TITUS
Svan Prose Texts IV (Lashkh)
Part No. 78
Previous part

Text: 78 
Page of edition: 106 
Line of edition: 4 
LXXVIII. ხოხრა მუხბო̄ლ


Line of edition: 5       ლჷმარდე̄ლიხ სემი ღარიბ ლახვბა, ხო̄ქვახ ეშხვა̄რეშდ, ერე
Line of edition: 6    აჩადხუ ლოქ ლაჯმაგი̄რდ იმთვა̄ლათე. კოჭო̄ლ თეთრი̄ლს ლოქ
Line of edition: 7    ითხელნეხ. აჩად ხოხრა მუხბო̄ლ. იზელა̄ლ, იზელა̄ლ ი ეშხუ აგის სგა
Line of edition: 8    ლეხთხანა̄ნ ბაპო̄ლს. ქა ლეხჭოდდა: -- მჷჯმაგი̄რ ლოქ ხაწჷხ ე̄სა? --
Line of edition: 9    ა̄დუ ლოქ, ბაპო̄ლდ ხე̄ქვე. -- ჲაღო ჩუ̄ვ ლოქ ედრიგვა̄ნხ. ლიჯმაგირი
Line of edition: 10    ვადა ლოქ ყიფუ̄ ლიჴდა̄ლნუნ ლე̄სეს. ეჩქად ლოქ ე ჯეჲ ჩვადჷმჯა̄რვნე,
Line of edition: 11    ნაჯმაგი̄რ ლოქ ჩუ ლეცვრე ხე̄რი. მიჩ ლოქ ე მოშ ადჷმჯა̄რვნე,
Line of edition: 12    ეჩქა ნაჯმაგი̄რ ქა ლევდი ლოქ ხე̄რი. ჟენბინე ლიჯმაგი̄რ
Line of edition: 13    მოჯმაგი̄რო̄ლდ. ეშხუ ლადეღ ბაპდ მოჯმაგი̄რო̄ლს ლალდეღთე ათყევნე
Line of edition: 14    ჩა̄ჟი ჯოგ. -- ეჲჟი̄ვ ლოქ ადბიზე, ერე ნებოზს ლოქ ე̄რ ანღრჷ̄ნიხ,
Line of edition: 15    მიჩ ლოქ ე̄რ ხე̄ცვნა̄ლდეხ. -- ეზარ ლოქ ი ადჲე ჩა̄რ ლალდეღთე,
Line of edition: 16    ნებოზს ჩი̄ს ჟახქვიც თვით პილ ი ოთჴიდ ბაპო̄ლს ი ლეხჭოდდა:
Line of edition: 17    -- ხე̄ცვნა̄ლხ ლოქ მო? -- ა̄დუ ლოქ. -- ხასდიკ ლოქ მა? -- მა̄მა ლოქ.
Line of edition: 18    მერმე ლადეღ ათყევნე დაჴლარ: -- ეჲჟი̄ვ ლოქ ადბიზე, ერე ნებოზს
Line of edition: 19    ლოქ ე̄რ მადლობას ხაყლჷდეხ. ანჴად მოჯმაგი̄რო̄ლ ი ნებოზს ჩი
Line of edition: 20    დაჴჷლს ქა̄თყვიჩ თვით ჭიშხ. ნებოზს ლეხჭოდდა: -- ხაყლეხ ლოქ
Line of edition: 21    მა მადლობას? -- ა̄დუ ლოქ. -- ხასდიკ ლოქ მა? -- მა̄მა ლოქ. მესმე
Line of edition: 22    ლადეღ ათყევნე ხამარ: -- ეშხუ ბოგჟი ჩუ ლოქ ეთჯინავი ხამარ,
Line of edition: 23    ვოდ ლოქ დო̄მ ლეხყაი ქა. გაცხაჲდ ეშხუ ბოგჟი ჩვეთჯინავა̄ნხ ხამარ.
Line of edition: 24    ანჴად მოჯმაგი̄რ ი ჟენკიდ ფა̄უ ი სგა̄შიდ ნიცთე. ხამარ ანტახხ
Line of edition: 25    აგითე. მოჯმაგი̄რს ლეხჭოდდა ბაპო̄ლ: -- მაჲ ლოქ ხოჩმი̄ნა? -- მა̄
Line of edition: 26    ლოქ ემჩედხ ბოგქა ხამარ ი სგა ლოქ ოთში̄და ნიცთე, ხასდიკ ლოქ
Line of edition: 27    მა? -- მა̄მა ლოქ, -- ხე̄ქვ ბაპო̄ლდ. ეჩანღო ანჴად ბაპო̄ლა დი ი
Line of edition: 28    ჟაჩად გაკთეჟი, ტუ̄ლი ყიფუს. ბაპო̄ლდ ქე̄დქინე მოჯმაგი̄რო̄ლა ვოთახთე
Line of edition: 29    ი ხე̄ქვ: ყიფუ ლოქ ემჴედ, დროჲ ლოქ ლი მიჩა ლი̄ზი̄შ.
Line of edition: 30    მოჯმაგი̄რო̄ლდ ჟესფხიჭე თოფს. -- ჲაღო ეჯი ყიფუს ჩუ ლოქ ანკვა̄ნნე
Line of edition: 31    ი ეჩანღო ლოქ ადრი. ჩვანკვა̄რ ყიფუ გაკხენჩუ. აღმოჩნდა ბაპო̄ლა
Line of edition: 32    დი. ბაპო̄ლდ ლექვ: -- ალე ლოქ მინსი̄ ჩვადგარი. ქა ლიქა̄ბი
Line of edition: 33    ხეკვად. ანჴად მოჯმაგი̄რო̄ლ ი სგა̄ჩად ცხიკა̄ლთე ი ჟიქა̄ნ ლავაშარ ესშიდ.
Line of edition: 34    ჟენცვე ბაპო̄ლდ ცხიკა̄ლ ი ქედქა̄ბე. ეშხუ ნიცე პილჟი ჩვადჷ̄გა̄ნ.
Page of edition: 107  Line of edition: 1    ჟანჴად მოჯმაგი̄რო̄ლ ცხიკა̄ლხენჟი. ანჴად ბაპო̄ლ ი ნიცე პილხენ
Line of edition: 2    მოჯმაგი̄რო̄ლ ადყვინე. ხეკვად, ერე ოთქიო̄ლა̄ნ, მარა ბაპო̄ლა
Line of edition: 3    ჲეხვს ე̄რ ხაგდჷდ, ეჩქა ბაპო̄ლა ჲეხვ ნიცხენ ადყვინე, ჯეჲ ამხენ
Line of edition: 4    ადყუ̄რდა. ანჴად ბაპო̄ლ ი ოხგუდდა ნიცი პილჟი მერდას ი სგა
Line of edition: 5    ლეჲქიო̄ლე ნიცთე. -- მაჲ ლოქ ხოჩმი̄ნა? -- ლეხჭოდდა მოჯმაგერო̄ლ.
Line of edition: 6    ვა̄ჲ, ჯეჲ ლოქ აჯაღ ამეჩუ არია̄? -- ალჷ̄მჯა̄რვე̄ლი ლოქ ე̄სა? --
Line of edition: 7    ა̄დუ ლოქ -- ხე̄ქვ ბაპო̄ლდ. ამჟი ახწინდა მოჯმაგი̄რ ბაპო̄ლს.


ჯაბა დონღვანი. სასაში. მ. ქალდანი. 12. IX. 1971



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.