TITUS
Svan Prose Texts IV (Lashkh)
Part No. 69
Previous part

Text: 69 
Page of edition: 92 
Line of edition: 18 
LXIX. გურამ ი გეგი


Line of edition: 19       ა̄რდა ეშხუ ხელწიფ, ჩუ ხეყე̄და მახე ნაშგომ ჲეხვ. ამ დროჲჟი
Line of edition: 20    ჟენბინა̄ნ ლიცვა̄ლ. ხელწიფ ერ ლაცვა̄ლთე ესღრჷ̄და, ჲეხვ აგის
Line of edition: 21    ღა̄ნავ ხოსდენო̄ლ. ჩოსმახა̄ლე ხელწიფდ მიჩა ჲეხვს:
Line of edition: 22       -- ჭყინტ ლოქ ე ეხთენე̄ნდეს, ჟი̄ვ ესჟახეხ გურამ.

Line of edition: 23       ზურა̄ლს ქე̄ხთენა̄ნ ნატყვბარალ -- ჲერუ ჭყინტ. ჟესჟახეხ გურამ
Line of edition: 24    ი გეგი.

Line of edition: 25       ხელწიფს ოთზგზეხ ბაჟი̄ნ ი ოთმახა̄ლეხ:
Line of edition: 26       -- მიჩა ჲეხვს ფეკვნარ ლოქ ახთენე̄ნა ი ქა ლოქ ოთში̄დახ.

Line of edition: 27       გურამ, გეგი ი მინე დი სგა̄დგენეხ კიდბონთე̄ჲსა ი სგა̄დკვა̄რხ
Line of edition: 28    ნიცთე. ნიცემ სგა̄დჲე ძუღვათე. ამეჩუ ხაჴიდ გეგიდ თხუმ კიდბონს
Line of edition: 29    ი ჟანძგვიბ. გურამ ეშხუ პილთე აჩად ცურავშვ, გეგი -- მე̄რმათე,
Line of edition: 30    მინე დი̄ლჷ̄ლ ღალ ჩვედშგუდა̄ნ.

Line of edition: 31       გურამ ცხეკთე აჩად, ამი̄ ნთხვიარე̄ლს ადგარი ი ეჯნოვშ ისე̄ლვე
Line of edition: 32    თხუმს. ეშხუ ლადეღ გურამს ლეხჴე̄დვნა̄ნ ეშხუ მინდორთე, ალ მინდორისა
Line of edition: 33    ჩვა̄რდა ჩა̄ჟ. ჩვადჷრმე ი ჟი ლახსგუ̄რდა. აჩად ძუღვა̄ პილთე,
Line of edition: 34    ამეჩუ ნავისა ჩვარიხ ჩხარა ლახვბა. გურამდ ჩა̄ჟ ჩვესბე ძუღვა̄
Page of edition: 93  Line of edition: 1    პილჟი ი ჯეჲი̄ სგე̄სგუ̄რდა ნავთე ალჲარცახან. ეშხვუნღო ჩომინ
Line of edition: 2    ბუქვ ი ალჲარე ნავ ქა̄დსიპე. გურამ ქა̄ნჴად ეჯ პილთე, იმე̄ჲ ჩა̄ჟ
Line of edition: 3    ხო̄ბდა, მიჩა ლა̄ჲფხნიკა -- ჩხარა ლახვბა -- მაგ ჩოთთვაფ.

Line of edition: 4       გურამ ჟი ლახსგუ̄რდა ჩა̄ჟს ი აჩად, ლეხჴე̄დვნა̄ნ ეშხუ კოჯმოყ.
Line of edition: 5    -- ჲაღო ამელეჟა დეშ ლოქ ღჷრიხ მინ, -- ჩა̄ჟდ ხე̄ქვ გურამს,
Line of edition: 6    -- ხაჴიდუ ლოქ მადრაჴ ი ჟი̄ვ ახტყვიფ შიყჟი კან, ლჷტყვი̄ფ
Line of edition: 7    აგის ლოქ ჟი̄ვ ესშიდ ეშხუ ფუთ ჯიმ, სერ ნამწროშ ჟი ლოქ
Line of edition: 8    ასკვფხენი კოჯი კეცხთეჟი.

Line of edition: 9       ჩუ ჩომინ ამჟი გურამდ. ერ ანსკინე ჩა̄ჟდ, კოჭო̄ლუ̄ლ ესკვად
Line of edition: 10    კოჯი კეცხნუნ ი ეშჩუ ნაკი̄ლისა ჟი ხოჲახხ. ამხენქა ლა̄ზ დე̄მთე
Line of edition: 11    ხა̄რხ. ჩა̄ჟდ ხე̄ქვ:
Line of edition: 12       -- ჩუ̄ვ ლოქ ადძიე ჯეჲ ი სგა̄ვ ლოქ აჩად მიჩა ფაშთე̄ჲსა. კოჯი
Line of edition: 13    კეცხჟი არწივს ლოქ ხუა ლაცინდულა. ხემა̄ჲ ლოქ ესწვე̄ნნე, არწივ
Line of edition: 14    შიშდ ფაშს ლოქ აჲეს ჟი.

Line of edition: 15       დე̄მ იჩმჷდა გურამ, მარა ჩა̄ჟდ ძალავშვ ათძია̄ლვნე ჩუ მიჩა
Line of edition: 16    თხუმ. სერ სგა̄ჩად გურამ ჩა̄ჟი ფაშთეჲსა. გაცხაჲდ ანჴად არწივ ი
Line of edition: 17    ჟადჲე კეცხაშ ფაშ. ჩუ ე̄რ ანტახ არწივ, გურამ ქა̄ნჴად ფაშხენქა,
Line of edition: 18    ენბინე ლი̄ზი ი სგა ლეხჴე̄დვნა̄ნ ხელწიფი ქორმოყ. ხელწიფდ ხე̄ქვ
Line of edition: 19    მიჩა ჯარს:
Line of edition: 20       -- ჩუ̄ვ ლოქ ადგარხ ალ მა̄რე.

Line of edition: 21       მარა გურამ ლახა̄და ი ჟანხვიტ თელდ ჯარ. ეჩქა ხელწიფდ
Line of edition: 22    ქა̄ნჴიდ მიჩა ხამარე მჷლდეღ ი სგა ხაფხიჭეხ ეჯნე̄მ ი გურამდ ეშხვა̄რ.
Line of edition: 23    ენქიო̄ლე ხამარე მჷლდეღდ ი სგე̄სციყ გიმთე̄ჲსა გურამ ღულა̄ჲ
Line of edition: 24    თხუმნუნ, ენქიო̄ლე გურამდ ი სგე̄სციყ ფურსკვალნუნ. ენქიო̄ლე
Line of edition: 25    ეჩქა მჷლდეღდ ი სგე̄სციყ ლალა̄რტყი̄ლნუნ. ენქიო̄ლე გურამდ
Line of edition: 26    ი სგე̄სციყ ღულაჲნუნ. ენქიო̄ლე ხამარე მჷლდეღდ ი სგე̄სციყ ყიანუნ.
Line of edition: 27    ჟესწა̄ნე, მჷლდეღდ ხმალ ი ხაქვცუდა თხუმს. ეჩქა გურამდ
Line of edition: 28    ესკი̄ლე:
Line of edition: 29       -- ატ საბა, იმე ლოქ არი მიჩა მუხვბე გეგი!


Line of edition: 30       ესრენ გეგი ალე ლჷმა̄რ ა ხამარე მჷლდეღ. ჩვათირხ ლახვბად
Line of edition: 31    ეშხვა̄რე თხუმ, ჟახყვიფ გეგიდ გურამ ი ჩვედყა̄ლა̄ნხ. ხელწიფ ჩვანკვა̄რხ
Line of edition: 32    ტახდხენხჩუ ი მინდ ენბინეხ ხელწფობ ქა იშგმინხ ხოჩა ლა̄ჲხვა.
Line of edition: 33    ეჩჷნღო ეჩე მა̄დ ადცგა̄ნხ ი ანჴადხ აგითე. მინე მუს ეჲზუმ ჩაჩ
Line of edition: 34    ხუღვა̄ნ ლჷფი̄შვდ, ერე ხამარ იყვნო̄ლხ ეჩეჟი. მუს მაგ ქო̄ხო̄მბვეხ
Line of edition: 35    ი ხოჩა̄მდ ჩვადწაბუ̄რეხ ი ხა̄დახ ხოჩე̄რება ლირდე. ჯამზჷრახ
Line of edition: 36    ღერთემ.



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.