TITUS
Svan Prose Texts IV (Lashkh)
Part No. 2
Previous part

Text: 2 
Page of edition: 10 
Line of edition: 18 
II. ლინწილა̄ლ


Line of edition: 19       მელღვაჟა̄ლ ზურა̄ლ ერ ხეყე̄ნიხ ქორს, ეჩის აყვნეხ ჩუ სგირიჟი,
Line of edition: 20    ძირს ხორშიხ ჭემს ი ეჩეჟი ნაბადს ჲედ ფარდაგს ხორშიხ;
Line of edition: 21    დარბზი დი̄რს ხაბემხ ჯო̄დი თეკვს მელღვაჟა̄ლ ზურა̄ლა შიე ლაგდურდ.
Line of edition: 22    ერ ითმა̄რჲელ მელღვაჟა̄ლ ზურა̄ლ, ეჩქა ხეგდურნი სგა ალ თეკვს
Line of edition: 23    ი ჲეს ლიგნა̄ლს ხაკვი̄, ჲეს -- ლიყვნა̄ლს, ჲეს თხუმხენ გარ იკჩი ი
Line of edition: 24    ამჩიქა ალ თეკვს მე̄ვარ ღალ იმჷრგი̄ნე ლათმა̄რჲელჟი; მაშედ მჷრ
Line of edition: 25    მჷრა̄მშა ზაბჟახ ალ თეკვ ი ამღა ხო̄ბხ ეჩაცახან. ჲეს კი̄ლი მე̄ლღვაჟა̄ლ
Line of edition: 26    ზურა̄ლ ვო̄ბა ხანს. ამჩიქა ხაყახ ლჷჴი̄დ გადო ზურა̄ლ, მე̄ვარ
Line of edition: 27    ნარდვ ლალღვაჟა̄ლჟი ზურალე̄ლცახან ი ამშა ამა̄რას ხამურჯიხ მელღვ
Line of edition: 28    აჟა̄ლია ლიშედს. შომასი̄ დო ი̄რი, ჩუ ერ ილღვაჟი ზურა̄ლ, ქა ხერა̄გი
Line of edition: 29    წვირჟი ლაყვრაჟი თოჲნუნ. ლილღვაჟა̄ლს ხაყლეხ წვირჟი ლიყვრეს.
Line of edition: 30    ჲესინ უსგვა ნაგზათექა ღო̄თ აყვრეხ. მახა ლჷღვაჟს შიშდ
Line of edition: 31    ტანს ხაბრა̄ლიხ ტებდი ლიცვშ ი მახა. ნათავ ბობშსა̄ ჩი ლადეღ
Line of edition: 32    აბრა̄ლიხ ტებდი ლიცისა, ვოდ ერე ზაჲნუნ. მახა ნალღვაჟს შიშდ
Line of edition: 33    ხაბშეხ კოტო̄ლ ლეზობი̄ლს ი ამჟი აყვრე, ვოდ თოჲნუნ. ამის ხა̄ჲშხა
Line of edition: 34    წვირჟი ლიყვრე. მელღვაჟ ზურა̄ლა ლარდა ქორ მე̄ვარ ურწყულ ხაბჟა

Page of edition: 11 
Line of edition: 1       ჟა ჩი̄ს მა̄რპს ი და̄რ ხეთლენი ნამჲარათე. დე ლიმზჷრ-ლიჴჷ̄რა̄ლს

Line of edition: 2       ხაყა ალ ქორისა ი დე ლათხვიართე მოშერ ღჷრი ალ ქორხენქა,
Line of edition: 3    ვოდ ალ წვირჟი მეყვრე ზურა̄ლ დო ენნაწლი. ლინწილა̄ლ გვია̄ნდ
Line of edition: 4    ლი წეს ნალღვაჟჷნღო. მენწილა̄ლ ზურა̄ლს ხონჴრი ლანწილა̄ლთე
Line of edition: 5    ლა̄ზჟი ჲედ მიჩა გადო ი ჲედ იშგენ ქორა ზურა̄ლ ჲერვა̄ლე ი ღჷ̄რდახ
Line of edition: 6    ბაპთე. ბაპ ჩუ ხაჩქოვა̄ლვნა ალ მენწილა̄ლ ზურა̄ლს ი ვოლარს
Line of edition: 7    თხუმჟი ხაფინა ი ხოჭვდა̄ნა მჷრა̄მ ქაღალდს ჯვინელ ლაირხენქა.
Line of edition: 8    ბაპხენქა მენწილა̄ლ ზურა̄ლ ღჷ̄რდა მეწვინდ ეჯ საყდრი ყო̄რთეჟი, მა̄ჲ
Line of edition: 9    საყდარ მინე სოფელისა იგნო̄ლ ი საყდარი ყო̄რს ლუშვა მუტვარს
Line of edition: 10    ლოხტვარნა, კოჭო̄ლ საკმეველს ლოხტუ̄სნა, საკმეველი მჷქაფ ჯვიდი
Line of edition: 11    ნაფიცხუ̄ლარსი̄ ჩუ ხაყახ ლეტუ̄სად, ჲურინ-სუმინ უსტა̄რუნს ესი̄რნა,
Line of edition: 12    ეშხვს ყო̄რმჷყ ჟენგენო̄ლ, საყდრი ყო̄რს ეშხვინ ქა ლეხყაჲო̄ლ ი ამანღო
Line of edition: 13    ანღინა მიჩა აგითე მიჩა მჷნჴრი ზურა̄ლცახან ეშხუდ. საყდრი
Line of edition: 14    ყო̄რთე ლა̄ზჟი აგიხენ ნაჲეს კოჭო̄ლ ტაბლე̄ლარი̄ შიდ ხუღვახ ი ჟი
Line of edition: 15    ხამზჷრიხ საყდრი ყორმჷყ აგიხენ ნაჲეს ტაბლე̄ლარს, სერ ალე მაგ
Line of edition: 16    გვეში ლჷჩმი̄ნან მენწილა̄ლ ზურა̄ლ ჟი ლჷნწილე ლი. ამანღო
Line of edition: 17    ნაურწყული მა̄ ხორიკ დე ალ ზურა̄ლს ი დე მიჩა ქორს ი ლარდას. ზურა̄ლ
Line of edition: 18    ლახ ჟენნაწლა̄ნ, სერ ალ ზურა̄ლა ლარდა ქორ წყჷლჲან ლი. ლამზჷრთე
Line of edition: 19    ი ლათხვიართე ლი̄ზისი̄ ჩუ ხაყა ალ ქორხენქა ი იშგენ გვეშარე
Line of edition: 20    ლიშდაბსი̄.

Line of edition: 21       ამჟი ლას ზურა̄ლა ლინწილა̄ლ ნალღვაჟა̄ლჷნღო.


არდევან ონიანი. სასაში. მ. ქალდანი. 20. IX. 1971



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.