TITUS
Svan Prose Texts IV (Lashkh)
Part No. 67
Previous part

Text: 67 
Page of edition: 87 
Line of edition: 23 
LXVII. ბე̄რია̄ნ


Line of edition: 24       ჯამზჷრახ ღერთემ ი ლჷმარდე̄ლიხ ეშხუ ჲეხვ-ჭაშ, ეჲჟი ალმეჩე̄ლიხ,
Line of edition: 25    ერე გეზალ მა̄ ლახვოდე̄ნახ. ეშხვინ ემჩედე̄ლი ჭაშ მეცართე
Line of edition: 26    ი ქო̄ხო̄მბვა მიჩა ბედ ი გვეშ. მეცარს ქა ლოხვოდა უსკვ ი ხო̄ქვა:
Line of edition: 27       -- ალე ჩუ̄ვ აბიჴვხ ისგდ ი ჩუ̄ვ ლალე̄მხ ჲეხვ-ჭაშდ. ჭაშს ჩუ
Line of edition: 28    ლოქ ეთში̄ კაწარ ი ჩხარა თოჲა თხუმჟი ჩუ̄ვ აქვიცხ ალ მჷში ი
Line of edition: 29    ეჩხენქა ქა ლოქ ანჴდენი ჭყინტ.

Line of edition: 30       ანტახ აგითე ალ მა̄რე ი ალე მაგ ამჟი ანსყე. კაწარ ჩვეთშია̄ნ
Line of edition: 31    ი ვედშვ ხემწირ. ჩხარა თოჲ თხუმჟი ჩვაქვიცხ ი ქა̄ნჴად ჭყინტ. ალე
Line of edition: 32    ეჯკალიბ ლას, ერე მჷჟს ხაჯო̄ნდა, ჟახად ჟესჟახეხ ბე̄რია̄ნ.

Line of edition: 33       ჟი ე̄რ ენცხე ბე̄რია̄ნდ, სადილდ ფურს იზბჷდა ივახშამდ -- ჴანს.
Line of edition: 34    მიჩა დი̄ჲმუ ხვა̄ჲ ჯოგარე პატრონ ლასხ, დე̄მთე ითნახ ბე̄რია̄ნა
Page of edition: 88  Line of edition: 1    ლი ზობს, მარა ქერ აჩადხ ზაჲარ, სგა ლეხშდახხ ჯოგარ. ჟი ლეგნა̄ლ
Line of edition: 2    ხა̄და ბე̄რია̄ნს ი ქა ლექა̄ბი აგიხენქა. შიდ ესყედნე ჲეშდჲერუ თეკვ.

Line of edition: 3       აჩად ი ეშხუ აგის სგა ლეხბურა̄ნ, ამეჩუ ხეწად ლეგვე̄რს, ლეგვე̄რისა
Line of edition: 4    ზურა̄ლ ესხვი̄და, ჩვადღა̄ნვე ეჯი, ეშხუ თეკვ ჩოსცვირ ი
Line of edition: 5    ჩოსმახა̄ლე:
Line of edition: 6       -- მიჩა ლიყუ̄ლი ლოქ ე̄რ ათსჷ̄ნდეს, ეჩქა ალ თეკვ ქა̄ვ ლახო̄მ
Line of edition: 7    მიჩა გეზალს ი ანზჷზე̄ვ ეჩხა̄ვ, იმხენი̄ ლოქ მიჩა ჲერ ისმო̄ლდეს.

Line of edition: 8       ამჟი მე̄რმა ლეთ ჩომინ, მესმა, მო̄ვშთხვა ი ჟაჩად
Line of edition: 9    ჲეშდჲერვნუნ.

Line of edition: 10       ეჩუნღო ბე̄რია̄ნ აჩად ხენწიფიშთე ი ჩოთო̄გა̄ნ მჷჯმაგი̄რდ. ხენწიფ
Line of edition: 11    ხეფრება̄ლ ბერია̄ნს ეჲჟი, ერე მიჩა ვეზრალსი̄ ეჯის ხახვჩი̄ნე.
Line of edition: 12    ლახთხამჷ̄ნდახ ალე ვეზრალს ბე̄რია̄ნაშდ ი ანსაქმეხ ამშა ქა ლიღრე.

Line of edition: 13       ეშხუ სემი ლჷთხუმ და̄ვს ხაგდჷ̄ნდა ხენწიფიშდ სემი საჯენ ზექ
Line of edition: 14    ი ვეზრალდ ენგონვეხ, ერე ბე̄რია̄ნს ლოქ ალ ზექი ლიჴდუნე ოსფაშდვა.
Line of edition: 15    ხენწიფდ ენჲერე ბე̄რია̄ნ ი ლეხჭოდდა:
Line of edition: 16       -- ხოფშვდჲელა ლოქ ე̄სა მიჩ ალე.
Line of edition: 17       -- დე̄სა ლოქ, მარა ალეს ლოქ ეში̄ ჟანსყე̄ჲნე. ქა̄ვ ლოქ ლახო̄მხ
Line of edition: 18    სემი ციცვი თხუმ, ეშხუ ქა̄ცი ქერ ი ნაფი̄ნ ნიც.

Line of edition: 19       ალჲარ მაგ შიდ ესყედნე ბე̄რია̄ნდ ი აჩად. ე̄რ აჴად და̄ვა ქორნუნ,
Line of edition: 20    სგე̄დსგიდდა ლაჴვრა̄ჲსა ი ქორს ჩჷესწვე̄ნე ჩუ ლჷრი̄კ ვოქრე
Line of edition: 21    ძვერო̄ლ, და̄ვს ჟი ხოხლა ბატკ ლემესიშდ ი ატყბი. ახფიშვდ ბე̄რია̄ნდ
Line of edition: 22    ციცვი თხუმ ძვე̄რას ი ძვე̄რად ლიგჷრჲალი ედბინე. და̄ვემ ხე̄ქვ
Line of edition: 23    ძვე̄რას:
Line of edition: 24       -- ჩუ̄ვ ედჩუმა̄ნ, ედო ყო̄რქა ლოქ ე̄რ ქა̄დკვა̄ნნე, ლაჴვრა̄ჲსა
Line of edition: 25    ლოქ სგა ლეტეხ ხე̄რი.

Line of edition: 26       აჯაღ ახფიშვდ ბე̄რია̄ნდ ციცვი თხუმ ძვე̄რას. აჯაღ ხე̄ქვ და̄ვემ
Line of edition: 27    ამჟი. მესმა̄მდი̄ ერ აჯაღ ხოჲახ ძვე̄რას ციცვი თხუმ ი ქე̄სგჷრჲალე,
Line of edition: 28    ხაფხიჭე და̄ვემ ი ქა̄დკვა̄რ ყო̄რქა. ქა̄მ ჟესფხიჭე ბე̄რია̄ნდ. ხოღლი
Line of edition: 29    და̄ვ ძვე̄რო̄ლს ი დე̄სა ანტახ. ეჩქა უცეფ ჟესფხიჭე ბატკს ი ჩუ ლალემ,
Line of edition: 30    ჟი ლახსგუ̄რდა ჩუხვ-კერტანს, შიდ ესყედნე ჲელჲა-ლემეს ი
Line of edition: 31    ქა̄ნქინე ყო̄რქა. სგა ლახხვი̄და სგობინ ბე̄რია̄ნ. ამნე̄მ ჩუხვ-კერტანს
Line of edition: 32    ქერ ოთშიდ, ჲელჲა-ლემესს ნაფი̄ნ ლიც ლახბიდ. და̄ვს ჩუ ლეჴედ
Line of edition: 33    ხა̄და კერტანხენჩუ ი სგა ხეძგარხ ეშხვა̄რ. ესბჷრგჲელეხ ი ჩვედნახე
Line of edition: 34    ბე̄რია̄ნდ. და̄ვემ ხე̄ქვ:
Line of edition: 35       -- ჩუ ლოქ ნომა̄ვ ადგარი ი მა̄ჲ ლოქ ხეკვდი, ეჩის ლოქ ხეჩო.
Line of edition: 36       -- ხელწიფიშდ ლოქ ე̄რ ზექ ხაგად, ჟი̄ვ ენცვე ი ანჴიდუ მიჩაცახან,
Line of edition: 37    ლახტის ბე̄რია̄ნდ.
Page of edition: 89 
Line of edition: 1       -- ალე თრუ̄ნყვს ე ჯეკვად, მანკვი თრუ̄ნყვს დეშ მე̄ქვარა̄? --
Line of edition: 2    ედსაკვრელე და̄ვემ.

Line of edition: 3       ჟენცვე და̄ვდ სემი საჯენ ზექ ი ანჴიდ. ერ ლოხჷმფე̄დვრეხ ხენწიფი
Line of edition: 4    ლაზგას, ვეზრალდ ხახე̄ნეხ ხენწიფს, ერე ბე̄რია̄ნ ლოქ ანღრი.
Line of edition: 5    ხენწიფდ მა̄დ ედჯირვე ი მჷხე̄ნას თხუმ ათქვიც.
Line of edition: 6       -- მინს ლოქ ოთღუპვახ მიჩა ბე̄რია̄ნ.

Line of edition: 7       ქედსგიდდა ყო̄რქა ი ბე̄რია̄ნ გაცხაჲდ ანღრჷ̄და ი და̄ვაშვდ ზექ
Line of edition: 8    ჟი ხო̄ცვდა. ალეს ე̄რ ხეწად ხენწიფ, ათხი̄დჷ̄ნდა ი ამჷნღო აჯაღ ხოშა
Line of edition: 9    ხალტჷ̄ნ ბე̄რია̄ნ.

Line of edition: 10       ვეზრალდ აჯაღ ენბინეხ ბე̄რია̄ნაშჟი ლაცდავია გვეში ლისქმე
Line of edition: 11    ი აჯაღ ათზჷზა̄ლვნეხ ჩიქ უსგვა ლჷთხუმ, ეჩჷნღო ჲეშდჲერუ
Line of edition: 12    ლჷთხუმ და̄ვაშთე, მარა ბე̄რია̄ნ ჩი̄ხენ ჟახი̄რიანდ ანტახ. ერ დოსსამა
Line of edition: 13    ოხჴჷრჴეხ, სერ ჟი̄ვდ ოხგონვეხ, ვითამ ბე̄რია̄ნს ლოქ ოსბაქა, ერე
Line of edition: 14    ალელია̄ჲშ ი გალელია̄ჲ ლახვისა ლოქ ე̄რ ტაიჭ-საღარ არი, ეჩს ი
Line of edition: 15    მიჩა ჲეშდჲერუ ნათსავს ჩი̄ს ლოქ ლჷრმს ოხჴიდე. ლეხჭოდდა ხენწიფ
Line of edition: 16    ბე̄რია̄ნს:
Line of edition: 17       -- გაცხაჲდ ლოქ ხო̄ქვა̄ ალე მიჩ?
Line of edition: 18       -- დე̄სა ლოქ ხო̄ქვა, მარა ალესი̄ ლოქ ჩვი̄ჩო, ოღონდ ქა̄ვ
Line of edition: 19    ლოქ ლახო̄მხ ჲეშდჲერუ კამბეჩი გვე̄რე, ჲერუ ფუთ ჯიმ ი ჲერუ
Line of edition: 20    ფუთ ქერ.
Line of edition: 21       -- ალე მაგ ჩუ ხოთხეხ ი აჩად ბე̄რია̄ნ, ალჲარცახან შიდ ესყედნე
Line of edition: 22    ლუსრმან ი კვეთხ. ჟი ე̄რ აჩად ლახვთე, ეშჩუ ლას ეშხუ ხოჩა
Line of edition: 23    სგიმ. ქა̄ჩად ბე̄რია̄ნ სგიმმჷყ ი ჟესშკა̄დე ჲეშდჲერუ გვე̄რე, ეშხვხენ
Line of edition: 24    ჯიმ აშიდ ი მე̄რმახენ ქერ, ჯეჲ ჟაჩად კო̄ლთხი ჲელვა - მეგემთეჟი.
Line of edition: 25    ქა̄ჩად კოჭო̄ლ ხანილ ი ანჴად ტაიჭ-საღარ, ესთხე̄ლდა სგიმს ი სგიმ
Line of edition: 26    ლჷშკა̄დ ესხვი̄და; სგიმ ე̄რ დოშ ლალჷ̄შ, ჯიმ ლალე̄მ, ხოშა ახფჷ̄ნდა,
Line of edition: 27    ქერ უდ ლალე̄მ, აჯაღ ხოშა ახფჷ̄ნდა. ესძგუმბი̄რა̄ლე ი ჟახგილ ეშხუ
Line of edition: 28    ტუფ, მე̄რმე დეშჲამ ახგილ ი სერ სგიმ დეშ ლალჷ̄შ. ესქინა̄ლე
Line of edition: 29    ეჩხა̄ვ-ამხა̄ვ ი აჯაღ ჯიმ ლალე̄მ. ერ დოსსამა ანჴჷრჴე ი მაფჷნშვ
Line of edition: 30    იდჷარო̄ლ, ქე̄სტუ̄ლე:
Line of edition: 31       -- ჲერვა̄ჲ ლოქ ღენ ჭაბუკვ ლი, ერე ჯიმი̄ ხო̄მნა, ქერი̄ ხო̄მნა,
Line of edition: 32    სგიმი̄ლი ჩუ̄ვ ლახა̄შ.

Line of edition: 33       ჟი ლოქ ე ლეჲსგურნე, ჩუ ლოქ ლახთუნნე, ბე̄რია̄ნდ ლახტუ̄ლე
Line of edition: 34    მეგემხენჩუ.
Line of edition: 35       -- ეზარ ლოქ, ტაიჭდ ლახტიხ.

Line of edition: 36       ჩვანჴად ბე̄რია̄ნ ი ჩუ ლახა̄შ კოჭო̄ლ სგიმი̄ლ; ჟი ლეჲსგურე
Page of edition: 90  Line of edition: 1    ტაიჭ-საღარდ ი ქა ლახზელა̄ლვნე. აჯაღ ჩუ̄ვდ ლახა̄შ სგიმ. ეჩუნღო
Line of edition: 2    ტაიჭ-საღარდ ხე̄ქვ:
Line of edition: 3       -- ჩუ̄ვ ოხქახ.
Line of edition: 4       -- ჩუ ლოქ დე̄მ ხოქხენი, ბე̄რია̄ნდ ლახტიხ.
Line of edition: 5       -- ე ლოქ დო̄მ ოხქეხნი, ე̄რ ლოქ ედჟუ̄ლი̄ნნე, დეცთე ლოქ
Line of edition: 6    ლახრიღვე.
Line of edition: 7       -- ჩუქვა̄ნ ლოქ ეხცა̄დი, ბე̄რია̄ნდ ლახტიხ.
Line of edition: 8       -- ჩუბო ლო ლახრიღვე.
Line of edition: 9       -- ჟიქა̄ნ ლოქ ეხცა̄დი.
Line of edition: 10       -- ლეჟა ლოქ ლახრიღვე.
Line of edition: 11       -- ჩვა̄ნ ლოქ ეხცა̄დი.
Line of edition: 12    -- ლექვა ლოქ ლახრიღვე.
Line of edition: 13       -- ჟა̄ნ ლოქ ეხცა̄დი.

Line of edition: 14       ე̄რ ენჟუ̄ლი̄ნე ტაიჭ-საღარდ, დეცთე ხეკვად ბე̄რია̄ნა ლირღვე,
Line of edition: 15    ბე̄რია̄ნ ჩუქვა̄ნ ეხცა̄და̄ნ; ჩუბო ე̄რ ხეკვად ლირღვე, ჟიქა̄ნ ეხცა̄და̄ნ;
Line of edition: 16    ლეჟა ე̄რ ხეკვად, ჩვა̄ნ ეხცა̄და̄ნ ი ამჟი, დეშ ანკვა̄რ ჩუ. ეჩქა ხე̄ქვ
Line of edition: 17    ტაიჭ-საღარდ.

Line of edition: 18       -- ჩუ̄ვ ანჴად, ედო ე̄რ ლოქ ესსჷრტჷნნე, მიჩა ჲეშდჲერუ გეზალ
Line of edition: 19    მაგ ლოქ ამეჩუ ანჴდენიხ ი მიჩ ლოქ ჩვადგჷლჷ̄რნეხ.
Line of edition: 20       -- ჯეჲ ლოქ ე̄რ ესყუ̄ლნე, ბე̄რია̄ნდ ხე̄ქვ, მიჩა ჲეშდჲერუ გეზალ
Line of edition: 21    ლოქ ამეჩუ ანჴდენიხ ლჷთეკვდ ი მინს ჩი̄ს ლოქ ჩვადჷრმნეხ.

Line of edition: 22       ესსჷრტჷნე ტაიჭ-საღარდ ი ესყუ̄ლე ბე̄რია̄ნდ. ათსჷ̄ნდახ ტაიჭსაღარი
Line of edition: 23    გეზლი̄რს ი ათსჷ̄ნდახ ბე̄რია̄ნა გეზლი̄რსი̄.

Line of edition: 24       ათა-თათა-თათა̄ჲ, ოხჩაშხ ბე̄რია̄ნა გეზლი̄რ, ანჴადხ ტაიჭ-საღარი
Line of edition: 25    გეზლი̄რი̄. ჩვადლაბნეხ ტაიჭ-საღარ ი მიჩა გეზლი̄რ ი ლაღრა̄ლუშ
Line of edition: 26    ანჴიდხ ხენწიფიშთე. ხენწიფს ძღჷდ ათხი̄დჷ̄ნ ი ბე̄რია̄ნს აჯაღ
Line of edition: 27    ვეზრალდ ხოშა̄მ ხეფრება̄ლ.

Line of edition: 28       აჯაღ ხოშა̄ვდ ლახუვშგედჷ̄ნხ ვეზრალს ბე̄რია̄ნა ჩუ ლისგვბე
Line of edition: 29    ხენწიფი ყო̄რჟი ი აჯაღ ჟი̄ვდ ოხბინეხ ლიგნოვა̄ლ. ხენწიფს ხე̄ქვხ:
Line of edition: 30       -- ბე̄რია̄ნს ლოქ ოსბაქა, ერე ჟი̄ვ ანსყეხ ხოშე̄რება ცხვად,
Line of edition: 31    ჟი̄ვ ანგოშლეს ლჷჯავშვ ი ჟი̄ვ ანფი̄ნეხ. ჯეჲ ი მიჩა ტაიჭ-საღარ
Line of edition: 32    ეშხვხენჩუ ლოქ ე̄რ ჩვადრიხ ალ ცხვადთე̄ჲსა, მე̄რმახენჟი ლოქ ჟანტხენიხ
Line of edition: 33    უთჷნკირდ. ხენწიფ ლეხჭოდდა ბე̄რია̄ნს:
Line of edition: 34       -- ხო̄ქვა ლოქ ე̄სა მიჩ ალე?
Line of edition: 35       -- დე̄სა ლოქ ხო̄ქვა ი მა̄ჲ ლოქ ხოხალ, ე ლოქ მოშ იჩო.

Line of edition: 36       აჩად ბე̄რია̄ნ ი რაშს ლეხჭოდდა. რაშემ ხე̄ქვ:
Page of edition: 91 
Line of edition: 1       -- ნომა̄ვ ლოქ ხაყლუ̄ნი, ადჲე̄ვ ლოქ ჯეჲ ი ეშხუ ნაგზი სგა̄ვ
Line of edition: 2    ლახბე ვოლს ი ეჩღო მიჩ ლოქ ხოხა̄ლღეს.

Line of edition: 3       ბე̄რია̄ნდ ხელწიფს ჟახმეჴრა̄ლვნე, ერე ჟასყი ალ გვეშს. ადჲე
Line of edition: 4    გაცხაჲდ რაშ ი სგა ლახბე ვოლს, ჯეჲ ანტახ აგითე. ხენწიფს
Line of edition: 5    ჟახსყევა̄ლვნე ქორზუმ ცხვად ი ჟახგოშლა̄ლვნე ლჷჯავშვ ი ჟახფი̄ნა̄ლვნე.
Line of edition: 6    ამზუმხანისა რაშ ვოლს იზბჷდა. სერ ჟი ლახსგუ̄რდა ბე̄რია̄ნ მიჩა
Line of edition: 7    რაშს ი სგა̄დსკინეხ ცხვადთე̄ჲსა. რაშდ ალ ვოლ მაგ ჟანტიხ ცხვადისა
Line of edition: 8    ი ჩვადქვე̄ლე ლჷჯე, ცხვადი მე̄რმა პილლეჟა ჟანტახხ ჲერქე̄და
Line of edition: 9    უთჷნკირდ. ქე̄რ ანჴადხ ქა̄მენჩუ, ისგჷნჟი ჲერქე̄და ვოქრ ლასხ ი
Line of edition: 10    ისგჷნჩუ -- ვერცხლ.

Line of edition: 11       ლახთხამჷ̄ნ ალე ხენწიფს, ჟახფი̄ნალვნე მახან ლჷჯე ი სგა̄ჩადხ
Line of edition: 12    ჯეჲ ი მიჩა ჩა̄ჟ, მე̄რმახენჟი ჯიჯვარ გარ ანტახხ. ჩოსსად ხენწფოგ
Line of edition: 13    ბე̄რია̄ნს ი მიჩა ამახვ ვეზრალ მაგ ქა̄დრეკლე ი ჯამზჷრახ ღერთემ.


სოსლან ონიანი. სასაში. ა. ონიანი. 4. VIII. 1958



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.