TITUS
Svan Prose Texts IV (Lashkh)
Part No. 62
Previous part

Text: 62 
Page of edition: 74 
Line of edition: 19 
LXII. სიღარიბე ი სიმდიდრე


Line of edition: 20    ეშხუ ჲეხვ-ჭაშ ლჷმა̄რე̄ლიხ ძღჷდ მდიდარ, ჲერუ ბობშარ
Line of edition: 21    ხაყე̄ნახ -- ჭყინტარ, ხაღვე̄ნახ საკვთარ გემარ, დუქნარ ი იშგენ მაგ
Line of edition: 22    მასარდ. ღვაჟმა̄რას ეშხუ ლე̄თ ლეხი̄სნავა̄ნ, ერე ანჴად სიღარიბე ი
Line of edition: 23    ხე̄ქვ:
Line of edition: 24       -- ლიმახჟი ლოქ ხოცხა ერ ლეხმუშგვრე̄ნს, ა ლიმეჩჟი მინ
Line of edition: 25    ჲეხვ-ჭაშს?

Line of edition: 26       ალეს დე ლიმახჟი ხეწხო̄ლ ი დე ლიმეჩჟი, ცხაჲ, ი პასუხვ დეშ
Line of edition: 27    ლახტიხ. ჩვარი ალ მა̄რე ლჷწუხვავად, ქა დე̄სჲამ ტუ̄ლი. მე̄რმა ლე̄თ
Line of edition: 28    აჯაღ ლეხი̄სნავა̄ნ, აჯაღ დეშ ლახო̄მ პასუხვ.

Line of edition: 29       -- ჲაღო მჷხარ ლოქ ანტხენი აჯაღ, სიღარიბედ ხე̄ქვ, ი ეჩქა̄ჲ
Line of edition: 30    ლოქ ე დო̄ჲამ ხე̄ქვნე, ეჩქა მიჩ ლოქ ხოხალ.

Line of edition: 31       ალ მა̄რე ხოშა ენწუხვავა̄ნ, დე იზბი, დე ითრე. ხეჭვდჲელ მიჩა
Line of edition: 32    ჲეხვ:
Line of edition: 33       -- მაჲ ლოქ ხათჷმ, იმნარ ლოქ ლი ამჟი ლჷწუხვავე?
Line of edition: 34       -- ჲაღო ამჟი̄ამჟი ლოქ ლი მიჩა გვეშ, ქა ლოხკვაშ ჲეხვს.
Page of edition: 75 
Line of edition: 1       -- ჲაღო, ეშჲეში̄ ლოქ ე ჴედნი, ლიმახჟი̄ვ ლოქ ანჴად, ჲეხვემ
Line of edition: 2    ზე̄ქვ, ლიმეჩჟი ლოქ ე̄რ ანჴეს, ეჩქა დეშჲამ ლოქ ხოწახ თხუმს.

Line of edition: 3       მესმა ლე̄თ ე̄რ ლეხი̄სნავა̄ნ აჯაღ, ეჩქა ამნე̄მ ხე̄ქვ:
Line of edition: 4       -- ნავჴედას ლოქ ე დო̄მ იჩო, ლიმახჟი̄ვ ლოქ ანჴად ბარემს.

Line of edition: 5       ამჷნღო სერ ამკალიბ დე̄სამა ხაისნავე̄ნა.

Line of edition: 6       ეშხვუნღო ოხჴად ამბავ ალ მა̄რას, ერე მიჩა გემარ ლოქ
Line of edition: 7    ალდა̄ვშე̄ლიხ, მაღვე̄ნ ლოქ მაგ ძუღვა̄ჲსა ალქარვე̄ლი. ამღა მა̄მ ენწუხვავა̄ნ
Line of edition: 8    ალ მა̄რე, დუქნარ ხუღვა აჯაღ ი ხოჩა ქორალ ხო̄გ მაღვე̄ნშვ
Line of edition: 9    გოში. მე̄რმა ლადეღ დუქნარს ეხბიდდახ სგა ი თელდ მაღვე̄ნ სგა
Line of edition: 10    ლეხშიხა̄ნ. ეში̄ მა̄მა ანფაშ ალ მა̄რე: ხოჩა ქორალ ხო̄გ ი ეჩა იმედ
Line of edition: 11    ხა̄რ. მესმა ლე̄თ ეხბიდდა ამშა ქორალს ი მესმა სართულხენჩუ თეკვშვ
Line of edition: 12    ანფიშვდ მიჩა ჲეხვ ი გეზალ ლაცა̄დარე ამა̄რაჲს ი ჯეჲი̄ ამჟი თეკვშვ
Line of edition: 13    ანჴად ჩუ. სგა დე̄სამა ლეხსადხ ჲადურდ.

Line of edition: 14       ამჟი დიდარ ე̄რ ლას, ჩუ ლჷღრიბან ხოშგუ̄ნდა ეშჩუ ლირდე ი
Line of edition: 15    მე̄რმა ქვეყანათე აჩად, ჲეხვ ი გეზალი̄ ადჲე. ეშხუ ლადეღ ჩვარიხ
Line of edition: 16    სოფლი ფე̄დჲას, მეგემ ჩუქვა̄ნ. ბობშარს ე̄რ ახჷ̄ჲდჷ̄ნხ, აჩად ალ მა̄რე
Line of edition: 17    სოფელთე ლეზობი ლაშგომდ ი ალჲარ ჩვაცვირ ეშჩუ. ეჩქას ანჴადხ
Line of edition: 18    ლჷჩა̄ჟ მა̄რე̄ლ ეჩექა, ზურა̄ლს სგა ხაფხიჭეხ ი ადჲეხ, ბობშარ ჩვაცვირხ
Line of edition: 19    მჷწიწინი. ერ ანტახ ალ მა̄რე, იმ იჩმინა, ლეჲეს ხა̄და ბობშარ
Line of edition: 20    სოფელთე, მარა ქა ლე̄ზი ხა̄დახ ნიცქა. ლიბვრე̄ლა̄ლ ლას, ალჲარ
Line of edition: 21    ერე ნიცს ლახა̄გა̄ნხ, ეშხუ ბობშ ჟენბე̄მბღვე, ნე̄სგა ნიცთე̄ჲსა ერ სგა̄ჴად,
Line of edition: 22    ვაჲ-ვაჲდ აფაშგ ალე ა, პილისა ე̄რ ბობშ აცვირ. ლეჲსიპნა̄ნ
Line of edition: 23    ეჩხა̄ვ, ეჯი თხე̄რას ოსყე̄და ი ალე, ხედი̄ჲ ჟი ხებე̄მბღვა̄ნ, სგო̄თშყად
Line of edition: 24    ნიცთე. ჩვასად ჯეჲგარ. იმ იჩმინა, აჩად ღალ ლაკვა̄რჲელთე. ეშხუნღო
Line of edition: 25    ჩოთო̄გა̄ნ ეშხუ ვარგს მჷჯმაგი̄რდ, ქა ლახა̄და ამეჩუ ჲეშდ ზაჲ. !

Line of edition: 26       ამჩიქს ამეჩუ, ალ ქვეყანა̄ჲსა, ითშიხ ხელწიფს. ჟანხურჲელეხ
Line of edition: 27    თელდ ხალს, ამფიშვდხ მუგვ ი ჲესვა̄ჲს ბარჯჟი ჟესგენი, ეჩის აგნეხ
Line of edition: 28    ხელწიფდ. ესპე̄ნა̄ლე ალ მუგვდ ი და̄ს ესა̄გა̄ნ. მე̄რმა ლადღიშვდ
Line of edition: 29    ენჲერეხ აჯაღ ალ ხალს ი ბჷგიდ ჩვადშგურა̄ნეხ:
Line of edition: 30       -- აგის ლოქ ნო̄რუ აცვირხ, იდო ხოლა̄მდ ლოქ ხახლახ ეჯ
Line of edition: 31    ვოჯახს, ხედიხენქა̄ჲ აგის ე̄რ ასდენი, ჟი ლოქ ა̄ჲყრეხ.

Line of edition: 32       სერ მე̄რმა ლადეღ ადჲეხ ალ მა̄რე̄ჲ, ა, ნაჲ ე̄რ ლჷგჷრგალდად.
Line of edition: 33    ვარგემ ალე, მიჩა მჷჯმაგი̄რ, ჩვესგენე ქახიქა, ერე დროჲს ატეხეს
Line of edition: 34    აგითე. ქა̄მფიშვდხ მუგვ, ესპე̄ნა̄ლე, დას ესა̄გა̄ნ, ვოდ ჟი დო ეთლაკა̄ნ
Line of edition: 35    ალ მა̄რას -- მჷჯმაგი̄რს, ალეს ჟესა̄გან ბარჯჟი ი ჩვადგენეხ, მაჲ
Line of edition: 36    საკვრელ ლი, ხელწიფდ.

Line of edition: 37       ათხე ხელწიფდ ხექვ მიჩა ვეზრალს:
Page of edition: 76 
Line of edition: 1       -- მინე სახელწიფისა ჲერვა̄ჲ ლოქ უპატრონო ი გაჭი̄ვრებულ
Line of edition: 2    ჩუ ლე̄სეს, მაგუ ოხჴიდხ.

Line of edition: 3       გაცხაჲდ ანჴიდხ ჲერუ ჭყინტ ი ეშხუ ზურა̄ლ. ჭყინტარ სგა̄დჲეხ
Line of edition: 4    ეშხუ ვოთახთე, ზურა̄ლ -- მე̄რმათე. ჭყინტარდ ქო̄ხო̄მბვეხ ეშხვა̄რ
Line of edition: 5    მინე-მინე ამბავ ი ჩვათხვი̄დახ, ერე ლახვბა ლიხ. ამჟი ეჯ ზურა̄ლ
Line of edition: 6    ხო̄ვნარი ალჲარე გარგლას მე̄რმა ვოთახხენქა, ეჯი̄ჲ გუდ აჴად, ერე
Line of edition: 7    მიჩა გეზლი̄რ ლიხ ალჲარ. დეშ ენთჷმი̄ნე ი სგა̄კვიშ ყო̄რ ი სგა̄ჩად
Line of edition: 8    მიჩა გეზლი̄რთე. დი-გეზლი̄რ ე̄რ ჩვედნაზვრა̄ნხ, უშხვა̄რ ხეყა̄ლდახ
Line of edition: 9    ი ხეფრება̄ლდახ ხვაჲ ხანს, მაჲ ლე̄ქვი̄ს ლი, ი ეჩუნღო ჩვათგე̄დდახ
Line of edition: 10    ეშხუდ.

Line of edition: 11       მე̄რმა ლადეღ ანჴად ვეზირ ალჲარე ლაჲესდ ხელწიფიშთე. ხეწად,
Line of edition: 12    ერე ზურა̄ლ ნე̄ნსგა̄ჲსა აყვრე ი ჭყვინტარ ეჩხენ-ამხენ მეჴრა̄ლჟი
Line of edition: 13    ხოყვრეხ. ვეზირდ ალჲარ ქა მა̄მ ანჲეცხვნე ი ქა ხე̄ქვ ხელწიფს
Line of edition: 14    ალე მაგ ამჟი. ალე ხელწიფს მე̄ვარ ათსასტლჷ̄ნ ი ადზჷზე მა̄რე ალჲარე
Line of edition: 15    ლახვტად. ვოდ ალჲარს თხუმვარს ქა ხაჭკვრუდა, ეჩქად სგე̄თჴჷ̄რა̄ნ ზურა̄ლ:
Line of edition: 16       -- ეშხუ ამბავუ ლოქ ახა̄ქვი̄სვნე, ხელწიფს ქა̄ვ ოხო̄მბვე ი
Line of edition: 17    ეჩუნღო ჟი̄ვ ლოქ ანხვიტ.

Line of edition: 18       ამნე̄მ გაცხაჲდ ქო̄ხო̄მბვე მინე ამბავ მაგ. ალ მა̄რას ჩუ
Line of edition: 19    ლახმაჭი̄ნდა ხელწიფიშთე ლი̄ზი, მარა ლოხჟჷ̄ნდა ალჲარ ი სერ ქო̄ხო̄მბვე
Line of edition: 20    ხელწიფს ალ ზურა̄ლა ნა̄მბავ მაგ.

Line of edition: 21       ეჩქა ხელწიფ გუდ აჴად, ერე ალჲარ მიჩა ჲეხვ ი გეზალ ლიხ,
Line of edition: 22    შიშდ ახჴიდვნე მიჩა̄შთე ი ძღჷდ ლიხჲადა̄ლ ჩომინხ. ამჷნღო სერ
Line of edition: 23    ალჲარდ ხოჩა ლირდე ედჴიდხ ი ჯამზჷრახ ღერთემ.


არსენა ონიანი. სასაში. ა. ონიანი. 12. VIII. 1957



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.