TITUS
Svan Prose Texts IV (Lashkh)
Part No. 68
Previous part

Text: 68 
Page of edition: 91 
Line of edition: 14 
LXVIII. გიორგი


Line of edition: 15       ლჷმარდე̄ლიხ ეშხუ ჲეხვ-ჭაშ. ზურა̄ლს ქა̄ხთენე̄ნა ჭყინტ. ალეს
Line of edition: 16    ძღჷდ ბჷგი მა̄რე ახფასე̄ნა.

Line of edition: 17       იმე̄ჲ ეჯჲარ იზგჷდახ, ეჩე ლას უდუმბურ ცხეკ. ალ ცხეკს დეშდვარ
Line of edition: 18    ხემთქვა̄ნხ ი ეჩხა̄ვ ლი̄ზის დეშერ აბდავდა. ეშხუ ლადეღ გიორგი
Line of edition: 19    აჩად ეჯ ცხეკთე ზექი ლაჴდად. ჴანარ ჩვაფიშვდ ლაბლახდ ი
Line of edition: 20    მიჯნე̄მ ენბინე სევჟი ზექი ლისყი. სევ ე̄რ ჟოსსყე, აჩად ჴანარე
Line of edition: 21    ლათხე̄ლთე, მარა დე̄სა ახხვი̄და. ღოშდ ლატეხჟი ჴანარე აკვდარგარ
Line of edition: 22    ახხვი̄და, ესრენ ჩოთგავლახ დეშდვარს. სევმოყ ე̄რ ქა̄ნჴად, დეშდვარსი̄
Line of edition: 23    ქა ხეწად, სგა ხაფხიჭე ეჯჲარს შტიმრა̄ლისა, ჟესგე უ̄ღვა ი სგო̄ხბე
Line of edition: 24    სევს. ჯეჲ ჟესგუ̄რდა სევჟი ი სგე̄რ ადჲე სოფელთე, ამეჩუ ჩი̄ს
Line of edition: 25    ჟახყალუ̄ნდა ი მაგ ჩვესპაჟვხ ქორს. ეჩუნღო გიორგიდ ჟანკუ̄ლთხანა̄ლე
Line of edition: 26    დეშდვარ ი სგა̄შიდ ლახმი̄რთე. ლჷკუ̄ლთხანე დეშდვარ ქა
Line of edition: 27    ხაწვე̄ნე ხალხს. ხალს ეშ ინა̄ქვა̄ლდა, -- იმჟი ლოქ ოთჷრმა ჲედ
Line of edition: 28    ოხკუ̄ლთხანა დეშდვარ. მე̄რმა ლადეღ ჩოთჩად დეშდვარ. სერ ეჩუნღო
Line of edition: 29    ქე̄დქა̄ბე ი აჩად მე̄რმა ქვეყანათე, ამი ესრენ და̄ვარ გარ იზგეხ.
Line of edition: 30    სგა̄ჩად გიორგი ეშხუ ქორთე, აგის და̄რ ოსხვი̄და ი ჩვადყუ̄რდა ლაყვრაჟი.
Line of edition: 31    ამჟი ანჴადხ და̄ვარ, გიორგის ე̄რ ქა ხეწადხ, ჟახყალუ̄ნდახ
Line of edition: 32    ი ეშხვა̄რ ხე̄ქვხ:
Line of edition: 33       -- აქა̄ნი̄ვ ლოქ ოხკიდხ გიორგის.

Line of edition: 34       შის ერ ეხბი̄შდა და̄ვ, გიორგიდ ეჲჟი ოხთჷლჷ̄რე ტოტისა, ერე
Line of edition: 35    და̄ვ ყუ̄ლ-ყუ̄ლდ აფაშგ.

Page of edition: 92 
Line of edition: 1       ამუნღო სერ გიორგი დავარცახან იზგჷდა. ამჟი̄ნენ ალ და̄ვარს
Line of edition: 2    ლიცვა̄ლ ოხბინეხ მე̄რმა ქვეყნი და̄ვარდ. ლაცვა̄ლთე ერ
Line of edition: 3    ესღრჷ̄დახ, და̄ვარდ გიორგის ოსმახა̄ლეხ:
Line of edition: 4       -- ერ ლოქ ესწგხახ მიჩაში, რაშს ლოქ ოხზჷზნეხ ი აჩადუ ჯეჲი̄
Line of edition: 5    ლაცვა̄ლთე.

Line of edition: 6       გაცხაჲდ ოხზჷზეხ რაშ, ჟი ლახსგუ̄რდა ალეს გიორგი, ხაჴიდ
Line of edition: 7    მადრაჴ ი ეჯკალიბ ჩქა̄რდ ედჭმა̄ნდვნა̄ნ, ერე გიმს ხექვცენო̄ლ.
Line of edition: 8    გიორგისი̄ ჟახყალუ̄ნდა, -- ჩუ ლოქ დო̄სა ანკვა̄რის, -- ი
Line of edition: 9    ჩვადცხჷპჷ̄რე რაში ჴადჩუქვა̄ნქა ჭიშხარ ი სგო̄ხთჷლჷ̄რე ბჷგიდ.
Line of edition: 10    ამჩიქს რაშ ქა ხეწად ხოშა მინდორისა წიფს ი ესფიქრე:
Line of edition: 11    -- ქა ლოქ აჲეს ეჯ წიფი ჩუქვა̄ნქა, არგებს ლოქ ქა მოშ ედყულას
Line of edition: 12    ალ მა̄რე.

Line of edition: 13       ქე̄რ აჩადხ ფე̄დჲათე, გიორგიდ სგა ხაფხიჭე ი ჟახყვიფ წიფ.
Line of edition: 14    ალეს ე̄რ და̄ვარ ხეწადხ, ეშხვა̄რე თხუმჟიქა̄ნქა ლასკნუშ ედი̄ტვა̄ნხ
Line of edition: 15    მიჩა და̄ვარე მეცვა̄ლუ. ეჩუნღო სერ მიჩა და̄ვარდ გიორგი
Line of edition: 16    ჩვადგენეხ მინე ხელწიფდ ი ხა̄დახ ხოჩა ლირდე ი ჯამზჷრას
Line of edition: 17    ღერთემ.


შოთა ონიანი. სასაში. ა. ონიანი. 5. VIII. 1960



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.