TITUS
Svan Prose Texts IV (Lashkh)
Part No. 83
Previous part

Text: 83 
Page of edition: 117 
Line of edition: 22 
LXXXIII. როსტომ


Line of edition: 23       ჯამზჷრახ ღერთემ ი როსტომ ლას გმირ, ქა იშგმინ ჲეხვ, ეჩქას
Line of edition: 24    ჯეჲ ჯართე ადჲეხ, ჲეხვ ჩოთსად აგის ღა̄ნავ ი ჩოსმახა̄ლე მიჩა ჲეხვს
Line of edition: 25    ამჟი:
Line of edition: 26       -- ჭყინტ ე ეჲთენე̄ნდეს, ჟესჟახ ზურაბ, დი̄ნა ე ეჲთენე̄ნდეს,
Line of edition: 27    ეჩქა ისგვი გვეშ ლი. ჭყინტ შიშდ ლეჲჭოდნი მიშგვას ი ლიზვრჲელს
Line of edition: 28    ედბინნე მიშგვა̄თე, მა̄ჲგვეშღა ნომა ამფუშდიდ, ვოდ ერე შიყქა
Line of edition: 29    ტოტი ლაცვჲენჟი მიშგვა რაშს ჩოქარ დო ესშიდვნას. შომა̄ჲ ალე
Line of edition: 30    ლეჲი̄მედას, ეჩქაგარ ამფიშვდდ მიშგვა̄თე. მი ჯიცვრე შარნას, ქა ლახაბ
Line of edition: 31    ლერსგვენ მაჯაშქა, ჟი ლახსგუ̄რდეს მიშგვა რაშს ი ანჩეს მიშგვა̄თე.

Line of edition: 32       ედჷლღვაჟა̄ნდა როსტომი ჲეხვ ი გაცხაჲდ ჭყინტ ეხთენა̄ნ, ჟესჟახე
Line of edition: 33    ზურაბ. ეჯი ლადეღშვ ეშხუ ჩარექს იცხემ, ლე̄თშვ -- ეშხუ
Page of edition: 118  Line of edition: 1    კამჷლს. გაცხაჲდ შიშდ ენცხე ჟი ი იშგმინ მიჩა მუეშთე ლი̄ზი. ქო̄ხჴიდხ
Line of edition: 2    თავლახენქა მიჩა მუე რაშ, დეც-მე̄ფხე̄მი უწდუნა. ოსცვიე
Line of edition: 3    ტოტზურაბდ შიყქა, მარა დეშ ესშიდვნე ჩოქარ. ამჟი, ხან ერ აჩად,
Line of edition: 4    ეჩქა̄ვდ ადსი̄ნჯვე აჯაღ, იმჟვა̄ჲ როსტომდ ადშგურა̄ნე მიჩა ჲეხვ.
Line of edition: 5    მესმა̄მდ ერე ოხჴიდხ რაშ ქა̄მთე, ეჩქა ოსცვიე ტოტ აჯაღ შიყქა ი
Line of edition: 6    ჩვესშიდვნე ჩოქარ. ათხე ზურაბი დის ათა̄და, ერე ათხე ლოქ აფშვდე,
Line of edition: 7    დედე̄ ბატო, მიჩა მუეშთე, მარა შუკვჟი ლოქ მეკვბადუ ა̄რდა.

Line of edition: 8       ჟოხუნგრეხ ზურაბს მიჩა მუე რაშ ი ქო̄თო̄გა̄ნ შუკვს. ალე
Line of edition: 9    ჟახმეჴრა̄ლვნეხ როსტომს: -- ჭყინტ-გეზალ ეხთენა̄ნ ი ანღრი
Line of edition: 10    მიჩა̄შთე.

Line of edition: 11       ათხე ალე ქაქაოზ მეფედ ენმეჴრე, ხედისი̄ როსტომ ხემსახურდა,
Line of edition: 12    ერე როსტომი გეზალ ლოქ ანღრი -- როსტომიშდ ხოშა ბჷგი.

Line of edition: 13       -- გუშგვე სახენწიფ ლოქ ეჯჲარეშ ი̄რი, ხაყლჷდახ ქაქაოზს,
Line of edition: 14    ნაჲ ლოქ და̄რ ოგკიდვნი ქუნს.

Line of edition: 15       ენჲერე ქაქაოზდ მიჩა ვეზრალ ეჩა ლამო̄რავდ, ერე იმჟი̄ ღენ
Line of edition: 16    ოხჴჷრჴახ ზურაბს იმავ ლიჴდა̄ლდ ლიდა̄ვშე.

Line of edition: 17       ქა̄ნსკინე ეშხუ მჷჯმაგი̄რ დედბერდ ი ხე̄ქვ:
Line of edition: 18       -- კოჭო̄ლ ნაქვემუ̄ლარს ე̄სჲამ მაქვმუნიდ, ეჩის მი ოხჴჷრჴნეხვი
Line of edition: 19    შუკვჟი, იმავ ლიჴდა̄ლდ.

Line of edition: 20       -- ნაქვემუ̄ლარს მა̄დე̄ჲ ფარჩა-ფურჩა̄ჲსა მეყე̄ნი̄ხი, ხენწიფდ
Line of edition: 21    ხე̄ქვ.

Line of edition: 22       -- ჲაღო ჟემშხებედ სემი წყვილ ზურა̄ლა ლერექვ ი ეჩის მი
Line of edition: 23    ოხჴჷრჴნე̄ხვი ამავ ლიჴდა̄ლნუნ.

Line of edition: 24       ჟოხშხებეხ გაცხაჲდ მე̄რნე-მე̄რმეკალიბ ლერექვ სემი წყვილ.
Line of edition: 25    ჟენმა̄რა̄ნ ალ ზურა̄ლ სერ, ეშხუ წყვილ სგა ლეჲქვე ი ჲერუ წყვილ
Line of edition: 26    შიდ ლეჲყედნე. ქო̄თო̄გა̄ნ შუკვს, სგა ლახხვი̄დ სგობინ ზურაბს ეშხუ
Line of edition: 27    ლაჭო̄ნ შუკვისა.

Line of edition: 28       -- ო, ისგვა პატრონს ლოქ ნატჲელ, მაჲ ჭყინტ ლოქ ოხჷრდა̄ხი.
Line of edition: 29    ნატჲელ ლოქ ისგვა დედეს, მაჯაშქა ლოქ ერ შარნი ხა̄ბ, ეჯი
Line of edition: 30    ლოქ ერ მო̄ ხესკვო̄ლდეს ხოლა̄მდ.

Line of edition: 31       ეჯნემ ჩოსთხჷ̄ლე -- ზურაბდ: -- მაჲ ისგვი გვეშ ლი, ხოლა̄მდ
Line of edition: 32    მესკვი ა -- ხოჩა̄მდ!

Line of edition: 33       ლახგლეჯე ზურაბდ რაშს მადრაჴ ი აჩად. ლოხქვიც გა̄ნ ალ დედბერდ
Line of edition: 34    -- გვეფემ, სგობინ ეხცა̄და̄ნ აჯაღვ ლაჭო̄ნ შუკვისა, ალე ლერექვ
Line of edition: 35    ქე̄დი̄ღე, მერმე კაბ სგა ლეჲქვე, ეჲჟი ლახხვი̄დ მე̄რმად. აჯაღვ
Line of edition: 36    ამჟი ხე̄ქვ:

Page of edition: 119 
Line of edition: 1       -- ნატჲელ ლოქ ისგვა მჷრდი დედეს, მაჲ ლოქ თვალ ოხჷრდა̄ხი,
Line of edition: 2    ერე ლოქ მაჯაშქა შარნა მო̄ ხა̄ბდეს.

Line of edition: 3       ჩუ̄ვდ ედსო̄ყა̄ნ ზურაბ, ჟოხტე̄ვე ბჷგიდ, -- მაჲ ლოქ ისგვი გვეშ
Line of edition: 4    ლი.

Line of edition: 5       ჩვანკვა̄რ ზურაბდ თხუმ ი ესღრი ხოლა გუჟი, . ხსკვრელ, ერე
Line of edition: 6    ჲერუ ზურა̄ლ ლახხვი̄და ი ამჟი ხე̄ქვხ ჲერვე̄და̄შემ.

Line of edition: 7       ლოხქვიც აჯაღ გა̄ნ მესმა̄მდ ალ ზურა̄ლდ, ალე ლერექვ ქა̄ვდ
Line of edition: 8    ედი̄ღე, მესმე კაბ სგა ლეჲქვე, სგა ლახხვი̄დ მესმა ლაჭო̄ნისა
Line of edition: 9    აჯაღვ. ამჟი̄ვდ ხე̄ქვ ალეს -- ზურაბს. ზურაბდ ჟესდე ხოლა ჲერ ი
Line of edition: 10    ჟანრიალე. ხოლა ზურა̄ლ ჩვედი̄ტვა̄ნ, ჯეჲ ესღრი სერ ლჷწუხვავე
Line of edition: 11    მიჩა რაშშვ. ადჴად იმე̄ჲ ლას ეჯ სახენწიფნუნ, იმე̄ჲ მიჩა მუ ა̄რდა.
Line of edition: 12    ალჲარ იმა̄რა̄ლხ, ა, ხენწიფ ი მიჩა, ამშა ლახვჲად, ერე როსტომ
Line of edition: 13    დო̄სა ეთთხანე̄ნს ხონკვი. როსტომს ბინა ქო̄სცა̄დეხ. ქალაქი ვოკერს
Line of edition: 14    ხებინავა̄ნ ი ქალაქი თხუმს ადბინავეხ. თვეთვნვ კარივ ხო̄გდა ი ათხე
Line of edition: 15    წვანილ კარავთჲე̄ჲსა ადჲეხ.

Line of edition: 16       სგა̄დჴად ქილაქთე̄ჲსა ისგლაღეღჟი ზურაბ. იჭვდჲელა̄ლ მიჩა
Line of edition: 17    მუეშს ეჯ მისამართშვ, მა̄ჲ ოსცვირ მიჩა მუემ, მარა დესსამა ენმეჴრე.
Line of edition: 18    ალჲარ ხაქა̄რჯა̄ლვნეხ ა ხელწიფი ხალხ. ადჲეხ ლაშომთე, ჟი̄ვ
Line of edition: 19    ენშომე, ეჩღო ლოქ ჟენთხე̄ლნე მიჩა მუს. ამშა ლაშომისა როსტომ
Line of edition: 20    ანმა̄რეხ ჟი ფალავანდდ.

Line of edition: 21       -- ეჯკალიბ ლოქ ე̄რე ემჴედ მინე ქალაქთე̄ჲსა, ერე ჲერვა̄ჲ
Line of edition: 22    ლოქ ხოშა გმირ ლი, ეჩის ლოქ ხეთხე̄ლი მებჷრგჲელდ. მიჩა გმირობ
Line of edition: 23    ლოქ ხასმა ეჯის ი იშგო ლოქ მიჩა თხუმს. სგა ლებჷრგე ლოქ ხა̄რ
Line of edition: 24    ბა̄ზი ნებოზს ეჯღა̄ჲამღა.

Line of edition: 25       ჟენმა̄რა̄ნ როსტომ, მაჲ საკვრელ. ადჲეხ, ქო̄ხჴიდხ ზურაბ ი
Line of edition: 26    ჩვადბჷრგა̄ლვნეხ. ხემა̄ჲ სგო̄ხგუდურღა ზურაბ როსტომს, შიშდ
Line of edition: 27    ჟი ხაჴიდ. ალე მე̄ვარ ათუშგდჷ̄ნდა როსტომს, -- ჲარ ლი ალე ამკლიბ,
Line of edition: 28    ფიქრე როსტომ, მიჩაშდ ჩოქ დეშეს ხოყრუნა, ამნემ ამჟი შიშდ
Line of edition: 29    ედნახე ჩუ.

Line of edition: 30       იჭვდჲელა̄ლ როსტომ, იმე̄ში̄ ღენ ლი ალე, მარა და̄რდმა ოთუშ
Line of edition: 31    ხე -- მინს ლოქ მა̄ ხოხალხ, ჲერვა̄ჲ ლოქ ღენ ლი. ჩვადყულუ̄რეხ
Line of edition: 32    ალჲარ, როსტომ მიჩაშვდ ადჲეხ. მჷხარ ძინრიშვდ ხაკუხ აჯაღ
Line of edition: 33    ალჲარე ლიბჷრგჲელვნე.

Line of edition: 34       როსტომ მიჩაშვდ ფიქრე: -- მჷხარი̄ ე ჩუ მი̄ნხენი, ლუარ დე̄მ
Line of edition: 35    ღური აგითე.

Line of edition: 36       აჩად ი თელდ ლე̄თ აშე̄რე ესრენ კოჭო̄ლ მეკვშდე ალმასი ხანჯრი̄ლს.
Line of edition: 37    ედხე̄ვსა̄ნ ძინარს ი ალე წაბდ ლჷშე̄რე ალმასი ხანჯარ

Page of edition: 120 
Line of edition: 1       ჩვესციყ ჩექმალექვა, კეცს ჟიბო ხაყერ, ღულა̄ჲ თხუმთე, მუჭ --
Line of edition: 2    ჩუბო.

Line of edition: 3       ქა̄ვდ ადჲეხ აჯაღვ ლაბჷრგჲელთე მე̄რმა ლადეღ, სგა ხაძგრა̄ლვნეხ
Line of edition: 4    უშხვა̄რ, თელდ ხალხ გირგიტდ ხაცხიპ. ხემა̄ჲ სგო̄ხგუდურდახ
Line of edition: 5    უშხვა̄რ, შიშდ ედნახე ზურაბდ აჯაღ ი ჩუ ხაყა ლჷნახ, ჟი მა̄დ ანფიშვდ.
Line of edition: 6    -- ხოჩა̄მდუ ედნახე, ხოტტანიხ ეჩხენ-ამხენ. ხაჴიდ ეჩქა
Line of edition: 7    როსტომდ ლაწბუ̄რა̄ თხუმჟი ხანჯარ ი ყიანუნ ანბიჴვ. ქა̄ჲ ესყუ̄ლე
Line of edition: 8    ეჩქა ზურაბდ: -- ატ, სი ნამჩურა, იმავ ლოქ ოთჩედნი მიჩა მუ
Line of edition: 9    როსტომს, ძუღვათე̄ჲსა ლოქ ადრი ი ეჩხა̄ვ ლოქ ეთჭემნი, ხმელადჟი
Line of edition: 10    ლოქ ჲადურდ დეშ ესპეჟვნი.

Line of edition: 11       ქე̄დსიპა̄ნ ლოშგმა̄ვქა ზურაბ, ჩვედჷმჯა̄რვა̄ნ როსტომ, ლიშჲა̄ლს
Line of edition: 12    ლა̄ხადა ზურაბს:
Line of edition: 13       -- ჯეჲ ლოქ ხოლე̄მი გეზალ, ჯეჲ მიჩა გეზალ ლოქ ე ლი,
Line of edition: 14    მიჩა შარნა ლოქ იმღა მო̄ ხა̄ბ მეჴერქა?

Line of edition: 15       -- სემი ჲეშმაჲ ზურა̄ლს ლოქ ოოქადვნა, ამეჩუ ლოქ ხა̄ბ
Line of edition: 16    ლაღლიაშისა.

Line of edition: 17       გაცხაჲდ ოთსი̄ნჯვე -- მიჩა შარნი.

Line of edition: 18       როსტომდ ოსყუ̄ლე ქაქაოზ მეფეს. გეზალ ლოქ ლოხდაგრა̄ლვნახ
Line of edition: 19    მიჩაშვდ შიარისა, აშიშდ უკუდე̄მი ჟაგარუ ოხზჷზე, ოდო სგა
Line of edition: 20    ლოქ ერ ეთნეჩდი მინს, გიმს ლოქ ათა̄ჲჭვნე ამი̄შო̄ბას.

Line of edition: 21       ათხე შიშდ ჟანმა̄რე ქაქაოზ მეფედ ბოთლშვ უკუდე̄მი ჟაგარ ი
Line of edition: 22    ხალხს ხე̄ქვ:
Line of edition: 23       -- ჲარ ლოქ ლეი̄ჲმედნე ამშა ლიჴდეს ქა როსტომიშთე. ერე
Line of edition: 24    ეჩის ერ ხა̄ვდუდეს ტოტთე̄ჲსა, ეჩქა ჩვაფუშდის ბოთლ ი ჩვადკუშუ̄რას,
Line of edition: 25    ეჲჟი ერე როსტომდ ღოშ ენმეჴრას.

Line of edition: 26       ამჟი ქა̄ნსკინე დი̄კონდ:
Line of edition: 27       -- თავარ დი̄კონდ ლოქ ე ადჯგირნეხ, ეჩქა ჯეჲ ლოქ იჩო ამჟი.

Line of edition: 28       ქა ლახო̄მხ დი̄კონს ბოთლ. ქა̄ნჴიდ როსტომიშთე, ქა ლოხრიწვ
Line of edition: 29    ტოტ ი ერ ხეგდურნო̄ლ როსტომ სგა, ეჩქა ჩვაფიშვდ დი̄კონდ ალე
Line of edition: 30    ი ჩვედკუშუ̄რა̄ნ ბოთლ.

Line of edition: 31       ჟენწუხვავა̄ნ როსტომ, ხაფხიჭე დი̄კონს ჭიშხარს ი კოჯს ხაჴიდ
Line of edition: 32    სგა ი ჯიჯვარ სგე̄თშკა̄და̄ნხ კოჯს.

Line of edition: 33       იზელა̄ლ ლჷწუხვავად როსტომ, ჯგჷრა̄გ ლახხვი̄დ სგობინ --
Line of edition: 34    მეჩი მა̄რად.

Line of edition: 35       -- როსტომ, იმღა ლოქ ლი ლჷწოხვავე, ჲენურდს ლოქ დესა
Line of edition: 36    ხოწვა ამჟი ლჷწუხვავე.

Page of edition: 121 
Line of edition: 1       როსტომდ ქო̄ხო̄მბვე მიჩა გვეშ, ამჟი ლოქ ოთდაგრა̄ლვნახ
Line of edition: 2    გეზალ.

Line of edition: 3       -- ჲაღო, ჯგგრა̄გდ ხე̄ქვ, ჲეშდჲერუ საჯენი ნანსკო̄დი ვორმო̄ვ
Line of edition: 4    ლოქ აქვიც, ჲეშდჲერუ ზაჲ ეჩე̄ჲსა̄ვ ლოქ არდვნე მიჩა ლჷქაჩ
Line of edition: 5    გეზალ, ჯეჲ ლოქ სგა̄ვ ეთჭამ.

Line of edition: 6       ქაქაოზ მეფე ი მიჩა ხალს ლჷხი̄დე ლიხ, ერე ჩვადღალტეხ როსტომ
Line of edition: 7    ი მიჩა გეზალ, მახჲადშვ ეშ ქირმოზეხ. ოსყუ̄ლე როსტომდ
Line of edition: 8    ქაქაოზ მეფეს: -- მჷშაჲ ლოქუ ოხზჷზე აშიშდ. . ოხზჷზე მახჲედა̄რ
Line of edition: 9    მჷშაჲ. ჩვადშთხარეხ ვორმო, იმეჩუ̄ჲ როსტომდ ხათო̄ნე, ჲეშდჲერუ
Line of edition: 10    საჯენ. სგა̄დჲე ეჩხა̄ვთე̄ჲსა მიჩა ლჷქაჩ გეზალ. არიხ ამე̄ჲსა ჲეშდეშხუ
Line of edition: 11    ზეჲ, ეშხუ ზაი̄ლ ხოკლიხ ქა ლიჴდა̄ლნუნ. . ალ ჲეშდეშხუ ზაისა
Line of edition: 12    ეჲზუმ ოხჴად ქა ჩაჩ როსტომს, ერე ჭიშხე ფხულარჟი ენსყე ჭი̄ნური
Line of edition: 13    ჯილარ. როსტომ აშმჷნე ჭი̄ნურს, ზურაბ ბანს ხაყლე თელდ
Line of edition: 14    ხოჩა̄მდ. ეჯი სერ ჟი ლჷხჩოვე ღო̄თ ლი.

Line of edition: 15       ამჩიქა ჟენმეჴრეხ ქაქაოზ მეფედ ი მიჩა ხლხდ, ერე ეშხუ ზაი̄ლ
Line of edition: 16    ხოკლიხ ეჯჲარს ჟი ლიჴდა̄ლდ ი ეში̄ ხოლა̄მდ ლი მინე გვეშ ეჯჲარე
Line of edition: 17    მეჴდან. ეჲზუმუ ლოქ მა ჩომინხ, ერე ჟი მა ოხჴჷრჴახ ეჯჲარს, ერე
Line of edition: 18    ჟი დოშ ანტეხეხ ვორნოხენჟი, ჲას ლოქ ხა̄ჲმედა ამშა ლიჩომ? ქა̄ნსკინე
Line of edition: 19    მე̄რმა დი̄კონდ ეჩქა ი ლე̄ქვ: -- კოჭო̄ლი̄ლს ლაჯგირჟი ლოქ
Line of edition: 20    ესჲამ ლახწახ, ერე ბაპდ ადჯგირახ, ეჩქას ლოქ ჯეჲ ხოწა ეჯჲარს.
Line of edition: 21    -- ბაპდ ლოქ მა̄დეჲ, ჲეფისკობოზდ ლოქ ადჯგირნეხ, ქაქაოზ
Line of edition: 22    მეფედ ხე̄ქვ.

Line of edition: 23       ქა̄ჩად ეჩქა დი̄კონ ეჯჲარე ვორმო̄ თხუმთეჟი, ჩი ძინარ-ნებოზს
Line of edition: 24    ხაგვშე ვორმო̄ თხუმჟი ჩინაირ ვინდრობას. ჟენწუხვავა̄ნ ამნოვშ
Line of edition: 25    როსტომ. უსგვა თოი̄ლ ხოკლი ჟი ლიჴედს ჟიქა̄ნთე, მარა დეშ გეჭნი
Line of edition: 26    სერ ეჩე̄ჲსა, ანღრი ჟიქა̄ნთე, ეჩქა სგა ხაფხჭი ზურაბ: -- მამა, ეშხვდ
Line of edition: 27    ლოქ ჩოთდაგრა ი მე̄რმა̄მდ ლოქ ნომა̄ვ ადგარი, ხოშა ლოქ ჟოხთჷმი̄ნა
Line of edition: 28    ი ხოხრო̄ლი̄ ჟი̄ვ ენოჷმი̄ნე. დეშ ღალ ენთჷმი̄ნე როსტომდ ეში̄
Line of edition: 29    ი ჟოხჩად. ჩვაცვირ ზურაბ აგერ-აგერ მეხჩოვა̄ლ.

Line of edition: 30       სგე̄ხჭვა̄და̄ნხ ჟიქა̄ნთე მეჴდან როსტომს, ხომზგრიხ ჟიქა̄ნთე ლიჴედს.
Line of edition: 31    ჩაჩ ეჲზუმ ხა̄რ, ერე ბარჯს ითხფე ჟი, ედო ჟი ხეგნი ჭიშხარშვ.
Line of edition: 32    სგეხჭვა̄და̄ნხ:
Line of edition: 33       -- ჲაღო ჩუ̄ვ ედწაბუ̄რა̄ნ სერ.
Line of edition: 34       -- ჩუ ლოქ დე̄მა ჩიქე, ვოდ ლოქ ღონეს დო ედსი̄ნჯვი.

Line of edition: 35       სგა̄ხშჷ̄დახ დალაქარ, მა̄ ჩომინ როსტომდ ლიწბუ̄რა̄ლ
Line of edition: 36       -- ჲაღო იმჟი ლოქ ხაკუ ღონე̄ ლისი̄ნჯავი?
Line of edition: 37       -- ვილ ლოქუ ადლა̄ბეხ ჩუ ფოლადშვ ი ბერეჟშვ, იმჟვა̄ჲ ლოქ
Page of edition: 122  Line of edition: 1    მოშ ედგჷჭის ჩუ. ოხქიო̄ლნე ლოქ ეჩის ხმალს ი ემოშ ლოქ აქვცე
Line of edition: 2    ჩუ, ეჩქა ლოქ ჩვი̄წბუ̄რა̄ლ, დო̄მა̄ჲღო ლოქ სგა ტეხნი ვორმოთე̄ჲსა.

Line of edition: 3       ეჩქას ქა̄ნსკინე დი̄კონდ ი ხე̄ქვ:
Line of edition: 4       -- ვა̄ჲ, ვორმო̄ჲსა მექვრე როსტომუ̄ლ, ფოლადშვ ლჷლა̄ბე
Line of edition: 5    ვილს მა̄დე̄ჲ ჩხირს ლოქ დეშ აქვცე. ეჩა ბედჟი ჯეჲ ჴადჩუქვა̄ნ ლოქ
Line of edition: 6    ლეხყვინი ვილს, ერე მა̄მ ლოქ ხაყლუ̄ნი ლიქვცედ.

Line of edition: 7       ვოდ სგა დო ლოხყვინეხ ვილს ეჯი ჴადჩუქვა̄ნ, ეჩქად მა̄დ ოხქიო̄ლე
Line of edition: 8    ხმალ როსტომდ. სგე̄რ ლოხყვინეხ, ეჩქა ოხსიპე, ვილი̄ ჩვაქვიც,
Line of edition: 9    დი̄კონი̄ ი ჲეშდჲერუ საჯენ ვორი̄. ე, ათხე ესტუ̄ლე დალაქარ,
Line of edition: 10    -- ჩუ ლოქ იწბუ̄რა̄ლ ათხე. ჩვადწაბუ̄რეხ. მაჲ საკვრელ. მიჩა
Line of edition: 11    სახენწიფ ჩვი̄წჲე ქაქაოზ მეფედ, ლიხჲადა̄ლ ხაყერ როსტომს
Line of edition: 12    ჩვესგუ̄რდა ხალს, ქეიფეხ ხემა̄ჲმოშ. ჟანგა̄ნ როსტომ, ქე̄სშუშპარა̄ლე.
Line of edition: 13    ქაქაოზ მეფეს ჲერუ ჭყინტგეზალ ხაყა ჟი ლჷჲა̄ლვნე, ჩუ ხოსგურხ
Line of edition: 14    ალ ბობშარ მეფე-დედფალს ნე̄სგა̄ჲსა, ჩოსნიკვ თხუმ ეჯჲარს როსტომდ,
Line of edition: 15    ლეჲშუშპრეხუ ლოქ მინდი̄. ჟანგენა̄ლეხ ხენწიფი გეზლი̄რ
Line of edition: 16    ლაშუშპართე ი ეჩუნღო ჩვესგუ̄რდახ მინვ დედე̄შ ი მამა̄ ნე̄სგა. ქა̄ჩად
Line of edition: 17    როსტომ ალჲარე სგობინთექა ი მეფე̄ გეზლი̄რს ეშხვა̄რ ლოხხიპ
Line of edition: 18    თხუმვარ. ეშხუ დის ოსდე ღულა̄რქა ლედგარ გეზალ ი მე̄რმე -- მუს.

Line of edition: 19       -- ხინ ლოქ ე ლე̄სეს გეზლა დაგრა, ეჩქა მინდი̄ ილხინესუ,
Line of edition: 20    ჭირ ლოქ ე ლე̄სეს, ეჩქა მინსი̄ ჭირუ ხა̄რხ.

Line of edition: 21       ეშხუ ჭიქ ჩუ̄ვდ ლალჷ̄შ როსტომდ, ჩოთჭათვნე ქორ ი ლირდე
Line of edition: 22    ი აჩად მიჩაშდ.

Line of edition: 23       ამზუმ ნაწვალავა̄ლ როსტომს ჩვათგე̄დნე̄ნა იმე̄ჲღენა უხვა̄ნ კოჯა
Line of edition: 24    თხუმჟი. როსტომს ესრენ და̄ვარ ხასსგე̄ნა. ალჲარს ჩოთკვიახ,
Line of edition: 25    ერე როსტომ ლოქ ქე̄მჴედ ვორმოხენქა, ჩუ ხათრო̄ნახ მინე მუხვბაშა̄ლ
Line of edition: 26    როსტომ. ეშხუ ხოშა და̄ვ ჟეთლაკა̄ნ ალეს მუვჟას.

Line of edition: 27       -- ათხე ალეს ქა დე̄მ ხვა̄ჲცხუნე, და̄ვემ ლე̄ქვ, ჟი ხვიცვემ ამჟი
Line of edition: 28    მიჩა ლჷკოჯდ, ნო̄თი მოშ ოთცუდვა ჩუ.

Line of edition: 29       ლოხდე შვენჲა̄გარ (\ ლაცვმარა̄ლ) კოჯს, ჟენცვე ი ოსღვა,
Line of edition: 30    როსტომ ჩვაყვრე ამშა თხუმჟი, ამჩიქა ქა̄ნჲაცხ.

Line of edition: 31       -- მაჲ ლოქ ამბავ ლი ალე, როსტომს ათა̄და, ოსღვა ლოქ მჷრა̄მ
Line of edition: 32    ჯეჲ მიჩა ლჷკოჯდ.

Line of edition: 33       -- ჯეჲ ლოქ ლი მიჩა ამახვ იყუნსარაჲ და̄ვ, ათხე ლოქ ასჲე̄ნა
Line of edition: 34    მეშხე ლადეღ მიჩ.

Line of edition: 35       -- ო, მიჩა̄ვ მაზიგუ ლახჴედა, მიჩა და̄ვუ̄ლ, როსტომდ ხე̄ქვ,
Line of edition: 36    ხიად, მა̄ჲგვეშღა ძუღვათე ნომა̄ვ ადკვა̄რ, ეშჲეში̄ კოჯქა̄ვ ადკვა̄რ.
Page of edition: 123  Line of edition: 1    ალახ ერე ძუღვათე ლიკვა̄ნე მო̄ ხაკუ, ჲაღო ამხა̄ვ აკვა̄ნე. ადჲე
Line of edition: 2    ი ძუღვათე შლიგ ახკიდვნე კოჯს. კოჯ ჩვაშყად ძუღვა̄ ძირთე ი როსტომ
Line of edition: 3    ქა̄ნტახ ლაცურავუშ. სგა ლეხი̄და ეჯ და̄ვს ღოშგინ ი ჩვადგარ.

Line of edition: 4       სერ ეჩუნღო იზელა̄ლდა ი ადგარდა და̄ვარს, იმე̄ჲ ეთთხანო̄ლ.
Line of edition: 5    დე̄სა აცვირ და̄ვ მჷ̄მბვიდ, მაგ ჟანხვიტ. მიჩა გეზალ ზურაბიშთე ლიტეხ
Line of edition: 6    ეჩანღოგარ ლეხშყად. ჯამზჷრახ ღერთემ.


ერმილე ონიანი. სასაში. ა. ონიანი. 1. IX. 1958



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.