TITUS
Svan Prose Texts IV (Lashkh)
Part No. 81
Previous part

Text: 81 
Page of edition: 111 
Line of edition: 1 
LXXXI. ჲერუ ზურა̄ლ


Line of edition: 2       არი ამეჩუ ეშხუ ხელწიფ, ძღჷდ ხოჩა̄მდ ხაშდბა მიჩა სახენწიფი
Line of edition: 3    გვეშარს. -- მიჩ ლოქ მაგ ხალატ, აჭკუარი, ჯეჲ ლოქ ხელტი̄
Line of edition: 4    მო მიჩა სახენწიფისა ჩი̄ს? იმჟი ლოქ ენმეჴრას ალე? ათხე ხელწიფდ
Line of edition: 5    ხე̄ქვ მიჩა ხალხს:
Line of edition: 6       -- ეშხუ ლე̄თ ჩუ̄ვ ადიგ მუტვარ მიჩა სახენწიფისა ჩი̄ემ, ჲესვა̄ჲს
Line of edition: 7    ლოქ ჯეჲ ხალტჷ̄ნდეს. სერ ჲესვა̄ჲს ხესსგი, მუტვარს ეჯი ლოქ
Line of edition: 8    გარ ანტვარნე.

Line of edition: 9       ჩი̄ს ქა ხე̄ქვხ ამშა სახენწიფისა:
Line of edition: 10       -- ბა̄ზი მუტვარ ნო̄რდუ ანტვარე. ჲერვა̄ჲ ლოქ ჟანტვარნე, ეჯი
Line of edition: 11    ლოქ ი̄რი ხელწიფი მომსისგ.

Line of edition: 12       ადზჷზე ხელწიფდ ხალხ ეჩა ლამჴერდ, ჲესვა̄ჲ ღენ ხოტვრა ჟი
Line of edition: 13    მუტვარ. ჩი̄ს ჩუ ლჷდი̄გ ხუღვა, მარა ეშხუ აგის, კოჭო̄ლ ქორო̄ლისა
Line of edition: 14    ჟი ტვარ მუტვარ. ედსგიდდახ სგა̄ნთე ი ქა ხეწადხ, ერე ჭაშ ჩვაყვრე
Line of edition: 15    ჲეხვე ღულა̄რისა ი ზურა̄ლ ხოსგდი. აჩადხ ი ქა ხე̄ქვხ ხელწიფს.
Line of edition: 16    ამნე̄მ ლე̄ქვ:
Line of edition: 17       -- ოხჴიდხუ ეჯ მა̄რე მიჩ.

Line of edition: 18       აჩადხ ი ოხჴიდხ. ხელწიფ ლეხჭოდდა:
Line of edition: 19       -- იმნარ ლოქ ხასისგ ჯეჲ, ერე ბა̄ზი მუტვარ ჟოხტვარა!

Line of edition: 20       ჯეჲ ლოქ დე̄სა ხასისგ, ნამეტანდი̄ ლოქ ხალატ, მარა ჯეჲ ი მიჩა
Line of edition: 21    ჲეხვ უსგვე̄შდი ჲერუ ლჷზაჲ ლოქ ლიხ ი ეჲჟი ლოქ ხალატხ უშხვა̄რე
Line of edition: 22    თხუმ, ერე უშხვა̄რ ლოქ ე დო̄მ ხოსგდჷნიხ ლე̄თნ ი ლადეღნ,
Line of edition: 23    ეჲჟი დეშ ლოქ გეჭნიხ.

Line of edition: 24       -- იმნარ ლოქ ხაკუჩ ეჯ მეჩი ზურა̄ლ, ხელწიფდ ხე̄ქვ, ჯეჲ ლოქ
Line of edition: 25    ხოშგმინნე ხოჩა ჲეხვს.

Line of edition: 26       ქა̄ნჴიდ ვეზირი ჲეხვ, ხოჩა თვალაშ ი ტანაშ. -- ალე̄ვ ლოქ ხა̄და
Line of edition: 27    ჲეხვდ ი ეჩის ქა̄ვ ეთყაჩ ე მეჩი ზურა̄ლს.

Line of edition: 28       -- მა̄ ლოქ ხა̄ჲმედა უსგვეშდიჲერუ ზაჲა მალატი ლიქრავი ი
Line of edition: 29    დეშ ლოქ ხოღლატი მიჩა ჲეხვს. აფიშდუ, ედო მა̄ ლოქ ხა̄ჲმედა
Line of edition: 30    ეჯნურ გეჭა.

Line of edition: 31       ანჩად ხელწიფ, ქა̄ვდ ხაწვე̄ნე მიჩა ჲეხვ -- დედვფალ. ალ მა̄რად
Line of edition: 32    აჯაღ ამჟი̄ვდ ხე̄ქვ:
Line of edition: 33       -- დეშ ლოქ აქრავი უსგვეშდიჲერუ ზაჲა ლილატს, აფიშდვხუ
Line of edition: 34    ლოქ აგითე, ოდო ჩუ ლოქ იდგარი.

Line of edition: 35       ანჩად ხელწიფ, ალე ჩვაფიშვდ, ახჴიდვნე ამშა ჲეხვ ი
Line of edition: 36    ლეხჭოდდა:

Page of edition: 112 
Line of edition: 1       -- იმნარ ლოქ ხასისგხ ჯეჲ, იმნარ ლოქ ოხტვარახ ლე̄თი
Line of edition: 2    მუტვარ?

Line of edition: 3       -- ჯეჲ ლოქ დე̄სა ხასისგხ, მარა ჯეჲ ი მიჩა ჭაშ ეჲჟი მალტა̄რ
Line of edition: 4    ლოქ ლიხ, ერე ლე̄თნ ი ლადეღნ ეშხვა̄რ ლოქ ე დო̄მ ხოსგდიხ, ჩუ
Line of edition: 5    ლოქ იდგარიხ.

Line of edition: 6       ათხე ხელწიფდ ხე̄ქვ:
Line of edition: 7       -- ქა̄ვ ლოქ ეთყაჩ ეჩის ე მეჩი მა̄რას, ჯეჲ ლოქ ხოთხე̄ლნე ხოჩულ
Line of edition: 8    ჭაშს.

Line of edition: 9       -- მიჩ ლოქ და̄რ ხაკუ ეჩსერ ე ჭაშსერ, ზურა̄ლდ ლახტის.

Line of edition: 10       ხელწიფდ ქა ხაწვე̄ნე მიჩა ვეზირ, მარა ზურა̄ლდ ხე̄ქვ:
Line of edition: 11       -- დეშ ლოქ აქრავი უსგვეშდიჲერუ ზაჲა ლილატს, მა̄ ლოქ
Line of edition: 12    ხაკუ ალე.

Line of edition: 13       -- ალე ლოქ ე მო̄ ხაკუჩ, ჯეჲ ლოქ ადჲეს ჲეხვდ ი ქვეყნი დედვფალ
Line of edition: 14    ლოქ ი̄რი, ხე̄ქვ ხელწიფდ.

Line of edition: 15       ესფიქრე ზურა̄ლდ ი ჟენჷნდუნე, ნებ ხე̄ქვ ხელწიფს.

Line of edition: 16       -- ჲაღო, ახ ლოქ ქა ხაჭიმ ჲეხვდ, აჩადუ ი ეჯი მეჩი მა̄რე ჩუ̄ვ
Line of edition: 17    ლოქ ადგირ ე, მიჩა ჭაშ, ეჩქა მიჩ ლოქ სგა ლეჲგვირგვინნე ჲეხვდ.

Line of edition: 18       აჩად ზურა̄ლ ჭაში ლადგართე. ხელწიფდ ესფიქრე, ჯეჲ ლოქ
Line of edition: 19    ემჴედე̄ლი ალჲარე ჲეშმაჲ. ადზჷზე ხალს ი ოთმახა̄ლე, ერე ნომა̄ვ ლოქ
Line of edition: 20    ათნებეხ ეჯ მა̄რე̄მი ლიდგარი, ოდო ხეცვი ლოქ ალჲარე ცოდ.
Line of edition: 21    აჩადხ ვარა მე̄ქვი̄სდ, მარა ზურა̄ლდ ჟი ლოხჩიშ ჭაში თხუმე ლიქვცე.
Line of edition: 22    ოხჴიდხ ხელწიფს ამბავ: -- ახ ლოქ ამჟა ღალტაჲ ლი
Line of edition: 23    ზურა̄ლ, უსგვე̄შდიჲერუ ზაჲა ლილატ ჩოთქარვა, ჭაშ ჩოთდაგრა. სერ
Line of edition: 24    გადაწყიტა ხელწიფდ, მიჩა სახელმწიფისა მა̄ჲ ზურა̄ლ ჩვარი, მაგ
Line of edition: 25    ჟანკჷდას.

Line of edition: 26       ვეზირს მახე ნაშგომ ჲეხვ ხაყა. ქა ხეხვტავიხ ალე̄ჲ მიჩა ჲეხვ
Line of edition: 27    ეშხვა̄რ, ლიგვნის იბნეხ ი ჟი̄კა̄ფიხ, ჩუ ხა̄რხ ამჟი ცოდუ̄ლობ თელდ
Line of edition: 28    ლე̄თ. ალე ენმეჴრე ვეზირი მუემ.

Line of edition: 29       -- მაჲ ესურ ამბავ ლი, მუ ლეხჭოდდა.
Line of edition: 30       -- ჲაღო ამჟი̄ჲ ამჟი ლოქ ხოჩმი̄ნა ეშხუ ზურა̄ლს, ალეს ლოქ
Line of edition: 31    ხელწიფ ასრო̄ცე̄ნა ი ჟი ლოქ ხუტე მიჩა სახენწიფისა მა̄ჲ ზურა̄ლე̄ლ
Line of edition: 32    არიხ -- ჩი̄ს.

Line of edition: 33       ალ მა̄რე ლჷმა̄რ ხელწიფი მუე ვეზირ.

Line of edition: 34       -- ალეს ლოქ ჯეჲ ახჟომა̄ლვნი ხელწიფს ჲაღო, ამნე̄მ ლე̄ქვ.

Line of edition: 35       ჟანჷ̄გა̄ნდა ალ მეჩი მა̄რე, ჟენრექვა̄ნდა ჯვინელ, მიჩა ხელწიფი
Line of edition: 36    დროი ლერქვალშვ, ლახსგუ̄რდა ჩა̄ჟს ი აჩად, აჴად ხელწიფიშთე.
Page of edition: 113  Line of edition: 1    ხელწიფს მე̄ვარ ათხი̄დჷ̄ნ მიჩა მუე ვეზირი ლიჴედ. ჩვესსგუ̄რდახ
Line of edition: 2    ტაბაგისა. ამნე̄მ ოხო̄მბვე ა მეჩი მა̄რად ხელწიფს:
Line of edition: 3       -- მიჩა მუ ლოქ ჟახაღაგარ ლჷმა̄რე̄ლი ხენწიფ, სახენწიფი
Line of edition: 4    გვეშარე მჷსყი ლოქ ჯეჲ ლჷმა̄რე̄ლი, ჯეჲ ლოქ იმთე̄ჲ ქა ლჷმა̄ზნ,
Line of edition: 5    ხალს ლოქ მიტანიაჲშვ ხახო̄ლნა ჩუ, ეჲჟი ხოჩე̄რება მა̄რე ლოქ
Line of edition: 6    ლჷმა̄რ ჯეჲ. ეშთა̄ნ უნგირ ლოქ ხაღვე̄ნა, სავოფლ ჯინჯილშვ ლჷსყე,
Line of edition: 7    ლელდაბაჟი ლოქ ლჷმსიმო̄ლინ ეჩა ჲერ. მიჩ ლოქ ხაღვე̄ნა ლახტ --
Line of edition: 8    ჲერვეშდივოხუშდ ფუთიან. ეშხუ ლადეღ ელმა̄ზნ ლოქ ჯეჲ, სგობინ
Line of edition: 9    ლოქ ლახხვიე̄ნა ეშხუ მა̄რე, მიჩაშნ ხოჩულ ლჷრექვ, მიჩაშნ ხოჩულ
Line of edition: 10    თვალაშ ი ტანაშ. ეჩის ლოქ მა̄ ხო̄ქვ "ხოჩა ლადეღ", ალე
Line of edition: 11    ლოქ მიჩ ათსასტკე̄ნა -- იმღა ლოქ მო̄ ხო̄ქვა მიჩაშვდ "ხოჩა ლადეღ".
Line of edition: 12    ღოშდ ლოქ ლახტეხე̄ნა ჯეჲ, ოსქიო̄ლა ი ხოყი̄რა ჲერვეშდივოხუშდ
Line of edition: 13    ფუთიან ლახტ. ეჩის ლოქ ღოშდ მა̄მა ლოხსინჯვა. მე̄რმა̄მდუდ
Line of edition: 14    ლოქ ხოყი̄რა ლახტ, აჯაღ ლოქ დესა ლოხსი̄ნჯვა ღოშდ.
Line of edition: 15    ალე ლოქ ხოშა ლახხჷ̄რე̄ნა მიჩ, ლახტეხა ლოქ ი მესმა̄მდ ლოქ
Line of edition: 16    ხოყირა. ეჩქა ლოქ ღოშდ ლოხსი̄ნჯვა ეჩის ი ხო̄ქვა:
Line of edition: 17       -- ეშხუ ლოქ ხოყირა, დე̄სამა ხო̄ქვა, მე̄რმა̄მდ ხოყი̄რა -- დესა̄მა̄ვდ
Line of edition: 18    ხო̄ქვა, მესმა̄მდ ლოქ იმნარ ხოყი̄რა?!

Line of edition: 19       -- ქა ლოქ ლახრეწვა მიჩ ი უნგირიშ ი მაჴვშდაგი ნე̄სგაქა ქა
Line of edition: 20    ლოქ ლოხჩიხნა ჯეჲ, მიჩა ჩა̄ჟ ლოქ ჟოსრეკა უნგირი კოტოტჟი̄ნე
Line of edition: 21    ი ოთჲა ლოქ ეჲჟი. ემჴედხ ლოქ ეშხუ აგის კოჯა ძირთე̄ჲსა, ამეჩუ
Line of edition: 22    ჩვახქეხე̄ნა ჩა̄ჟს ეჯი, ქა ლოხვოღა ჩა̄ჟ მიჩაშვდ ლეყდა̄ნიდ ი ხო̄ქვა: --
Line of edition: 23    ეშხუ კი̄ლ ლოქ ე̄რ ხასჷ̄ნდეს, ჟი̄ვ ენმა̄რა̄ნ ლა̄ტვიაშდ, მე̄რმე კი̄ლ-
Line of edition: 24    კილ ლოქ ე̄რ ხასჷ̄ნდეს, ეჩქა ჩა̄ჟი̄ ადჲე̄ვ ლოქ ი ედი̄ტვა̄ნუ მიჩა აჷითე.
Line of edition: 25    კილ-კილ ლოქ ე მო̄ ხასჷ̄ნდეს, ეჩქა ქუთან ნო̄მთე̄ვ ჩომინ, ოდო
Line of edition: 26    სგა ლოქ ე̄რ ლეხჲა, ისგდ ლოქ აქვცე.

Line of edition: 27       -- ჟაჩად ეჯი კოჯლეჟა, ეშხუ კი̄ლ ქა მასჷ̄ნდა. ეჩანღო -- დე̄სა
Line of edition: 28    სერ. ჩვანჴად ზისხა̄რ, ჟი ლასგუ̄რდა ჩა̄ჟს. ქა̄ვღ ლემჩიხნე ხაჴვშდა.
Line of edition: 29    გქა ი ამჲე მიშგვა ლჷჩა̄ჟდ, ხო̄მბვი მიჩა მუე ვეზირ ხელწიფს. ემჩედხ
Line of edition: 30    ლოქ ეჩუნღო ძღჷდჟი, სგე̄მჴედხ საყდართე̄ჲსა, ემჩედ ეშხუ
Line of edition: 31    აგის საფლავთეჟი̄ნ, ჟოხშთხარა კუბ, ოთბინა ლიგვნი, ხვა̄ჲხანს
Line of edition: 32    ლჷმგვანინ: -- ალე ლოქ ხა̄რ მიჩ ჭაშ ა, ალ ლჷდგარ, ალე ლოქ
Line of edition: 33    ოთდაგრახ ჩხარა მა̄რას, ჩხარა ზაჲ ლოქ ხეჭმინა̄ლ ეჯჲარს ლედგარიდ,
Line of edition: 34    ათხადნუნ დეშ ლოქ ოხდარა ი ათხე ლოქ ოხკი̄და ეჯჲარ მაგ
Line of edition: 35    კოჯჟიქა̄ნ მინდორისა. სერ ლოქ ამანღო მიჩ ლირდე მა̄ ხაკუჩ, ჭაშ
Line of edition: 36    ლოქ ახ ჩოთწორა, სერ ლოქ ჯეჲ თხუმს იდგარი. ალ ჩა̄ჟ მიჩუ ხამზჷრე̄ნა
Line of edition: 37    მიჩა ლჷუნგირდ ი მიჩა ჲრაღი̄ მაგ, სგა̄ვ ადგენე ლჷდგარ
Page of edition: 114  Line of edition: 1    ალ კუბთე̄ჲსა ი ჩუ̄ვ ადშდუხვე. ხოყი̄რა ლოქ ხანჯარ ჴადჟი ი ჩოთდგრა
Line of edition: 2    თხუმ.

Line of edition: 3       სერ ხელწიფს ხე̄ქვ ალ მა̄რად -- მეჩი ვეზირდ:
Line of edition: 4       -- მაგ ლოქ ეშხუ მა̄ ლი ზურა̄ლ, ეშხუს ლოქ ალე ხოჩმი̄ნა ი
Line of edition: 5       -- მე̄რმას ლოქ მე̄რმე, იმნარ ლოქ კჷდე სახელწიფისა ზურა̄ლს ჩი̄ს?

Line of edition: 6       ამჟი ჟოხჟომა̄ლვნა ხელწიფიშვდ ალ ვეზირს ზურალე̄ლე ლიკდე
Line of edition: 7    სახენწიფისა.

Line of edition: 8       ჯამზჷრახ ღერთემ.


სტეფანე ონიანი. სასაში. ა. ონიანი. 11. VIII. 1958



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.