TITUS
Svan Prose Texts IV (Lashkh)
Part No. 79
Previous part

Text: 79 
Page of edition: 107 
Line of edition: 8 
LXXIX. კაჟიან და̄ვ


Line of edition: 9       ლჷმარდე̄ლი ეშხუ მა̄რე, ეჩა ჲეხვს ბობშ მა̄დ ახთენე̄ნა. ემჩედელი
Line of edition: 10    მჷრა̄მთე, -- მიჩა ნა̄თი ღე̄რბათს ლოქ ათვე̄ლე. შუკვჟი სგა
Line of edition: 11    ლახხვე̄ნა ეშხუ ზურა̄ლ. ალე ლახჭოდნე̄ნა:
Line of edition: 12       -- იმთე ლოქ ესღრი?
Line of edition: 13       -- ბობშ ლოქ მა̄ ლახვოდე̄ნა ქა ი მიჩა ნა̄თი ღერბათს ლოქ
Line of edition: 14    ათვე̄ლე.

Line of edition: 15       -- ჯეჲ ლოქ ლახო̄დი უსკვს, ხე̄ქვ ზურა̄ლდ, ჩუ̄ვ ლოქ ლალე̄მ
Line of edition: 16    მიჩა ჲეხვდ ი ქა ლოქ ეხთენი ჭყინტ.

Line of edition: 17       ქა ლოხვოდა ალ ზურა̄ლს უსკვ, ოთჲა მა̄რო̄ლს ი ჩუ ხო̄მნა მიჩა
Line of edition: 18    ჲეხვეშდ, ალეს ქა̄ხთენენა ჭყინტ (ჟახე მა̄მა მაშყიდ, ჟელჟახნედ
Line of edition: 19    შიშდ იმვა̄ლა̄მ, მაჲ ხოჭირს, ჟელჟახად ბჷლათ).

Line of edition: 20       ეშხუ ზაისა ალ ჭყინტ ხოშე̄რება ალჷრდე̄ლი. ამჩიქს ხელწიფიშვდ
Line of edition: 21    კაჟიან და̄ვს ოთქვითა დი̄ნაგეზალ. ეჩქა ხელწიფს ხო̄ქვა:
Line of edition: 22       -- ჲარი̄ ლოქ მიჩა დი̄ნას ენტიხე, ეჩის ლოქ ათყევნი ჲეხვდ.
Line of edition: 23    ემჩედე̄ლი ბჷლათ მიჩა ჩა̄ჟშვ, ქე̄მჩედე̄ლი ძუღვაქა ი ლახჴე̄დვნე̄ნა
Line of edition: 24    და̄ვა ქორმოყ. და̄ვს ხაგდინა, დი̄ნა დე̄ფანჟი ლჷმბა̄ნდა̄ლინ.
Line of edition: 25    ჩოსბა ჩა̄ჟ ი ქე̄მჩედე̄ლი დი̄ნა̄შმოყ. ერ ხაკვდა ეჩა ლიჴდე, ეჩქა ოხბინა
Line of edition: 26    და̄ვა ჩა̄ჟს ლიჭიხვინი ი ჟოხწკვიპვნა ბჷლათი ჩა̄ჟიშვდ ი ჩოთო̄ტვნა.
Line of edition: 27    ალეს ერ ბჷლათ ხაწდა, ქა̄ხღვეჭა ღოშგინ. ჩა̄ჟს ერ ძუღვთეჲსა
Line of edition: 28    ოთსკინა, ეჩქა ბჷლათს სგა ხოფხიჭა აკვედისა ი ქო̄ხტი̄ხა ალ
Line of edition: 29    ჩა̄ჟს ამხენთე.

Line of edition: 30       სერ ბჷლათ ემჩედე̄ლი ეშხუ მა̄რათე ი ლახჭოდნე̄ნა:
Line of edition: 31       -- იმჟი ლოქ ხაკვჩერ ანჴჷდას ეჯ დი̄ნა?
Line of edition: 32       -- იმჟი ი, ხო̄ქვა ეჯ მა̄რას, კოჯარე ნე̄სგა ლოქ არი ეშხუ ჩა̄ჟ,
Line of edition: 33    ეჩა კოკინო̄ლუ ლოქ ანჴიდ, ჟი̄ვ ლოქ ენჷრდე ი ეჩუნღოგარუ აჩად
Line of edition: 34    ეჯ დი̄ნათე.

Page of edition: 108 
Line of edition: 1       ემჩედე̄ლი ბჷლათ გაცხაჲდ, ოხჴედა კოკინო̄ლ, ჟოხჷრდა ი ემჩედ
Line of edition: 2    დი̄ნა̄ ლაჴდად. და̄ვა ქორნუნ ერ ემჴედ, ჩა̄ჟ მა̄მა ოსბა ჩუ. დი̄ნა
Line of edition: 3    ერ ახყე̄ნა, ოხბინა და̄ვა ჩა̄ჟს ლიჭიხვინი. ეჩქა ბჷლათი ჩა̄ჟს ხოჩდა
Line of edition: 4    ეჩაშდ იშთხვარ. ეჩღო ჟი ლახსგურე̄ნახ ჩა̄ჟს ი ქახგენე̄ნახ ძუღვაქა.
Line of edition: 5    ამჩიქს ქე̄მჲეცხე̄ლი კაჟიან და̄ვ ი ახჭემა ღოშგინ. ერ ხაჲა̄ლნა, ჟი
Line of edition: 6    ლახსიპნე̄ნა ბჷლათ. ლჷმცუა̄ლინხ, მარა ეჩქა ჩოთკარა ხოშე̄რება.
Line of edition: 7    ჴარჴ და̄ვს ჩუ ლაყლეპდ, მარა უცეფდ სგო̄თსკინა ჩა̄ჟს ეჩა ჴარჴლექვა,
Line of edition: 8    ხოჩდა სგა̄ნ იშთხვარ ი ჩოთდაგრა ალ და̄ვ. ბჷლათს ოთჲა დი̄ნა
Line of edition: 9    აგითე, ხელწიფს ქო̄თყევნა ეჯი ჲეხვდ, ხოჩმი̄ნახ ძღჷდ ქორწილ,
Line of edition: 10    ხა̄რე̄ნახ ხოჩა ლირდე ი ჯამზჷრახ ღერთემ.


ტარიელ ონიანი. სასაში. მ. ქალდანი. 13. IX. 1971



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.