TITUS
Svan Prose Texts IV (Lashkh)
Part No. 60
Previous part

Text: 60 
Page of edition: 72 
Line of edition: 15 
LX. მეთხვიარ ხაჯი


Line of edition: 16       ლჷმარდე̄ლი უშხუ მეთხვიარ ი ხა̄ჲშხე̄ნა ხაჯი. ხაჯი ჩიგირ ხვა̄ჲს
Line of edition: 17    ლჷმდაგრინ. ეშხუ ლადეღ დე̄სამა ოთდაგრა. დემოშ მე̄რმე ლადეღ.
Line of edition: 18    მესმე ლადეღ ჩოთდაგრა ნათხვიარო̄ლ. ჩოხრეკა ლატფუ̄რად.
Line of edition: 19    ხჷნსგანუნ ერ ჩოოტუფუ̄რა, ეჩქა ჩვემშყედ, ტუფ სგა ლეჲტიხ ი
Line of edition: 20    ჩვედი̄ტვა̄ნ. ხაჯი ქე̄ხჭამ ლადგარდ. ნათხვიარო̄ლ სგა̄ჩად გამოქვაბულთე
Line of edition: 21    ი ხექვე: -- ალე ლოქ ე̄რ ხასკვრელ, მაჲ ლოქ ხასკვრელ,
Line of edition: 22    აჩად ლოქუ, ეშხუ მა̄რას ჴანიშდ ი წელიშდ ბერჟი უ̄ღვა ხო̄გ, ეჩაშთე.
Line of edition: 23    აჩად აგითე ი ეჩხენქა ესზელა̄ლე. სგა ლახხვი̄დახ მჷლდღა. ლეხჭოდდა:
Line of edition: 24    -- ამკაიბ ი ამკაიბ მა̄რე იმე ლოქ იზგე? ეჯჲარდ ხე̄ქვეხ:
Line of edition: 25    -- მიჩ ლოქ მჷლდღა ლეხხვიხ, ეჯჲარ ლოქ ხათო̄ნნეხ. სგა
Line of edition: 26    ლახხვი̄და, ქა ხათო̄ნეხ მესმე მჷლდეღთე შუკვ. აჩად ხაჯი
Line of edition: 27    ი ქა ხეწად ეჯი მა̄რეს. ხოჩა ლადეღ ხე̄ქვ. ეჯნე̄მდი̄ ლახტიხ
Line of edition: 28    ი ჩვაწჲე ხაჯი. ლეჲქეიფეხ. ხაჯიდ ხე̄ქვე: -- ჲაღო მიჩ ლათხვიარჟი̄ნენ
Line of edition: 29    ამჟინენ ლოქ ხაყრა. ნათხვიარეი̄ ჩოთჩად ი ტუთი̄ სგა
Line of edition: 30    ლეჲტიხ. ეჩქა ალ მა̄რედი̄ ენბინე ლი̄მბვი: ჲაღო მიჩი̄ ლოქ ამჟი ხაყრა:
Line of edition: 31    -- ეშხუ ლე̄თ მჷრა̄მდ ლამტუ̄ლე. ქო̄თსგი, მაჴიდ იმი̄ღენა̄მ
Line of edition: 32    მადრაჴ ი ჟემსიპე კვიცრად. ძინარს მაჴიდ ი ჟემსიპე მა̄რად. მე̄რმე
Line of edition: 33    ნებოზსი̄ აჯაღ მჷრა̄მდ ლამტუ̄ლე. ხანჯარი ლიყდა̄ნი ჩვემე̄შდჷ̄ნ.
Line of edition: 34    მაჴიდ ი ჟოსსიპენ თხე̄რად. ძინარს მაჴიდ ი ჟოსსიპენ მა̄რად. მესმე
Page of edition: 73  Line of edition: 1    ლე̄თი̄ ლამტუ̄ლე. ქო̄დე, ხანჯარ ჩოსყედა̄ნ. ერ ემქიო̄ლე, ხანჯარ
Line of edition: 2    ოსხვეჲ, ქო̄თაქვც ტოტ, სგო̄ნჴუ ქორთე, ქა ხვაწვე̄ნ ჲეხვს. ჲეხვემ
Line of edition: 3    მე̄ქვე: -- ქა ღენ მაწვე̄ნ! ქა ხაწვე̄ნე ი ჲეხვემ ხაჴიდ ჭაშს ი ჟესსიპა̄ნ
Line of edition: 4    ჟეღდ. იზელა̄ლ, ჩვედჷრმეხ მჷლდღად. ეჯჲარს ჩი ლე̄თ ხოთფენიხ
Line of edition: 5    დაჴჷლ. ეჯ ლე̄თ ჩვესბეხ. ეჯი ლე̄თ დე̄სამა ადჷრმეხ. მე̄რმე ლე̄თჟამფიშდვხ.
Line of edition: 6    თხე̄რე̄ლ სემი ჩვადშგუდე. ეჩანღო კე̄სარს ლახო̄მეხ.
Line of edition: 7    ეჯი ლათხვიართე ლი̄ზის ხამურჯი. აჩადხ, ჟეღი̄ ოთჴერდა. ჟეღ
Line of edition: 8    ხეწად ნახთვიარეს, ეთჭამ ი ნათხვიარე გამოქვაბულთე აჩად.
Line of edition: 9    ნათხვაირედ ხე̄ქვე: -- მი ჟეჲსიპნე მა̄რად ი სი ადე ი ისგვა ჲეხვს ი მუხვბას
Line of edition: 10    ხაჴ ალე მადრაჴ. აჩად ალე ი ხეჴჷ̄რა̄ლ: -- სგა̄ვ ლოქ ედხინეხ
Line of edition: 11    ქორთე. დე̄მ იხნეხ. ეჩქა ჟესსიპა̄ნ შდუგვდ ალე მა̄რე ი სგა̄ჩად ქორთე.
Line of edition: 12    ხაჴიდ ჲეხვს ი ჟესსიპა̄ნ წელდ. ხაჴიდ მუხვბას ი ჟესსიპა̄ნ ჴანდ.
Line of edition: 13    ი მიჯნე̄მ ქა იშგმინ მე̄რმე ჲეხვ. ალე მაგ ქო̄ხო̄მბვე ხაჯის ი ამჟი̄ნ ლოქ
Line of edition: 14    ხეყრენი ი გაცხაჲდ ამჟი̄ნ ხეყარ ი ხაჯიდ ქა იშგმინ მე̄რმე ჲეხვ ი
Line of edition: 15    იზგა̄ლდახ ბედნიერდ.


როლანდ ონიანი. სასაში. მ. ქალდანი. 14. IX. 1971



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.