TITUS
Svan Prose Texts IV (Lashkh)
Part No. 63
Previous part

Text: 63 
Page of edition: 76 
Line of edition: 24 
LXIII. სარკ


Line of edition: 25       ჯამზჷრახ ღერთემ ი ა̄რდახ ეშხუ ღარიბ ჲეხვ-ჭაშ, ხეყე̄დახ სემი
Line of edition: 26    დი̄ნაგეზალ, ალჲარე ლე̄მნე დე̄სამა ხუღვა̄ნხ. აჩადხ ეშხუ ლადეღ
Line of edition: 27    ალ დი̄ნო̄ლარ ცხეკთე ლეზობი ლათხე̄ლიდ, ჟეთლაკა̄ნხ ეშხუ უსკვს --
Line of edition: 28    მაშნიას. ჩვენშიდხ უსკვ, მა̄ჲ ლალე̄მხ -- ლალემხ, მა̄ჲ მო̄დე̄ჲ --
Line of edition: 29    ოხღვახ აგითე. შუკვჟი სემე̄და სგა̄შჷ̄დახ ხოშა ვორმოთე, ეჩხენჟი
Line of edition: 30    ჟი დეშ ანტახხ. ვოდ ახა̄დახ უსკვ, ეჩქად იზბჷდახ, სგე̄რ
Line of edition: 31    ხეშდეხურა̄ლდახ, ეჩქა ჩვედი̄თეხ. ხოხრო̄ლდ ჩვადშხუნე, ხოშა ლავდილად
Line of edition: 32    შიშდ ჩუ ლალე̄მხ. ეჩუნღო ლეხკვაჲხ ხოხრო̄ლაშვდ უსკვი ქა ლიღე̄შს.
Line of edition: 33    ამნე̄მ ხე̄ქვ:

Page of edition: 77 
Line of edition: 1       -- იმნარ ლოქ ხაკუხ ლიღე̄შ, ალე ლოქ ეში̄ მინეშვდ
Line of edition: 2    ხაკვდე̄ნა.

Line of edition: 3       ხოხრა უდლე̄ლა ნა̄თი უსკვი̄ ერ ჩოთშდახხ, სერ დე̄სამა ხუღვახ
Line of edition: 4    ლეზობ. ედბინე ხოხრო̄ლდ ვორი ლიშთხრი ი იმე̄ჲ ლას სგა
Line of edition: 5    ლეხჴედუნა̄ნ ეშხუ დიდარ მა̄რე̄მი თავლათე. ედბინე ამნე̄მ ჩა̄რე ლეზობ
Line of edition: 6    ქვრი ლიქვთერ, ოსღვა ვორმოთე ი ხა̄მნე მიჩა ხოშა ლავდილას.

Line of edition: 7       ჩვაჩხაფხ თავლა̄ჲსა ჩა̄რ, ხეცვა̄ლ მახვში ჩა̄რე მჷ̄ზნანის:
Line of edition: 8       -- იმნარ ლოქ ათჩხეფა მიჩა ჩა̄რ.

Line of edition: 9       ხასკვრელ მჷზნანისი̄. ეშხუ ლადეღ, ქერ ე̄რ ჩოსშიდ ჩა̄რს,
Line of edition: 10    ჩოსდარჯე. უცეფ ქა̄ნსკინე გიმხენქა დენო̄ლდ ი ეშ ლახქანავე ალე
Line of edition: 11    ა ქერ. აჩად ჩა̄რე მჷ̄ზნანი ი ალე მაგ ქა ხე̄ქვ მიჩა მახვშის. სგე̄თჭამხ
Line of edition: 12    დი̄ნო̄ლა ნასყეჲ ლა̄ზისა ი ჟახხვი̄დახ სემი დი̄ნა. ალჲარ სემე̄და
Line of edition: 13    ხოჩა თვალაშ ი ტანაშ ლასხ. ქორი მახვშიდ ესმაკხე, სემი ჭყინტ ლოქ
Line of edition: 14    ხაყა ი ეჯჲრე ლა̄ჲხვად ლოქ ხე̄რი.

Line of edition: 15       ალ ლავდილას ლეხჭოდდახ:
Line of edition: 16       -- მაჲ ლოქ ხა̄ჲმედახ მინს, ხოხალხ ლოქ ე̄სამა?
Line of edition: 17       -- ეშხუ ნოხს ლოქ ანსყე̄ჲნე ეჯკალიბს, ერე ეშხუ სახელწიფ
Line of edition: 18    ლოქ ერ ადფი̄ნას, ხოშა უდილდ ლე̄ქვ.
Line of edition: 19       -- ეშხუ ღოლჲა̄ქს ლოქ ანსყე̄ჲნე ეჯკალიბდ, ერე ეშხუ სახელწიფს
Line of edition: 20    ლოქ ერ ახა̄რვნას, ლე̄ქვ მანე̄სგრა უდილდ.

Line of edition: 21       ხოხრა უდლე̄ლდ ღალ ლე̄ქვ:
Line of edition: 22       -- მიჩ ლოქ დე̄სამა ხა̄ჲმედა, ხიად, ჩუ ლოქ ერ ედღა̄ნვი, ქა
Line of edition: 23    ლოქ ეხთენი ნატყვბარალ -- ჭყინტ ი დი̄ნა, ისგჷნჟი ვოქრ ლოქ
Line of edition: 24    ი̄რიხ ი ისგჷნჩუ -- ვერცხლ.

Line of edition: 25       ალჲარ ქა იშგმინხ ალ დიდარ მა̄რე̄მი გეზლი̄რდ ი ჩუ ჩომინხ ხოჩა
Line of edition: 26    ქორწილ.

Line of edition: 27       ქო̄ხჴიდხ ნოხი ა̄ქაშ მაშე̄ნა დი̄ნას, მარა დესსამა ანსყე. მანე̄სგჷრას
Line of edition: 28    ლახო̄მხ ხოჩა ღოლჲა̄ქ ი ეჯნე̄მი̄ დესსამა ანსყე. მახვრე̄ნო̄ლ
Line of edition: 29    ჩვედღა̄ნვა̄ნ, ვოდ ჟი სედნო̄ლ, ეჩქად ამშა ჭაშ ჯართე ადჲეხ. ამჟი
Line of edition: 30    ალ დი̄ნა ილღვაჟა̄ლ, დროჲ შომა̄ჲ ოხჴად. ჯუა̄ჲ იზა̄ლ, ფეკვნარს
Line of edition: 31    ჴჷდე. ხოხრა უდილს ლალღვაჟა̄ლჟი მიჩა ლავდილა ხო̄ზნანიხ.
Line of edition: 32    ქე̄ხთენა̄ნ ჲერუ ბობშ -- ჭყინტ ი დი̄ნა, ისგჷნჟი ვოქრ ლიხ ი ისგგნჩუ
Line of edition: 33    -- ვერცხლ. ჯუა̄ჲ ჩვედზა̄ნ. ალ ბობშარ ხოშა ლავდილად ადჲეხ, სგა̄შიდხ
Line of edition: 34    ლჷლჲენთეჲსა ი მინე უდილს ხე̄ქვხ:
Line of edition: 35       -- ფეკვნარ ლოქ ახთენე̄ნა მიჩ -- ეშხუ ჯუვ ი მე̄რმე ხვირ.

Line of edition: 36       ალჲარ ლჷლჲენთე ე̄რ აშიდხ ა ბობშარ, ლეგვე̄რი ბარბოლდს
Line of edition: 37    ლეხჩერვა̄ნხ ი ჩვადჩერვეხ ლეჷვე̄რ. ესრენ ამე̄ჲსა მჷლგვე̄რი არი,

Page of edition: 78 
Line of edition: 1       ქა̄ნჴად ქა̄მთე, ხეწად ალ ბობშარს, მარა ალჲართა̄ნ დე̄სამა ხოწვა --
Line of edition: 2    ეშ დღაჩეხ. ჟენკიდ ბობშარ ი სგა̄დჲე ლეგვე̄რთე. ჟოხო̄ზინე ი ქუნ
Line of edition: 3    ლეხტახხ.

Line of edition: 4       ალე სერ ქედკვია̄ნ: მჷლგვე̄რის ლოქ ბობშარ ახხვიე̄ნა ბარბოლდჟი.
Line of edition: 5    ალჲარ ლე̄თშვ ირთხილს იცხემხ ი ლადეღშვ -- კამჷლს. ალე
Line of edition: 6    ბობშარე გიგა̄ლდი̄ ჩვედკვიეხ. მინე ჩი̄ჟას, ხოხრა უდლა ჭაშს,
Line of edition: 7    ოთზჷზეხ ქაღალთ:
Line of edition: 8       -- მიჩა ჲეხვს ლოქ ფეკვნარ ახთენე̄ნა.
Line of edition: 9    ამნემ ოხტიხ ქაღალთ, ამე̄ჲსა ხეჲრა̄ნ:
Line of edition: 10       -- მა̄ჲ ლოქ დო ლე̄სეს, მიჩა ლიჴდა̄ლდ ხოჩა̄მდუ ოხო̄ზინენ
Line of edition: 11    ჲეხვსი̄ ი გეზლი̄რსი̄.

Line of edition: 12       ჲესვა̄ჲ ქაღალთ ოხღვა̄ნ, ეჩის ხოშა ლავდილად შუკვისა ჩოსხვიეხ
Line of edition: 13    ლეზობ - ლეთრე, ჩვაწჲეხ ი ჩვადშდჷმეხ. ალე ქაღალთ მაშდმა̄რს
Line of edition: 14    ჟოხკიდხ, მე̄რმე ჩვადა̄ჲრეხ: "ხა̄ლ ლოქ ალ ქაღალთ ოხჴეხ,
Line of edition: 15    ლაყვილ შუკვისა ლოქ ე̄რ მეგემ ლჷ̄გ, ეჩისუ ლახბეხ მიჩა ჲეხვ, ლექვა
Line of edition: 16    მე̄ზი ლოქ ქა̄ვ ხატბჷნდა, ლეჟა მე̄ზი ჭიშხსუ ხაკვცა̄ნდა". ალ
Line of edition: 17    ქაღალთ სგო̄სდეხ მაშდმა̄რს ჯიბაჲთე̄ჲსა.

Line of edition: 18       ეჩუნღო ხოშა ლავდილად ანმა̄რეხ ძღვენ ი სგა ლეხმუშგვრა̄ნხ
Line of edition: 19    მინე უდლა გეზლი̄რს, ალჲარ ათხე სერ ძღჷ̄დარ ლიხ. ჯჷმილ ლათხვიარს
Line of edition: 20    არი ი დაჩურ გარ ოსხვა̄დახ აგის. გიგა̄ლარდ ხე̄ქვხ:
Line of edition: 21       -- მაჲ ხოჩა ჯჷმილ-დაჩურ ლოქ ლიხ მინ. მინეშთა̄ნ ლოქ დესამა
Line of edition: 22    არი მინე სახენწიფისა, ეშხუ რიგი̄ლ ლოქ ერ მო̄ ხაკლჷ̄ნდეხ ქა.
Line of edition: 23       -- მაჲ ლოქ, დი̄ნა ლეხჭოდდა.
Line of edition: 24       -- მაჲ ი, იალბუზი თანაღჟი ლოქ არი სარკ, ქვეყანაჟი ლოქ
Line of edition: 25    მა̄ჲ ე̄სამა არი, ეჩე̄ჲსა მაგ ლოქ ქა თერა, ეჯი ლოქ ხაკვჩერ ხუღვე̄ნდეხ
Line of edition: 26    მინს.
Line of edition: 27       -- დეშ ლოქ აზზი, ხიად, ეჩხა̄ვ მიჩა ჯჷმილს, ჩუ ლოქ დო̄სამა
Line of edition: 28    ედზიგვნას.
Line of edition: 29       -- სარკს ლოქ ე დოშ ჴგდეხ, ეჩქა მიჩა ჯჷმილ ჩუ ლოქ იცდავი
Line of edition: 30    ლათხვიარს, ხე̄ქვხ გიგა̄ლარდ.

Line of edition: 31       მაჲ ჩომნას სერ დაჩვრე̄ლდ, ხაკვჩერ ე̄სამა ენგონვას!

Line of edition: 32       ერ ანჴად ჯჷმილ ლათხვიარხენ, დაჩურ ლეგდ გინ ოსხვი̄და.

Line of edition: 33       -- მაჲ ლოქ ხეზგი, ლეხჭოდდა ჯჷმილ.
Line of edition: 34       -- მაჲ ი, იალბუზი თანაღჟი ლოქ ერ სარკ არი, ეჩის ლოქ ე
Line of edition: 35    დო̄მ ანჴდე, მიჩა მჷხჩოვი დე̄სამა ლოქ ლი.

Line of edition: 36       აჩად ი ეშხუ ხოშა მინდორისა ჩვაყვრე ზურა̄ლ და̄ვ. სგა
Line of edition: 37    ლეხქა̄ლა̄ნ ალეს ი ქა ლეხჴაფ ლუსჟი:
Page of edition: 79 
Line of edition: 1       -- ჯეჲ ლოქ დი ი ჯეჲ გეზალ.
Line of edition: 2       -- ოხ, მაჲ ძნელ ლოქ ლი ჯრული კვეშა, ოდო ამსვა̄ლდ ლოქ
Line of edition: 3    მა̄მ ხალატ მიჩ, და̄ვემ ხე̄ქვ, იმთე ლოქ ესღრი?
Line of edition: 4       -- იალბუზი თანაღჟი ლოქ ერ სარკ არი, ეჩა ლაჴდათე ლოქ
Line of edition: 5    ესღრი.
Line of edition: 6       -- ეჩხა̄ვ მე̄ზი ლოქ ხვა̄ჲ ხოწვა, მეტეხ -- და̄რ.
Line of edition: 7       -- ჲაღო მაჲ ლოქ ჩომნას? -- ჭყინტ ლეხჭოდდა.

Line of edition: 8       და̄ვემ ჩვადშგურა̄ნე:
Line of edition: 9       -- ეჯ სარკ ხჷნსგე ლოქ ჩუ ხაშთხვა ი ხჷნსგე ჟი თერა. ჟი ლოქ
Line of edition: 10    ე̄რ ოხბჷდდეს, ეჩქა̄ვ ლოქ ლე̄ქვ: "მიჩა დედე̄ ქუნარე სამჷრთალ
Line of edition: 11    ლოქ ე̄სა ჩვა̄რდეს, ალე სარკ ჟი̄ვ ახყვიფვნე ი აგითე̄ვ ათჲესვნე!"
Line of edition: 12    ე̄რ ლოქ ოხღვე̄ნი, ჩხირ ი კაჭკაჭ მაგ ლოქ ხატუ̄ლნი: "სარკ აჩად,
Line of edition: 13    სარკ აჩად", მარა ღოშდ ლოქ ნო̄მღა̄ვ ედსგიდდა.

Line of edition: 14       სერ აჩად ალ ჭყინტ, აჴად სარკნუნ. ე̄რ ოხბჷდდა ალეს ჟი,
Line of edition: 15    ღულა̄ჲ თხუმდ ბეჩდ ესსიპდა, მე̄რმა̄მდ ოხბჷდდა ი ლალა̄რტყო̄ლდ
Line of edition: 16    ესსიპდა ბეჩდ. ეჩქა გარ ლეხშყად, და̄ვემ ე̄რ ადშგურა̄ნე. ეთჴჷ̄რა̄ნ
Line of edition: 17    ღერბათს: "მიჩა დედე̄ ქუნარე სამჷრთალ ლოქ ე ჩუ ე̄სა ა̄რდეს,
Line of edition: 18    ალე სარკ ჟი̄ვ ლოქ ახყვიფვნე ი აგითე̄ვ ათჲესვნე! ეჩქა ბეჩ ჩოთშჷ̄და,
Line of edition: 19    სარკ ჟეხყვაფ ი ანჲე. ღოშგინხენ მაგ ხატუ̄ლდა: "სარკ
Line of edition: 20    ლოქ ემჩედ, სარკ ემჩედ", მარა ღოშდ მა̄ ლეჲსგიდდა. ანჴიდ ამჟი
Line of edition: 21    სარკ აგითე. ალე გიგა̄ლარდ ჩვედკვიეხ. შომა̄ჲ ჭყინტ ლათხვიარს
Line of edition: 22    ა̄რდა, ეჩქა აჯაღ ლეხტახხ ამშა დაჩურს ი ხე̄ქვხ:
Line of edition: 23       -- მინეშთა̄ნ ცხაჲ ლოქ დე̄სამა არი, მარა აჯაღ ეშხუ რიგი̄ლ
Line of edition: 24    ლოქ მჷრ ხაკლიხ.

Line of edition: 25       -- მაჲ ლოქ? -- დენა ლეხჭოდდა.
Line of edition: 26       -- მაჲ ი, იალბუზი თანაღჟი ლოქ ე̄რ უსკვ არი, ეჯი ლოქ ხაკვჩერ
Line of edition: 27    ხო̄გდეხ მინს ჲეზვისა.

Line of edition: 28       ანჴად ამშა ჯჷმილ ნებოზს ლათხვიარხენ ი დაჩურ აჯაღ ლედგ
Line of edition: 29    გინ ოსხვი̄და.

Line of edition: 30       -- მაჲ ლოქ ხეზგი? -- ჯჷმილ ლეხჭოდდა.
Line of edition: 31       -- მაჲ, ი, იალბუზი თანაღჟი ლოქ ე̄რ უსკვ არი, ეჩის ლოქ ე
Line of edition: 32    დო̄მ ჴჷდე, მიჩა მჷხჩოვი დესამა ლოქ ლი.
Line of edition: 33       -- მიჩა ცოდუ ლოქ ხა̄ცვ მიჩა ამშა მჷ̄ქვი̄სს. ადინე ლოქ ი, ე
Line of edition: 34    მოშ ლოქ ანჴდე, ეზერ, ე მო̄დე̄ჲ მიჩა ჭირი მჷ̄ქაფუ ლოქ ლი.

Line of edition: 35       ანგე̄ნდა მე̄რმა ლადეღ ი აჩად. აჴად ეჯ მინდორნუნ აჯაღ ე,
Line of edition: 36    და̄ვ ერ აყუ̄რდა. "ხოჩა ლადეღ" ხე̄ქვ მიჩა დიდლჷგნას.

Line of edition: 37       -- ხოჩა̄ვ ლოქ ხაყრა, მარა იმთე ლოქ ესღრი?
Page of edition: 80 
Line of edition: 1       -- იმთე ი, იალბუზი თანაღჟი ლოქ ე̄რ უსკვ არი, ეჩა ლაჴდათე
Line of edition: 2    ლოქ ესღრი.
Line of edition: 3       -- ეჩხა̄ვ მე̄ზი ლოქ ხვა̄ჲ ხოწვა ი მეტეხ -- და̄რ, ჲერვა̄ჲ ლოქ
Line of edition: 4    ღჷრი, მაგ ლოქ ბეჩდ ხესპი. მიჯნე̄მ ამჟი̄ვ ჩომინ: უსკვს ლოქ ერ
Line of edition: 5    ჟოხბჷდდეს, ეჩქა̄ვ ლე̄ქვ: "მიჩა დედე̄ ქუნარე სამჷრთალ ლოქ ჩუ
Line of edition: 6    ე̄სა ა̄რდეს, ალე უსკვ ლოქ ჟი̄ვ ახყვიფვნე ი აგითე̄ვ ათჲესვნე!"
Line of edition: 7    ამჟი სერ ალ უსკვი̄ ადჲე აგითე.

Line of edition: 8       ეჩუნღო აჯაღ ლეხმუშგვრა̄ნხ ალ ჭყინტი დაჩურს მიჩა გიგა̄ლარ
Line of edition: 9    ი ხე̄ქვხ:
Line of edition: 10       -- აჯაღ ეშხუ რიგი̄ლ ლოქ ხაკლიხ: ბროლი კოშკისა ლოქ ე̄რ
Line of edition: 11    ზითუნახავ არი, ეჯი ლოქ ხაკვჩერ ლე̄სეს მიჩა ჯჷმლა ჲეხვ.

Line of edition: 12       ჭყინტ ე̄რ ანჴად ლათხვიარხენ, მიჩა დაჩურ აჯაღ ლეგდ ოსხვი̄და.
Line of edition: 13    ამნე̄მ ხე̄ქვ:
Line of edition: 14       -- ბროლი კოშკისა ლოქ ე̄რ ზითუნახავ არი, ეჩის ლოქ ე დო̄მ
Line of edition: 15    ენჴიდე ჲეხვდ, მიჩა მჷხჩოვი ლოქ დე̄სამა ლი.

Line of edition: 16       ანგე̄ნდა ჭყინტ ი აჩად. აჴად მიჩა დიდლჷგნა და̄ვაშნუნ. ეჯი
Line of edition: 17    ლეხჭოდდა:
Line of edition: 18       -- იმთე ლოქ ესღრი?

Line of edition: 19       ამნე̄მ ქა ხე̄ქვ, იმთეჲ ესღრჷ̄და.

Line of edition: 20       -- ჲაღო ეჩხა̄ვ ამჟი ლოქ ნომა̄ვ ღჷრი, ატახუ ლოქ აჷითე, მიჩა
Line of edition: 21    უსკვს ლოქ ეშხუ უსკვ ქა̄ვ ახკიჩ, იბუ̄ლთანა̄ლდა̄ვ ლოქ ალ
Line of edition: 22    უსკვშვ ი ესღრჷ̄დდა̄ვ ეჲჟი. ჩუ ლოქ ე̄რ ოთშყეს უსკვ, ეთჭამუ ლოქ
Line of edition: 23    ეჩის ი ჟი ლოქ ათლაკნე ზითუნახავს. ჭყინტდ გაცხაჲდ ამჟი ჩომინ.
Line of edition: 24    უსკვ ოთჟოღვდა ვოქრე ტუბა̄ჲ პილთეჟი, ამე̄ჲსა იბრა̄ლ ზითუნახავ.
Line of edition: 25    ლეხქა̄ლა̄ნ ალეს ჭყინტ ი ქო̄თქვითე ლერქვალ. ჩუ ე̄რ ედბარა̄ნ
Line of edition: 26    ზითუნახავ, ესთხე̄ლდა ლერქვალს, მარა დესა ახხვი̄და.

Line of edition: 27       -- ჲერვა̄ჲ ლოქ ღენ ჭაპუკვ ლი, ლერექვუ ლახტის, ლახტუ̄ლე
Line of edition: 28    ზითუნახავდ, მარა ამნე̄მ ლერექვ მა̄ ლახტის.
Line of edition: 29       -- ჯეჲ მუ ი ჯეჲ გეზალ, ზითუნახავდუდ ლახტუ̄ლე.

Line of edition: 30       ლერექვ ეში̄ მა̄ ლახტინ ჭყინტდ.

Line of edition: 31       -- ჯეჲ ჯჷმილ, ჯეჲ დაჩურ; ჯეჲ დი, ჯეჲ გეზალ, ხეჴჷ̄რა̄ლ
Line of edition: 32    ზითუნახავ, მარა ჭყინტდ დე̄სამა იკვდუნე. ეჩქა სერ ზითუნახავდ
Line of edition: 33    ხე̄ქვ:
Line of edition: 34       -- ჯეჲ ლოქ ჭაშ ი ჯეჲ ჲეხვ.

Line of edition: 35       ალე ჭყინტს ათხი̄დჷ̄ნ ი ანჲე მახჲედა̄რ ზითუნახავ აგითე ჲეხვდ.

Line of edition: 36       ამჩიქს ალ ჯჷმილ-დაჩვრა მუ̄ჲ ანჴად ჯარხენ. ეჯნე̄მ მე̄ვარ
Line of edition: 37    ედსასტე მიჩა ჲეხვე შუკვისა ლიბენ:

Page of edition: 81 
Line of edition: 1       -- მიჩ ლოქ ამკალიბ ქაღალთ დე̄სა ხოზზა.
Line of edition: 2    ამნე̄მ ეშხუ ლადეღ ჩვაწჲე ხალხ, ალჲარცახან მიჩა გეზალ
Line of edition: 3    ჯჷმილ-დაჩური̄ ჩუ, მაჲ საკვრელ ლი. დე̄სამა ხომჴერა̄ნ, მიჩ მა̄ჲ ღენ
Line of edition: 4    ხა̄დახ ალჲარ.

Line of edition: 5       ე̄რ ესღრჷ̄დახ შუკვჟი, ჯჷმილ-დაჩურდ ქა ლახტჷბნეხ მინე დის.
Line of edition: 6    ზითუნახავდ ჩვადკვეცნა̄ლე ი ქა ლეხყაჲა̄ნ. ერ ანჴადხ მინე მუეშნუნ,
Line of edition: 7    ამეჩუ ჩოსგეხ ხოჩა ტაბაგ, ამეჟი ჩვარი მჷტყაბ ხოხობ. ზითუნახავდ
Line of edition: 8    ტაბაგისა, მა̄ჲ ათხადნუნ ალა̄მბვედ, ალე მაგ ქა̄ნა̄მბვე.

Line of edition: 9       -- ალე ლოქ ე მაგ ტკიც ლე̄სეს, ეჩქა ალე მჷტყაბ ხოხობ ჟი̄ვ
Line of edition: 10    ლოქ ალგენე̄ლი, ჩუ̄ვ ლოქ ალფჷთხნა̄ლე̄ლი ი სუმინ ლოქ ჩუ̄ვ
Line of edition: 11    ოსტუ̄ლა, ზითუნახავდ ლე̄ქვ, ე ლოქ ლირტყველა̄ლ ლე̄სეს, ეჩქა
Line of edition: 12    მჷტყაბ ლოქ ლი ი მჷტყაბდუ ლოქ ემსედ.

Line of edition: 13       ხოხობდ ჟანსკინე, ჩვედფჷთხნა̄ლა̄ნ ი სუმინ ჩვესტუ̄ლე.
Line of edition: 14    ნატყვბარ ჯჷმილ-დაჩვრა დი, მეგემს ე̄რ ხა̄ბდა ლაყვილ შუკვისა,
Line of edition: 15    ანჴიდხ აგითე, მიჩა ლავდილა წელი აკვდარს ლახბეხ, ლემჷჟს
Line of edition: 16    ადჲეხ ი ლენთოჲს ენტიხხ ლათრინუშ, აგუ̄ლარ გარ ახყა̄დახ აგითე.

Line of edition: 17       ალ ჯჷმილ-დაჩვრა დის ი მუს ეჩუნღო ხოჩა ლიჲეხვ-ლიჭაშ ხა̄დახ,
Line of edition: 18    გეზლი̄რ ი თერღლა მე̄ვარ ხახჲადჷ̄ნხ ი ჯამზჷ̄რახ ღერთემ.


ბაბილინე ონიანი. სასაში. ა. ონიანი. 15. VIII. 1957



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.