TITUS
Svan Prose Texts IV (Lashkh)
Part No. 45
Previous part

Text: 45 
Page of edition: 60 
Line of edition: 12 
XLV. ნასყიდაჲ მუყვბანია̄ნ


Line of edition: 13       ნასყიდაჲ იზგა ჴოფურს, ხეყე̄და იშგვიდ ჷეზალ, მაგ ლჷჲეხვლჷგზელ,
Line of edition: 14    ლას ჩა̄რკვია̄ნა გლეხ. იშგენ გლეხარ ხაყლახ ჩა̄რკვია̄ნს:
Line of edition: 15       -- ნასყიდაჲ ი მიჩა ჲეხვ ი გეზალ ჟი̄ვ ანხვიტ ი ეჯჲარე
Line of edition: 16    ქონება ი დაბ-ლა̄რე მინსუ ოთრიგვე.

Line of edition: 17       ვოშელდინი̄ აჩად ჩა̄რკვია̄ნ მიჩა გლეხარშვ ნასყიდა̄ჲ ლადგართე,
Line of edition: 18    ეჩშელდინ ლეხლაკა̄ნხ ნასყიდაჲს მიჩა ჲეხვეშ ი გეზლაცახან, ჩუ
Line of edition: 19    სგურ, ჩუ ხოყდა̄ნა ჩა̄რკვია̄ნა კახთ ი იმზგრა̄ლ:
Line of edition: 20       -- ღე̄რბეთ, ფუსნ ლოქუ ოთმეზრე ი ოთდიდრე ჩუ.

Line of edition: 21       სერ ჩა̄რკვია̄ნდ დეშ ანხვიტ ალჲარ.

Line of edition: 22       ეშხუ ლადეღ ნასყიდაჲ მეჩდე ლას ლათხვიართე, აგითე ლიჴედ
Line of edition: 23    ჩვეთგვიანა̄ნ, ამჩიქა ანჴადხ ჩა̄რკვია̄ნ ი მიჩა ხალხ, სგო̄თშგაბხ ქორთე
Line of edition: 24    ნასყიდა̄ჲ ჲეხვს ი გეზალს, იშგვიდ მახე-ღვაჟ მინე ლჷჲეხვ-ლჷგზელდ
Line of edition: 25    ჟანხვიტხ, ლუარ ნასყიდა̄ჲ ჲეხვგარ აცვირხ, იმჟვა̄ჲ ლენტხე̄ლე
Line of edition: 26    ასუშ. ალ ზურა̄ლს ჭაშ ლახგვნებჷ̄ნ: ე̄რ ლოქ ანჴდენი, დო̄ვ ლოქ
Line of edition: 27    ეჯი̄ჲ ჩუ ე̄სა ადგარხ. ოსო̄გა̄ნ ლახვე შუკვს, იმე̄ჲ დო ლას, სგა
Line of edition: 28    ლახხვი̄და მიჩა ჭაშს. ნასყიდაჲს ჟახყალუ̄ნდა, ზურა̄ლს ე̄რ ხეწად
Line of edition: 29    ლეთშვ ამკალიბ აგის. ქე̄სწა̄ნე თოფ, ჟესხელე:
Line of edition: 30       -- ჲარ ლოქ ლი ჯეჲ?
Line of edition: 31       -- ჯეჲ ლოქ მიჩა ჲეხვ ლი.

Line of edition: 32       ნახთვიარე ჩვენკიდ შიყხენჩუ ი ლეხჭოდდა:
Line of edition: 33       -- მაჲ ლოქ ხაკვდა ამხა̄ვ?
Line of edition: 34       -- მინე გეზლი̄რ მაგ ლოქ ჟოხხვი̄ტახ ჩა̄რკვია̄ნს ი მიჩა ხალხს.
Line of edition: 35    სოფელთე ლოქ ნომა̄ვ ანჴად, ედო მიჩი̄ ლოქ ჩიადგარიხ.

Page of edition: 61 
Line of edition: 1       ნასყიდაჲ ემჴედ, ჩოთკარა საყდარ, ჟოხკი̄და მუტვარ ი თა̄რიძელი
Line of edition: 2    ხატ ი ათჴჷ̄რენა:
Line of edition: 3       -- ე, თა̄რიძელ, შუკვ ლოქუ ხათო̄ნე, ალ მუტვარ ლოქ ნომა̄ვ
Line of edition: 4    ოთდიგ, ვოდ ლოქ მიჩა ლიჩრავის მო̄ ხეყე̄დეს.

Line of edition: 5       ოხბინახ ლი̄ზი; სგე̄მჴედხ ჭველჲერთეჲსა ი მუტვარი̄ ჩვათდეგახ.
Line of edition: 6    მე̄რმა ლადეღ ამეჩუ̄ მეზგე̄ლს ვარ ხო̄ქვახ:
Line of edition: 7       -- დემ ლოქ აზგა̄ლვნეხ მიჩ ამეჩუ.

Line of edition: 8       ნასყიდაჲს ჟოხგოშლა ქა̄ცი ვორშვ, ქე̄მჩედ ლატლითე, ქო̄თჲა
Line of edition: 9    ალე იმჟვა̄ჲ ლაჴჷრ. ლატლარ ქა̄ხჷნჴერნე̄ნახ ი ჩო̄ლარეშვდ ხო̄ქვახ:
Line of edition: 10       -- ალ მა̄რას ლოქ ფხულე ნო̄სავ ლახფედეხ, იმე̄ჲ ხეკვეს,
Line of edition: 11    ეშჩუ̄ვ ლოქ ათნებეხ ლიზგა̄ლ, მო̄დე̄ჲ ქა ლოქ ე̄რ ანჴდენიხ, მინს ლოქ
Line of edition: 12    ჟანხვტეხ ჩა̄ს.

Line of edition: 13       ნასყიდაჲს საყდარ ჩოთგა, ხატ სგა ლოხსგოჯნა ი ჟოხბინა ამეჩუ
Line of edition: 14    ლიზგა̄ლ. მუყბანია̄ნარ სერ ლადინუნ ჩო̄ლურს არიხ.


გრიგოლ დონღვანი. ჩიხარეში. ა. ონიანი. 9. VIII. 1957



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.