TITUS
Svan Prose Texts IV (Lashkh)
Part No. 64
Previous part

Text: 64 
Page of edition: 81 
Line of edition: 19 
LXIV. ბჷლათ


Line of edition: 20       ლჷმა̄რხ ეშხუ ჲეხვ-ჭაშ, ხაყე̄ნახ ჩხარა ჭყინტ-გეზალ. აჩად ალე
Line of edition: 21    ა ღვაჟმა̄რე ი ჩხარა დი̄ნა-გეზალ ე̄ს ხეყე̄ნი, ეჯჲარ ხაკვჩერ ანჴჷდას
Line of edition: 22    მიჩა ჷეზლი̄რე ლა̄ჲხვად -- ჩხარა მუხვბას ჩხარა უდილ ხეყე̄ნი
Line of edition: 23    ჲეხვდ. სგა ლიხხვი̄და ეშხუ მა̄რე, ალე ლეხჭოდდა:
Line of edition: 24       -- იმთე ლოქ ესღრი?
Line of edition: 25       -- იმთე̄ჲ, მიჩ ლოქ ხაყა ჩხარა ჭყინტ ი ხეთხე̄ლი ლოქ ეჯკალიბ
Line of edition: 26    მა̄რას, ჲესვა̄ჲ ლოქ ჩხარა დი̄ნა ხეყე̄ნი.
Line of edition: 27       -- ჩხარა ლოქ მა̄მაჲ, არა ლოქ მიჩ ხაყა.
Line of edition: 28       -- ჲაღო ჩუ̄ვ ლოქ ედჲა̄ქა̄ნხ, ჩუ ლოქ აცვრე მახვრე̄ნა ჭყინტს
Line of edition: 29    უჩი̄ჟად. ჟი̄ვ ლოქ ენმა̄რა̄ნხ ი მინ ლოქ ანჴდენიხ, ხე̄ქვ დი̄ნე̄ლე
Line of edition: 30    მუს ი ჯეჲ ატახ მიჩა გეზლი̄რთე.

Line of edition: 31       ჩიდ ხოხრი მუხვბას ხა̄ჲშხა ბჷლათ, ალეს მიჩა მუემ ხე̄ქვ:
Line of edition: 32       -- მაგ ლოქ ქო̄თჩი̄ჟა ი ჯეჲ ლოქ გარ ოთცვი̄რა უჩი̄ჟად.
Line of edition: 33       -- ჲაღო აჩადხუ, მარა ჯეჲ ლოქ ე̄რ ადშგურა̄ნნე, ეჲჟი̄ვ ლოქ
Line of edition: 34    ჩომინხ, -- ბჷლათდ ხე̄ქვ, -- ე̄რ ლოქ ანღრჷ̄ნიხ, ეჩქა ლოქ იჩო
Page of edition: 82  Line of edition: 1    ეჲჟი ათვის, ერე მჷტყაბ ნეპო̄ლარ ლოქ ანღრჷ̄ნიხ მეგმარხენჩუ,
Line of edition: 2    მარა ჩუ ლოქ ნო̄სა̄ვ ესმჷნჩალეხ. ეჩანღო ავდარს ლოქ იჩო ეჯკალიბს,
Line of edition: 3    ერე დეცე ნაკვიშ ლოქ გიმდ ანღრჷ̄ნი, მარა ჩუ ლოქ ნო̄სა̄ვ
Line of edition: 4    ესჷლყჷ̄მეხ.

Line of edition: 5       აჩადხ ალჲარ ი ეჩე, მაჲ საკვრელ ლი, ქორწილ ხა̄დახ. ეჩუნღო
Line of edition: 6    ეჩხენ ქო̄ხო̄გა̄ნხ შუკვს. ათვი ე̄რ ჩომინ, მა̄დ ესმჷნჩალეხ. ეჩანღო
Line of edition: 7    ავდარ ჩომინ. ლათრეღლად ალჲარე უჭვდჲელად ჟანკაჩეხ
Line of edition: 8    ჩე̄რილეშგვე̄რ ი ჩვედგა̄ნ ეშხუ ხოჩა ქარვასლა. სერ მაგ სგა̄ჩადხ
Line of edition: 9    ეჩხა̄ვთე̄ჲსა ლალყჷ̄მდ. ქე̄რ ენდა̄რა̄ნ, ენსგიდდა ჭყინტარე მუ
Line of edition: 10    ყო̄რქა, სგა̄ნტახ ი ხმალს ლახა̄და ლაშე̄რას, ქე̄დსგიდდა მაშე̄ნე მუხბე,
Line of edition: 11    სგა̄ნტახ ი ეჯი̄ჲ ხმალს ლახა̄და ლაშერას. ესღრიხ თვით-თვითჟი
Line of edition: 12    ქა̄მთე, სგა ტეხნიხ ი ხმალი ლაშე̄რას ხა̄რხ. ესრენ ქა ხაცხიპ ალ ქარვასლას
Line of edition: 13    და̄ვა ჯარ. ღოშგინპილს ქა̄ჩად ჭყინტარე მუ ქა̄მთე ი და̄ვარს
Line of edition: 14    ხე̄ქვ:
Line of edition: 15       -- ე მინ და̄ვარ, მაჲ ამბავ ლოქ ლი, მაჲ ლოქ ხაკუხ მინეშხენქა?
Line of edition: 16       -- ხოცხენდა̄ჲ ქა̄ვ ლახო̄მ ბჷლათ, აგის ლოქ ე̄რ მახვრე̄ნე გეზალ
Line of edition: 17    ხოცვირ, მო̄დე̄ჲ ჟი ლოქ კჷდეხ ჩი̄ს, პასუხდ ლახტიხხ და̄ვარდ.

Line of edition: 18       ალეს მაჲუ ხოჩმი̄ნა̄ნ, ქო̄თბაცე. ამფიშვდხ ალჲარ აგითე ი
Line of edition: 19    ანჴადხ. ანჴადხ ი ბჷლათ ეშ იპე̄ნა̄ლ ქორწილის, ჟი ხაჟღუნე ჩი̄ს
Line of edition: 20    ლიმღვინეს ი ლიზრულის. ამშა მუ̄ლუ̄ლ ჩვარი ეჲჟი ლჷწუხვავად,
Line of edition: 21    მჷგდა̄ჲ ლუვარ ი დჷდგარ მაგ სგობინჩუ ხოგფა.

Line of edition: 22       -- იმნარ ლოქ არი, მამა, ხოლა გუჟი, ლეხჭოდდა ბჷლათ.
Line of edition: 23       -- იმნარ ი ამჟი ლოქ ლი მიჩა გვეშ, ქა ლებცი ლოქ ხა̄რე̄ნა
Line of edition: 24    და̄ვარეშვდ მიჩა თხუმ.
Line of edition: 25       -- ჩუ ლოქ დერ ოთშგურა̄ნა, იმნარ ლოქ ოსჷლყჷ̄მახ?! ათხე
Line of edition: 26    სერ იმ ლოქ იჩოხ, ქორწილ ქა̄ვ ლოქ ადგა̄თვეხ ი ეჩუნღო ადინე
Line of edition: 27    ლოქ, ე მოშ ლოქ ანტხენი -- ანტხენი, ე ლოქ დოშ, ეჩქა მინსუ
Line of edition: 28    ხა̄რხ ხოჩა ლირდე.

Line of edition: 29       ქორწილჷნღო აჩად ბჷლათ; აჩად ი ეშხუ აგის ჟესლაკა̄ნ
Line of edition: 30    მეცხუ̄ტა̄ლს.

Line of edition: 31       -- მა̄ჲზუმჟი ლოქ ღჷრი მიჩა ცხუ? -- ბჷლათ ლეხჭოდდა.
Line of edition: 32       -- სემი ლადღი ვადავშვ ლოქ ფუშდე.
Line of edition: 33       -- ეჲ, ჯეჲ მა̄რე, მაჲ მა̄რე ლოქ ლი ამთან?! ჯეჲ მიჩა ნაკვა̄ნ
Line of edition: 34    ცხუს ხოსგდი ლოქ ი ეჲჟი ლოქ ტეხნი ჩუ, ჯეჲ ლოქ სემი ლადღი
Line of edition: 35    ვადავშვ ფუშდე.
Page of edition: 83 
Line of edition: 1       -- მა̄რე ლოქ ლი ე ჯი ე ბჷლათ, ჯეჲ ლოქ მაჲ მა̄რე ი̄რი! -- ხე̄ქვ
Line of edition: 2    ამნე̄მ პასუხვდ.
Line of edition: 3       -- ჲაღო ბჷლათ ლოქ ჯეჲ ლი ი ანჩადუ მიჩაცახან.

Line of edition: 4       სგა ლეხღვერა̄ნხ ეშხვა̄რ ლახვბად ი აჩდხ ეშხუდ. აჴადხ ეშხუ
Line of edition: 5    აგითე ი ამეჩუ სგა ხო̄ბხ ჲეშდჲერუ უ̄ღვა ჴამბეჩ ლაჴანს. ალჲარ
Line of edition: 6    იმვა̄ჲ ბელტს ქა̄სპეხ, ეშხუ მა̄რე ჩი̄ს ჩვი̄ნტყვი, მარა ეში̄ ტუ̄ლი:
Line of edition: 7       -- ხაიდ ლოქ, ხაიდ.
Line of edition: 8       -- ე, ჯეჲ მა̄რე, მაჲ მა̄რე ლოქ ლი ამკალიბ, ერე ალმეგა ბელტს
Line of edition: 9    იზბი ი ეში̄ ხაიდ?! ჯეჲ ლოქ ეშხუ დიარს ვედშვ იზბი, ხე̄ქვ ალეს
Line of edition: 10    ბჷლათდ.
Line of edition: 11       -- მა̄რე ლოქ ეჯი ლი ე ბჷლათ, ჯეჲ ლოქ მაჲ მა̄რე ი̄რი!
Line of edition: 12       -- ჲაღო ბჷლათ ლოქ ჯეჲ ლი ი ანჩადუ მიჩაცახჲნ, ლახვბა
Line of edition: 13    ლოქ ი̄რიხ.

Line of edition: 14       აჩადხ ი ეშხუ აგის ეთლაკა̄ნხ მეთხვიარას, დოლობში̄რე̄ლ სგა
Line of edition: 15    ხა̄ზხ ჭიშხარისა, ცხეკისა ნათხვიარას დე̄სა ცურეხ, ჩი̄ს ჩვარკელიხ
Line of edition: 16    აგითე.
Line of edition: 17       -- ეჲ, მინ მა̄რე̄ლ, მაჲ მა̄რე̄ლ ლოქ მინ ლიხ! ჯეჲ ლოქ ე̄რ ღჷრი
Line of edition: 18    ლათხვიართე, ეშხუ ნათხვიარას ლოქ ვედშვ ადგარი.
Line of edition: 19       -- მინ ლოქ მაჲ მა̄რე̄ლ ი̄რის, მა̄რე ლოქ ლი ეჯი ე ბჷლათ.
Line of edition: 20       -- ბჷლათ ლოქ ჯეჲ ლი ჲაღო ი ანჩადხუ მიჩაცახან ი ლახვბა
Line of edition: 21    ლოქ ი̄რიხ.

Line of edition: 22       აჩადხ ალჲარ ეშხუდ. ეშხუ აგის ანღრი ხოშჱრება ნიც,
Line of edition: 23    ლა̄შხურზუმ, ჩუქვა̄ნ ჩუ ხაჩრავა მა̄რე, ეჩის ჩი̄ს ჩვი̄თრე ი ეში̄
Line of edition: 24    ტუ̄ლი:
Line of edition: 25       -- ხაფჷნ ლოქ, ხაფჷნ.

Line of edition: 26       ესღრიხ ი ეშხუ აგის სგა ლახხვი̄დახ ბაპ, ჟი ხა̄ცვ საყდარ ი
Line of edition: 27    ეშტუ̄ლი:
Line of edition: 28       ხაქფუნი ლოქ, ხაქფუნი.

Line of edition: 29       ალე̄ჲ სგა ლეჲგნჴერა̄ნე მუხვბად ბჷლათდ.

Line of edition: 30       აჩადხ ალჲარ ი აჴადხ ეჯ და̄ვარნუნ. და̄ვარდ ხე̄ქვხ ბჷლათს:
Line of edition: 31       -- ჲედ კე̄სარი გეზალუ ოხჴიდ ჲეხვდ და̄ვს, მო̄დე̄ჲ ჩუ ლოქ
Line of edition: 32    ადგარიხ.

Line of edition: 33       ბჷლათ ი მიჩა აფხნიკარ აჩადხ კე̄სარშე̄რთე ი ხაშგმინხ დი̄ნა.

Line of edition: 34       -- ჩუ̄ვ ლოქ ადმჷქრა̄ლვნეხ მეცხუ̄ტა̄ლა, მინე მეცხუ̄ტა̄ლ ლოქ
Line of edition: 35    ე ახსერნე, ქა ლოქ ლახო̄დი დი̄ნას, ე მო̄დე̄ჲ -- დე̄მა, ხე̄ქვ ალჲარს
Line of edition: 36    კე̄სარდ.

Page of edition: 84 
Line of edition: 1       ჩვადმჷქრა̄ლვნეხ ი კე̄სარშა მეცხუ̄ტა̄ლი ნაკვა̄ნ ცხუ თეისა
Line of edition: 2    დეშ ოთთვაფხ, ეჲჟი ანტახ ღოშდ, ამნე̄მ სემი ლადღი ვადავშვ
Line of edition: 3    ადზჷზე დეცთე.

Line of edition: 4       -- ათხე ჲაღო მუთხვიარა̄ვ ადმჷქრა̄ლვნეხ.

Line of edition: 5       აჩადხ ი კე̄სარშა მუთხვიარდ ეშხუ რეჭუ̄ლ ანჴიდ, ბჷლათი
Line of edition: 6    მეთხვიარდ ცხეკისა ნადირ დე̄სა აცვირ, მაგ ჩვანჴიდ. ამე̄ჲსა̄ჲ ჟახსერე
Line of edition: 7    ბჷლათდ.

Line of edition: 8       ათხე კე̄სარდ ხე̄ქვ:
Line of edition: 9       -- ჩუ ლოქ ადძეჲნე ჲეშდჲერუ ჴანს ი მიჩა ლეზობ - ლეთრას
Line of edition: 10    ლოქ ანმა̄რნე ი ალეს ლოქ ე ჩუ მოშ ლეჲზობნეხ ეშხუ ლე̄თ-ლადეღისა,
Line of edition: 11    ეჩქა ლოქ დი̄ნას ქა ლახო̄დნე.

Line of edition: 12       -- ე, ხიად, ბელტიყლაპიაჲ, ათხე ლოქ ხაწჷხ მიჩა ში! --
Line of edition: 13    ესჷმწა̄რვჲელა̄ნ ბჷლათ.

Line of edition: 14       ალე მაგ ჩუ ლალე̄მ ბელტიყლაპიაჲდ, მა̄დე̄ჲ ჭვედვარი̄
Line of edition: 15    ქე̄ნლო̄კე.

Line of edition: 16       -- სერ ქა̄ვ ლოქ ლახო̄მხ დი̄ნა, ბჷლათდ ხე̄ქვ, მარა კე̄სარდ
Line of edition: 17    ეშხუ̄ვდ ხექვ:
Line of edition: 18       -- ჟი ლოქ ანგოშლი ეშხუ ვოთახს ღვინელშვ გოში ჟაჴარშვ
Line of edition: 19    ი ეშხუ ლე̄თ-ლადეღისა ლოქ ე ქა მოშ ენჷნწჷ̄რნეხ, ეჩქა სერ ქა
Line of edition: 20    ლოხ ლახო̄დი გეზალს.

Line of edition: 21       ალეს სგა ლოხფიშვდ ბჷლათდ ლიცი თჷრაჲ მა̄რე ი ჩუ ლალჷ̄შ
Line of edition: 22    შიშდ.

Line of edition: 23       ათხე სერ კე̄სარდ ჩვადკჷლე მიჩა ქორი ყო̄რალ ი დი̄ნას დე̄მ
Line of edition: 24    ხა̄ვდი. ეჩქა ბაპს ხე̄ქვ ბჷლათდ:
Line of edition: 25       -- ე, საბა, ე̄მა ლოქ ხა̄ჲმედა, ჟი̄ვ ენცვე ალ ქორ ი ანჲე̄ვ.

Line of edition: 26       ჟენცვე გაცხაჲდ ბაპდ ქორ ი ოხღვა. ქე̄ნსგიდდა კე̄სარ ი
Line of edition: 27    ლახტუ̄ლე: -- ჲერვა̄ჲ ლოქ ღენ ჭაპუკვ ლი, ედტიხუ ი ჩუ̄ვ ესგე
Line of edition: 28    მიჩა ნამზიგვჟი ი ჲეშდჲერუ ჩა̄ჟს ლოქ ოთლა̄ბნე თეთრშვ ი
Line of edition: 29    ვოქრშვ ი ალ დი̄ნასი̄ ლოქ ათყევნი. ედტიხ ღოშდ ი კე̄სარდ
Line of edition: 30    ჲეშდჲერუ ლჷლა̄ბე ჩა̄ჟ ი ალ დი̄ნა ახყევნე.

Line of edition: 31       ანჴადს ამჟი ალჲარ და̄ვარნუნ. ბჷლათ ლეხჭოდდა:
Line of edition: 32       -- მინ და̄ვარ, ხედი ლოქ ლი ჩი̄ჟე?

Line of edition: 33       და̄ვარდ ქა ხათო̄ნეხ ლეჩი̄ჟჷ̄რი.

Line of edition: 34       -- ატ, მინ და̄ვარ, ჩუ ლოქ იმღა დოშ ოთწაბუ̄რახ! -- ოსკილე
Line of edition: 35    ბჷლათდ.

Line of edition: 36       და̄ვარ ლახჭვა̄დე ი სგა̄ხგუდრა̄ლვნე ლეჩი̄ჟჷ̄რის. ჟენკიდ მიჩა
Line of edition: 37    ხმალ, ვითამ აწბუ̄რე ლოქ ხოჩიდ და̄ვარს, ჟანკიდ მაგ. ალ დი̄ნა
Page of edition: 85  Line of edition: 1    ჩოთსად მიჩ, ადჲე აგითე ამზუმ ქონება ი დი̄ნა̄ჲ. ქორწილ ჩომინხ
Line of edition: 2    ეზარ, ხოჩა ლირდე ედჴიდხ ი ჯამზჷრახ ღერთემ.


ბაბილინე ონიანი. სასაში. ა. ონიანი. 16. VIII. 1957



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.