TITUS
Rg-Veda: Rg-Veda-Samhita
Part No. 298
Previous part

Hymn: 2_(298) 
Verse: 1 
Halfverse: a    यो मर्त्ये॑ष्व॒मृत॑ ऋ॒तावा॑ दे॒वो दे॒वेष्व॑र॒तिर्नि॒धायि॑ ।
   यो मर्त्ये॑ष्व॒मृत॑ ऋ॒तावा
   यः मर्त्ये॑षु अ॒मृतः ऋ॒तावा
   यो मर्ति॑येषु अ॒मृत ऋ॒तावा

Halfverse: b    दे॒वो दे॒वेष्व॑र॒तिर्नि॒धायि॑ ।
   दे॒वः दे॒वेषु अर॒तिः नि॒धायि ।
   दे॒वो दे॒वेषु अर॒तिर् नि॒धायि ।

Halfverse: c    होता॒ यजि॑ष्ठो म॒ह्ना शु॒चध्यै॑ ह॒व्यैर॒ग्निर्मनु॑ष ईर॒यध्यै॑ ।।
   होता॒ यजि॑ष्ठो म॒ह्ना शु॒चध्यै
   होता यजि॑ष्ठः म॒ह्ना शु॒चध्यै
   होता यजि॑ष्ठो महि॒ना % शु॒चध्यै

Halfverse: d    ह॒व्यैर॒ग्निर्मनु॑ष ईर॒यध्यै॑ ।।
   ह॒व्यैः अ॒ग्निः मनु॑षः ईर॒यध्यै ।।
   ह॒व्यैर् अ॒ग्निर् मनु॑ष ईर॒यध्यै ।।


Verse: 2 
Halfverse: a    इ॒ह त्वं सू॑नो सहसो नो अ॒द्य जा॒तो जा॒ताँ उ॒भयाँ॑ अ॒न्तर॑ग्ने ।
   इ॒ह त्वं सू॑नो सहसो नो अ॒द्य
   इ॒ह त्वम् सूनो सहसः नः अ॒द्य
   इ॒ह त्वं सू॑नो सहसो नो अ॒द्य

Halfverse: b    जा॒तो जा॒ताँ उ॒भयाँ॑ अ॒न्तर॑ग्ने ।
   जा॒तः जा॒तान् उ॒भया॑न् अ॒न्तर् अग्ने ।
   जा॒तो जा॒ताँ उ॒भयाँ अ॒न्तर् अग्ने ।

Halfverse: c    दू॒त ई॑यसे युयुजा॒न ऋ॑ष्व ऋजुमु॒ष्कान्वृष॑णः शु॒क्राँश्च॑ ।।
   दू॒त ई॑यसे युयुजा॒न ऋ॑ष्व
   दू॒तः ई॑यसे युयुजा॒नः ऋ॑ष्व
   दू॒त ई॑यसे युयुजा॒न ऋ॑ष्व

Halfverse: d    ऋजुमु॒ष्कान्वृष॑णः शु॒क्राँश्च॑ ।।
   ऋ॑जुमु॒ष्कान् वृष॑णः शु॒क्रान् च ।।
   ऋ॑जुमु॒ष्कान् वृष॑णः शु॒क्राअंश् च ।।


Verse: 3 
Halfverse: a    अत्या॑ वृध॒स्नू रोहि॑ता घृ॒तस्नू॑ ऋ॒तस्य॑ मन्ये॒ मन॑सा॒ जवि॑ष्ठा ।
   अत्या॑ वृध॒स्नू रोहि॑ता घृ॒तस्नू
   अत्या वृध॒स्नू रोहि॑ता घृ॒तस्नू
   अत्या वृध॒स्नू रोहि॑ता घृ॒तस्नू

Halfverse: b    ऋ॒तस्य॑ मन्ये॒ मन॑सा॒ जवि॑ष्ठा ।
   ऋ॒तस्य मन्ये मन॑सा जवि॑ष्ठा ।
   ऋ॒तस्य मन्ये मन॑सा जवि॑ष्ठा ।

Halfverse: c    अ॒न्तरी॑यसे अरु॒षा यु॑जा॒नो यु॒ष्माँश्च॑ दे॒वान्विश॒ आ च॒ मर्ता॑न् ।।
   अ॒न्तरी॑यसे अरु॒षा यु॑जा॒नो
   अ॒न्तर् ईयसे अरु॒षा यु॑जा॒नः
   अ॒न्तर् ईयसे अरु॒षा यु॑जा॒नो

Halfverse: d    यु॒ष्माँश्च॑ दे॒वान्विश॒ आ च॒ मर्ता॑न् ।।
   यु॒ष्मान् च दे॒वान् विशः आ च मर्ता॑न् ।।
   यु॒ष्मांश् च दे॒वान् विश आ च मर्ता॑न् ।।


Verse: 4 
Halfverse: a    अ॑र्य॒मणं॒ वरु॑णम्मि॒त्रमे॑षा॒मिन्द्रा॒विष्णू॑ म॒रुतो॑ अ॒श्विनो॒त ।
   अ॑र्य॒मणं॒ वरु॑णम्मि॒त्रमे॑षाम्
   अर्य॒मण॑म् वरु॑णम् मि॒त्रम् एषाम्
   अर्य॒मणं वरु॑णम् मि॒त्रम् एषाम्

Halfverse: b    इन्द्रा॒विष्णू॑ म॒रुतो॑ अ॒श्विनो॒त ।
   इन्द्रा॒विष्णू म॒रुतः अ॒श्विना उ॒त ।
   इन्द्रा॒विष्णू म॒रुतो अ॒श्विनो॒त ।

Halfverse: c    स्वश्वो॑ अग्ने सु॒रथः॑ सु॒राधा॒ एदु॑ वह सुह॒विषे॒ जना॑य ।।
   स्वश्वो॑ अग्ने सु॒रथः॑ सु॒राधा
   स्वश्वः अग्ने सु॒रथः सु॒राधाः
   सुअश्वो अग्ने सु॒रथः सु॒राधा

Halfverse: d    एदु॑ वह सुह॒विषे॒ जना॑य ।।
   आ इत् उ वह सुह॒विषे जना॑य ।।
   एद् उ वह सुह॒विषे जना॑य ।।


Verse: 5 
Halfverse: a    गोमाँ॑ अ॒ग्ने ऽवि॑माँ अ॒श्वी य॒ज्ञो नृ॒वत्स॑खा॒ सद॒मिद॑प्रमृ॒ष्यः ।
   गोमाँ॑ अ॒ग्ने ऽवि॑माँ अ॒श्वी य॒ज्ञो
   गोमा॑न् अग्ने अवि॑मान् अ॒श्वी य॒ज्ञः
   गोमाँ अग्ने अवि॑माँ अ॒श्वी य॒ज्ञो

Halfverse: b    नृ॒वत्स॑खा॒ सद॒मिद॑प्रमृ॒ष्यः ।
   नृ॒वत्स॑खा सद॑म् इत् अप्रमृ॒ष्यः ।
   नृ॒वत्स॑खा सद॑म् इद् अप्रमृ॒ष्यः ।

Halfverse: c    इळा॑वाँ ए॒षो अ॑सुर प्र॒जावा॑न्दी॒र्घो र॒यिः पृ॑थुबु॒ध्नः स॒भावा॑न् ।।
   इळा॑वाँ ए॒षो अ॑सुर प्र॒जावा॑न्
   इळा॑वान् ए॒षः अ॑सुर प्र॒जावा॑न्
   इळा॑वाँ ए॒षो अ॑सुर प्र॒जावा॑न्

Halfverse: d    दी॒र्घो र॒यिः पृ॑थुबु॒ध्नः स॒भावा॑न् ।।
   दी॒र्घः र॒यिः पृ॑थुबु॒ध्नः स॒भावा॑न् ।।
   दी॒र्घो र॒यिः पृ॑थुबु॒ध्नः स॒भावा॑न् ।।


Verse: 6 
Halfverse: a    यस्त॑ इ॒ध्मं ज॒भर॑त्सिष्विदा॒नो मू॒र्धानं॑ वा त॒तप॑ते त्वा॒या ।
   यस्त॑ इ॒ध्मं ज॒भर॑त्सिष्विदा॒नो
   यः ते इ॒ध्मम् ज॒भर॑त् सिष्विदा॒नः
   यस् त इ॒ध्मं ज॒भर॑त् सिष्विदा॒नो

Halfverse: b    मू॒र्धानं॑ वा त॒तप॑ते त्वा॒या ।
   मू॒र्धान॑म् वा त॒तप॑ते त्वा॒या ।
   मू॒र्धानं वा त॒तप॑ते तुवा॒या ।

Halfverse: c    भुव॒स्तस्य॒ स्वत॑वाँः पा॒युर॑ग्ने॒ विश्व॑स्मात्सीमघाय॒त उ॑रुष्य ।।
   भुव॒स्तस्य॒ स्वत॑वाँः पा॒युर॑ग्ने
   भुवः तस्य स्वत॑वान् पा॒युः अ॑ग्ने
   भुव॑स् तस्य स्वत॑वाँः पा॒युर् अग्ने

Halfverse: d    विश्व॑स्मात्सीमघाय॒त उ॑रुष्य ।।
   विश्व॑स्मात् सीम् अघाय॒तः उ॑रुष्य ।।
   विश्व॑स्मात् सीम् अघाय॒त उ॑रुष्य ।।


Verse: 7 
Halfverse: a    यस्ते॒ भरा॒दन्नि॑यते चि॒दन्नं॑ नि॒शिष॑न्म॒न्द्रमति॑थिमु॒दीर॑त् ।
   यस्ते॒ भरा॒दन्नि॑यते चि॒दन्नं
   यः ते भरा॑त् अन्नि॑यते चित् अन्न॑म्
   यस् ते भरा॑द् अन्नि॑यते चिद् अन्नं

Halfverse: b    नि॒शिष॑न्म॒न्द्रमति॑थिमु॒दीर॑त् ।
   नि॒शिष॑न् म॒न्द्रम् अति॑थिम् उ॒दीर॑त् ।
   नि॒शिष॑न् म॒न्द्रम् अति॑थिम् उ॒दीर॑त् ।

Halfverse: c    आ दे॑व॒युरि॒नध॑ते दुरो॒णे तस्मि॑न्र॒यिर्ध्रु॒वो अ॑स्तु॒ दास्वा॑न् ।।
   आ दे॑व॒युरि॒नध॑ते दुरो॒णे
   आ दे॑व॒युः इ॒नध॑ते दुरो॒णे
   आ दे॑व॒युर् इ॒नध॑ते दुरो॒णे

Halfverse: d    तस्मि॑न्र॒यिर्ध्रु॒वो अ॑स्तु॒ दास्वा॑न् ।।
   तस्मि॑न् र॒यिः ध्रु॒वः अ॑स्तु दास्वा॑न् ।।
   तस्मि॑न् र॒यिर् ध्रु॒वो अ॑स्तु दाअस्वा॑न् ।।


Verse: 8 
Halfverse: a    यस्त्वा॑ दो॒षा य उ॒षसि॑ प्र॒शँसा॑त्प्रि॒यं वा॑ त्वा कृ॒णव॑ते ह॒विष्मा॑न् ।
   यस्त्वा॑ दो॒षा य उ॒षसि॑ प्र॒शँसा॑त्
   यः त्वा दो॒षा यः उ॒षसि प्र॒शंसा॑त्
   यस् त्वा दो॒षा य उ॒षसि प्र॒शंसा॑त्

Halfverse: b    प्रि॒यं वा॑ त्वा कृ॒णव॑ते ह॒विष्मा॑न् ।
   प्रि॒यम् वा त्वा कृ॒णव॑ते ह॒विष्मा॑न् ।
   प्रि॒यं वा त्वा कृ॒णव॑ते ह॒विष्मा॑न् ।

Halfverse: c    अश्वो॒ न स्वे दम॒ आ हे॒म्यावा॒न्तमँह॑सः पीपरो दा॒श्वाँस॑म् ।।
   अश्वो॒ न स्वे दम॒ आ हे॒म्यावा॑न्
   अश्वः न स्वे दमे आ हे॒म्यावा॑न्
   अश्वो न स्वे दम आ हे॑मि॒यावा॑न्

Halfverse: d    तमँह॑सः पीपरो दा॒श्वाँस॑म् ।।
   तम् अंह॑सः पीपरः दा॒श्वांस॑म् ।।
   तम् अंह॑सः पीपरो दाशु॒वांस॑म् ।।


Verse: 9 
Halfverse: a    यस्तुभ्य॑मग्ने अ॒मृता॑य॒ दाश॒द्दुव॒स्त्वे कृ॒णव॑ते य॒तस्रु॑क् ।
   यस्तुभ्य॑मग्ने अ॒मृता॑य॒ दाश॑द्
   यः तुभ्य॑म् अग्ने अ॒मृता॑य दाश॑त्
   यस् तुभ्य॑म् अग्ने अ॒मृता॑य दाश॑द्

Halfverse: b    दुव॒स्त्वे कृ॒णव॑ते य॒तस्रु॑क् ।
   दुवः त्वे कृ॒णव॑ते य॒तस्रु॑क् ।
   दुव॑स् तु॒वे कृ॒णव॑ते य॒तस्रु॑क् ।

Halfverse: c    न स रा॒या श॑शमा॒नो वि यो॑ष॒न्नैन॒मँहः॒ परि॑ वरदघा॒योः ।।
   न स रा॒या श॑शमा॒नो वि ।!। यो॑षन्
   न स रा॒या श॑शमा॒नः वि यो॑षत्
   न स रा॒या श॑शमा॒नो वि यो॑षन्

Halfverse: d    नैन॒मँहः॒ परि॑ वरदघा॒योः ।।
   न ए॑नम् अंहः परि वरत् अघा॒योः ।।
   नैन॑म् अंहः परि वरद् अघा॒योः ।।


Verse: 10 
Halfverse: a    यस्य॒ त्वम॑ग्ने अध्व॒रं जुजो॑षो दे॒वो मर्त॑स्य॒ सुधि॑तं॒ ररा॑णः ।
   यस्य॒ त्वम॑ग्ने अध्व॒रं जुजो॑षो
   यस्य त्वम् अग्ने अध्व॒रम् जुजो॑षः
   यस्य त्वम् अग्ने अध्व॒रं जुजो॑षो

Halfverse: b    दे॒वो मर्त॑स्य॒ सुधि॑तं॒ ररा॑णः ।
   दे॒वः मर्त॑स्य सुधि॑तम् ररा॑णः ।
   दे॒वो मर्त॑स्य सुधि॑तं ररा॑णः ।

Halfverse: c    प्री॒तेद॑स॒द्धोत्रा॒ सा य॑वि॒ष्ठासा॑म॒ यस्य॑ विध॒तो वृ॒धासः॑ ।।
   प्री॒तेद॑स॒द्धोत्रा॒ सा य॑विष्ठ
   प्री॒ता इत् असत् होत्रा सा य॑विष्ठ
   प्री॒तेद् असद् धोत॑रा सा य॑विष्ठ

Halfverse: d     असा॑म॒ यस्य॑ विध॒तो वृ॒धासः॑ ।।
   असा॑म यस्य विध॒तः वृ॒धासः ।।
   असा॑म यस्य विध॒तो वृ॒धासः ।।


Verse: 11 
Halfverse: a    चित्ति॒मचि॑त्तिं चिनव॒द्वि वि॒द्वान्पृ॒ष्ठेव॑ वी॒ता वृ॑जि॒ना च॒ मर्ता॑न् ।
   चित्ति॒मचि॑त्तिं चिनव॒द्वि वि॒द्वान्
   चित्ति॑म् अचि॑त्तिम् चिनवत् वि वि॒द्वान्
   चित्ति॑म् अचि॑त्तिं चिनवद् वि वि॒द्वान्

Halfverse: b    पृ॒ष्ठेव॑ वी॒ता वृ॑जि॒ना च॒ मर्ता॑न् ।
   पृ॒ष्ठा इ॑व वी॒ता वृ॑जि॒ना च मर्ता॑न् ।
   पृ॒ष्ठेव वी॒ता वृ॑जि॒ना च मर्ता॑न् ।

Halfverse: c    रा॒ये च॑ नः स्वप॒त्याय॑ देव॒ दितिं॑ च॒ रास्वादि॑तिमुरुष्य ।।
   रा॒ये च॑ नः स्वप॒त्याय॑ देव
   रा॒ये च नः स्वप॒त्याय देव
   रा॒ये च नः सुअप॒त्याय देव

Halfverse: d    दितिं॑ च॒ रास्वादि॑तिमुरुष्य ।।
   दिति॑म् च रास्व अदि॑तिम् उरुष्य ।।
   दितिं च रास्व अदि॑तिम् उरुष्य ।।


Verse: 12 
Halfverse: a    क॒विं श॑शासुः क॒वयो ऽद॑ब्धा निधा॒रय॑न्तो॒ दुर्या॑स्वा॒योः ।
   क॒विं श॑शासुः क॒वयो ऽद॑ब्धा
   क॒विम् शशासुः क॒वयः अद॑ब्धाः
   क॒विं श॑शासुः क॒वयो अद॑ब्धा

Halfverse: b    निधा॒रय॑न्तो॒ दुर्या॑स्वा॒योः ।
   नि॑धा॒रय॑न्तः दुर्या॑सु आ॒योः ।
   नि॑धा॒रय॑न्तो दुरि॑यासु आ॒योः ।

Halfverse: c    अत॒स्त्वं दृश्याँ॑ अग्न ए॒तान्प॒ड्भिः प॑श्ये॒रद्भु॑ताँ अ॒र्य एवैः॑ ।।
   अत॒स्त्वं दृश्याँ॑ अग्न ए॒तान्
   अतः त्वम् दृश्या॑न् अग्ने ए॒तान्
   अत॑स् तु॒वं दृशि॑याँ अग्न ए॒तान्

Halfverse: d    प॒ड्भिः प॑श्ये॒रद्भु॑ताँ अ॒र्य एवैः॑ ।।
   प॒ड्भिः प॑श्येः अद्भु॑तान् अ॒र्यः एवैः ।।
   प॒ड्भिः प॑श्येर् अद्भु॑ताँ अ॒र्य एवैः ।।


Verse: 13 
Halfverse: a    त्वम॑ग्ने वा॒घते॑ सु॒प्रणी॑तिः सु॒तसो॑माय विध॒ते य॑विष्ठ ।
   त्वम॑ग्ने वा॒घते॑ सु॒प्रणी॑तिः
   त्वम् अग्ने वा॒घते सु॒प्रणी॑तिः
   तु॒वम् अग्ने वा॒घते सु॒प्रणी॑तिः

Halfverse: b    सु॒तसो॑माय विध॒ते य॑विष्ठ ।
   सु॒तसो॑माय विध॒ते य॑विष्ठ ।
   सु॒तसो॑माय विध॒ते य॑विष्ठ ।

Halfverse: c    रत्न॑म्भर शशमा॒नाय॑ घृष्वे पृ॒थु श्च॒न्द्रमव॑से चर्षणि॒प्राः ।।
   रत्न॑म्भर शशमा॒नाय॑ घृष्वे
   रत्न॑म् भर शशमा॒नाय घृष्वे
   रत्न॑म् भर शशमा॒नाय घृष्वे

Halfverse: d    पृ॒थु श्च॒न्द्रमव॑से चर्षणि॒प्राः ।।
   पृ॒थु श्च॒न्द्रम् अव॑से चर्षणि॒प्राः ।।
   पृ॒थु श्च॒न्द्रम् अव॑से चर्षणि॒प्राः ।।


Verse: 14 
Halfverse: a    अधा॑ ह॒ यद्व॒यम॑ग्ने त्वा॒या प॒ड्भिर्हस्ते॑भिश्चकृ॒मा त॒नूभिः॑ ।
   अधा॑ ह॒ यद्व॒यम॑ग्ने त्वा॒या
   अध+ ह यत् व॒यम् अग्ने त्वा॒या
   अधा ह यद् व॒यम् अग्ने तुवा॒या

Halfverse: b    प॒ड्भिर्हस्ते॑भिश्चकृ॒मा त॒नूभिः॑ ।
   प॒ड्भिः हस्ते॑भिः चकृ॒म+ त॒नूभिः ।
   प॒ड्भिर् हस्ते॑भिश् चकृ॒मा त॒नूभिः ।

Halfverse: c    रथं॒ न क्रन्तो॒ अप॑सा भु॒रिजो॑रृ॒तं ये॑मुः सु॒ध्य॑ आशुषा॒णाः ।।
   रथं॒ न क्रन्तो॒ अप॑सा भु॒रिजो॑र्
   रथ॑म् न क्रन्तः अप॑सा भु॒रिजोः
   रथं न क्रन्तो अप॑सा भु॒रिजो॑र्

Halfverse: d    ऋ॒तं ये॑मुः सु॒ध्य॑ आशुषा॒णाः ।।
   ऋ॒तम् येमुः सु॒ध्यः आशुषा॒णाः ।।
   ऋ॒तं ये॑मुः सु॒धिय आशुषा॒णाः ।।


Verse: 15 
Halfverse: a    अधा॑ मा॒तुरु॒षसः॑ स॒प्त विप्रा॒ जाये॑महि प्रथ॒मा वे॒धसो॒ नॄन् ।
   अधा॑ मा॒तुरु॒षसः॑ स॒प्त विप्रा
   अध+ मा॒तुः उ॒षसः स॒प्त विप्राः
   अधा मा॒तुर् उ॒षसः स॒प्त विप्रा

Halfverse: b    जाये॑महि प्रथ॒मा वे॒धसो॒ नॄन् ।
   जाये॑महि प्रथ॒माः वे॒धसः नॄन् ।
   जाये॑महि प्रथ॒मा वे॒धसो नॄन् ।

Halfverse: c    दि॒वस्पु॒त्रा अङ्गि॑रसो भवे॒माद्रिं॑ रुजेम ध॒निनं॑ शु॒चन्तः॑ ।।
   दि॒वस्पु॒त्रा अङ्गि॑रसो भवेम
   दि॒वः पु॒त्राः अङ्गि॑रसः भवेम
   दि॒वस् पु॒त्रा अङ्गि॑रसो भवेम

Halfverse: d     अद्रिं॑ रुजेम ध॒निनं॑ शु॒चन्तः॑ ।।
   अद्रि॑म् रुजेम ध॒निन॑म् शु॒चन्तः ।।
   अद्रिं रुजेम ध॒निनं शु॒चन्तः ।।


Verse: 16 
Halfverse: a    अधा॒ यथा॑ नः पि॒तरः॒ परा॑सः प्र॒त्नासो॑ अग्न ऋ॒तमा॑शुषा॒णाः ।
   अधा॒ यथा॑ नः पि॒तरः॒ परा॑सः
   अध+ यथा नः पि॒तरः परा॑सः
   अधा यथा नः पि॒तरः परा॑सः

Halfverse: b    प्र॒त्नासो॑ अग्न ऋ॒तमा॑शुषा॒णाः ।
   प्र॒त्नासः अग्ने ऋ॒तम् आशुषा॒णाः ।
   प्र॒त्नासो अग्न ऋ॒तम् आशुषा॒णाः ।

Halfverse: c    शुचीद॑य॒न्दीधि॑तिमुक्थ॒शासः॒ क्षामा॑ भि॒न्दन्तो॑ अरु॒णीरप॑ व्रन् ।।
   शुचीद॑य॒न्दीधि॑तिमुक्थ॒शासः
   शुचि इत् अयन् दीधि॑तिम् उक्थ॒शासः
   शुचीद् अयन् दीधि॑तिम् उक्थ॒शासः

Halfverse: d    क्षामा॑ भि॒न्दन्तो॑ अरु॒णीरप॑ व्रन् ।।
   क्षाम+ भि॒न्दन्तः अरु॒णीः अप व्रन् ।।
   क्षामा भि॒न्दन्तो अरु॒णीर् अप व्रन् ।।


Verse: 17 
Halfverse: a    सु॒कर्मा॑णः सु॒रुचो॑ देव॒यन्तो ऽयो॒ न दे॒वा जनि॑मा॒ धम॑न्तः ।
   सु॒कर्मा॑णः सु॒रुचो॑ देव॒यन्तो
   सु॒कर्मा॑णः सु॒रुचः देव॒यन्तः
   सु॒कर्मा॑णः सु॒रुचो देव॒यन्तो

Halfverse: b    ऽयो॒ न दे॒वा जनि॑मा॒ धम॑न्तः ।
   अयः न दे॒वाः जनि॑म+ धम॑न्तः ।
   अयो न दे॒वा जनि॑मा धम॑न्तः ।

Halfverse: c    शु॒चन्तो॑ अ॒ग्निं व॑वृ॒धन्त॒ इन्द्र॑मू॒र्वं गव्य॑म्परि॒षद॑न्तो अग्मन् ।।
   शु॒चन्तो॑ अ॒ग्निं व॑वृ॒धन्त॒ इन्द्र॑म्
   शु॒चन्तः अ॒ग्निम् ववृ॒धन्तः इन्द्र॑म्
   शु॒चन्तो अ॒ग्निं व॑वृ॒धन्त इन्द्र॑म्

Halfverse: d    ऊ॒र्वं गव्य॑म्परि॒षद॑न्तो अग्मन् ।।
   ऊ॒र्वम् गव्य॑म् परि॒षद॑न्तः अग्मन् ।।
   ऊ॒र्वं गव्य॑म् परि॒षद॑न्तो अग्मन् ।।


Verse: 18 
Halfverse: a    आ यू॒थेव॑ क्षु॒मति॑ प॒श्वो अ॑ख्यद्दे॒वानां॒ यज्जनि॒मान्त्यु॑ग्र ।
   आ यू॒थेव॑ क्षु॒मति॑ प॒श्वो अ॑ख्यद्
   आ यू॒था इ॑व क्षु॒मति प॒श्वः अ॑ख्यत्
   आ यू॒थेव क्षु॒मति प॒श्वो अ॑ख्यद्

Halfverse: b    दे॒वानां॒ यज्जनि॒मान्त्यु॑ग्र ।
   दे॒वाना॑म् यत् जनि॑म अन्ति उग्र ।
   दे॒वानां यज् जनि॑म अन्ति उग्र ।

Halfverse: c    मर्ता॑नां चिदु॒र्वशी॑रकृप्रन्वृ॒धे चि॑द॒र्य उप॑रस्या॒योः ।।
   मर्ता॑नां चिदु॒र्वशी॑रकृप्रन्
   मर्ता॑नाम् चित् उ॒र्वशीः अकृप्रन्
   मर्ता॑नाअं चिद् उ॒र्वशी॑र् अकृप्रन्

Halfverse: d    वृ॒धे चि॑द॒र्य उप॑रस्या॒योः ।।
   वृ॒धे चि॑त् अ॒र्यः उप॑रस्य आ॒योः ।।
   वृ॒धे चि॑द् अ॒र्य उप॑रस्य आ॒योः ।।


Verse: 19 
Halfverse: a    अक॑र्म ते॒ स्वप॑सो अभूम ऋ॒तम॑वस्रन्नु॒षसो॑ विभा॒तीः ।
   अक॑र्म ते॒ स्वप॑सो अभूम
   अक॑र्म ते स्वप॑सः अभूम
   अक॑र्म ते सुअप॑सो अभूम

Halfverse: b    ऋ॒तम॑वस्रन्नु॒षसो॑ विभा॒तीः ।
   ऋ॒तम् अवस्रन् उ॒षसः विभा॒तीः ।
   ऋ॒तम् अवस्रन्न् उ॒षसो विभा॒तीः ।

Halfverse: c    अनू॑नम॒ग्निम्पु॑रु॒धा सु॑श्च॒न्द्रं दे॒वस्य॒ मर्मृ॑जत॒श्चारु॒ चक्षुः॑ ।।
   अनू॑नम॒ग्निम्पु॑रु॒धा सु॑श्च॒न्द्रं
   अनू॑नम् अ॒ग्निम् पुरु॒धा सु॑श्च॒न्द्रम्
   अनू॑नम् अ॒ग्निम् पुरु॒धा सु॑श्च॒न्द्रं

Halfverse: d    दे॒वस्य॒ मर्मृ॑जत॒श्चारु॒ चक्षुः॑ ।।
   दे॒वस्य मर्मृ॑जतः चारु चक्षुः ।।
   दे॒वस्य मर्मृ॑जतश् चारु चक्षुः ।।


Verse: 20 
Halfverse: a    ए॒ता ते॑ अग्न उ॒चथा॑नि वे॒धो ऽवो॑चाम क॒वये॒ ता जु॑षस्व ।
   ए॒ता ते॑ अग्न उ॒चथा॑नि वे॒धो
   ए॒ता ते अग्ने उ॒चथा॑नि वेधः
   ए॒ता ते अग्न उ॒चथा॑नि वेधो

Halfverse: b    ऽवोचाम क॒वये॒ ता जु॑षस्व ।
   अवो॑चाम क॒वये ता जु॑षस्व ।
   अवो॑चाम क॒वये ता जु॑षस्व ।

Halfverse: c    उच्छो॑चस्व कृणु॒हि वस्य॑सो नो म॒हो रा॒यः पु॑रुवार॒ प्र य॑न्धि ।।
   उच्छो॑चस्व कृणु॒हि वस्य॑सो नो
   उत् शोचस्व कृणु॒हि वस्य॑सः नः
   उच् छोचस्व कृणु॒हि वस्य॑सो नो

Halfverse: d    म॒हो रा॒यः पु॑रुवार॒ प्र य॑न्धि ।।
   म॒हः रा॒यः पु॑रुवार प्र य॑न्धि ।।
   म॒हो रा॒यः पु॑रुवार प्र य॑न्धि ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.