TITUS
Rg-Veda: Rg-Veda-Samhita
Part No. 309
Previous part

Hymn: 13_(309) 
Verse: 1 
Halfverse: a    प्रत्य॒ग्निरु॒षसा॒मग्र॑मख्यद्विभाती॒नां सु॒मना॑ रत्न॒धेय॑म् ।
   प्रत्य॒ग्निरु॒षसा॒मग्र॑मख्यद्
   प्रति अ॒ग्निः उ॒षसा॑म् अग्र॑म् अख्यत्
   प्रति अ॒ग्निर् उ॒षसा॑म् अग्र॑म् अख्यद्

Halfverse: b    विभाती॒नां सु॒मना॑ रत्न॒धेय॑म् ।
   वि॑भाती॒नाम् सु॒मनाः रत्न॒धेय॑म् ।
   वि॑भाती॒नां सु॒मना रत्न॒धेय॑म् ।

Halfverse: c    या॒तम॑श्विना सु॒कृतो॑ दुरो॒णमुत्सूर्यो॒ ज्योति॑षा दे॒व ए॑ति ।।
   या॒तम॑श्विना सु॒कृतो॑ दुरो॒णम्
   या॒तम् अश्विना सु॒कृतः दुरो॒णम्
   या॒तम् अश्विना सु॒कृतो दुरो॒णम्

Halfverse: d    उत्सूर्यो॒ ज्योति॑षा दे॒व ए॑ति ।।
   उत् सूर्यः ज्योति॑षा दे॒वः ए॑ति ।।
   उत् सूरि॑यो ज्योति॑षा दे॒व ए॑ति ।।


Verse: 2 
Halfverse: a    ऊ॒र्ध्वम्भा॒नुं स॑वि॒ता दे॒वो अ॑श्रेद्द्र॒प्सं दवि॑ध्वद्गवि॒षो न सत्वा॑ ।
   ऊ॒र्ध्वम्भा॒नुं स॑वि॒ता दे॒वो अ॑श्रेद्
   ऊ॒र्ध्वम् भा॒नुम् सवि॒ता दे॒वः अ॑श्रेत्
   ऊ॒र्ध्वम् भा॒नुं स॑वि॒ता दे॒वो अ॑श्रेद्

Halfverse: b    द्र॒प्सं दवि॑ध्वद्गवि॒षो न सत्वा॑ ।
   द्र॒प्सम् दवि॑ध्वत् गवि॒षः न सत्वा ।
   द्र॒प्सं दवि॑ध्वद् गवि॒षो न सत्वा ।

Halfverse: c    अनु॑ व्र॒तं वरु॑णो यन्ति मि॒त्रो यत्सूर्यं॑ दि॒व्या॑रो॒हय॑न्ति ।।
   अनु॑ व्र॒तं वरु॑णो यन्ति मि॒त्रो
   अनु व्र॒तम् वरु॑णः यन्ति मि॒त्रः
   अनु व्र॒तं वरु॑णो यन्ति मि॒त्रो

Halfverse: d    यत्सूर्यं॑ दि॒व्या॑रो॒हय॑न्ति ।।
   यत् सूर्य॑म् दि॒वि आ॑रो॒हय॑न्ति ।।
   यत् सूरि॑यं दि॒वि आ॑रो॒हय॑न्ति ।।


Verse: 3 
Halfverse: a    यं सी॒मकृ॑ण्व॒न्तम॑से वि॒पृचे॑ ध्रु॒वक्षे॑मा॒ अन॑वस्यन्तो॒ अर्थ॑म्।
   यं सी॒मकृ॑ण्व॒न्तम॑से वि॒पृचे
   यम् सीम् अकृ॑ण्वन् तम॑से वि॒पृचे
   यं सी॑म् अकृ॑ण्वन् तम॑से वि॒पृचे

Halfverse: b    ध्रु॒वक्षे॑मा॒ अन॑वस्यन्तो॒ अर्थ॑म् ।
   ध्रु॒वक्षे॑माः अन॑वस्यन्तः अर्थ॑म् ।
   ध्रु॒वक्षे॑मा अन॑वस्यन्तो अर्थ॑म् ।

Halfverse: c    तं सूर्यं॑ ह॒रितः॑ स॒प्त य॒ह्वी स्पशं॒ विश्व॑स्य॒ जग॑तो वहन्ति ।।
   तं सूर्यं॑ ह॒रितः॑ स॒प्त य॒ह्वी
   तम् सूर्य॑म् ह॒रितः स॒प्त य॒ह्वीः
   तं सूरि॑यं ह॒रितः स॒प्त य॒ह्वी

Halfverse: d    स्पशं॒ विश्व॑स्य॒ जग॑तो वहन्ति ।।
   स्पश॑म् विश्व॑स्य जग॑तः वहन्ति ।।
   स्पशं विश्व॑स्य जग॑तो वहन्ति ।।


Verse: 4 
Halfverse: a    वहि॑ष्ठेभिर्वि॒हर॑न्यासि॒ तन्तु॑मव॒व्यय॒न्नसि॑तं देव॒ वस्म॑ ।
   वहि॑ष्ठेभिर्वि॒हर॑न्यासि॒ तन्तु॑म्
   वहि॑ष्ठेभिः वि॒हर॑न् यासि तन्तु॑म्
   वहि॑ष्ठेभिर् वि॒हर॑न् यासि तन्तु॑म्

Halfverse: b    अव॒व्यय॒न्नसि॑तं देव॒ वस्म॑ ।
   अ॑व॒व्यय॑न् असि॑तम् देव वस्म ।
   अ॑व॒व्यय॑न्न् असि॑तं देव वस्म ।

Halfverse: c    दवि॑ध्वतो र॒श्मयः॒ सूर्य॑स्य॒ चर्मे॒वावा॑धु॒स्तमो॑ अ॒प्स्व॒न्तः ।।
   दवि॑ध्वतो र॒श्मयः॒ सूर्य॑स्य
   दवि॑ध्वतः र॒श्मयः सूर्य॑स्य
   दवि॑ध्वतो र॒श्मयः सूरि॑यस्य

Halfverse: d    चर्मे॒वावा॑धु॒स्तमो॑ अ॒प्स्व॒न्तः ।।
   चर्म इव अव अधुः तमः अ॒प्सु अ॒न्तर् ।।
   चर्मे॒वावा॑धुस् तमो अ॒प्सु अ॒न्तः ।।


Verse: 5 
Halfverse: a    अना॑यतो॒ अनि॑बद्धः क॒थायं न्य॑ङ्ङुत्ता॒नो ऽव॑ पद्यते॒ न ।
   अना॑यतो॒ अनि॑बद्धः क॒थायं
   अना॑यतः अनि॑बद्धः क॒था अ॒यम्
   अना॑यतो अनि॑बद्धः क॒थायं

Halfverse: b    न्य॑ङ्ङुत्ता॒नो ऽव॑ पद्यते॒ न ।
   न्य॑ङ् उत्ता॒नः अव पद्यते न ।
   निअ॑ङ्ङ् उत्ता॒नो अव पद्यते न ।

Halfverse: c    कया॑ याति स्व॒धया॒ को द॑दर्श दि॒व स्क॒म्भः समृ॑तः पाति॒ नाक॑म् ।।
   कया॑ याति स्व॒धया॒ को द॑दर्श
   कया याति स्व॒धया कः द॑दर्श
   कया याति स्व॒धया को द॑दर्श

Halfverse: d    दि॒व स्क॒म्भः समृ॑तः पाति॒ नाक॑म् ।।
   दि॒वः स्क॒म्भः समृ॑तः पाति नाक॑म् ।।
   दि॒व स्क॒म्भः समृ॑तः पाति नाक॑म् ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.