TITUS
Svan Prose Texts III (Lentekh)
Part No. 240
Previous part

Text: 240 
Page of edition: 287 
Line of edition: 33 
CCXXXX. მეთხვა̈რ ი მიჩა ჲეხვ


Line of edition: 34       ლჷმა̈რდელი ეშხუ მეთხვა̈რ. ეჲს ხა̈'ენა ხვა̈ჲ ლახვბა. ეჲ მეთხვა̈რს
Line of edition: 35    ხალატენა ეშხუ ხოჩა დენა. ესრენიშ ეჲ დენა დაუა̈რს ლა̈ჲ
Line of edition: 36    ხალატენახ. ეჲ დენა დეცხენჩუ ალმა̈ზლი ძინა̈რ-ძინა̈რს, ჲეს-ჲესინ
Line of edition: 37    დაუა̈რიშხო, ჲეს-ჲესინ მეთხვა̈რიშხო. ეშხუნ ა̈მეჴედ მეთხვა̈რიშხო
Line of edition: 38    ი ეჲს მა̈დ ათოფიშტვა ქა. ეჲ დვრეს ლალსკიდნელი იხა̈წედა ხვა̈ჲ
Page of edition: 288  Line of edition: 1    დაუა̈რს, ალმა̈ზლიხ მიჩა̈შხო. მეთხვა̈რს რა̈შვ ხა̈ყენა ი მაჩა ლახვბა
Line of edition: 2    ჩვა̈მეჩედხ ი ეჩეჩუ ახობინახ ლიშია̈ლ ი დაუა̈რს ეჲმინ ჟ'ახოხვიტახ.
Line of edition: 3    ალ დენას ფერიფერს ასაცადა. ეჩანღო ჩვა̈მეჩედ მეთხვა̈რ ი ლახობინა
Line of edition: 4    ლიშია̈ლ ი ვოდ ი ვოდ ლჷმა̈შია̈ლლი, ეჩანღო ჩვათა'ვეჩა ხმა̈ლ.
Line of edition: 5    ა̈მეჩედ რა̈შვ ჩუ. მიჩა აკვატშვ მა̈გ ჟ'ახოსრიმა. ეშხუ და̈ულდ ათასედა
Line of edition: 6    დჷქა̈ჩ ი ალ მვთხვა̈რს ლიც ახაფუნა. ა̈მეჴედ ეჲ და̈ულდ ი ზურალა̈
Line of edition: 7    კაბ ლახოქვემა, სტამნჷლ ტვეტისა ხა̈ვენა. მეთხვა̈რს ხოქვა:
Line of edition: 8       -- ამეჲსა ლიც ლოქ ხუვა ჷ?
Line of edition: 9       -- ვო, ლიც ლოქ ხუვა ამეჲსა.

Line of edition: 10       მარე ეჲ ბა̈ნგ ლჷმა̈რ. ქა ლახოვოდა მეთხვა̈რიშვ ი ჩუ ლახოშვა̈
Line of edition: 11    მეთხვა̈რს ი მეთხვა̈რ ჩვალბანგა̈ველი. ა̈მეჴედ ეჩექა მიჩა ჲეხვ ი ეჲს
Line of edition: 12    ეჲკა̈ლი ხა̈ცვემენა ფხულეჟი, ერე ეჲს ერე ლახათხეპნა აბაყაქა, ჟი
Line of edition: 13    ლჷმა̈ლვაროლლი. დენას ქასოთხეპა ი ჟ'ალლუვა̈რელი მეთხვა̈რ.
Line of edition: 14    ეჩანღო ჲჷრბინ აჲახ ამჟი ხა̈'ერა მეთხვა̈რს. ვოდდო მეთვხა̈რ ხოჩამდ
Line of edition: 15    ჟ'ა̈ნხოჩავოლ, ეჩქად მიჩა ჲეხვ ა̈მეჩედლი ლათვაფხო. მვთხვა̈რ
Line of edition: 16    ერ ხოჩამდ ჟ'ალხოჩაველი, მიჩა რა̈შვჟი ჟი ლახასკურა ი ა̈მეჩედ
Line of edition: 17    ლახვხო. ჟ'ახოგა̈ჲღება, ერე მიჩა ჲეხვ ალ თანა̈ღს ეჩეხენჩუ ა̈მეჩედ.

Line of edition: 18       მიჩა ნა̈მწვინვი კოჯ ლჷმა̈რ. ეჩე ლეჲა დეშ ლჷმა̈ზლი ჯე. ეჲ
Line of edition: 19    კოჯისა ხა̈ვენა ლა̈ცინდოლა ა̈რწივს. რა̈შვს ხოქვა, ერე: -- ჯე ჩუ
Line of edition: 20    ლოქუ აბიჴვ ი მიჩა თხვიმ ქა ლოქ ახაქვიც ი ჩუ ლოქუ ასდე. ჯე
Line of edition: 21    სკა ლოქუ აჩად ჴა̈დხოჲსა.

Line of edition: 22       ალეს დემ ლჷმა̈ჩვემლი მეთხვა̈რ, მარე ეში მა ჲეკვეს ხოჩომნან
Line of edition: 23    ი ამჟი ხოჩომნა, გაცხა̈დ.

Line of edition: 24       ა̈მეჴედ ჩუ ა̈რწივ ი ჯე ჟ'ათხოჲა ლა̈ცინდოლახო. ჩვერ ა̈მეტეხ
Line of edition: 25    ა̈რწივ თხვიმხო, ეჩქა ეჲ მეთხვა̈რ ქა ლახაჩეშა ეჲ მიჩა ჲეხვს.
Line of edition: 26    ჟ'ახოთხა მიჩა ჲეხვ ი ეჩეჩუ უცხოვრებიათ ხოჩამდ.


Line of edition: 27 
გიგლა ქურასბედიანი. ნანარი. მ. ქალდანი. 15.IX.1958 წ.



Next part


This text is part of the TITUS edition of Svan Prose Texts III (Lentekh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.