TITUS Texts: Rg-Veda: Rg-Veda-Samhita

TITUS
Rg-Veda: Rg-Veda-Samhita
Part No. 304

Hymn: 8_(304)
Verse: 1
Halfverse: a    दू॒तं वो॑ वि॒श्ववे॑दसं हव्य॒वाह॒मम॑र्त्यम् ।
   दू॒तं वो॑ वि॒श्ववे॑दसं
   दू॒तम् वः वि॒श्ववे॑दसम्
   दू॒तं वो वि॒श्ववे॑दसं

Halfverse: b    हव्य॒वाह॒मम॑र्त्यम् ।
   ह॑व्य॒वाह॑म् अम॑र्त्यम् ।
   ह॑व्य॒वाह॑म् अम॑र्तियम् ।

Halfverse: c    यजि॑ष्ठमृञ्जसे गि॒रा ।।
   यजि॑ष्ठमृञ्जसे गि॒रा ।।
   यजि॑ष्ठम् ऋञ्जसे गि॒रा ।।
   यजि॑ष्ठम् ऋञ्जसे गि॒रा ।।

Verse: 2
Halfverse: a    स हि वेदा॒ वसु॑धितिम्म॒हाँ आ॒रोध॑नं दि॒वः ।
   स हि वेदा॒ वसु॑धितिम्
   स हि वेद+ वसु॑धितिम्
   स हि वेदा वसु॑धितिम्

Halfverse: b    म॒हाँ आ॒रोध॑नं दि॒वः ।
   म॒हान् आ॒रोध॑नम् दि॒वः ।
   म॒हाँ आ॒रोध॑नं दि॒वः ।

Halfverse: c    स दे॒वाँ एह व॑क्षति ।।
   स दे॒वाँ एह व॑क्षति ।।
   स दे॒वान् आ इ॒ह व॑क्षति ।।
   स दे॒वाँ एह व॑क्षति ।।

Verse: 3
Halfverse: a    स वे॑द दे॒व आ॒नमं॑ दे॒वाँ ऋ॑ताय॒ते दमे॑ ।
   स वे॑द दे॒व आ॒नमं
   स वे॑द दे॒वः आ॒नम॑म्
   स वे॑द दे॒व आ॒नमं

Halfverse: b    दे॒वाँ ऋ॑ताय॒ते दमे॑ ।
   दे॒वान् ऋताय॒ते दमे ।
   दे॒वाँ ऋ॑ताय॒ते दमे ।

Halfverse: c    दाति॑ प्रि॒याणि॑ चि॒द्वसु॑ ।।
   दाति॑ प्रि॒याणि॑ चि॒द्वसु॑ ।।
   दाति प्रि॒याणि चित् वसु ।।
   दाति प्रि॒याणि चिद् वसु ।।

Verse: 4
Halfverse: a    स होता॒ सेदु॑ दू॒त्यं॑ चिकि॒त्वाँ अ॒न्तरी॑यते ।
   स होता॒ सेदु॑ दू॒त्यं
   स होता स इत् उ दू॒त्य॑म्
   स होता सेद् उ दू॒तियं

Halfverse: b    चिकि॒त्वाँ अ॒न्तरी॑यते ।
   चि॑कि॒त्वान् अ॒न्तर् ईयते ।
   चि॑कि॒त्वाँ अ॒न्तर् ईयते ।

Halfverse: c    वि॒द्वाँ आ॒रोध॑नं दि॒वः ।।
   वि॒द्वाँ आ॒रोध॑नं दि॒व ।।
   वि॒द्वान् आ॒रोध॑नम् दि॒वः ।।
   वि॒द्वाँ आ॒रोध॑नं दि॒वः ।।

Verse: 5
Halfverse: a    ते स्या॑म॒ ये अ॒ग्नये॑ ददा॒शुर्ह॒व्यदा॑तिभिः ।
   ते स्या॑म॒ ये अ॒ग्नये
   ते स्या॑म ये अ॒ग्नये
   ते सि॑याम ये अ॒ग्नये

Halfverse: b    ददा॒शुर्ह॒व्यदा॑तिभिः ।
   द॑दा॒शुः ह॒व्यदा॑तिभिः ।
   द॑दा॒शुर् ह॒व्यदा॑तिभिः ।

Halfverse: c    य ई॒म्पुष्य॑न्त इन्ध॒ते ।।
   य ई॒म्पुष्य॑न्त इन्ध॒ते ।।
   ये ई॑म् पुष्य॑न्तः इन्ध॒ते ।।
   य ई॑म् पुष्य॑न्त इन्ध॒ते ।।

Verse: 6
Halfverse: a    ते रा॒या ते सु॒वीर्यैः॑ सस॒वाँसो॒ वि शृ॑ण्विरे ।
   ते रा॒या ते सु॒वीर्यैः
   ते रा॒या ते सु॒वीर्यैः
   ते रा॒या ते सु॒वीरि॑यैः

Halfverse: b    सस॒वाँसो॒ वि शृ॑ण्विरे ।
   स॑स॒वांसः वि शृ॑ण्विरे ।
   स॑स॒वांसो वि शृ॑ण्विरे ।

Halfverse: c    ये अ॒ग्ना द॑धि॒रे दुवः॑ ।।
   ये अ॒ग्ना द॑धि॒रे दुवः॑ ।।
   ये अ॒ग्ना द॑धि॒रे दुवः ।।
   ये अ॒ग्ना द॑धि॒रे दुवः ।।

Verse: 7
Halfverse: a    अ॒स्मे रायो॑ दि॒वेदि॑वे॒ सं च॑रन्तु पुरु॒स्पृहः॑ ।
   अ॒स्मे रायो॑ दि॒वेदि॑वे
   अ॒स्मे रायः दि॒वेदि॑वे
   अ॒स्मे रायो दि॒वेदि॑वे

Halfverse: b    सं च॑रन्तु पुरु॒स्पृहः॑ ।
   सम् चरन्तु पुरु॒स्पृहः ।
   सं च॑रन्तु पुरु॒स्पृहः ।

Halfverse: c    अ॒स्मे वाजा॑स ईरताम् ।।
   अ॒स्मे वाजा॑स ईरताम् ।।
   अ॒स्मे वाजा॑सः ईरताम् ।।
   अ॒स्मे वाजा॑स ईरताम् ।।

Verse: 8
Halfverse: a    स विप्र॑श्चर्षणी॒नां शव॑सा॒ मानु॑षाणाम् ।
   स विप्र॑श्चर्षणी॒नां
   स विप्रः चर्षणी॒नाम्
   स विप्र॑श् चर्षणी॒नाअं

Halfverse: b    शव॑सा॒ मानु॑षाणाम् ।
   शव॑सा मानु॑षाणाम् ।
   शव॑सा मानु॑षाणाअम् ।

Halfverse: c    अति॑ क्षि॒प्रेव॑ विध्यति ।।
   अति॑ क्षि॒प्रेव॑ विध्यति ।।
   अति क्षि॒प्रा इ॑व विध्यति ।।
   अति क्षि॒प्रेव विध्यति ।।

This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.