TITUS
Svan Prose Texts III (Lentekh)
Part No. 230
Previous part

Text: 230 
Page of edition: 271 
Line of edition: 6 
CCXXX. რეგვენილ ი ჭკვია̈ნილ


Line of edition: 7       ლჷმა̈რდელიხ რეგვენილ ი ჭკვია̈ნილ. ა ჭკვია̈ნილს ხა̈'ენა დადა.
Line of edition: 8    ეშხუნ ა̈მეჩედელი ჭკვია̈ნილ კრებახო ი რეგვენილა̈შდ ასომახალა,
Line of edition: 9    ერე "დაჴა̈რ ლოქუ ადაჲას". ათხოჲა. გაცხად, რეგვენილს დაჴა̈რ
Line of edition: 10    ლალდაღხო. ჟ'ა̈მეჩედელი ვიცხხოჟი ი ხოქვა დაჴა̈რეშდ. ერე "ნომა
Line of edition: 11    ლოქუ ლახემედ ალ ვიცხ, მი ლოქ ერ ანშვდეხვი, ედო (\ ოდო)
Line of edition: 12    ჩუ ლოქ ე{რ} ანჴვედენიხვი, ჩიჲს თხუმა̈რს ჟი ლოქ ჯაჭკრულე".

Line of edition: 13       ჟ'ა̈მეჩედელი, გაცხად, ვიცხხოჟი ი შიდე. იზვებხ დაჴა̈რ. ეშხუ
Line of edition: 14    დაჴჷლს მუჭჟი ასაცეჷა ვიცხ. ჩვენ ა̈მეჴედელი რეგვენილ ძირხო,
Line of edition: 15    ლახასკიდნა ი დესა ა̈რი ვიცხ. ასოწვენა ეშხუ დაჴჷლ ი მუჭჟი ხა̈ცე'ა
Line of edition: 16    ეშხუ ვიცხ. ასარა რეგვენილ ალ დაჴა̈რს ი ჟ'ახოჭკურიელა
Line of edition: 17    ჩემიშდ კინჩხა̈რ ი ალ დაჴჷლიშდ მა̈დ ახოჭკორა კინჩხ. ა̈მეჩედელი
Line of edition: 18    ა̈გხო რეგვენილ. ლახაჭვედნა ჭკვია̈ნილ რეგვენილს: "მა ლოქ ა
Line of edition: 19    თო'ერა დაჴა̈რდ?"

Line of edition: 20       ეჩქა ქა ხოქვა რეგვენილს, ერე "ვიცხ ლოქ ლახომახ მიჩა ნა̈შიდ".
Line of edition: 21    ჭკვია̈ნილს ხოქვა რეგვენილა̈შდ: "სკა ლოქ ა̈ნმაჯახ ეჲ დაჴა̈რ ი
Line of edition: 22    ლანხვბა̈რს ეში ლოქ ა̈წინეხ".

Line of edition: 23       ა̈მეჩედელიხ ჲერქედა დაჴა̈რე ლა̈ჴდად. რეგვენილს ერ ვოხვიშტ
Line of edition: 24    ახაღვენა, ეჩქა ჭკვია̈ნილს ეშხუ ახაღვენა. სკახომაჯახ ალ დაჴა̈რ
Line of edition: 25    მა̈გ ი ათოუზა ჭკვია̈ნილს რეგვენილ ლანხვბა̈რე ლა̈ჴდად ი ხოქვა
Line of edition: 26    ლანხვბა̈რეშდ": "ნა̈რ ლოქუ ანჴეხ ბაზი, ედო ჩუ ლოქ ადგა̈რი ჩიჲს".

Line of edition: 27       ა̈მეტეხელი ა̈გხო რეგვენილ, ხოქვა ჭკვია̈ნილს: "მა ლოქ ხო'ერა
Line of edition: 28    ლანხვბა̈რეშდ".

Line of edition: 29       რეგვენილს ხოქვ', ერე "ანჴედენიხ ლოქ ბაზი".

Line of edition: 30       ლახადახ ხვა̈ჲ ხა̈ნ ი დეს' ანჴადხ ლანხვბა̈რ. აჩად ჭკვია̈ნილ ი
Line of edition: 31    ხა̈ქვ ლანხვბა̈რს: -- ინა̈რ ლოქ მა̈დ ა̈მეჴედელიხ ბაზი მინეშხო?

Line of edition: 32       ეჩქა ქა ხოქვახ ლანხვბა̈რს, იმა̈ჲჟი ხოქვა რეგვენილს მინეშვდ.
Line of edition: 33    ა̈მვჴედელიხ ეჲ ლეთ ლანხვბა̈რ მინეშხო ი ხოჩამდ ასახვიახ ალმინს.

Line of edition: 34       მერბა ლა̈დეღ აჲაღ ჭკვია̈ნილ კრებახო ა̈მეჩედელი. ასომახალა
Line of edition: 35    რეგვენილა̈შდ: "მიჩა დადა ჩუ ლოქუ ადაბარალე ლჷჯეჲსა!"

Line of edition: 36       ჟ'ახოფინა, გაცხად, ლჷჯე რეგვენილს. ხოჩამდ ერ ჟ'ალკვარჩხა̈ლელი,
Line of edition: 37    ეჩქა სკათოკვარა ლჷჯევშ გვეში ხვადხოჲსა ალ ზურალ.
Page of edition: 272  Line of edition: 1    ეჩეჲსა ფექ ათოშიდა ი ჟ'ახოს'ა ქაქდ. ა̈მეჴედელი ჭკვია̈ნილ კრებახენ:
Line of edition: 2    -- მა ლოქ ათო'ერა მიჩა დადად?
Line of edition: 3       -- მა ლოქ ი ცხვადისა ლოქ ა̈რი.

Line of edition: 4       ქა̈მეჩედელი ჭკვია̈ნილ ი ათოსინჯავა ცხვადისა ზურალ ი ჯიჯვა̈რ
Line of edition: 5    გარ ახახეია.

Line of edition: 6       აჲსამეზრახ ღერბეთდ!


Line of edition: 7 
საშა ლიპარტელიანი. ხოფირი. მ. ქალდანი. 17.IX.1957 წ.



Next part


This text is part of the TITUS edition of Svan Prose Texts III (Lentekh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.