TITUS
Svan Prose Texts III (Lentekh)
Part No. 238
Previous part

Text: 238 
Page of edition: 285 
Line of edition: 16 
CCXXXVIII. მავრენე მუხვბოლა̈ ლიმარბგ


Line of edition: 17       ლჷმა̈რდელიხ სემი ლახვბა. მავრენე ლჷმა̈რ ბჷლანჩაროლ. ლახვბას
Line of edition: 18    ხოქვახ, ერე: -- აჩეხ ლოქ ლათხუარხო თვითოლობჟი ი ხედვა̈ჲ
Line of edition: 19    ხოჩილ ლოქ ნათხუარეს ანჴდეხ?

Line of edition: 20       ა̈მეჩედ ხოშა მუხვბე. თელდ სვიკვა̈რ ჩვათოზნა ი მა̈დმამოშ
Line of edition: 21    ათოდაგარა ი ა̈მეჴედ ცა̈რიელდ ა̈გხო. ეჩანღო მანესკჷრე მუხვბე
Line of edition: 22    ა̈მეჩედ ლათხუარხო. ეჲს ლა̈ჲ ხვა̈ჲ სვიკვა̈რ ათოზნა ი გვია̈ნდს
Line of edition: 23    ხა̈წედა ეშხუ ღვაშს ი ჩვასოცჩა ი ყალია̈ნ ხა̈ვენა ჴარჴისა ი ეჲ
Line of edition: 24    ჩვასოდა მიჩა ლესკხენ ი ახოთოფა ი მა̈ჩ ხო'ირა ი ჩუბავ ახობინა
Line of edition: 25    მიჩა̈შხო ლიზი ღვაშს. ალეს ცა (\ დესა) ხა̈სკიდნენა ი ქვინ ხო'ირა
Line of edition: 26    მარემიშ ი ჟიბავ ასოჭონა. გვის მა̈დ ლახოტამა ი აჲაღ ახოფიშტვა
Line of edition: 27    თვეფ ი ღვაშს ხა̈ჲეხა ლესკა̈რქა ი ეჩელექვა კოჯ ლჷმა̈რ,
Line of edition: 28    ღვაშ ჩვა̈მეშყედ ეჩელექვა. მეთხუა̈რ კოჯ ლექვა დეშ ალმა̈ზ ი
Line of edition: 29    მოსა̈რებს ა̈მეჩედ ი ჩვიბ ხა̈თხელნინა. ქასობორა მა̈გ ეჩექა, მარე მა̈ჩ
Line of edition: 30    ახოთხა. ახობინა სერ ა̈გხო ლიზი ი ა̈რიელდ ა̈მეჴედ.
Line of edition: 31       -- ხორვა მუხვბოლ ჲედურ იმჟი ლოქ ანჴდე ნათხუარეს, მინს
Line of edition: 32    ლოქ მა̈ჩ ახოჴიდახ.

Line of edition: 33       ეში ა̈მეჩედ ალ ხორვა მუხვბოლ. ასხრი, ასხრი ი ეშხუ ლეგვერისა
Line of edition: 34    ხოჩა ზურელა̈ლ ლჷმა̈რდხ. ეჲმინს ხა̈'ენახ ვოქვრე ქათალა̈ლ
Line of edition: 35    ი ვოქვრე ღალა̈ლ ხა̈ვენახ. ხორვა მუხვბოლს ფა̈ტვ ხა̈ვენა ჯიბა̈ჲსა
Line of edition: 36    ი ზურელა̈ლს ხოქვახ: -- დეშ ლოქ ფა̈ტვს ასოშიდეუ ქათალა̈ლს?

Page of edition: 286 
Line of edition: 1       ალეს ჩვასოშიდა ი ეშხუ ქათალ ჟ'ახორმა ი ქათო'ვიჩა ღა̈ლე
Line of edition: 2    ი სკასოდა ჯიბა̈ჲსა. კეტოლ ქა ხა̈თერნინა ღა̈ლე. ხორვა მუხვბოლს
Line of edition: 3    რა̈შვ ხა'ენა. რა̈შვს ხოქვა ალ ხორვა მუხვბოლა̈შვ: -- ნომ ლოქ იდესკ
Line of edition: 4    (\ იდეს) ჯიბა̈ჲსა, ნომ ლოქ ხა̈წვენე ხოშა ლახვბას, ედო ხოლამდ
Line of edition: 5    ლოქ ხოსყეიხ გვეშს.

Line of edition: 6       ეში მა̈ (\ მა̈დ) ახოჟომა ი ჯიბა̈ჲსა ხა̈ვენა ი ა̈მეჩედ ა̈გხო ი ალ
Line of edition: 7    ლახვბა ინაქვა̈ლხ ი ალმინს ხოქვახ, ერე: -- ალე ნათხუარეს ლა̈ჲ
Line of edition: 8    ლოქ ჴიდე.

Line of edition: 9       ა̈მეჩედ ხორვა მუხვბე ლა̈თხუარხო ი რა̈შვჟი ჟი ლახასკურა.
Line of edition: 10    ლალსკიდნელი ი ქა ხა̈წედა ჲერსკნს ი ახოთოფა ი ხო'ირა ლაშტმჷლდიჲსა.
Line of edition: 11    ალ ჲერსკნ ქალკაფელი ი ჩვათოტუფურა, ჟ'ასოლაჯა
Line of edition: 12    ჲერსკნ რა̈შვჟი. ალე ანღრი ათხე სერ. ლალსკიდნელი ი ხა̈წედა
Line of edition: 13    ღვაშს ი იდიარა̈ლ ალ ღვაშ ესრენიშ. ახოთოფა ამშა̈შე ლა̈ჲდი ი
Line of edition: 14    ხო'ირა ი მერბან ლა̈ჲ ხო'ირა ი ალე ლა̈ჲდი ჩვალდაგა̈რ. ჩვათოტუფურა
Line of edition: 15    ი ჟი ლახოცომა რა̈შვიშვ ი ა̈მეჴედ ა̈გხო. ალ ლახვბა ინაბაჟა̈ლხ
Line of edition: 16    ი ხოლა კვიჭ ხარხ მეჴედე ალ ხორვა მუხვბოლა̈შვხო. ალ
Line of edition: 17    ხოშა ლახვბალს ქახოკვარახ ხორვა მუხვბოლ. ა̈მეჩედ ხორვა
Line of edition: 18    მუხვბოლ რა̈შვშ ქორა̈ ლა̈თხელიხო. ჟი ლახადა ეშხუ სემი ლახვბა
Line of edition: 19    დაუა̈რე ქორს. ქა̈მეჴედ ჩიქე დაუა̈რე ხოშა მუხვბე. სკა ლახაბორგა
Line of edition: 20    ალეს ი და̈ვ ა̈ფშტვე ათხე ხორვა მუხვბეს, ამ დვრეს ა̈მეჴედ
Line of edition: 21    რა̈შვ, აკვატ ხო'ირა და̈ვიშვ ი ჩვათოდაგარა. სერ ჲერბი ლახვბა
Line of edition: 22    დაუა̈რს სკახაფურთინა ალე ი ჟ'ახოსრიმა. ალ დაუა̈რ ქათოშიდა
Line of edition: 23    ქა̈მხო ი ა̈მეჩედ ალე რა̈შვშ ჲეხვი ლაცხვა̈პიდ ი ეშხუ ქორს
Line of edition: 24    ხოჩა დენა ლჷმა̈რდ ი ჟი ლახოსკურა ეჲ შიშტ რა̈შვჟი ი ახოჲა
Line of edition: 25    ალ ქორხო. ამეიხა აჲახ სკასახვია ეშხუ და̈ვ. ა̈მეჩედ ხორვა მუხვბე,
Line of edition: 26    დაშნა̈ვშ ქათოქვიცა თხვიმ. ეჲ ლა̈ჲ ქათოკვარა ქა̈მხო ი ეჲ ქორისა
Line of edition: 27    მოუწყვიათ მა̈გრიგ ი უცხოვრებიათ ეჩეჲსა ხოჩამდ.


Line of edition: 28 
გიგლა ქურასბედიანი. ნანარი. მ. ქალდანი. 20.IX.1958 წ.



Next part


This text is part of the TITUS edition of Svan Prose Texts III (Lentekh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.