TITUS
Svan Prose Texts IV (Lashkh)
Part No. 85
Previous part

Text: 85 
Page of edition: 130 
Line of edition: 1 
LXXXV. ივანე ლირვა̄ლეშ


Line of edition: 2       ლჷმარდე̄ლიხ მეკდე ჲეხვ-ჭაშ, ჩჲა̄გ ხეთხე̄ლიხ ესრენ ჟაგარს,
Line of edition: 3    ერე გეზალ ლეხვოდე̄ნდეხ. მეცარს ხოთო̄ნა ეშხუ უსკვ, ეჩის ლოქ
Line of edition: 4    ე ითხე̄ლნეხ, ეშხუ უსკვ ჲეხვემუ ლალე̄მ ი მე̄რმე -- ჭაშემ. აჩად
Line of edition: 5    ჭაშ ი ჩვი̄თხე სემი უსკვ, ანჴიდ ი ეშხუ ჲეხვემ ლალე̄მ, მე̄რმე -- ჭაშემ
Line of edition: 6    ი მესმე ისგდ ედბიჴვხ. ქა̄ჩად ეზარ ხან ი ჩვედღა̄ნვა̄ნ ჲეხვ. დროჲ ე̄რ
Line of edition: 7    ოხჴად, წვირჟი ადყვინეხ. ქა̄ნთავე ჭყინტ ნებოზს, ჟანპრისდე ბაპდ
Line of edition: 8    ი ჟესჟახეხ ივანე ნებვზაშ. ჟი ლჷპრისდანღო ბობშს ლუს ლოხმამა
Line of edition: 9    ი ქე̄მპერ, ემჩედ. ეჩღო̄ნ ესღრი ესრენ ბაპ აგითე, ეჩქა დიე ჴადხენქა
Line of edition: 10    ლოხტუ̄ლა მე̄რმა ბობშს, ერე ჩუ̄ვ ლოქ ესღე̄ლე, ჯეი̄ ლოქ
Line of edition: 11    ჟივ ანპრისდე. ისგლე̄თი დროჲჟი ეჯი̄ჲ ქა̄ნთავე ზურა̄ლდ. ჟანპრისდე
Line of edition: 12    ბაპდ ი ჟესჟახე ივანე ისგლე̄თისა̄შ. ლალემ ამნე̄მი̄ ლუს ი აპარ.
Line of edition: 13    ესღრი აჯაღ ბაპ ი მესმა̄მდ უდ ლახტუ̄ლე: -- ჯეჲი ლოქ ჟი̄ვ ანპრისდე
Line of edition: 14    ბარემს ი ეჩუნღო̄ვ ლოქ აჩად. ლირვა̄ლთე მესმე̄ჲ ქე̄ნთენან.
Line of edition: 15    ჟესჟახეხ ივანე ლირვა̄ლეშ. ამნე̄მი̄ ლალე̄მ ლუს ი აპარ
Line of edition: 16    მჷრა̄მთე.

Line of edition: 17       ივანე ნებვზაშ ნებოზს ჴედნი ი იზბი ლუსს ი ღჷრი მჷრა̄მთე,
Line of edition: 18    ისგლე̄თისა̄შ ისგლე̄თისა ჴედნი ლეზობი ლაზობდ, ლირვა̄ლეშ -- ლურვან.
Line of edition: 19    ხვა̄ჲ ხანუნღო ალჲარდ ჟენცხეხ, მა̄რე̄ლ ეხფასა̄ნხ, დეცი̄ ალჲარე
Line of edition: 20    ში̄ჲსა არი ი გიმი̄.

Line of edition: 21       ეშხუ ნებოზს ანჴად ივანე ნებვზაშ, ჩუ ლალე̄მ ეშხუ თორნ
Line of edition: 22    დიარ ი ჩვადყვინე მიჩა დიემ, მა̄დ აფიშვდ დე̄მთე. ისგლე̄თისა მე̄რმე ანჴად,
Line of edition: 23    ეჩისი̄ ხა̄მნე დიარ ი ეჯი̄ჲ ჩვესცვირ, ლირვა̄ლთე ანჴად ივანე
Line of edition: 24    ლირვა̄ლეშ ი ალე̄ჲ ჩვესცვირ ამნე̄მ ა დიემ. ჩვათთირვნე ალჲარს ეშხვა̄რე
Line of edition: 25    თხუმ: -- ლახვბა ლოქ ლიხ ი ლინხუბუ ხაყერხ უშხვა̄რ.

Line of edition: 26       კოჭო̄ლ ხანჷნღო ხენწიფდ ანჴიდ მუ̄რყჷამთე მიჩა გეზლი̄რ --
Line of edition: 27    სემი მზეთუნ:ხვ. შიშდ ჟენმე̄რა̄ნ, ჩვესრჷხნა̄ლე ი დი̄ნო̄ლარ ქა
Line of edition: 28    მჷრა̄მდ ედცხვაპე. ხენწიფდ ი მიჩა სახენწიფდ ქე̄ნჷმგლოვეხ ალ დი̄ნო̄ლარ.
Line of edition: 29    ალე ჭყინტო̄ლარე პეპი ბაპდ ერ ენმეჴრე, აჩად ი ქა ხე̄ქვ
Line of edition: 30    ხენწიფს, ე̄რე ივანე-მჷშკიდი ჷეზლი̄რს ლოქ ხეხლიხ ეჯჲარე გვეშ,
Line of edition: 31    ლიცი̄ ლოქ ეჯჲარე ში̄ჲსა არი ი -- გიმი̄. ხენწიფდ ენჲერე ეჯჲარე
Line of edition: 32    დი ი ხე̄ქვ:
Line of edition: 33       -- ოხჴიდუ ლოქ მიჩა გეზლი̄რ, გვეშ ლოქ მჷრ ხუღვა
Line of edition: 34    ეჯჲარცახან.

Line of edition: 35       დი სგე̄თჴჷ̄რა̄ნ: -- ჟი ლოქ ნომა̄ვ ანხვიტ ი ეჩქა ლოქ ოხჴიდე.

Line of edition: 36       გაცხაჲდ ეჯ ნებოზს ოხჴიდ სემე̄და გეზალ. ხენწიფ ლახა̄და
Page of edition: 131  Line of edition: 1    ლაჭვდჲელა̄ლს, იმი̄ ღენ ხაშდბახ ი ღოშგინპილს ლეხჭოდდა მიჩა
Line of edition: 2    დი̄ნო̄ლარე ამბავს. ხოშა ლახვბას დე̄სამა ხომჴერა̄ნხ. ხოხრად -- ივანე
Line of edition: 3    ლირვა̄ლეშდ -- ხე̄ქვ:
Line of edition: 4       -- მიჩ ლოქ მჷრ ხოწვა; ეშხვინ ციხვაჟი ლოქ ლჷმყვინე̄ლი ი
Line of edition: 5    ცხულა̄-ჴემეტ ლოქ შიდ ხაღვე̄ნა. მიჩა თხუმჟიქა̄ნქა ლოქ მჷრ ალღრჷ̄ნე̄ლი
Line of edition: 6    ი ეჩა̄შხენ დი̄ნო̄ლარი̄ ლიკი̄ლი ლოქ ხასმო̄ლნა; ჩუ ლოქ
Line of edition: 7    ლჷმდაგრინ ცხულა̄-ჴემეტშვ, მარა ეჩქა დი̄ნო̄ლარი̄ ლოქ ჩუ
Line of edition: 8    ლჷმდაგრო̄ლინხ ი სერ ლახჟერნე̄ნა ლოქ ეჲარ. იმთე̄ჲ ღენ ლოქ
Line of edition: 9    ემჩედე̄ლიხ, ამშა მა̄მ ლოქ ხომჴერა.

Line of edition: 10       ხენწიფს ლიგვნი ოხშგაბ ი სგე̄თჴჷ̄რა̄ნ ლახვბას: -- ჟი̄ვ ლოქ
Line of edition: 11    ენთხე̄ლეხ დი̄ნო̄ლარ ი მინ ლახვბასუ ხა̄დახ, ოღონდ ქა̄ვ ლოქ ხაწვე̄ნეხ,
Line of edition: 12    შომა̄ჲ ლოქ დო ლე̄სეს. ლახვბას ერ ვახშამ ხა̄მნე ი აჩადხ
Line of edition: 13    ალჲარ ლათხე̄ლითე, ლეხჴე̄დვნა̄ნხ ეშხუ კოჯა ძირთე. ალ კოჯს ეშხუ
Line of edition: 14    ჭიშხ ეშხუ ძუღვათე ხა̄გნე̄ნა, მე̄რმე -- მე̄რმა ძუღვათე. ეშჩუ ლჷმარდე̄ლი
Line of edition: 15    ეშხუ ბერჟი და̄ვ, ეჩისი̄ კოჯა თხუმთეჟი ხაკვდა ჟი ლი̄ზი,
Line of edition: 16    მარა ლა̄ზ დე̄მხენ ლჷმა̄რ. ბერჟი დავს ხო̄ქვა ალ ჭყინტარეშვდ:
Line of edition: 17       -- ბერეჟუ ლოქ ითხეხ, ქველბდ ლოქ მიჩა (და̄ვა) თხუმუ ლეჲყედნეხ
Line of edition: 18    ი ჟი̄ვ ანსყეს ჯაჭვ. ჯაჭვს ეშხუ თხუმისა ფუცხვუ ლოქ ოხსყეხ
Line of edition: 19    ი ჟი̄ვ ადკვა̄რხ კოჯთეჟი, ეჯი ლოქ სგე̄ხრეკი ი ჟი̄ვ ეთჭამხ ჯაჭვს
Line of edition: 20    კოჯთეჟი.

Line of edition: 21       გაცხაჲდ ამჟი ჩომინხ. კეცხაშ ივანე ნებვზაშს ხე̄ქვ ჟი ლი̄ზი.
Line of edition: 22    ეჯი ჟოთო̄გა̄ნ, მარა ისგთეჟი დეშ აჩად ი ჩუ ლეტეხ ხა̄და. ივანე
Line of edition: 23    ისგლე̄თიში̄ დეშ აჩად. თხუმნუნ ბერჟი და̄ვი̄ დეშ აჩად. სგა ხაფხიჭე
Line of edition: 24    ივანე ლირვა̄ლეშდ ი ჟაჩად თხუმნუნ, ჟიქა̄ნხენჩუ ლახტუ̄ლე ბერჟი
Line of edition: 25    და̄ვს:
Line of edition: 26       -- მიჩა ლახვბას ლოქ ნო̄სამა̄ვ ათზიგვნე, ოდო მიჩა კი̄ნჩხჟი
Line of edition: 27    ლოქ ენკედ ჩი̄ს.

Line of edition: 28       ალე ქო̄თო̄გა̄ნ სერ ლათხე̄ლითე იჟეთლაკა̄ნ ეშხუ სპილენჯი ქორს.
Line of edition: 29    ამეჩუ ზურა̄ლ არი ჲეზვისა ი ირბჲელ. სგა̄ჩად ივანე ლირვა̄ლეშ ჲეზვთე
Line of edition: 30    ი მა̄ჲ ქა̄ნნაყე ზურა̄ლდ და̄ვა ლეზობ, ალე მაგ ჩუ ლალე̄მ ივანედ
Line of edition: 31    ი ჩოხღე̄ლე ხოშა და̄ვს -- იშგვიდ ლჷთხუმს. და̄ვ ლათხვიართე ლას
Line of edition: 32    მეჩდე ი ნებოზს ანღრი. და̄ვა ჩა̄ჟს ფორხილ ხეყარ.

Line of edition: 33       -- აჩუ, ჯეჲ ლოქ წელკავი ბედიშ, ხე̄ქვ დავდ, იმნარ ლოქ ხაყლუ̄ნი,
Line of edition: 34    ივანე ლირვა̄ლეშ ლოქ დერ მა̄დ ესხვი აგის?!

Line of edition: 35       ანჴად ი ივანე გაცხაჲდ აგის ესხვი̄და. და̄ვ ალეს ლეხჭოდდა:
Line of edition: 36       -- იმნარ ლოქ ემჴედე̄ლი, ლა̄ჲმახვდ ა̄ ლამკეთდ?
Line of edition: 37       -- ლა̄ჲმახვდ ლოქ, მიჩაცახან ლამკეთ მაჲ ლოქ ხუღვა!

Page of edition: 132 
Line of edition: 1       ჩვანსკინე და̄ვდ ჩა̄ჟხენჩუ ი სგა ხეძგარხ უშხვა̄რ. ენქიო̄ლე
Line of edition: 2    და̄ვდ ი ჩვესციყ ივანე ღულა̄ჲთხუმნუნ. ჟენსკინე ივანედ, ლეჲქიო̄ლე
Line of edition: 3    და̄ვ ი ჩვესციყ ლალა̄რტყი̄ლთე̄ჲსა ი ქა̄თჭკორე თხუმვარ. ზურა̄ლდ
Line of edition: 4    ქა̄ნქინე ი ხე̄ქვ:
Line of edition: 5       -- ჯეჲ ლოქ ჭაშ ი ჯეჲ ჲეხვ.
Line of edition: 6       -- მა̄დე ლოქ, ჯეჲ ლოქ თერღლა ი ჯეჲ ძმაჲ.

Line of edition: 7       ქე̄ხბი̄შდა ივანე მჷსკადს ი აჩად მე̄რმა უდლა ლათხე̄ლითე. აჴად
Line of edition: 8    ეშხუ ქორნუნ, ალე თელდ ვერცხლიშ ლი. ამე̄ჲსა ჩვარი ზურა̄ლ
Line of edition: 9    -- მე̄რმე უდილ -- მანე̄სგჷრა. ამშა ჭაშ ჩხარა ლჷთხუმ და̄ვ ლი.
Line of edition: 10    ჩვადგარ ალე̄ჲ ი ზურა̄ლს მჷსკადს ქე̄ხბი̄შდა. სერ აჩადუდ მახვრე̄ნა
Line of edition: 11    უდლა ლათხე̄ლითე ი იმე̄ჲ ლას ალესი̄ ჟეთლაკა̄ნ. ალე სგა̄რი ვოქრე
Line of edition: 12    ქორისა, ჟი ხაფსვნა ჲეშდჲერუ ლჷთხუმ და̄ვ. ანჴად ალეჲ ლათხვიარხენ.
Line of edition: 13    სგა ხეძგარხ ივანე ი და̄ვ უშხვა̄რ ი იბჷრგჲელხ. ჩვედნახე
Line of edition: 14    და̄ვ ი ჩხარა თხუმ ქა̄თქვიც. და̄ვს ჟეხფაშ ი ლეხჭოდდა ივანეს:
Line of edition: 15       -- მინეშმჷყ იმჟი ლოქ ხოხალხ ლიცვა̄ლ?
Line of edition: 16       -- გუშგვემჷყ იცვა̄ლხ ი ჟი ლოქ იშმინეხ ეჩღო.
Line of edition: 17       -- ჲაღო ჟი̄ვ ლოქ ენშომეხ.

Line of edition: 18       ჟენშომეხ ი ეჩუნღო უ̄ქვ-მა̄ქვდ ჟანსკინე ივანედ, ჩუ ხოღლატე
Line of edition: 19    და̄ვს ი სემი თხუმ ღალატშვ ათქვიც. ივანედ ალე დეშ ჩომინ ხოჩა
Line of edition: 20    ლინა̄რ -- მა̄რას ღალატ მა̄ ხეშგდი.

Line of edition: 21       ანჲე მიჩა ლე̄ჲხუ̄რი, ალ მახვრე̄ნე უდილ ი ქე̄ხლაკა̄ნხ ხოშა
Line of edition: 22    ლავდილასი̄ ი ანჴადხ კოჯა იხუმთეჟი, იმეჩუ̄ჲ ჯაჭვ ხო̄ბდახ. ეჩეჩუ
Line of edition: 23    ლახვბა ი ბერჟი და̄ვ ჩვესხვი̄დახ. ჩვანზჷზე ხოშა უდილ, -- ალე
Line of edition: 24    ლოქ ხოშა მუხვბასუ ხა̄და. ეჩღო მანე̄სგრა ანზჷზე, -- ალე ლოქ
Line of edition: 25    მანე̄სგრა მუხვბასუ ხა̄და. მახვრე̄ნე უდილ, მიჩა ლე̄ჲხუ̄რი, დე̄მ ღჷ̄რდა
Line of edition: 26    სგობინ, -- ჩუ ლოქ ხოღლატიხ, მარა ივანედ მა̄ ჩომინ. ჩვადზჷზე
Line of edition: 27    მიჩა ლე̄ჲხუ̄რი ძირთე, სგა ხაფხიჭე ალეს ბერჟი და̄ვდ, ჯაჭვს ლახტ
Line of edition: 28    ხაჴიდ ი ჩვანკვა̄რ ძირთე, ივანე ჩვასად ჟი̄ბ. ლე̄ჲხუ̄რიდ ლახტუ̄ლე
Line of edition: 29    ჩუქვა̄ნხენჟი:
Line of edition: 30       -- ჲეშდჲერუ ლჷთხუმ და̄ვ ლოქ ერ ოთდაგრა, ეჩეჩუ̄ნ, კოჯა
Line of edition: 31    ძირისა, ლოქ რაშ ხა̄ბ, ეჩისუ ოთჯირვე, იმჟი̄ჲ ლოქ ხე̄ქვას, ეჲჟი̄ვ
Line of edition: 32    ჩომინ. ატახ ალე ღოშდ ი აჩად რაშთე. რაშდ ხე̄ქვ:
Line of edition: 33       -- სემი ლადეღ ჩუ̄ვ აფიშვდ ი ლახბალხა̄ლვნე̄ვ ლოქ.

Line of edition: 34       გაცხაჲდ ჩვაფიშვდ ი სემი ლადეღი მჷქაფ უსგვა ლადეღ
Line of edition: 35    ლახბალხა̄ლვნე. ეჩუნღო ჩვადგრმე ი ჟი ლახსგუ̄რდა. ერ ხაჴიდ ლახტ,
Line of edition: 36    აჩად მე̄რა-მე̄ფხაქა ი აჴად ეჩავ ე, იმე̄ჲ მიჩა ლე̄ჲხუ̄რი, და̄ვ ი მიჩა
Line of edition: 37    ლახვბა ა̄რდახ.

Page of edition: 133 
Line of edition: 1       ალ ლავდილა̄ მჷსკდარ სემე̄და̄შიშ ივანე ლირვა̄ლეშს ხუღვა̄ნ ი
Line of edition: 2    ამნურაჲ მა̄დ ოთგვირგვინახ. ივანე ლირვა̄ლეშ ვოქრე მჷშკიდს ოთო̄გა̄ნ
Line of edition: 3    შაგირდდ. ამჟი ანჴად მიჩა მუხვბე მჷშკიდთე მჷსკდარე ლასყევა̄ლვნად.
Line of edition: 4    ჟენკიდ ამნე̄მ მჷსკდარ ი ქა ლახო̄მ ხოშა მუხვბას, მარა
Line of edition: 5    ამნე̄მ ჩუ დე̄სა ათირ მიჩა ხოხრა მუხვბე.

Line of edition: 6       მე̄რმა ლადეღ ლიგვირგვინა̄ლ ლი, კეცხა ლადეღ ხოშა მუხვბე
Line of edition: 7    ხაკვერ ადგვირგვინახ. მჷშკიდ ხოთვრი ივანე ლირვა̄ლეშს ლაგვირგვინა̄ლთე,
Line of edition: 8    ლჷწჲე ლოქ ლიხ, მარა ეჯნე̄მ ვარ ხე̄ქვ:
Line of edition: 9       -- მა̄დე, ჯეჲ ლოქუ აჩად, მაჲ ლოქ მიჩა გვეშ ი̄რი
Line of edition: 10    ლაგვირგვინა̄ლთე ლი̄ზი.

Line of edition: 11       სერ მე̄რმა ლადეღ აჩად ვოქრვ მჷშკიდ ლაგვიგვინა̄ლთე. ივანედ
Line of edition: 12    ჟანმა̄რე მიჩა რაშ ი აჩად უქბოვშ ალე̄ჲ. ქე̄რ ანღრიხ საყდარხენქა,
Line of edition: 13    ხეწად, ერე მიჩა ხოშა მუხვბე ოთგვირგვინახ, ალჲარს თხუმჟიქა̄ნქა
Line of edition: 14    ჲურინ ქე̄ხცხაპ რაშშვ ი ანჴად აგითე. ხალხ ჩვალნა̄ქვე̄ლი, ჲერვა̄ჲ
Line of edition: 15    ხასგდინა:
Line of edition: 16       -- ალჲარ ლოქ ი̄რიხ იღბალიან, ეჯკალიბ ლოქ მჷრ ახსიპე̄ნახ
Line of edition: 17    თხუმჟიქა̄ნქა.

Line of edition: 18       ივანე ანტახ მჷშკიდი ქორთე. მე̄რმა ლადეღ მე̄რმა მუხვბე̄მი
Line of edition: 19    ლიგვირგვინა̄ლ ლას ი აჯაღ ამჟი ჩომინ. ხალს ჩუ̄ვდ ედნა̄ქვა̄ნ, ამკალიბ
Line of edition: 20    ივა ლადეღ დე̄სამა ხოწვა̄ნხ.

Line of edition: 21       მესმა ლადეღ და̄ვს მიჩა ლე̄ჲხუ̄რის ხოგვირგვინეხ. ქე̄რ ოხყახ
Line of edition: 22    საყდარხენქა, ხაჴიდ ლახტ ბერჟი და̄ვს ი ეჩა ბუა̄სთე ათა̄ჲჭვე. ლე̄ჲხუ̄რი
Line of edition: 23    მიჩაცახან ადჲე. ეხლაკა̄ნ მიჩა მოღლატ ლახვბას ი ეჯჲარ
Line of edition: 24    ი ზურალე̄ლ ადჲე ხენწიფიშთე. ხენწიფს ათხი̄დჷ̄ნ, მაჲ საკვრელ ლი,
Line of edition: 25    გეზლი̄რე ლიხვჲე, ლაჩჟა ხოჩა ხაყა. ადძიე ლეძჲენი, ჩომინ ქორწლობ,
Line of edition: 26    ალ ჭყინტო̄ლარე დი̄ჲმუ მიჩა̄შთე ანჴიდ ი ხა̄დახ ხოჩა ლირდე.
Line of edition: 27    ჯამზჷრახ ღერთემ.


ჭუჭა ონიანი. სასაში. ა. ონიანი. 31. VIII. 1958



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.