TITUS
Rg-Veda: Rg-Veda-Samhita
Part No. 294
Previous part

Hymn: 60_(294) 
Verse: 1 
Halfverse: a    इ॒हेह॑ वो॒ मन॑सा ब॒न्धुता॑ नर उ॒शिजो॑ जग्मुर॒भि तानि॒ वेद॑सा ।
   इ॒हेह॑ वो॒ मन॑सा ब॒न्धुता॑ नर
   इ॒हेह वः मन॑सा ब॒न्धुता नरः
   इ॒हेह वो मन॑सा ब॒न्धुता नर

Halfverse: b    उ॒शिजो॑ जग्मुर॒भि तानि॒ वेद॑सा ।
   उ॒शिजः जग्मुः अ॒भि तानि वेद॑सा ।
   उ॒शिजो जग्मुर् अ॒भि तानि वेद॑सा ।

Halfverse: c    याभि॑र्मा॒याभिः॒ प्रति॑जूतिवर्पसः॒ सौध॑न्वना य॒ज्ञिय॑म्भा॒गमा॑न॒श ।।
   याभि॑र्मा॒याभिः॒ प्रति॑जूतिवर्पसः
   याभिः मा॒याभिः प्रति॑जूतिवर्पसः
   याभि॑र् मा॒याभिः प्रति॑जूतिवर्पसः

Halfverse: d    सौध॑न्वना य॒ज्ञिय॑म्भा॒गमा॑न॒श ।।
   सौध॑न्वनाः य॒ज्ञिय॑म् भा॒गम् आन॒श ।।
   सौध॑न्वना य॒ज्ञिय॑म् भा॒गम् आन॒श ।।


Verse: 2 
Halfverse: a    याभिः॒ शची॑भिश्चम॒साँ अपिं॑शत॒ यया॑ धि॒या गामरि॑णीत॒ चर्म॑णः ।
   याभिः॒ शची॑भिश्चम॒साँ अपिं॑शत
   याभिः शची॑भिः चम॒सान् अपिं॑शत
   याभिः शची॑भिश् चम॒साँ अपिं॑शत

Halfverse: b    यया॑ धि॒या गामरि॑णीत॒ चर्म॑णः ।
   यया धि॒या गाम् अरि॑णीत चर्म॑णः ।
   यया धि॒या गाम् अरि॑णीत चर्म॑णः ।

Halfverse: c    येन॒ हरी॒ मन॑सा नि॒रत॑क्षत॒ तेन॑ देव॒त्वमृ॑भवः॒ समा॑नश ।।
   येन॒ हरी॒ मन॑सा नि॒रत॑क्षत
   येन हरी मन॑सा नि॒रत॑क्षत
   येन हरी मन॑सा नि॒रत॑क्षत

Halfverse: d    तेन॑ देव॒त्वमृ॑भवः॒ समा॑नश ।।
   तेन देव॒त्वम् ऋभवः सम् आनश ।।
   तेन देव॒त्वम् ऋभवः सम् आनश ।।


Verse: 3 
Halfverse: a    इन्द्र॑स्य स॒ख्यमृ॒भवः॒ समा॑नशु॒र्मनो॒र्नपा॑तो अ॒पसो॑ दधन्विरे ।
   इन्द्र॑स्य स॒ख्यमृ॒भवः॒ समा॑नशुर्
   इन्द्र॑स्य स॒ख्यम् ऋ॒भवः सम् आनशुः
   इन्द्र॑स्य स॒ख्यम् ऋ॒भवः सम् आनशुर्

Halfverse: b    मनो॒र्नपा॑तो अ॒पसो॑ दधन्विरे ।
   मनोः नपा॑तः अ॒पसः दधन्विरे ।
   मनो॑र् नपा॑तो अ॒पसो दधन्विरे ।

Halfverse: c    सौ॑धन्व॒नासो॑ अमृत॒त्वमेरि॑रे वि॒ष्ट्वी शमी॑भिः सु॒कृतः॑ सुकृ॒त्यया॑ ।।
   सौ॑धन्व॒नासो॑ अमृत॒त्वमेरि॑रे
   सौधन्व॒नासः अमृत॒त्वम् आ ई॑रिरे
   सौधन्व॒नासो अमृत॒त्वम् एरि॑रे

Halfverse: d    वि॒ष्ट्वी शमी॑भिः सु॒कृतः॑ सुकृ॒त्यया॑ ।।
   वि॒ष्ट्वी शमी॑भिः सु॒कृतः सुकृ॒त्यया ।।
   वि॒ष्ट्वी शमी॑भिः सु॒कृतः सुकृ॒त्यया ।।


Verse: 4 
Halfverse: a    इन्द्रे॑ण याथ स॒रथं॑ सु॒ते सचाँ॒ अथो॒ वशा॑नाम्भवथा स॒ह श्रि॒या ।
   इन्द्रे॑ण याथ स॒रथं॑ सु॒ते सचाँ
   इन्द्रे॑ण याथ स॒रथ॑म् सु॒ते सचा
   इन्द्रे॑ण याथ स॒रथं सु॒ते सचाँ

Halfverse: b    अथो॒ वशा॑नाम्भवथा स॒ह श्रि॒या ।
   अथ उ वशा॑नाम् भवथ+ स॒ह श्रि॒या ।
   अथो वशा॑नाम् भवथा स॒ह श्रि॒या ।

Halfverse: c    न वः॑ प्रति॒मै सु॑कृ॒तानि॑ वाघतः॒ सौध॑न्वना ऋभवो वी॒र्या॑णि च ।।
   न वः॑ प्रति॒मै सु॑कृ॒तानि॑ वाघतः
   न वः प्रति॒मै सु॑कृ॒तानि वाघतः
   न वः प्रति॒मै सु॑कृ॒तानि वाघतः

Halfverse: d    सौध॑न्वना ऋभवो वी॒र्या॑णि च ।।
   सौध॑न्वनाः ऋभवः वी॒र्या॑णि च ।।
   सौध॑न्वना ऋभवो वी॒रिया॑णि च ।।


Verse: 5 
Halfverse: a    इन्द्र॑ ऋ॒भुभि॒र्वाज॑वद्भिः॒ समु॑क्षितं सु॒तं सोम॒मा वृ॑षस्वा॒ गभ॑स्त्योः ।
   इन्द्र॑ ऋ॒भुभि॒र्वाज॑वद्भिः॒ समु॑क्षितं
   इन्द्र ऋ॒भुभिः वाज॑वद्भिः समु॑क्षितम्
   इन्द्र र्भुभि॑र् वाज॑वद्भिः समु॑क्षितं

Halfverse: b    सु॒तं सोम॒मा वृ॑षस्वा॒ गभ॑स्त्योः ।
   सु॒तम् सोम॑म् आ वृ॑षस्व+ गभ॑स्त्योः ।
   सु॒तं सोम॑म् आ वृ॑षस्वा गभ॑स्तियोः ।

Halfverse: c    धि॒येषि॒तो म॑घवन्दा॒शुषो॑ गृ॒हे सौ॑धन्व॒नेभिः॑ स॒ह म॑त्स्वा॒ नृभिः॑ ।।
   धि॒येषि॒तो म॑घवन्दा॒शुषो॑ गृ॒हे
   धि॒या इ॑षि॒तः म॑घवन् दा॒शुषः गृ॒हे
   धि॒येषि॒तो म॑घवन् दा॒शुषो गृ॒हे

Halfverse: d    सौ॑धन्व॒नेभिः॑ स॒ह म॑त्स्वा ।।
   सौ॑धन्व॒नेभिः स॒ह म॑त्स्व+ नृभिः ।।
   सौ॑धन्व॒नेभिः स॒ह म॑त्सुवा नृभिः ।।


Verse: 6 
Halfverse: a    इन्द्र॑ ऋभु॒मान्वाज॑वान्मत्स्वे॒ह नो॒ ऽस्मिन्सव॑ने॒ शच्या॑ पुरुष्टुत ।
   इन्द्र॑ ऋभु॒मान्वाज॑वान्मत्स्वे॒ह नो
   इन्द्र ऋभु॒मान् वाज॑वान् मत्स्व इ॒ह नः
   इन्द्र र्भु॒मान् वाज॑वान् मत्सुवे॒ह नो

Halfverse: b    ऽस्मिन्सव॑ने॒ शच्या॑ पुरुष्टुत ।
   अ॒स्मिन् सव॑ने शच्या पुरुष्टुत ।
   अ॒स्मिन् सव॑ने शचि॑या पुरुष्टुत ।

Halfverse: c    इ॒मानि॒ तुभ्यं॒ स्वस॑राणि येमिरे व्र॒ता दे॒वाना॒म्मनु॑षश्च॒ धर्म॑भिः ।।
   इ॒मानि॒ तुभ्यं॒ स्वस॑राणि येमिरे
   इ॒मानि तुभ्य॑म् स्वस॑राणि येमिरे
   इ॒मानि तुभ्यं स्वस॑राणि येमिरे

Halfverse: d    व्र॒ता दे॒वाना॒म्मनु॑षश्च॒ धर्म॑भिः ।।
   व्र॒ता दे॒वाना॑म् मनु॑षः च धर्म॑भिः ।।
   व्र॒ता दे॒वाना॑म् मनु॑षश् च धर्म॑भिः ।।


Verse: 7 
Halfverse: a    इन्द्र॑ ऋ॒भुभि॑र्वा॒जिभि॑र्वा॒जय॑न्नि॒ह स्तोमं॑ जरि॒तुरुप॑ याहि य॒ज्ञिय॑म् ।
   इन्द्र॑ ऋ॒भुभि॑र्वा॒जिभि॑र्वा॒जय॑न्नि॒ह
   इन्द्र ऋ॒भुभिः वा॒जिभिः वा॒जय॑न् इ॒ह
   इन्द्र र्भुभि॑र् वा॒जिभि॑र् वा॒जय॑न्न् इ॒ह

Halfverse: b    स्तोमं॑ जरि॒तुरुप॑ याहि य॒ज्ञिय॑म् ।
   स्तोम॑म् जरि॒तुः उप याहि य॒ज्ञिय॑म् ।
   स्तोमं जरि॒तुर् उप याहि य॒ज्ञिय॑म् ।

Halfverse: c    श॒तं केते॑भिरिषि॒रेभि॑रा॒यवे॑ स॒हस्र॑णीथो अध्व॒रस्य॒ होम॑नि ।।
   श॒तं केते॑भिरिषि॒रेभि॑रा॒यवे
   श॒तम् केते॑भिः इषि॒रेभिः आ॒यवे
   श॒तं केते॑भिर् इषि॒रेभि॑र् आ॒यवे

Halfverse: d    स॒हस्र॑णीथो अध्व॒रस्य॒ होम॑नि ।।
   स॒हस्र॑णीथः अध्व॒रस्य होम॑नि ।।
   स॒हस्र॑णीथो अध्व॒रस्य होम॑नि ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.