TITUS
Rg-Veda: Rg-Veda-Samhita
Part No. 293
Previous part

Hymn: 59_(293) 
Verse: 1 
Halfverse: a    मि॒त्रो जना॑न्यातयति ब्रुवा॒णो मि॒त्रो दा॑धार पृथि॒वीमु॒त द्याम् ।
   मि॒त्रो जना॑न्यातयति ब्रुवा॒णो
   मि॒त्रः जना॑न् यातयति ब्रुवा॒णः
   मि॒त्रो जना॑न् यातयति ब्रुवा॒णो

Halfverse: b    मि॒त्रो दा॑धार पृथि॒वीमु॒त द्याम् ।
   मि॒त्रः दा॑धार पृथि॒वीम् उ॒त द्याम् ।
   मि॒त्रो दा॑धार पृथि॒वीम् उ॒त द्याम् ।

Halfverse: c    मि॒त्रः कृ॒ष्टीरनि॑मिषा॒भि च॑ष्टे मि॒त्राय॑ ह॒व्यं घृ॒तव॑ज्जुहोत ।।
   मि॒त्रः कृ॒ष्टीरनि॑मिषा॒भि च॑ष्टे
   मि॒त्रः कृ॒ष्टीः अनि॑मिषा अ॒भि च॑ष्टे
   मि॒त्रः कृ॒ष्टीर् अनि॑मिषा॒भि च॑ष्टे

Halfverse: d    मि॒त्राय॑ ह॒व्यं घृ॒तव॑ज्जुहोत ।।
   मि॒त्राय ह॒व्यम् घृ॒तव॑त् जुहोत ।।
   मि॒त्राय ह॒व्यं घृ॒तव॑ज् जुहोत ।।


Verse: 2 
Halfverse: a    प्र स मि॑त्र॒ मर्तो॑ अस्तु॒ प्रय॑स्वा॒न्यस्त॑ आदित्य॒ शिक्ष॑ति व्र॒तेन॑ ।
   प्र स मि॑त्र॒ मर्तो॑ अस्तु॒ प्रय॑स्वान्
   प्र स मि॑त्र मर्तः अस्तु प्रय॑स्वान्
   प्र स मि॑त्र मर्तो अस्तु प्रय॑स्वान्

Halfverse: b    यस्त॑ आदित्य॒ शिक्ष॑ति व्र॒तेन॑ ।
   यः ते आदित्य शिक्ष॑ति व्र॒तेन ।
   यस् त आदित्य शिक्ष॑ति व्र॒तेन ।

Halfverse: c    न ह॑न्यते॒ न जी॑यते॒ त्वोतो॒ नैन॒मंहो॑ अश्नो॒त्यन्ति॑तो॒ न दू॒रात् ।।
   न ह॑न्यते॒ न जी॑यते॒ त्वोतो
   न ह॑न्यते न जी॑यते त्वोतः
   न ह॑न्यते न जी॑यते तु॒वोतो

Halfverse: d    नैन॒मंहो॑ अश्नो॒त्यन्ति॑तो॒ न दू॒रात् ।।
   न ए॑नम् अंहः अश्नोति अन्ति॑तः न दू॒रात् ।।
   नैन॑म् अंहो अश्नोत्य् अन्ति॑तो न दू॒रात् ।।


Verse: 3 
Halfverse: a    अ॑नमी॒वास॒ इळ॑या॒ मद॑न्तो मि॒तज्ञ॑वो॒ वरि॑म॒न्ना पृ॑थि॒व्याः ।
   अ॑नमी॒वास॒ इळ॑या॒ मद॑न्तो
   अनमी॒वासः इळ॑या मद॑न्तः
   अनमी॒वास इळ॑या मद॑न्तो

Halfverse: b    मि॒तज्ञ॑वो॒ वरि॑म॒न्ना पृ॑थि॒व्याः ।
   मि॒तज्ञ॑वः वरि॑मन् आ पृ॑थि॒व्याः ।
   मि॒तज्ञ॑वो वरि॑मन्न् आ पृ॑थि॒व्याः ।

Halfverse: c    आ॑दि॒त्यस्य॑ व्र॒तमु॑पक्षि॒यन्तो॑ व॒यम्मि॒त्रस्य॑ सुम॒तौ स्या॑म ।।
   आ॑दि॒त्यस्य॑ व्र॒तमु॑पक्षि॒यन्तो
   आदि॒त्यस्य व्र॒तम् उपक्षि॒यन्तः
   आदि॒त्यस्य व्र॒तम् उपक्षि॒यन्तो

Halfverse: d    व॒यम्मि॒त्रस्य॑ सुम॒तौ स्या॑म ।।
   व॒यम् मि॒त्रस्य सुम॒तौ स्या॑म ।।
   व॒यम् मि॒त्रस्य सुम॒तौ सि॑याम ।।


Verse: 4 
Halfverse: a    अ॒यम्मि॒त्रो न॑म॒स्यः॑ सु॒शेवो॒ राजा॑ सुक्ष॒त्रो अ॑जनिष्ट वे॒धाः ।
   अ॒यम्मि॒त्रो न॑म॒स्यः॑ सु॒शेवो
   अ॒यम् मि॒त्रः न॑म॒स्यः सु॒शेवः
   अ॒यम् मि॒त्रो न॑म॒सियः सु॒शेवो

Halfverse: b    राजा॑ सुक्ष॒त्रो अ॑जनिष्ट वे॒धाः ।
   राजा सुक्ष॒त्रः अ॑जनिष्ट वे॒धाः ।
   राजा सुक्ष॒त्रो अ॑जनिष्ट वे॒धाः ।

Halfverse: c    तस्य॑ व॒यं सु॑म॒तौ य॒ज्ञिय॒स्यापि॑ भ॒द्रे सौ॑मन॒से स्या॑म ।।
   तस्य॑ व॒यं सु॑म॒तौ य॒ज्ञिय॑स्य
   तस्य व॒यम् सुम॒तौ य॒ज्ञिय॑स्य
   तस्य व॒यं सु॑म॒तौ य॒ज्ञिय॑स्य

Halfverse: d     अपि॑ भ॒द्रे सौ॑मन॒से स्या॑म ।।
   अपि भ॒द्रे सौ॑मन॒से स्या॑म ।।
   अपि भ॒द्रे सौ॑मन॒से सि॑याम ।।


Verse: 5 
Halfverse: a    म॒हाँ आ॑दि॒त्यो नम॑सोप॒सद्यो॑ यात॒यज्ज॑नो गृण॒ते सु॒शेवः॑ ।
   म॒हाँ आ॑दि॒त्यो नम॑सोप॒सद्यो
   म॒हान् आदि॒त्यः नम॑सा उप॒सद्यः
   म॒हाँ आ॑दि॒त्यो नम॑सोप॒सद्यो

Halfverse: b    यात॒यज्ज॑नो गृण॒ते सु॒शेवः॑ ।
   या॑त॒यज्ज॑नः गृण॒ते सु॒शेवः ।
   या॑त॒यज्ज॑नो गृण॒ते सु॒शेवः ।

Halfverse: c    तस्मा॑ ए॒तत्पन्य॑तमाय॒ जुष्ट॑म॒ग्नौ मि॒त्राय॑ ह॒विरा जु॑होत ।।
   तस्मा॑ ए॒तत्पन्य॑तमाय॒ जुष्ट॑म्
   तस्मै ए॒तत् पन्य॑तमाय जुष्ट॑म्
   तस्मा ए॒तत् पन्य॑तमाय जुष्ट॑म्

Halfverse: d    अ॒ग्नौ मि॒त्राय॑ ह॒विरा जु॑होत ।।
   अ॒ग्नौ मि॒त्राय ह॒विः आ जु॑होत ।।
   अ॒ग्नौ मि॒त्राय ह॒विर् आ जु॑होत ।।


Verse: 6 
Halfverse: a    मि॒त्रस्य॑ चर्षणी॒धृतो ऽवो॑ दे॒वस्य॑ सान॒सि ।
   मि॒त्रस्य॑ चर्षणी॒धृतो
   मि॒त्रस्य चर्षणी॒धृतः
   मि॒त्रस्य चर्षणी॒धृतो

Halfverse: b    ऽवो दे॒वस्य॑ सान॒सि ।
   अवः दे॒वस्य सान॒सि ।
   अवो दे॒वस्य सान॒सि ।

Halfverse: c    द्यु॒म्नं चि॒त्रश्र॑वस्तमम् ।।
   द्यु॒म्नं चि॒त्रश्र॑वस्तमम् ।।
   द्यु॒म्नम् चि॒त्रश्र॑वस्तमम् ।।
   द्यु॒म्नं चि॒त्रश्र॑वस्तमम् ।।


Verse: 7 
Halfverse: a    अ॒भि यो म॑हि॒ना दिव॑म्मि॒त्रो ब॒भूव॑ स॒प्रथाः॑ ।
   अ॒भि यो म॑हि॒ना दिव॑म्
   अ॒भि यः म॑हि॒ना दिव॑म्
   अ॒भि यो म॑हि॒ना दिव॑म्

Halfverse: b    मि॒त्रो ब॒भूव॑ स॒प्रथाः॑ ।
   मि॒त्रः ब॒भूव स॒प्रथाः ।
   मि॒त्रो ब॒भूव स॒प्रथाः ।

Halfverse: c    अ॒भि श्रवो॑भिः पृथि॒वीम् ।।
   अ॒भि श्रवो॑भिः पृथि॒वीम् ।।
   अ॒भि श्रवो॑भिः पृथि॒वीम् ।।
   अ॒भि श्रवो॑भिः पृथि॒वीम् ।।


Verse: 8 
Halfverse: a    मि॒त्राय॒ पञ्च॑ येमिरे॒ जना॑ अ॒भिष्टि॑शवसे ।
   मि॒त्राय॒ पञ्च॑ येमिरे
   मि॒त्राय पञ्च येमिरे
   मि॒त्राय पञ्च येमिरे

Halfverse: b    जना॑ अ॒भिष्टि॑शवसे ।
   जनाः अ॒भिष्टि॑शवसे ।
   जना अ॒भिष्टि॑शवसे ।

Halfverse: c    स दे॒वान्विश्वा॑न्बिभर्ति ।।
   स दे॒वान्विश्वा॑न्बिभर्ति ।।
   स दे॒वान् विश्वा॑न् बिभर्ति ।।
   स दे॒वान् विश्वा॑न् बिभर्ति ।।


Verse: 9 
Halfverse: a    मि॒त्रो दे॒वेष्वा॒युषु॒ जना॑य वृ॒क्तब॑र्हिषे ।
   मि॒त्रो दे॒वेष्वा॒युषु
   मि॒त्रः दे॒वेषु आ॒युषु
   मि॒त्रो दे॒वेषु आ॒युषु

Halfverse: b    जना॑य वृ॒क्तब॑र्हिषे ।
   जना॑य वृ॒क्तब॑र्हिषे ।
   जना॑य वृ॒क्तब॑र्हिषे ।

Halfverse: c    इष॑ इ॒ष्टव्र॑ता अकः ।।
   इष॑ इ॒ष्टव्र॑ता अकः ।।
   इषः इ॒ष्टव्र॑ताः अकर् ।।
   इष इ॒ष्टव्र॑ता अकः ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.