TITUS
Svan Prose Texts IV (Lashkh)
Part No. 82
Previous part

Text: 82 
Page of edition: 114 
Line of edition: 9 
LXXXII. ღარიბიშ ი მერტყველიაჲ მა̄რენი̄ ლი̄ჲფხნიკ


Line of edition: 10       ჯამზჷრას ღერთემ, ალგენე̄ლი ღარიბ მა̄რო̄ლ, ოხნაყა ღალ მიჩა
Line of edition: 11    ჲეხუ̄ლს ლეზჷზ, ოხცვა ი ემჩედ გზა̄რვთე. ადჴად ალ მა̄რო̄ლ ლაყვილ
Line of edition: 12    შუკვნუნ, ამეჩუ ჩვესშომე. ვოდ ჟი̄გნა̄ლდა, ეჩქად მე̄რმე მა̄რე
Line of edition: 13    ანჴად ამელეჟა, გზა̄რვ ეჯი̄ჲ მიჩაშა̄ლ. ესრენ მერტყველიაჲ მა̄რე ლი
Line of edition: 14    ალე. ჩვადუ̄ქვეხ, ერე ეშხუდუ ლოქ აჩადხ, მო̄ნს ესჭამხ ეშხვა̄რ,
Line of edition: 15    ესღრიხ. მერტყველიაჲ მა̄რად ხე̄ქვ, ერე სადილუ ლოქ ლალე̄მხ.
Line of edition: 16    მართალ მა̄რო̄ლ ნებს ესჭამ.

Line of edition: 17       -- ჲაღო, ხონკვი ლოქ მიჩა -- მართალ მა̄რო̄ლა -- ლეზჷზუ
Line of edition: 18    ლალემხ, მერტყველიაჲდ ხე̄ქვ.
Line of edition: 19       -- ეჲჟივ ლოქ ჩომინხ, მართალ მა̄რო̄ლდ ლახტიხ.

Line of edition: 20       ჟენკიდხ ეჩა ლეზჷზ ი ლალე̄მხ. ვოდ ახა̄დახ ეჩა ლეზჷზ, იზბჷდხ.
Line of edition: 21    სგე̄რ ლეხშდახხ, ჟახჷ̄ჲდჷ̄ნ მართალ მა̄რო̄ლს ი ხე̄ქვ: --
Line of edition: 22    ლალე̄მხუ დიარ, ჲაღო. მერტყველიაჲდ ლახტიხ: -- ე̄სა ლოქ ხუღვა
Line of edition: 23    მიჩ, ლალე̄მუ, ჯეჲ ლოქ დე̄სჲამ ხა̄მნე. ჩვედნებვზა̄ნ. მაჲ ჩომნას სერ
Line of edition: 24    ამნე̄მ ა მართალ მა̄რო̄ლდ. მეხვრე ლეგვე̄რი̄ლ ლი ჯვინელ ამეჩუ, მა̄
Line of edition: 25    ხა̄ჲმედა ლი̄ზი ი სგა̄ჩად ამხა̄ვ. ალე აჩად ა მერტყველიაჲ
Line of edition: 26    მა̄რე, გოში ხუღვა ლეზჷზშვ ქა̄ცი. ჩუ ერ ედბურა̄ნდა, მართალ
Line of edition: 27    მა̄რო̄ლ ლეგვე̄რი ქვირაფთე̄ჲსა აჩად ლავჟად. არი ღალ ამე̄ჲსა ი
Line of edition: 28    კოჭო̄ლ ხანჷნღო ანჴადხ დეშდვო̄ლ, თხე̄რო̄ლ, მა̄ლჷ̄ლ ი რეჭუ̄ლ.
Line of edition: 29    ენბინეხ ეჯჲარდ გარგლა. -- ჲას მაჲ ხოხალ, ჲაღო, ქვეყნი ამბავ,
Line of edition: 30    ანა̄მბვეხუ. ჟენბინე რეჭულდ:
Line of edition: 31       -- ჲაღო, მინ ლოქ ე̄რ არიხ ამეჩუ, ლეგვე̄რისა, ალეს ლოქ ეშხუ
Line of edition: 32    შდუგუ̄ლ ხამთქვა. ჩუ ლოქ ხუა ვოქრ ი ქა ლოქ ოსღვა ჩი ძინარს,
Line of edition: 33    ჩხარა სა̄თჟი, ლამჟჷნათე. ქა ლოქ ე̄რ აგა̄თვე ლიმა̄ჯის, ეჩქა
Page of edition: 115  Line of edition: 1    ჯეჲ სგა ხეყვნი ეჩის. ჲერვა̄ჲ ლოქ შდუგუ̄ლს ჩვადგარნე, ვოქრ ლოქ
Line of edition: 2    ჩოსსედნი.

Line of edition: 3       ალე ჟენუ̄ვნარე მართალ მა̄რო̄ლდ. ეჩანღო მა̄ლჷ̄ლს ათა̄და:
Line of edition: 4    -- მიჩ ლოქ ეშხუ ხენწიფ ხოცჷხ, მახა მა̄რო̄ბჟი ლოქ ათგენე̄ნა
Line of edition: 5    თეს, შიე გუგვი ნახუმსერ ლოქ დე̄სა ხა̄რ ლასგიდ. ეჩა დაჴლა
Line of edition: 6    ჯოგისა ლოქ ხეჩდა სემი ლჷმუჭ დაჴჷლ, ეჩის ლოქ ე̄რ ჩვათძი̄ჲნე
Line of edition: 7    მა̄რე ი ეჩა გულჩონჩხარს ხოცვენნი̄ხი თე̄რალქა, ეჩანღო̄ნენ ჩოხრეკნე
Line of edition: 8    ეჩა თე̄რალე ნამწვინჩუ ი ხაწე̄ქვნი თე̄რალლექვა, ჟესშდიხე̄ხი
Line of edition: 9    გულჩონჩხს თე̄რალქა ლაცვენუშ, ხოჩულ ლოქ ხოტხენი თე̄რალ,
Line of edition: 10    ედო ხოდრულ მა̄დე, ეჩან ე, ეჩქად ე̄რ ხა̄რე̄ნა. ეჯი ხენწიფდ ლოქ
Line of edition: 11    მიჩა თე̄რალე მჷხჩოვის აგნე ი ჯეჲ ლოქ ჩუ ჴედნი ტახდხენჩუ.

Line of edition: 12       ალე̄ჲ ჟენუ̄ვნარე ალ მა̄რო̄ლდ. ათხე თხე̄რო̄ლდ ლე̄ქვ:
Line of edition: 13       -- ეშხუ ხენწიფ ლოქ ლი, გეზალ ლოქ დე̄სა ხაყა, ეჩა ჲეზვისა
Line of edition: 14    უსკვ ლჷ̄გ, სემი̄ლს ლოქ იშნე ზაისა. ჲერვა̄ლე ეჯ უსკვარს ხენწიფს
Line of edition: 15    ი მიჩა ჲეხვს ე ჩუ ხა̄მნი, ზაჲთექა გეზალ ლოქ ქა ხევდიხ. ხენწფობს
Line of edition: 16    ლოქ უსკვი მჷ̄მნეს ხომზჷრი ეჯი.

Line of edition: 17       ალე̄ჲ ჟენუ̄ვნარე მართალ მა̄რო̄ლდ. ათხე დეშდვო̄ლს ათა̄და:
Line of edition: 18       -- ეშხუ სახენწიფ ლოქ ლი, ჲეშდჲერუ ზაჲ ლოქ ხაკუხ ნიცთე
Line of edition: 19    ლა̄ზს, ჲეშდჲერუ ზაჲ -- ლატეხს. ხენწიფი ჲეზვისა ლოქ იცხ
Line of edition: 20    ლჷ̄გ, ეჯის ლოქ ე ჟახყვიფე, ლეგვე̄რი მჷსპჷნაზუმ ლოქ ხეზვბენი
Line of edition: 21    ნიც. მიჩა სახენწიფს ლოქ ამშა მჷჩომს ხომზჷრი ხენწიფ, მარა ჩუ
Line of edition: 22    ლოქ და̄ს ხოხალ ალე.

Line of edition: 23       ალ გარგლა̄ჲსა ჩუ̄ჲ ედრუა̄ნ სერ, ალე მაგ ჟენუ̄ვნარე მართალ
Line of edition: 24    მა̄რო̄ლდ. ლურვან ალჲარ აჩადხ მინე-მინეშვდ. მა̄რო̄ლდ ესფიქრე
Line of edition: 25    ღალ:
Line of edition: 26       -- ამეჩუ ხვარი ბარემს ი ალჲარე გარგლა ე ტკიც ი̄რი, ჟოხმეჴრი
Line of edition: 27    ლადი, ამინდი̄ ხოჩა ლი. ჩხარა სა̄თ ერ ანჴად, წირი დროჲ,
Line of edition: 28    შდუგუ̄ლდ გაცხაჲდ ჟენბინე ვოქრვალე ლიმა̄ჯი ლანჟჷნათე. ქა̄დგა̄თვე
Line of edition: 29    ლიმა̄ჯი, სგა ლოხყუ̄რდა ი ხელჩე. ენქვიც მა̄რო̄ლდ ტყენ,
Line of edition: 30    ლეხქა̄ლა̄ნდა სგა შდუგვს, ლახჟეჟე ი ჩვადგარ. ალ ვოქრვალ მაგ
Line of edition: 31    მიჩ ოსსად ი ჟენგოშლე ქა̄ცი. ათხე ჩვედჯირვე, ერე მა̄ჲმა ალჲარდ
Line of edition: 32    ლე̄ქვხ, მაგ ტკიც ლი.

Line of edition: 33       აჩად მა̄რო̄ლ აგითე ლჷხი̄დე. მიჩა ჲეხუ̄ლ ვაჲ-ვაჲდ აფაშგ:
Line of edition: 34       -- იმნარ ლოქ ემტეხ, ჯეჲ ლაჟგიარ, ამჟი შიშდ?
Line of edition: 35       -- ნომა̄ვ ღედ ხა̄რ, ქა̄ვ ოხჴიდ ღენა გობ.

Line of edition: 36       ქო̄ხჴიდ ჲეხუ̄ლდ გობ, ჟი ლოხფიშგ ქა̄ცის თხუმ, ქა̄ნსიპე გობთეჲსა
Line of edition: 37    ი ჟოხტჷტნე გობ, ჟოხკო̄ჩე ვოქრშვ. ვო, ათხე ხახჲად
Line of edition: 38    დედბერი̄ლს.

Page of edition: 116 
Line of edition: 1       -- ასაბრა, აჯაღუ ლოქ აჩად, იმე̄ჲ ღენ ლოქ ითხი ამჟი.
Line of edition: 2    ჟანგა̄ნ გაცხაჲდ ალ მა̄რო̄ლ ი აჩად, თეთრ მასარდ ხუღვა ლეზჷზდ,
Line of edition: 3    ეთლაკა̄ნდა თეურ ხენწიფი მეჯოგს ი ლეხჭოდდა:
Line of edition: 4       -- ხაყახ ლოქ ე̄სა მინს სემი ლჷმუჭ დაჴჷლ?
Line of edition: 5       -- ა̄დვ ლოქ, -- ქა ხაწვე̄ნეხ.

Line of edition: 6       ათხე აჩად თეურ ხენწიფიშთე ი ხე̄ქვ:
Line of edition: 7       -- თე̄რალ ლოქ ერ ქო̄ხფხჷრის, ერ ლოქ ხა̄რა მიჩ -- ეჲჟი, იმ
Line of edition: 8    ლოქ ედჴიდე.

Line of edition: 9       -- ჰმ, ჩვათჩო̄ნდა, მიჩ ლოქ ოთმეზრი ლიხენწიფს.
Line of edition: 10       -- ლიხენწიფ ლოქ მა̄ ხაკუ ჲაღო მიჩ ი ნამუსდ ლოქ ოთფი̄შვდე̄ნს.
Line of edition: 11    მიჩა ჯოგისა ლოქ ერ სემი ლჷმუჭ დაჴჷლ ხაყახ, ეჯი̄ვ ლოქუ
Line of edition: 12    ანჴიდ. შიშდ ადზჷზე მა̄რე, ანჴიდ დაჴჷლ, ჩვათძია̄ლვნე შიშდ.
Line of edition: 13    ჩუ ლიტფუ̄რა̄ლნუნ ჩვათბიჴვნე ი ქა̄ხკიდვნე გულჩონჩხ. ჩვადყვინე
Line of edition: 14    ხენწიფ ლაყვრაჟი ჴაბჴაბე̄ლ ი ჟესშდიხ გულჩონჩხარ თე̄რალჟი
Line of edition: 15    ლაცვჲენუშ ჲერუ-სემი ლადეღისა. ხენწიფს ქო̄ხფხარ თე̄რალ,
Line of edition: 16    ერ ხა̄და ეჩქად, ეჩან ხოჩულ. მიჩა სახენწიფ ჩვაწჲე თელდ ი
Line of edition: 17    ლიხჲადა̄ლს ხაშდბა. ხენწფობს "ხომზჷრი ალეს, მარა ალე დე̄მ იჩო.
Line of edition: 18    სერ ეჩუნღო აშირ ჩა̄ჟი ლა̄ბ ვოქრ, აშირ ვილი ლა̄ბ, აშირ -- წელიშ,
Line of edition: 19    აშირ -- აქლემიშ, კელდღა მა̄ჲ ჩუ ლი ლა̄ბი მჷცვემ,
Line of edition: 20    მაგ ალე ჩოთლა̄ბე თვით აშირ, თვით აშირ მა̄რე სგა ლახჭემე ეჯჲარს
Line of edition: 21    ი ქა ხაშჩუქვრე ალე მაგ, ალახ ერ ხენწფობ მო̄ ჩომინ.

Line of edition: 22       აჩად ალ მა̄რე, ადჲე მაღვე̄ნ, ეთლაკა̄ნ ეშხუ ხოჩა მინდორს,
Line of edition: 23    ჩვესბჷრგე ამეჩუ ალ ხალს ი ალ მაღვე̄ნი̄ ი ჩვადშენვე ქალაქ.

Line of edition: 24       ათხე ლეხტახ ალეს ა, გეზალ ერ დო̄სა ხაყა ხენწიფს, ი ხე̄ქვ:
Line of edition: 25       -- გეზალ ლოქ ე̄რ დო̄სა ხაყახ მინს, ქა ლოქ ე̄რ ლეხვოდე̄ნხ,
Line of edition: 26    იმ ლოქ ედჴიდეხ.

Line of edition: 27       ლიხენწიფ ლახჭარჟე, მარა მა̄ ლოქ ხაკუ, ნამუსდ აფიშვდ.
Line of edition: 28    მა̄ჲზუმი̄ ხონკვი̄ ხენწიფდ ლახო̄მ, ამზუმ ამნე̄მუდ ლახო̄მ, შომა̄ჲ
Line of edition: 29    გეზალ ქა ლეხვოდა̄ნ. ამნოვშ მე̄რმე ქალაქ ადგე.

Line of edition: 30       ათხე ეჩე აჩად ე, ნიც ერ ხა̄რ ჯო̄დჲას ხენწიფს, ეჩის ლეხმუშგვრა̄ნ.
Line of edition: 31    ნიც ხაშგმინ.

Line of edition: 32       -- ჲშდეშხუ ზაჲ ლოქ ქა ხა̄რხ, ანღრიხ ი ეშხუ ზაი̄ლ ლოქ
Line of edition: 33    ხოკლიხ ლიჴდა̄ლდ.

Line of edition: 34       -- მაჲ ლოქ ამბავ ლი ალე.
Line of edition: 35       -- მაჲ ლოქ ჩომნახ, ამჟი ჯო̄დჲას ლოქ ხა̄რხ ნიც ი!
Line of edition: 36       -- ჲეზვისა ლოქ ერ ე̄რდ ოხსყას ნიც, იმ ლოქ ედჴითე.

Page of edition: 117 
Line of edition: 1       -- ჰმ, ჩვათჩო̄ნ ხენწიფს, მიჩა სახენწიფს ლოქ ედჴიდე, ხენწფობს
Line of edition: 2    ლოქ ოთმეზრი ი!

Line of edition: 3       -- ხენწფობ ლოქ მა̄ ხაკუ მიჩ. ნამუსდ ლოქ ოთფი̄შვდენს ჲაღო
Line of edition: 4    ჯეჲ. ჲაღო ოხჴიდუ მჷშჲარ ათხე.

Line of edition: 5       ოხჴიდ მჷშჲარ. სგა ლახა̄დახ ჲეზვისა იცხი ლაშთხარს, ჟახყვიფხ
Line of edition: 6    სადლობნუნ. ვოდ თელდ ჟი ხაყვფახ, ეჩქად თქიშ ხაჴიდ ნიცემ,
Line of edition: 7    ლჷყა̄რჟიქა̄ნქა ესღრი კამარაჲ. მესმე ქალაქი ნაგმუნ ამნე̄მ
Line of edition: 8    ხაშჩუქვრე. სერ ანჩად, სემი ქალაქ ხუღვა ი იზგა̄ლ ბედნიე̄რდ.

Line of edition: 9       ალე ჩოთკვია ეჩის ე მერტყველიაჲ მა̄რას ი ემჴედ ამშა̄შთე.
Line of edition: 10    ამნე̄მ ქო̄ხო̄მბვე, ერე ეჯ ლეგვე̄რისა ლოქ ალკეთლე̄ლი, ჯეჲ ლოქ ერ
Line of edition: 11    ემსედ ეჩქა. სერ აჩად მერტყველიაჲ მა̄რე̄ჲ ეჯ ლეგვე̄რი̄ლთე, სგა̄ჩად
Line of edition: 12    ალეჲ ქვირაფთე̄ჲსა. ანჴადხ დეშდვო̄ლ, თხე̄რო̄ლ, მა̄ლჷ̄ლ ი
Line of edition: 13    რეჭუ̄ლ. ვოდ ერე იშგენს ე̄სჲამ ყჷლეხ, ეშხვა̄რ ხოჩშეხ ჟი:
Line of edition: 14       -- მიჩ ლოქ ერ ხო̄ქვა ამეჩუ̄ნენ, ჩუ ლოქ დერ ე̄რეს ხოჩმი̄ნა.
Line of edition: 15    მიჩა ნა̄ქვი̄სი̄ ლოქ ჩუ ე̄რეს ხოჩმი̄ნა, ჩი̄ემ ამჟი ლე̄ქვხ თვით-თვითჟი,
Line of edition: 16    ხა̄ვნარნახ ლოქ მჷრე̄ს ე̄რ.

Line of edition: 17       ჟანგა̄ნხ თვითო̄ლაჟი, ჩვადსი̄ნჯვა̄ლეხ ჩჲა̄გ, ღოშგინპილს დეშდვო̄ლ
Line of edition: 18    ანგა̄ნ, ადქვიჭე ქვირაფთე̄ჲსა ტოტ, ჟახყვიფ ამხენჟი მა̄რე,
Line of edition: 19    ქა̄ნკვა̄რ სგირითე, ესგვარა̄ნდახ ჟი ი კია-კიად ადგენეხ. ალე̄ჲ ისგვი
Line of edition: 20    მერტყველიაჲ მა̄რე, ამჟი̄ვ ხაყრა აფხნიკი მჷღლატის ჩი̄ს. ჯამზჷრას
Line of edition: 21    ღერთემ.


ერმილე ონიანი. სასაში. ა. ონიანი. 30. VIII. 1958



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.