TITUS
Svan Prose Texts III (Lentekh)
Part No. 239
Previous part

Text: 239 
Page of edition: 286 
Line of edition: 29 
CCXXXIX. მენახშირეჲ გეზალ


Line of edition: 30       ლჷმა̈რდელი ეშხუ ბატვენ ი ა̈მეჩედელი ლათხუარხო. ცხეკისა
Line of edition: 31    ლჷმა̈გენლი მენახშირეჲ ქორ. ბატვრს ჟ'ასალეთა ი ა̈მეჩედელი
Line of edition: 32    მენახშირეჲშხო. მენახშირეჲშვ ხოქვა: -- ავე ლოქ ჩვადაგენი.

Line of edition: 33       ეჲმინს ხა̈'ენახ ეშხო გეზალჭყინტ, ჭყინტეშვ ხოქვა ბატვენს,
Line of edition: 34    ერე: -- ავე ლოქ ლიცს ახოჴიდე.

Line of edition: 35       ჭყინტ ა̈მეჩედ ლიცხო ი ქახაჭემა ბატვენ. ჭყინტ ბოგქა ალსჷმა̈ზლი
Line of edition: 36    ი ლახოჯილკა ბატვენს ი ლიცხოჲსკა ა̈მეშყედ. ვოდ ი ვოდ
Line of edition: 37    ასაყენა ლიცს. ლეგვერა̈ლ ლჷმა̈გენლიხ ხვა̈ჲ ი ეჩეჩუ ლჷმა̈რდელიხ
Page of edition: 287  Line of edition: 1    მარალ. ბეფშ ღა̈რხოჲსკა ათანკელა. ჟ'ახოკიდახ მჷლეგვვრალა̈ლს.
Line of edition: 2    ეჲმინს ათოუზახ ვოქვრე ბაბა̈ჲ ფათუა̈რე ლა̈ყვფახო. ა̈მეჩედელი
Line of edition: 3    ჭყინტ. ალსჷმა̈ზლი ი ლახახვია მენა̈ვე. მენა̈ვეს ხოქვა: -- იმოხ ლოქ
Line of edition: 4    ა̈სხრი?

Line of edition: 5       ჭყინტს ხოქვა, ერე: -- ვოქვრე ბაბა̈ჲ ფათუა̈რე ლა̈ყვფუახო ლოქ
Line of edition: 6    ასხრი ი ქა ლოქუ ადაჲას ნა̈ვშვ ეჩეხენხო.

Line of edition: 7       მენა̈ვეს ხოქვა: -- მიჩა გვეშ ჟი ლოქუ ახოკვიალე.

Line of edition: 8       ქათხოჲა ლჷც ეჩეხენხო ი ალსჷმა̈ზლი სერ ჭყინტ. აჲაღ ლახახვია
Line of edition: 9    მარე. ეჲს ხოქვ', ერე: -- სემი ზა̈ ლოქ ლი სერ, ბინილი ლიც
Line of edition: 10    ჩუ ლოქ ალშუშელი ი ეჯის ლოქ ავე ჟ'ახოკვია̈ლი.

Line of edition: 11       ჭყინტს ხოქვა: -- ადვ ლოქ.

Line of edition: 12       სერ სკა̈მეჩედელი ჭყინტ ვოქვრე ბაბა̈ჲ ქორხო. ეჩეჩუნ ხა̈ყენა
Line of edition: 13    ჭყინტს პა̈პი. ჭყინტს ხოქვა, ერე: "ავე ლოქ ვოქვრე ბაბა̈ჲ
Line of edition: 14    ფათუა̈რე ლიყვფეს ათანები".
Line of edition: 15       -- ჟი ლოქუ ახაყვიფ. -- ი ჟ'ახოყვიფა ჭყინტს ვოქვრე ბაბა̈ჲ
Line of edition: 16    ფათუა̈რ.

Line of edition: 17       ჭყინტს ხოქვა მიჩა პა̈პიჲშვ, ერე: -- მენა̈ვეს ლოქ ი ეშხუ მარეს
Line of edition: 18    ამახალახ ალ ი ალ გვეშ, ქა ლოქუ ხა̈ქვ ამშა პასვიხვ.

Line of edition: 19       მიჩა პა̈პის ქა ხოქვა ამშა პასვიხვ. ჭყინტს ქასობინა ლიზი. ახალაკა
Line of edition: 20    მენა̈ვეს. მენა̈ვეიშვ ლოქ ხოქვა, ერე: -- მიჩა პა̈პის ლოქ ასომახალა
Line of edition: 21    ამჟი, ერე არ ლოქ ანჴეს მიჩაშხო. სკა როქუ ასასკურე ნა̈ვისკა
Line of edition: 22    ი ეჲს ლოქუ ხექეს, ერე: "ჲერვალე ლოქ ხატული. ქა ლოქუ
Line of edition: 23    აჩად ქამხო ი აჩა̈დ ლოქუ მიჩა ბინახო". ეჩქა ეჩის ლოქ ასესედენი ნა̈ვ.

Line of edition: 24       ჭყინტ ჩვათოჯილდოვა მენა̈ვეს ვოქვრა̈ლშვ ი სერ ა̈მეჩედელი
Line of edition: 25    ი ქათალაკა ბინილი პატვრენს ი ხა̈ქვ: -- ამჟი ლოქ ასომახალა მიჩა
Line of edition: 26    პაპის, ერე ეჩეჲსკა ლოქ ხა̈ნკელა ბაყა̈ყ. ეშხუ მეტრ ჟი ლოქუ ანშთხა̈რ
Line of edition: 27    ი ჟი ლოქუ ანაკვა̈რ ბაყა̈ყ. ეჩქა ქა ლოქ ანღინე ლიც. -- ეჲს
Line of edition: 28    ლა̈ჲ ჩვათოჯილდოვა ვოქვრა̈ლშვ ი ვოქვრე ჩა̈ჟშვ. ა̈მეჴედელი
Line of edition: 29    მჷლეგვერალა̈ლხო. ეჲმინს ხა̈რჴენახ ეშხუ ღვაჟმარე ი ლახახარბა
Line of edition: 30    ღვაჟმარეს. "ჯე ლოქ ლა̈ჲდი ღჷრი"!

Line of edition: 31       ა̈მეჩედელი ღვაჟმარე ი ეჲ ნა̈ვ ეჲს ასასელა.


Line of edition: 32 
დარეჯან ქურასბედიანი. ნანარი. მ. ქალდანი. 18.IX.1958 წ.



Next part


This text is part of the TITUS edition of Svan Prose Texts III (Lentekh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.