TITUS
Svan Prose Texts IV (Lashkh)
Part No. 84
Previous part

Text: 84 
Page of edition: 123 
Line of edition: 7 
LXXXIV. ამირან


Line of edition: 8       ჯამზჷრახ ღერთემ. ამეჩუ არი ამირან, ხედი̄ ერე ჩიდხოშა ლჷჴმაშ
Line of edition: 9    ლი. იზელა̄ლ ალე ი ხაკუ ერე, ჲერვა̄ლე ბჷგი მა̄რას, მიჩა მეტხჲელს,
Line of edition: 10    ეთთხანე̄ნდეს, ხოშა ნაღალდ და̄ვარს ხეთხე̄ლი, ეჯჲარს იმე̄ჲ
Line of edition: 11    ხეთხნი, ჟი ხუტე. ღუმუ̄რალ ე̄რ ლიხ, ალჲარ ლოქ ხაჯეშხ და̄ვს,
Line of edition: 12    სერ ამირან ალჲარსი̄ ჟი ხაყვფინა და̄ვარე მასისგვშ ი ქა ლჷმკვა̄ნინ
Line of edition: 13    ჯო̄დჲათე. ამჩიქს ამირან ჩვათვაფ ლჷლეღვ-ლჷჯიჯვდ. დეშე̄რდმა
Line of edition: 14    ენმეჴრე ამშა. ალეს ჲეხვ ოთსად ღა̄ნავ ხოშა კოჯისა.

Line of edition: 15       ეშხვინ ისმი ლიკი̄ლი. ფჷრის ჩვაზსყე ი ზჷსყის ჩვაფრე ალ ლიკილი.
Line of edition: 16    ამშა ჭალა̄ჲსა ლი ძღჷდ სოფელ. ალ ლიკი̄ლიდ ჟანწუხვავე
Line of edition: 17    თელდ სოფლი ხალს. ალ სოფელისა იზგე ეშხუ მჷშკიდ, ხედნე̄მი̄
Line of edition: 18    გუთე ესდე ეჩა ლიმჴერი, ერე მა̄ჲ ღენ ლი მჷკი̄ლი. ლე̄თშვ ღჷრი
Line of edition: 19    უქბო̄ლდაშ მიჩა ლაშკდაშთე ი ასყი ჲეჩო̄ლარს, ჟანსყე ხვაჲ. მიჩა ჲეხვს
Line of edition: 20    დესამა ახმეჴრა̄ლვნე, დე იშგენს ე̄ს. ეშხუ ლე̄თ ალ ჲეჩო̄ლარ სგა̄შიდ
Line of edition: 21    მაგ ქა̄ცითეჲსა, შიდ ესყედნე ბერჟი ყვე̄ბა, ისგლე̄თმოყქა სგა
Line of edition: 22    ლახა̄გა̄ნ ალ კოჯს, ხაცყე ჲეჩო̄ლს ი ჭიშხს იგემ, ამჟი ესღრი კოჯლეჟა.
Line of edition: 23    ხჷნსგა კოჯს ერე ჟოთქა̄ბე, ხატცი ჲეჩო̄ლს ბერჟი ყვე̄ბას ი დეშ
Line of edition: 24    ლახბჷგე, ეჩანღო̄ნენ ტოტშვ ოთჯილკე ი სგე̄დკარა̄ნდა ყო̄რ. ეჯკლიბ
Line of edition: 25    ლასგიდ ანჴად ალ ყო̄რქა, ერე უნა̄რევ. მაჲ ჩუ ე̄სამა არი ამე̄ჲსა,
Line of edition: 26    მაგ ვოქრეშ ლი ი ალჲარე ნაღაჟვშ ლი ლასგიდ. სგა̄ჩად მჷშკიდ
Line of edition: 27    სგა̄ნთე ი ლაყვრაჟი ზურა̄ლს ხეწად. ალე ჩვაყუ̄რდა, ჩუ ლას
Line of edition: 28    ხოჩა თვალაშ ი ტანაშ, ამშა ლისგდის მა̄მა ხოჩა̄ნ. ამნე̄მ ერე ლიგჷრგალი
Line of edition: 29    ჟენბინე, მჷშკიდი გუემ ლიცხემ ედბინე. ხოჩა ვოქრე ლჷსდგვარა̄ლ
Line of edition: 30    ხა̄გ, ხვა̄ჲხანს ხენყავდა ალეს მჷშკიდ, ეჩანღო̄ნენ, ლი̄ზა̄ლს,
Line of edition: 31    ხე̄ქვ ზურა̄ლდ:
Line of edition: 32       -- ეშხუ ჲეჩო̄ლი̄ლი̄ ლოქ ნო̄სა ოთსეს, ოდო მიჩა ჲეხვ ლოქ
Line of edition: 33    ლი გვეფ ი ეშხუ ჲეჩო̄ლი̄ლშვ ლოქ გარ ჟი ჴედნი ამხა̄ვ. ეჯი ლოქ ერ
Line of edition: 34    ჟანჴეს, იშგენ დო̄სამა მაყრის ი ლჷსდგვარგარ ამქუცას, ჯეჲ ლოქ
Line of edition: 35    ეჯის ჟი ხედგარი.

Page of edition: 124 
Line of edition: 1       მჷშკიდ ლე̄თშვ ჩიგარ ესღრი ალ ზურა̄ლთე, ალე ლჷმა̄რ ამირანი
Line of edition: 2    ჲეხვ. კი̄ლ-კი̄ლს ეჩქა იკდჷდა, შომა̄ჲ ამირან ხეშყდენო̄ლ. ეშხუ
Line of edition: 3    ლეთ მჷშკიდს ჩოთსად ჲეჩო̄ლ, ალე მიჩა ჲეხვემ ჟენმეჴრე. ჟაჩად
Line of edition: 4    ზურა̄ლ ალ კოჯლეჟა ი ვოქრე ლჷსდგვარ ქა ღალ ახქვიც. ამირანი
Line of edition: 5    ჲეხვ ლადგარს ლახა̄გა̄ნ. მე̄რმა ლე̄თ მჷშკიდ აჩად, ზურა̄ლ მექუ̄ნავა̄ლ
Line of edition: 6    ესხვი̄დ. ათხე ზურა̄ლდ ხე̄ქვ მჷშკიდს: -- მახე ნატფუ̄რ
Line of edition: 7    კამბეჩი ტუფუ ითხე. მჷშკიდ აჩად კამბეჩი ტუფი ლათხე̄ლითე, ჩვი̄თხე
Line of edition: 8    ი ანჴიდ. ზურა̄ლდ ჟენკიდ ვოქრე ჯაყვაჲ ი ხე̄ქვ მჷშკიდს: ათხე
Line of edition: 9    სი ჩვამჷბჴვ ჴადჟი ალ ვოქრე ჯაყვაჲშვ". მჷშკიდ დე̄მ იჩო, ხატკლებ
Line of edition: 10    ლებჴვად, მარა ზურა̄ლდ მა̄ ჩომინ:
Line of edition: 11       -- ჯეჲ ლოქ იდგარი ი ალე ლი ი ჴადისა ლოქ ჭყინტ ხაყა ი ეჯის
Line of edition: 12    ლოქ ნომა ადგარიხ. ჭყინტ სგა̄ვ ათჭო̄ნე კამბეჩი გვე̄რათე, სგა̄ვ ადყვინე
Line of edition: 13    ვოქრე აკავანთე, ბჷგიდ ლოქ ჟი̄ვ ანლაჯე, ამჟი ჟი̄ვ ლოქ ენცვე
Line of edition: 14    ი იამანი წყაროთეჟი̄ვ ლოქ, ადჲე, ალ აკვანს ამირანი ხმალ ჟი̄ვ
Line of edition: 15    ლოქ ოსრიკ.

Line of edition: 16       ალე მჷშკიდდ ჩუ ჩომინ ი ზურა̄ლი̄ ჩვადგა̄ნ.

Line of edition: 17       ათხე იამან აჩად წყაროთე ლაწვე̄ნად, ჟახხვი̄და ვოქრე აკავან.
Line of edition: 18    იამანს ალე ლახსაკვრელჷ̄ნ. ადსი̄ნჯვე ი აკავანისა ბობშ აყვრი.
Line of edition: 19    ლა̄რტყჷნჟიბო ვოქრეშ ლი ალ ბობშ ი ლა̄რტყჷნჩუბო -- ვერცხლიშ.
Line of edition: 20    ალე იამანს გუ̄ნ ათხი̄დჷ̄ნ, ჟენკიდ ალ ბობშ ი ჩაფჷლი ყიალექვა ედკვა̄რ
Line of edition: 21    ი აჩად აგითე. ქა ლოხხელე ჩაფჷო მიჩა ჲეხუ̄ლს ქა ლეკედდ.
Line of edition: 22    "იამან, სი მა̄რე, იმ ხიჩო, ჲეხვემ ხე̄ქვ, ათხად დე̄სა ჯიკდჷ̄რა̄ლვნა
Line of edition: 23    მიშგვავ ჩაფლარ, ათხე მაჲ ამბავ ლი". ჭაშემ ძალავშ ათკიდვნე ჩაფჷლ
Line of edition: 24    ი ბობშ სგო̄თშყად კალთაჲთე ზურა̄ლს. "მადილუ ხა̄რ მიშგვა
Line of edition: 25    ღე̄რბათს, ალე ბადრი̄შ ი ვისიბი მუვე̄ნად მე̄რი", ლე̄ქვ ზურა̄ლდ.

Line of edition: 26       ალ ბობშს ჟახად ამირან ესჟახეხ. ეჯი ლე̄თშვ ირთხინს იცხმჷდა
Line of edition: 27    ი ლადეღშვ -- კამჷლს. ალე ჟენჷრდეხ მინე ჭყინტარცახან.

Line of edition: 28       იამან ლჷმა̄რე̄ლი გმირ, მარა ლადი მეჩი ლი. ვოდერ მახე ლას,
Line of edition: 29    ეჩქად ჲეშდჲერუ ლჷთხუმ და̄ვს ზაისა ჲეშდჲერუ საჯენ ზექს ხაჴდუნდა
Line of edition: 30    ი ჲეზვისა ჩუ ხაგმუნა. შომა̄ჲ ერე იამან ჩვედმეჩა̄ნდა, ეჩქა
Line of edition: 31    ჲეშდჲერუ ლჷთხუმ და̄ვ ახწი̄ნდა. ათხე მიჩ ხა̄რ ჲეშდჲერუ საჯენ
Line of edition: 32    და̄ვაშდ ლეჴდე. გუ̄ნ ერ ჩვედმეჩა̄ნ, დეშმამ ხოჴდა. ანჩად და̄ვ ი
Line of edition: 33    ლერსგვენი თე ღალ ოხკიდ იამანს.

Line of edition: 34       ბადრი, ვისიბ ი ამირან ჟენჷრდა̄ნხ, აჩადხ ლაღრა̄ლდ ნიცთე,
Line of edition: 35    ეშჩუ ლახხვი̄დახ მეჩი ზურა̄ლ. ალ ზურა̄ლს ამირანდ ლალციარ ჩოთკუშუ̄რე.
Line of edition: 36    ეჩქა ზურა̄ლდ ქა ლახსაყდვრე: "სგაჲ ე ხოჩა ბობშარ ხიდ,
Page of edition: 125  Line of edition: 1    ისგვე ბაბას ერ თე დო̄სა ხა̄რ, ეჯი ეთწორედ". ბობშარ ამჟი აჩადხ
Line of edition: 2    აგითე. ამირანდ ხე̄ქვ მიჩა მჷრდის:
Line of edition: 3       -- ქე̄მნაყ ხოჩა თაშა̄რ.

Line of edition: 4       მჷრდიდ ქო̄ხნაყე თაშა̄რ ი ქო̄თჴიდ სგობინთე, ამირანდ ალეს
Line of edition: 5    ტეფ ახცი̄რე, მიჩა მჷრდის მჷჭოდჟი ლახდე ი ხე̄ქვ:
Line of edition: 6       -- ვოდ დო̄მ მე̄ქვნე, ბაბა̄ თეს მა̄ჲ ღენ ხეყარ, ეჩქად დე̄მ
Line of edition: 7    ჯიკედ.

Line of edition: 8       -- ეჩის ხოდა̄ვ ათშდეხა ლადეღ, ჲერვა̄ჲდ ალე სგაჲ ქა ჯე̄ქვხ;
Line of edition: 9    ისგვე ბაბას ჲეშდჲერუ ლჷთხუმ და̄ვემ ოხკიდ თე, ხე̄ქვ დიემ.

Line of edition: 10       ანჴად იამან ი ჲეხვს ოხტე̄ვე:
Line of edition: 11       -- იმნარ ლოქ ხო̄ქვა ალე ბობშარეშდ, ჩიქე ლოქ ალჲარ კოტო̄ლარ
Line of edition: 12    ლიხ ი მა̄ ლოქ ხა̄ჲმედახ ეჯ და̄ვა ლიცვა̄ლ.

Line of edition: 13       -- ჲაღო ადჲე̄ვ ლოქ ი ეჯ და̄ვ ქა̄ვ ხათო̄ნე, ხეშგოხ ბობშარ,
Line of edition: 14    მარა ალეს იამან დე̄მ იჩო:
Line of edition: 15       -- ჩიქე ლოქ ბობშარ ლიხ ი მა̄ ლოქ ხა̄ჲმედახ.
Line of edition: 16       -- მი ერ ლოხთერ, ეჩქა მი ჯე̄ქვნინე ეჩხა̄ვ ლი̄ზის, ხე̄ქვ იამანდ.

Line of edition: 17       ხაქა̄რ ჯუნა̄ლვნე სერ ბობშარს იამან.

Line of edition: 18       აჯაღ ლეხშყადხ ალე ბობშარს ი ბჷგიდ ოხტე̄ვეხ მინე ბაბას.
Line of edition: 19    ჩიდ ხოშა ამირანს ხაკჷლდა̄ლა და̄ვა ლიცვა̄ლ, მე̄ვარ ხოლა̄მდ იშდაბ.

Line of edition: 20       იამანს ხო̄გ ჲეზვისა მუ̄რყვამ, ამშა ყო̄რს ჟი ხაჭიდ
Line of edition: 21    დოლობში̄რა.

Line of edition: 22       -- ალეს მი ი ეჯ და̄ვ მუ̄რყვანჟიქა̄ნქა ხვაკვა̄ნად, იამანდ ხე̄ქვ,
Line of edition: 23    ი შომა̄ჲ ლოქ მინ ალეს ჩუ იჩოხ, ერე ალ დოლობ-ში̄რას მუ̄რყვამჟიქა̄ნქა
Line of edition: 24    ქა̄დკვა̄ნნეხ ი მე̄რმახენ ჟენჷრმნეხ, ეჩქა ლოქ ხაყახ და̄ვა
Line of edition: 25    ლაშჲა̄ლთე მე̄ზიდ.

Line of edition: 26       სგა ლახა̄დახ მუ̄რყვამჟიქა̄ნქა ალ დოლობ-ში̄რა̄ ლაკვა̄ნას. სგა
Line of edition: 27    ხაფხიჭე ბადრიდ დოლობ-ში̄რას, ხვენჲა̄გარქა ხაჴიდ მუ̄რყვამს, ქა დეშ
Line of edition: 28    ადკვა̄რ. ხაფხიჭე ვისიბდ ი ნე̄სგა მუ̄რყვამს ხაჴიდ. ხაფხიჭე ამირანდ,
Line of edition: 29    ქა̄დკვა̄რ მუ̄რყვამჟიქა̄ნქა, მარა ეჩხენ დეშ ლეჲგრმე. იამანდ ხე̄ქვ:
Line of edition: 30       -- ჩიქე და̄ვაცახან ლიშჲა̄ლ მა̄ ლოქ ხა̄ჲმედახ. ხჷნსგე ზაჲ
Line of edition: 31    ჩუ̄ვ ლოქ ენღე̄ლეხ, ეჩანღო აჯაღ ლოქ ადკვია̄ლვნიხ.

Line of edition: 32       ალ ხჷსნგა ზაისა იამანს ლათხვიართე ოსყე̄და მიჩა ნარდალ ი
Line of edition: 33    ცხეკს ნათხვიარას მა̄მ ხაცვრუდახ. ქა̄ჩად ალ ხჷნსგე ზაჲ, სგა̄ვდ ლეხტახხ
Line of edition: 34    აჯაღ ალ მუ̄რყვამს. ენკიდ ბადრიდ დოლობ-ში̄რა, ქა̄დკვა̄რ ეჩხენთე
Line of edition: 35    ი ჟი დეშ ლეჲჷრმე. ათხე ვისიბი ნა̄თი ლი, ენკიდ ამნე̄მ ი
Line of edition: 36    ხვენჲა̄გარს ხაჴიდ. ათხე ამირანი ნა̄თი ლი, ამირანდ ენკიდ დოლობში̄რა,
Line of edition: 37    ქა̄დკვა̄რ მუ̄რყვამი ჟიქა̄ნქა, ეჩხენ ჟი ლეჲჷრმე ი ქა̄ვდ ანტიხ
Line of edition: 38    ამხენთე ძირს უდად. ათხე იამანს ათა̄და:

Page of edition: 126 
Line of edition: 1       -- მადილუ ხა̄რ მიშგვა ღე̄რბათს, ლადი ჩუ ჯაყახ მიშგვა მუწვრიდ.
Line of edition: 2    ათხე ალეგარ დეშ ლი, სგაჲ ჯაწჷხხ, ეჩხა̄ვ ერ ადინედ, ეშხუ
Line of edition: 3    წელი თხუმ, ჲერუ ციცვი თხუმ, ეშხუ კუპრ ნაფი̄ნ ნიც, ეშხუ
Line of edition: 4    ტომარაჲ ჷჯაბ ქერ.

Line of edition: 5       ალე მაგ ჩვი̄თხეხ ი ქე̄დჷნგზა̄რვა̄ნხ. ჲარაღ მასარდ ხუღვახ
Line of edition: 6    თვითჟი ჩი̄ს. ათხე იამანდ ხე̄ქვ:
Line of edition: 7       -- ლჷმა̄რე დერ ხიდ სგაჲ ლა̄ზიაშდ, მი მა̄ მა̄ჲმედა ეჩავ ლიჴედ
Line of edition: 8    ი ამანეშ ქა ჯათო̄ნნე და̄ვა ლაზგას.

Line of edition: 9       სერ იამან ხო̄მბვი: -- და̄ვს ლოქ ხაყა ლალსგურად ძღჷდ
Line of edition: 10    კერტან, ქა̄მთე ლა̄ზჟი ღადარს ყიალექვა იშდე და̄ვ ი ეჯნოვშ აცდავი
Line of edition: 11    ხალხს. ჲერუ ყო̄რმოყუ ლოქ ესჷ̄გა̄ნხ მარჯვდ, ტახს ლოქუ ოთშიდხ
Line of edition: 12    ქერ ი ყიალეჟა ლოქ ერ ლემეს ანღრი, ეჩის ნაფი̄ნ ნიცუ ესგოშეხ.
Line of edition: 13    მესმე ლაჴვრამჷყუ ლოქ აჩად ი ღადართე̄ჲსა̄ვ ლოქ ახფიშვდ ციცვი
Line of edition: 14    თხუმ, ღო მე̄რმე ციცვი თხიმ, ეჩანღო წელი თხუმშვ სტოლს
Line of edition: 15    ლოქ ჭიშხ ნო̄თი მოშ ათკუშახ.

Line of edition: 16       ამჟი აჩადხ სერ ალჲარ, აჴადხ და̄ვაშნუნ. ამეჩუ̄ნენ ლიჭრაჟა̄ლ
Line of edition: 17    ოხჩჷ̄დხ -- ჲერვა̄ჲ ღენ ესჷ̄გე̄ნდეხ ყო̄რმოყ ი ჲერვა̄ჲ ღენ აჩეს ლაჴვრამოყ.
Line of edition: 18    ლოშგინპილს ჟახწი̄რქვნე ამირანდ, ბადრი ი ვისიბ ჩვესგენე
Line of edition: 19    ყო̄რმოყ ი ჯეჲ აჩად ლაჴვრათე ლალე̄ჭვიდ. ახფიშვდ ეშხუ ციცვი
Line of edition: 20    თხუმ, და̄ვ სგა ხასგუ̄რდა ტაბაგს ი ღვე̄რ სგა ლახშჷ̄ღა. ახფიშვდ
Line of edition: 21    მე̄რმე ციცვი თხუმ ი ტაბაგს ჭიშხ ათკვიშ. და̄ვს ათა̄და:
Line of edition: 22       -- მადილუ ხა̄რ ღე̄რბათს, ღერთემ ნაკმარუნ ემზჷზე.

Line of edition: 23       ახფიშვდ ათხე ამირანდ წელი თხუმ, და̄ვს ხაჴიღ მუჭოდისა.
Line of edition: 24    ჟანსკინე და̄ვემ, ღადარ მაგ ყიალექვა ედშიღ, ჩუჩ-კერტანს ჟი ლახსგუ̄რდა
Line of edition: 25    ი ქა̄ნსკინე ყო̄რქა. ყო̄რმოყ ბადრი ი ვისიბ ოსხვი̄დხ, კერტანს
Line of edition: 26    ქერ ოთშიდხ, მჷლამ სგა ლახდიგხ. ბადრიდ ი და̄ვემ სგა ხაფხიჭეხ
Line of edition: 27    ეშხვა̄რ, ამირანს ლაჴვრაჟი ჩვათგე̄დდა. ვისიბ ჩვედი̄ტვა̄ნ
Line of edition: 28    რაშშვ. ბადრი ი და̄ვ იბჷრგჲელხ, თან ხატუ̄ლი ამირანს: -- არიქა
Line of edition: 29    ხოწა̄დავ, ედო და̄ვ ლოქ ხემწირ. ბადრის ჲერ ხო̄ზდა ეჯკალიბ, ერე
Line of edition: 30    დეცე ლაჴვრას ფჷტდა. შომა̄ჲ ლას, ამირან ჟანჲაცხ, ეჩქად ჩოთგაჭ
Line of edition: 31    ბადრი და̄ვს. ამირანდ სგა̄თფხიჭე და̄ვს ი ჲეშდჲერუ თხუმ მაგ ეშხუდ
Line of edition: 32    ახქვიც, ნეც-ნეცინდ ჩვადჭკორე, ჯიჯვ ი ლეღვ მაგ ჩვადჷ̄თე.
Line of edition: 33    ჲეშდჲერუ საჯენ ჯიჯვს ეხფასა̄ნ ი ჲეშდჲერუ -- ლეღვს. ალე ერ ქა̄დგა̄თვე,
Line of edition: 34    ეჩქაგარ ეხთხე̄ლდა ლახვბას. ბადრიდ ხე̄ქვ ამირანს, -- ვისიბ
Line of edition: 35    ჩუ ლოქ ალჷ̄ტვე̄ლი, და̄ვს ლოქ ერ ხაწდა. ბადრის ხე̄ქვ: -- ვისიბუ
Line of edition: 36    ლახტუ̄ლე, იამანუ ლახღვერნე, არგებს ლოქ მო̄დ ადსკინას ძუღვათე,
Line of edition: 37    ქა̄ვ ხე̄ქვ, ერე და̄ვ ლოქ ჩოთდაგრახ. ბადრი̄ ჲერ ეი კთსჷ̄ნდა
Page of edition: 127  Line of edition: 1    ვისიბს, ეჩქა რაშს სგობნე ჭიშხარ სგა ლჷგე ხუღვა̄ნ ძუღვათე, მარა
Line of edition: 2    ღოშდ ანტახ ვისიბ.

Line of edition: 3       და̄ვს ნე̄სგა სგირი̄ჲსა ვოქრე სვეტ ხუღვა̄ნ, მა̄რე̄მი თე̄რალშვ
Line of edition: 4    გოში. ლეჲდეხ ალე ბარჯს ი ადჲეხ, ხვაჲ იშგენ ქონებაცახან, აგითე.
Line of edition: 5    იამანდ ძღჷდ ლიხჲადა̄ლ ჩომინ. მიჩა თე სგა ლოხგეხ იამანს,
Line of edition: 6    ოსცვიეხ უკუდე̄მი წყარო ი ჟენხოჩვა̄ნ.

Line of edition: 7       იზელა̄ლხ ლახვბა ლათხვიართე, ამირან ჲადურდ დე̄მ აგვა̄ვი
Line of edition: 8    და̄ვარს. ეშხუ ლადეღ მინდორისა ლახხვი̄დახ სემი გველჲერშაპ,
Line of edition: 9    ალჲარ ამირანდ ჩვადჷ̄თე: -- წჷრნი, ჩიდ ხოშა, ამირანს; ქურუხვ,
Line of edition: 10    მანე̄სგრა, ბადრის; მეშხე, ხოხრა, ვისიბს. ბადრიდ ლე̄ქვ, წჷრნი
Line of edition: 11    ლოქ მიჩ ი ქურუხვ -- ამირანს, მეშხე -- ვისიბს. ალ გარგლა ერ
Line of edition: 12    ქა̄დგა̄თვეხ, აჩად ჯეჲ წჷრნითე, ბადრი -- ქურუხვთე ი ვისიბ -- მეშხათე.

Line of edition: 13       ამირან ხემა̄ჲ ქა̄ჩად, ჩვათგე̄დდა ი მუვჟე ჩვესყლეპე გველჲერშაპდ.
Line of edition: 14    ბადრიდ ი ვისიბდ ჟანხვიტხ მინე-მინე ნა̄თი გველჲერშაპალ.
Line of edition: 15    წჷრნი გველჲერშაპ, ხედისი̄ ამირან ჴადისა ხეყე̄და, ჩვედი̄ტვა̄ნ,
Line of edition: 16    ბადრი ი ვისიბ ქე̄ხღვაჭხ, მარა ეჯი სგე̄თგვაწ გიმთე̄ჲსა ი ალვედი ლიქვცეგარ
Line of edition: 17    ოხჩიშხ ლახვბად. ჴურუმოყ, იმეჩუ̄ჲ გველჲერშაპ აჩად ჩუ,
Line of edition: 18    ლახვბად ჩვედგეხ კარავ, ბადრი ხატული ამირანს:
Line of edition: 19       -- ხანჯარუ ლოქ ხაჴიდ გველჲერშაპს.

Line of edition: 20       გველჲერშაპ ჩვაჩად ჩუბე ბუა̄სთე, ეჩე ამირან ქა̄ნჲაცხ ი ოსცვია̄ლე
Line of edition: 21    გველჲერშაპს. ალეს ჴადარ ახზიგდა ი მიჩა დის ლახჷნჩჷლე.

Line of edition: 22       -- დედე̄შ, ჟიბე ბუა̄სს ლოქ სემი ბუზუ̄ლი̄ლარ არიხ, ეჯჲარ
Line of edition: 23    ლოქ ნო̄სა ათყე̄ნა̄ნ, ქა̄ვ აჩად ი ვოქრე სვეტსუ ეთჭო̄ნა̄ნ ი ჩუ ლოქ
Line of edition: 24    ედჭყჷტნი, მა̄ჲ ღენ ლოქ ლი.

Line of edition: 25       ქა̄ჩად ეჯი, მარა, აკვედ ერ მექვცე ხა̄და, სერ დეშ ლეხგაჭ სვეტს,
Line of edition: 26    ჩვანშყად ძირთე. სერ მიჩა დიემ ლიმზჷრი ოხბინე: -- ამირან ლოქ
Line of edition: 27    ე̄სა ლი, ქა̄ვ ლოქ ანჴად ჲედ სგობნა̄ვ, ჲედ ღოშგმა̄ვ. ამირანდ
Line of edition: 28    ხე̄ქვ: -- ჟი̄ვ ლოქ ედტიხხ ჟიბე ბუა̄სთე, ოდო აშ დეშ ლოქ ჴედნი,
Line of edition: 29    ეჩე ლოქ ქა ანჴდენი, იმექა̄ჲ ლოქ ხეკვდი.

Line of edition: 30       ალჲარდ ჩვაღღვენეხ ამირან, ერე ჩუ მო̄დ ადგარის გველჲერშაპ
Line of edition: 31    ი ჟედტიხხ ჟიბე ბუა̄სთე. ეჩე ჟოხჭი̄რხე ხანჯარშვ ლერსგვენ
Line of edition: 32    ლესგ ი ქა̄ნჴად ეჩექა. გველჲერშაპს სგა ხაყერხ ჩელტი ლესგ ი
Line of edition: 33    ჩვაფიშვდხ ლუარ.

Line of edition: 34       ამირანს ლახუშგდჷ̄ნ, ამჟი ერ ხეყარ, ი ქე̄თყვალ ბადრის ი ვისიბს
Line of edition: 35    ი აჩად მიჩაშდ, იზელა̄ლ სერ, მიჩაშურად ირო̄მა̄ლ ცხეკისა, ხეთხე̄ლი.
Line of edition: 36    ჲერ ბჷგი ი̄რი, ი ხეცვა̄ლ ი ხუტე ეჯჲარს.

Line of edition: 37       ამირან ლას ჯგჷრა̄ჷი ლჷპრისდე. ქა ლეხწვე̄ნა̄ნ მიჩა პეპი ი
Page of edition: 128  Line of edition: 1    ეჯნე̄მ საჩქვარდ ლახო̄მ, ერე სუმინ ვოდ დო აკვშე ჯგჷრა̄გი მაღვრას,
Line of edition: 2    ეჩქად ამირანი მჷმწირ დე̄სამა ლოქ ი̄რდი.

Line of edition: 3       აჴად ამირან ეშხუ ძღჷდ ჯო̄დჲა მინღორთე̄ჲსა, ალ მინდორ ლი
Line of edition: 4    გოში ღოლჲა̄ქა ჯოგშვ. კოჯა კეცხჟი ჩუ სგურ და̄ვ-დედბერ, ხოშა
Line of edition: 5    ღუმუ̄რ ლეშგვე̄რდ ხუღვა ი ხოშა დოლობ -- ჩერიშტად, ნეცინ ცხეკს
Line of edition: 6    ალთე. ალეს ამირან დე̄სა ხეწად. სგე̄თნეჩდა̄ნ ამირან ღოლჲა̄ქარს,
Line of edition: 7    ხატცი ხმალს ღოლჲა̄ქს, ხაქვცე თხუმს ი ეჯი შიშდ სგა ხეტხენი.
Line of edition: 8    ალე ამირანს ლახხჷ̄რჷ̄ნ, ერე ღოლჲა̄ქ დეშ ადგარ. და̄ვ ხოსგდი ალეს,
Line of edition: 9    ესდე ჲერ ღოლჲა̄ქა ჯოგს ი სგა̄ჩად ჯოგ ქვაბთე̄ჲსა ი ამირანი̄ სგედყევნე.
Line of edition: 10    ანჴად და̄ვ ი ქვაბი ყო̄რ ჟანგე, ჯეჲ სგა̄ჩად, ლემესი ნა̄შვეჲჟი
Line of edition: 11    თხუმ ესდე ი ჩვათგე̄დდა. ამირან სგა̄ნ უტკუნისა იზელა̄ლ ი ხეთხე̄ლი
Line of edition: 12    ქა̄მთე ლა̄ზს. ამჩიქა ათსჷ̄ნდა ლიკვეც, ხასკვრელ ალე ამირანს.
Line of edition: 13    იმხენი̄ ხესმი ალ ლიკვეც, ეჩხა̄ვ ესღრი, ხოშა̄ჲ-ხოშა ხესმი. ამჟი სერ
Line of edition: 14    ჲერ ესდე:
Line of edition: 15       -- ჲარ ლოქ ლი მჷკვეც.
Line of edition: 16       -- ჯეჲ ლოქ ჲარ ლი, ეჯი ლეხჭოდდა.
Line of edition: 17       -- მი ამირან სხვი, სი ჲარ ხი.
Line of edition: 18       -- მი̄ჲ ამირან ხვი. იმნარ ალჴადდ ამჟი უბედ, ერე ალ და̄ვა
Line of edition: 19    ბედიშ ალჴადდ ჲერქე̄და?! აღე საბრა ი ნო̄თი ჟი მოშ ამფუშდა.

Line of edition: 20       ადსი̄ნჯვე ამირანდ ი ლაღლიაშა̄რნუნ გიმისა არი ი ბერჟი ჯაჭვშ
Line of edition: 21    ჩუ ლჷბე ლი. ჩუ დეშ ოთდაგრა მეწრი და̄ვს, სგობნა̄ვ ვორმო ოთშთხარა
Line of edition: 22    ი ლაბჷრგჲელჟი ეჩხა̄ვ ოსქადა ი ჩოთშდუხვა სერ
Line of edition: 23    ლაღლიშა̄რთე̄ჲსა.

Line of edition: 24       სგა ლახა̄და ამირან ი ჟენი̄ყე ვორმოხენჟი.

Line of edition: 25       -- მიჩა მადილუ ლოქ ხა̄რ ღე̄რბათს, ერე მიჩა მჷთხე̄ლიდ ლოქ
Line of edition: 26    გეზალ ახჴედა. ათხე კოტო̄ლ ფიჩხი̄ლარუ ლოქ ითხე, ლემესუ ანა̄შვე
Line of edition: 27    ჟი და̄ვა თხუმმოყ, ნატბიდი ე̄რ ხო̄ჲხენი, ეჩქა ეჯი ქა ლოქ დესა
Line of edition: 28    ჲეცხნი, მინს ლოქ ლიმა̄რა̄ლე დროჲ ლეხვოდიხ. ალ და̄ვს ლოქ
Line of edition: 29    ხა̄რ ჲეშდვოხუშდ თხუმ. მაგვარ სმალ ლოქ ხუღვა, ეთჲა ლოქ მოშ
Line of edition: 30    კი̄ნჩხქა, ჟი̄ვ ლოქ ესზჷმე ხმალ კი̄ნჩხქა.

Line of edition: 31       აჩად ხოხრა ამირან, ენკიდ მიჩა ხმალ, ესზჷმე კი̄ნჩხქა ი ისგთექა
Line of edition: 32    დეშ ეთი̄და.

Line of edition: 33       -- ათხე, საბა, ჲაღო მიშგვი ხმალ ხაკვა̄რა მუხურისა, ჟეხიკ
Line of edition: 34    ეჯი, ემოშ ეხწინა̄ხი, ხოშა ამირანდ ხე̄ქვ.

Line of edition: 35       აჩად ამირან, ჟენთხე̄ლე მიჩა მუე ხმალ, ალე ჲურინ ხოშა ლი

Line of edition: 36       მიჩა ხმალდ. -- ხმალს ერ ლექვნე, ეჯი ლოქ ალე ლი, გუისა ლე̄ქვ.

Line of edition: 37       -- ვოდ ლოქ და̄ვს თხუმს ხაქვცუდეს, ეჩქაღ ღოლჲა̄ქარუ
Line of edition: 38    ადტუფუ̄რე, -- მუემ ხე̄ქვ.

Page of edition: 129 
Line of edition: 1       ხოხრა ამირან ღოლჲა̄ქს ლეფხვნა̄ჲსა ხოყჲენი კე̄ნჭო̄ლს, ღოშგინ
Line of edition: 2    ხატცი ღულა̄ჲ თხუმს, ტუფ ტოტისა ხესდენი ი ტვიტელ ღოლჲა̄ქ
Line of edition: 3    ეჩე შყედნი მიჩაშდ, ე! ამჟი ალჲარ ხვაჲ ადტუფუ̄რე. ალე ქა
Line of edition: 4    ხე̄ქვ ხოშა ამირანს.

Line of edition: 5       -- ათხე, ერ ჯიხა̄ლდეს სი, ხოშა ამირანდ ხე̄ქვ ხოხრა ამირანს,
Line of edition: 6    თხუმს ერ ქა̄თქვიცე̄ხი, ღოლჲა̄ქარ ქა̄მთე ედბინნეხ ლი̄ზის, ნაჲ
Line of edition: 7    ღოლჲა̄ქ; ტუფარ ხაკვჩერ ჟი ლელთხჷფად. და̄ვ ყო̄რჟი ესგენი,
Line of edition: 8    უფათვას ჩვი̄ცვრუნი ი ლჷფათვს ქა ფუშდნი ი ნაჲი̄ ქო̄გფშვდე.
Line of edition: 9    ქა̄მენხენისა ლასგიდ გვე̄რი ი ჩვალდაგრიდ ალ ხოლა ვინდრობა
Line of edition: 10    და̄ვს.

Line of edition: 11       ჩუ̄ჲ ამჟი ჩომინხ. და̄ვ ჩვადგარხ ი ხოშა კოჯს ქა̄დკვა̄რხ. იზელა̄ლხ
Line of edition: 12    ეშხუდ მუ-გეზალ. ითხვიარხ ი ნამბიზუნდ ხა̄მნე მიჩა მუს ლეზობს.
Line of edition: 13    ეშხუნღო̄ნენ ჟახჟა̄ნდა მუეცახან ლიზელა̄ლ ი ქა ლახცვირ მიჩა
Line of edition: 14    მუ.

Line of edition: 15       -- მამა, ხმალ ქა ლემცა̄დ, ხოხრა ამირანდ ხე̄ქვ.
Line of edition: 16       -- დეშ ჯიცა̄დი, მამაღვარა, სი ლჷმა̄რე̄ლხი ხოლა გუეშ ი მი
Line of edition: 17    ერ ჟი ე̄სა ლემმიზზე̄ნდე, მიშგვა ხმალი̄ლშვ კოტო̄ლ ზისხი̄ლ ერ ემჩეს,
Line of edition: 18    ეში̄ ჩუ ხვიდგარი. ამჷნქა დე̄სამა მადგარი, ამჟი მუღვა ღერთაშხენქა
Line of edition: 19    ლჷვოდ.

Line of edition: 20       დეშ ედყიჩ ხოხრა ამირან ი ქა ლევდი ხა̄და ხმალ -- ჩვადცა̄დუნეხ
Line of edition: 21    ხმალარ. სერ იზელა̄ლხ ალჲარ მო̄შ-მო̄შ. დე მაღვრი ხამწამ,
Line of edition: 22    დე -- დე̄სამა ხოხრა ამირანს.

Line of edition: 23       ხოხრა ამირანს სგა ლახხვი̄და მიჩა პეპი -- ჯგჷრა̄გ. აქა̄ნი ოხკიდხ
Line of edition: 24    ეშხვა̄რ.

Line of edition: 25       -- პეპი, სგე̄მბჷრგენ, -- ამირანდ ხე̄ქვ.
Line of edition: 26       -- მი დეშჲამ ჯებჷრგი, -- ჯგჷრა̄გდ ლახტის.

Line of edition: 27       ამირას ეში̄ სგე̄თქვე̄ლა̄ნ. ჯგჷრა̄გდ ფა̄უ ესციყ ჩუ. -- სგა̄ვ ლოქ
Line of edition: 28    ეხბჷრგა̄ნ ალეს, ემოშ ლოქ ახყვიფე. ალე უმარჯვ მა̄მ ლახა̄და ამირანს.
Line of edition: 29    სუმინ ესციყ ჯგჷრა̄გდ ი სუმინ ახყვიფ ამირანდ ჟი. ამირან
Line of edition: 30    ეში̄ ხეკვი̄შა̄ლ, სგა̄ვ ლოქ ეხბჷრგა̄ნ. ერ დოშ ედყიჩ, ეჩქა ხე̄ქვ ჯგჷრა̄გდ:
Line of edition: 31    -- ანჩადუ ლოქ მიჩაცახან, მიჩ ლოქ ხუღვა ბერჟი კალ ი
Line of edition: 32    ეჩე̄ჲსა სგა ლოქ ეხბჷრგი. აჩადხ ი აჴადხ ხოშა კოჯა ძირთე, კოჯარ
Line of edition: 33    ეშ ი აშ ატახხ, ნესგა̄ჲსა ჩვასად კოტო̄ლ მინდორი̄ლ. ამეჩუ ჯგჷრა̄გდ
Line of edition: 34    ამირან ჩვესბე, ჩვესციყ ძღჷდ ბერეჟ, ამირან ბერჟი ჯაჭვშ ეჩის სგა
Line of edition: 35    ლახბე, ხმალ ქახიქა ესდე, ეჲჟი ერე ამირან დოშ ხეჲა̄ლდეს.

Line of edition: 36       -- ლეზობ ი ლეთრე უკლებდუ ჯუღვა, -- ჯგჷრა̄გდ ხე̄ქვ.

Line of edition: 37       ამირან სერ ათხე̄ჲ ლოქ ეჩეჩუ ხა̄ბ ი ჯამზჷრახ ღერთემ.


ბარამ ონიანი. სასაში. ა. ონიანი. 23. VIII. 1960



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.