TITUS
Rg-Veda: Rg-Veda-Samhita
Part No. 312
Previous part

Hymn: 16_(312) 
Verse: 1 
Halfverse: a    आ स॒त्यो या॑तु म॒घवाँ॑ ऋजी॒षी द्रव॑न्त्वस्य॒ हर॑य॒ उप॑ नः ।
   आ स॒त्यो या॑तु म॒घवाँ॑ ऋजी॒षी
   आ स॒त्यः या॑तु म॒घवा॑न् ऋजी॒षी
   आ स॒त्यो या॑तु म॒घवाँ ऋजी॒षी

Halfverse: b    द्रव॑न्त्वस्य॒ हर॑य॒ उप॑ नः ।
   द्रव॑न्तु अस्य हर॑यः उप नः ।
   द्रव॑न्तु अस्य हर॑य उप नः ।

Halfverse: c    तस्मा॒ इदन्धः॑ सुषुमा सु॒दक्ष॑मि॒हाभि॑पि॒त्वं क॑रते गृणा॒नः ।।
   तस्मा॒ इदन्धः॑ सुषुमा सु॒दक्ष॑म्
   तस्मै इत् अन्धः सुषुम+ सु॒दक्ष॑म्
   तस्मा इद् अन्धः सुषुमा सु॒दक्ष॑म्

Halfverse: d    इ॒हाभि॑पि॒त्वं क॑रते गृणा॒नः ।।
   इ॒ह अ॑भिपि॒त्वम् करते गृणा॒नः ।।
   इ॒हाभि॑पि॒त्वं क॑रते गृणा॒नः ।।


Verse: 2 
Halfverse: a    अव॑ स्य शू॒राध्व॑नो॒ नान्ते॒ ऽस्मिन्नो॑ अ॒द्य सव॑ने म॒न्दध्यै॑ ।
   अव॑ स्य शू॒राध्व॑नो॒ नान्ते
   अव स्य शूर अध्व॑नः न अन्ते
   अव स्य शूर अध्व॑नो न अन्ते

Halfverse: b    ऽस्मिन्नो॑ अ॒द्य सव॑ने म॒न्दध्यै॑ ।
   अ॒स्मिन् नः अ॒द्य सव॑ने म॒न्दध्यै ।
   अ॒स्मिन् नो अ॒द्य सव॑ने म॒न्दध्यै ।

Halfverse: c    शँसा॑त्यु॒क्थमु॒शने॑व वे॒धाश्चि॑कि॒तुषे॑ असु॒र्या॑य॒ मन्म॑ ।।
   शँसा॑त्यु॒क्थमु॒शने॑व वे॒धाश्
   शंसा॑ति उ॒क्थम् उ॒शना इव वे॒धाः
   शंसा॑ति उ॒क्थम् उ॒शने॑व वे॒धाश्

Halfverse: d    चिकि॒तुषे॑ असु॒र्या॑य॒ मन्म॑ ।।
   चि॑कि॒तुषे असु॒र्या॑य मन्म ।।
   चि॑कि॒तुषे असु॒रिया॑य मन्म ।।


Verse: 3 
Halfverse: a    क॒विर्न नि॒ण्यं वि॒दथा॑नि॒ साध॒न्वृषा॒ यत्सेकं॑ विपिपा॒नो अर्चा॑त् ।
   क॒विर्न नि॒ण्यं वि॒दथा॑नि॒ साध॑न्
   क॒विः न नि॒ण्यम् वि॒दथा॑नि साध॑न्
   क॒विर् न नि॒ण्यं वि॒दथा॑नि साध॑न्

Halfverse: b    वृषा॒ यत्सेकं॑ विपिपा॒नो ।!। अर्चा॑त् ।
   वृषा यत् सेक॑म् विपिपा॒नः अर्चा॑त् ।
   वृषा यत् सेकं विपिपा॒नो अर्चा॑त् ।

Halfverse: c    दि॒व इ॒त्था जी॑जनत्स॒प्त का॒रूनह्ना॑ चिच्चक्रुर्व॒युना॑ गृ॒णन्तः॑ ।।
   दि॒व इ॒त्था जी॑जनत्स॒प्त का॒रून्
   दि॒वः इ॒त्था जी॑जनत् स॒प्त का॒रून्
   दि॒व इ॒त्था जी॑जनत् स॒प्त का॒रून्

Halfverse: d    अह्ना॑ चिच्चक्रुर्व॒युना॑ गृ॒णन्तः॑ ।।
   अह्ना चित् चक्रुः व॒युना गृ॒णन्तः ।।
   अह्ना चिच् चक्रुर् व॒युना गृ॒णन्तः ।।


Verse: 4 
Halfverse: a    स्व॒र्यद्वेदि॑ सु॒दृशी॑कम॒र्कैर्महि॒ ज्योती॑ रुरुचु॒र्यद्ध॒ वस्तोः॑ ।
   स्व॒र्यद्वेदि॑ सु॒दृशी॑कम॒र्कैर्
   स्व॑र् यत् वेदि सु॒दृशी॑कम् अ॒र्कैः
   सुव॑र् यद् वेदि सु॒दृशी॑कम् अ॒र्कैर्

Halfverse: b    महि॒ ज्योती॑ रुरुचु॒र्यद्ध॒ वस्तोः॑ ।
   महि ज्योतिः रुरुचुः यत् ह वस्तोः ।
   महि ज्योती रुरुचुर् यद् ध वस्तोः ।

Halfverse: c    अ॒न्धा तमाँ॑सि॒ दुधि॑ता वि॒चक्षे॒ नृभ्य॑श्चकार॒ नृत॑मो अ॒भिष्टौ॑ ।।
   अ॒न्धा तमाँ॑सि॒ दुधि॑ता वि॒चक्षे
   अ॒न्धा तमां॑सि दुधि॑ता वि॒चक्षे
   अ॒न्धा तमां॑सि दुधि॑ता वि॒चक्षे

Halfverse: d    नृभ्य॑श्चकार॒ नृत॑मो अ॒भिष्टौ॑ ।।
   नृभ्यः चकार नृत॑मः अ॒भिष्टौ ।।
   नृभ्य॑श् चकार नृत॑मो अ॒भिष्टौ ।।


Verse: 5 
Halfverse: a    व॑व॒क्ष इन्द्रो॒ अमि॑तमृजी॒ष्यु॒भे आ प॑प्रौ॒ रोद॑सी महि॒त्वा ।
   व॑व॒क्ष इन्द्रो॒ अमि॑तमृजीष्य्
   वव॒क्षे इन्द्रः अमि॑तम् ऋजी॒षी
   व॑व॒क्ष इन्द्रो अमि॑तम् ऋजी॒षी

Halfverse: b    उ॒भे आ प॑प्रौ॒ रोद॑सी महि॒त्वा ।
   उ॒भे आ प॑प्रौ रोद॑सी महि॒त्वा ।
   उ॒भे आ प॑प्रौ रोद॑सी महि॒त्वा ।

Halfverse: c    अत॑श्चिदस्य महि॒मा वि रे॑च्य॒भि यो विश्वा॒ भुव॑ना ब॒भूव॑ ।।
   अत॑श्चिदस्य महि॒मा वि रे॑च्य्
   अतः चित् अस्य महि॒मा वि रे॑चि
   अत॑श् चिद् अस्य महि॒मा वि रे॑चि

Halfverse: d    अ॒भि यो विश्वा॒ भुव॑ना ब॒भूव॑ ।।
   अ॒भि यः विश्वा भुव॑ना ब॒भूव ।।
   अ॒भि यो विश्वा भुव॑ना ब॒भूव ।।


Verse: 6 
Halfverse: a    विश्वा॑नि श॒क्रो नर्या॑णि वि॒द्वान॒पो रि॑रेच॒ सखि॑भि॒र्निका॑मैः ।
   विश्वा॑नि श॒क्रो नर्या॑णि वि॒द्वान्
   विश्वा॑नि श॒क्रः नर्या॑णि वि॒द्वान्
   विश्वा॑नि श॒क्रो नरि॑याणि वि॒द्वान्

Halfverse: b    अ॒पो रि॑रेच॒ सखि॑भि॒र्निका॑मैः ।
   अ॒पः रि॑रेच सखि॑भिः निका॑मैः ।
   अ॒पो रि॑रेच सखि॑भिर् निका॑मैः ।

Halfverse: c    अश्मा॑नं चि॒द्ये बि॑भि॒दुर्वचो॑भिर्व्र॒जं गोम॑न्तमु॒शिजो॒ वि व॑व्रुः ।।
   अश्मा॑नं चि॒द्ये बि॑भि॒दुर्वचो॑भिर्
   अश्मा॑नम् चित् ये बि॑भि॒दुः वचो॑भिः
   अश्मा॑नं चिद् ये बि॑भि॒दुर् वचो॑भिर्

Halfverse: d    व्र॒जं गोम॑न्तमु॒शिजो॒ वि व॑व्रुः ।।
   व्र॒जम् गोम॑न्तम् उ॒शिजः वि व॑व्रुः ।।
   व्र॒जं गोम॑न्तम् उ॒शिजो वि व॑व्रुः ।।


Verse: 7 
Halfverse: a    अ॒पो वृ॒त्रं व॑व्रि॒वाँस॒म्परा॑ह॒न्प्राव॑त्ते॒ वज्र॑म्पृथि॒वी सचे॑ताः ।
   अ॒पो वृ॒त्रं व॑व्रि॒वाँस॒म्परा॑हन्
   अ॒पः वृ॒त्रम् वव्रि॒वांस॑म् परा अहन्
   अ॒पो वृ॒त्रं व॑व्रि॒वांस॑म् परा॑हन्

Halfverse: b    प्राव॑त्ते॒ वज्र॑म्पृथि॒वी सचे॑ताः ।
   प्र आ॑वत् ते वज्र॑म् पृथि॒वी सचे॑ताः ।
   प्राव॑त् ते वज्र॑म् पृथि॒वी सचे॑ताः ।

Halfverse: c    प्रार्णाँ॑सि समु॒द्रिया॑ण्ऐनोः॒ पति॒र्भव॒ञ्छव॑सा शूर धृष्णो ।।
   प्रार्णाँ॑सि समु॒द्रिया॑ण्ऐनोः
   प्र अर्णां॑सि समु॒द्रिया॑णि ऐनोः
   प्र आ॑र्णांसि समु॒द्रिया॑णि ऐनोः

Halfverse: d    पति॒र्भव॒ञ्छव॑सा शूर धृष्णो ।।
   पतिः भव॑न् शव॑सा शूर धृष्णो ।।
   पति॑र् भव॑ञ् छव॑सा शूर धृष्णो ।।


Verse: 8 
Halfverse: a    अ॒पो यदद्रि॑म्पुरुहूत॒ दर्द॑रा॒विर्भु॑वत्स॒रमा॑ पू॒र्व्यं ते॑ ।
   अ॒पो यदद्रि॑म्पुरुहूत॒ दर्द॑र्
   अ॒पः यत् अद्रि॑म् पुरुहूत दर्द॑र्
   अ॒पो यद् अद्रि॑म् पुरुहूत दर्द॑र्

Halfverse: b    आ॒विर्भु॑वत्स॒रमा॑ पू॒र्व्यं ते॑ ।
   आ॒विः भु॑वत् स॒रमा पू॒र्व्यम् ते ।
   आ॒विर् भुवत् स॒रमा पूर्वि॒यं ते ।

Halfverse: c    स नो॑ ने॒ता वाज॒मा द॑र्षि॒ भूरिं॑ गो॒त्रा रु॒जन्नङ्गि॑रोभिर्गृणा॒नः ।।
   स नो॑ ने॒ता वाज॒मा द॑र्षि॒ भूरिं
   स नः ने॒ता वाज॑म् आ द॑र्षि भूरि॑म्
   स नो ने॒ता वाज॑म् आ द॑र्षि भूरिं

Halfverse: d    गो॒त्रा रु॒जन्नङ्गि॑रोभिर्गृणा॒नः ।।
   गो॒त्रा रु॒जन् अङ्गि॑रोभिः गृणा॒नः ।।
   गो॒त्रा रु॒जन्न् अङ्गि॑रोभिर् गृणा॒नः ।।


Verse: 9 
Halfverse: a    अछा॑ क॒विं नृ॑मणो गा अ॒भिष्टौ॒ स्व॑र्षाता मघव॒न्नाध॑मानम् ।
   अछा॑ क॒विं नृ॑मणो गा अ॒भिष्टौ
   अछ+ क॒विम् नृमणः गाः अ॒भिष्टौ
   अछा क॒विं नृ॑मणो गा अ॒भिष्टौ

Halfverse: b    स्व॑र्षाता मघव॒न्नाध॑मानम् ।
   स्व॑र्षाता मघवन् नाध॑मानम् ।
   सुव॑र्षाता मघवन् नाध॑मानम् ।

Halfverse: c    ऊ॒तिभि॒स्तमि॑षणो द्यु॒म्नहू॑तौ॒ नि मा॒यावा॒नब्र॑ह्मा॒ दस्यु॑रर्त ।।
   ऊ॒तिभि॒स्तमि॑षणो द्यु॒म्नहू॑तौ
   ऊ॒तिभिः तम् इषणः द्यु॒म्नहू॑तौ
   ऊ॒तिभि॑स् तम् इषणो द्यु॒म्नहू॑तौ

Halfverse: d    नि मा॒यावा॒नब्र॑ह्मा॒ दस्यु॑रर्त ।।
   नि मा॒यावा॑न् अब्र॑ह्मा दस्युः अर्त ।।
   नि मा॒यावा॑न् अब्र॑ह्मा दस्यु॑र् अर्त ।।


Verse: 10 
Halfverse: a    आ द॑स्यु॒घ्ना मन॑सा या॒ह्यस्त॒म्भुव॑त्ते॒ कुत्सः॑ स॒ख्ये निका॑मः ।
   आ द॑स्यु॒घ्ना मन॑सा या॒ह्यस्त॑म्
   आ द॑स्यु॒घ्ना मन॑सा याहि अस्त॑म्
   आ द॑स्यु॒घ्ना मन॑सा याहि अस्त॑म्

Halfverse: b    भुव॑त्ते॒ कुत्सः॑ स॒ख्ये निका॑मः ।
   भुव॑त् ते कुत्सः स॒ख्ये निका॑मः ।
   भुव॑त् ते कुत्सः सखि॒ये निका॑मः ।

Halfverse: c    स्वे योनौ॒ नि ष॑दतं॒ सरू॑पा॒ वि वां॑ चिकित्सदृत॒चिद्ध॒ नारी॑ ।।
   स्वे योनौ॒ नि ष॑दतं॒ सरू॑पा
   स्वे योनौ नि स॑दतम् सरू॑पा
   सु॒वे योनौ नि ष॑दतं सरू॑पा

Halfverse: d    वि वां॑ चिकित्सदृत॒चिद्ध॒ नारी॑ ।।
   वि वा॑म् चिकित्सत् ऋत॒चित् ह नारी ।।
   वि वां चिकित्सद् ऋत॒चिद् ध नारी ।।


Verse: 11 
Halfverse: a    यासि॒ कुत्से॑न स॒रथ॑मव॒स्युस्तो॒दो वात॑स्य॒ हर्यो॒रीशा॑नः ।
   यासि॒ कुत्से॑न स॒रथ॑मव॒स्युस्
   यासि कुत्से॑न स॒रथ॑म् अव॒स्युः
   यासि कुत्से॑न स॒रथ॑म् अव॒स्युस्

Halfverse: b    तो॒दो वात॑स्य॒ हर्यो॒रीशा॑नः ।
   तो॒दः वात॑स्य हर्योः ईशा॑नः ।
   तो॒दो वात॑स्य हरि॑योर् ईशा॑नः ।

Halfverse: c    ऋ॒ज्रा वाजं॒ न गध्यं॒ युयू॑षन्क॒विर्यदह॒न्पार्या॑य॒ भूषा॑त् ।।
   ऋ॒ज्रा वाजं॒ न गध्यं॒ युयू॑षन्
   ऋ॒ज्रा वाज॑म् न गध्य॑म् युयू॑षन्
   ऋ॒ज्रा वाजं न गधि॑यं युयू॑षन्

Halfverse: d    क॒विर्यदह॒न्पार्या॑य॒ भूषा॑त् ।।
   क॒विः यत् अह॑न् पार्या॑य भूषा॑त् ।।
   क॒विर् यद् अह॑न् पारि॑याय भूषा॑त् ।।


Verse: 12 
Halfverse: a    कुत्सा॑य॒ शुष्ण॑म॒शुषं॒ नि ब॑र्हीः प्रपि॒त्वे अह्नः॒ कुय॑वं स॒हस्रा॑ ।
   कुत्सा॑य॒ शुष्ण॑म॒शुषं॒ नि ब॑र्हीः
   कुत्सा॑य शुष्ण॑म् अ॒शुष॑म् नि ब॑र्हीः
   कुत्सा॑य शुष्ण॑म् अ॒शुषं नि ब॑र्हीः

Halfverse: b    प्रपि॒त्वे अह्नः॒ कुय॑वं स॒हस्रा॑ ।
   प्र॑पि॒त्वे अह्नः कुय॑वम् स॒हस्रा ।
   प्र॑पि॒त्वे अह्नः कुय॑वं स॒हस्रा ।

Halfverse: c    स॒द्यो दस्यू॒न्प्र मृ॑ण कु॒त्स्येन॒ प्र सूर॑श्च॒क्रं वृ॑हताद॒भीके॑ ।।
   स॒द्यो दस्यू॒न्प्र मृ॑ण कु॒त्स्येन
   स॒द्यः दस्यू॑न् प्र मृ॑ण कु॒त्स्येन
   स॒द्यो दस्यू॑न् प्र मृ॑ण कुत्सि॒येन

Halfverse: d    प्र सूर॑श्च॒क्रं वृ॑हताद॒भीके॑ ।।
   प्र सूरः च॒क्रम् वृहतात् अ॒भीके ।।
   प्र सूर॑श् च॒क्रं वृ॑हताद् अ॒भीके ।।


Verse: 13 
Halfverse: a    त्वम्पिप्रु॒म्मृग॑यं शूशु॒वाँस॑मृ॒जिश्व॑ने वैदथि॒नाय॑ रन्धीः ।
   त्वम्पिप्रु॒म्मृग॑यं शूशु॒वाँस॑म्
   त्वम् पिप्रु॑म् मृग॑यम् शूशु॒वांस॑म्
   तु॒वम् पिप्रु॑म् मृग॑यं शूशु॒वांस॑म्

Halfverse: b    ऋ॒जिश्व॑ने वैदथि॒नाय॑ रन्धीः ।
   ऋ॒जिश्व॑ने वैदथि॒नाय रन्धीः ।
   ऋ॒जिश्व॑ने वैदथि॒नाय रन्धीः ।

Halfverse: c    प॑ञ्चा॒शत्कृ॒ष्णा नि व॑पः स॒हस्रात्कं॒ न पुरो॑ जरि॒मा वि द॑र्दः ।।
   प॑ञ्चा॒शत्कृ॒ष्णा नि व॑पः स॒हस्रा
   पञ्चा॒शत् कृ॒ष्णा नि व॑पः स॒हस्रा
   पञ्चा॒शत् कृ॒ष्णा नि व॑पः स॒हस्रा

Halfverse: d     अत्कं॒ न पुरो॑ जरि॒मा वि द॑र्दः ।।
   अत्क॑म् न पुरः जरि॒मा वि द॑र्दर् ।।
   अत्कं न पुरो जरि॒मा वि द॑र्दः ।।


Verse: 14 
Halfverse: a    सूर॑ उपा॒के त॒न्वं॒ दधा॑नो॒ वि यत्ते॒ चेत्य॒मृत॑स्य॒ वर्पः॑ ।
   सूर॑ उपा॒के त॒न्वं॒ दधा॑नो
   सूरः उपा॒के त॒न्व॑म् दधा॑नः
   सूर उपा॒के त॒नुवं दधा॑नो

Halfverse: b    वि यत्ते॒ चेत्य॒मृत॑स्य॒ वर्पः॑ ।
   वि यत् ते चेति अ॒मृत॑स्य वर्पः ।
   वि यत् ते चेति अ॒मृत॑स्य वर्पः ।

Halfverse: c    मृ॒गो न ह॒स्ती तवि॑षीमुषा॒णः सिँ॒हो न भी॒म आयु॑धानि॒ बिभ्र॑त् ।।
   मृ॒गो न ह॒स्ती तवि॑षीमुषा॒णः
   मृ॒गः न ह॒स्ती तवि॑षीम् उषा॒णः
   मृ॒गो न ह॒स्ती तवि॑षीम् उषा॒णः

Halfverse: d    सिँ॒हो न भी॒म आयु॑धानि॒ बिभ्र॑त् ।।
   सिं॒हः न भी॒मः आयु॑धानि बिभ्र॑त् ।।
   सिं॒हो न भी॒म आयु॑धानि बिभ्र॑त् ।।


Verse: 15 
Halfverse: a    इन्द्रं॒ कामा॑ वसू॒यन्तो॑ अग्म॒न्स्व॑र्मीऴे॒ न सव॑ने चका॒नाः ।
   इन्द्रं॒ कामा॑ वसू॒यन्तो॑ अग्मन्
   इन्द्र॑म् कामाः वसू॒यन्तः अग्मन्
   इन्द्रं कामा ? वसू॒यन्तो अग्मन्

Halfverse: b    स्व॑र्मीऴे॒ न सव॑ने चका॒नाः ।
   स्व॑र्मीऴे न सव॑ने चका॒नाः ।
   सुव॑र्मीऴे न सव॑ने चका॒नाः ।

Halfverse: c    श्र॑व॒स्यवः॑ शशमा॒नास॑ उ॒क्थैरोको॒ न र॒ण्वा सु॒दृशी॑व पु॒ष्टिः ।।
   श्र॑व॒स्यवः॑ शशमा॒नास॑ उ॒क्थैर्
   श्रव॒स्यवः शशमा॒नासः उ॒क्थैः
   श्र॑व॒स्यवः शशमा॒नास उ॒क्थैर्

Halfverse: d    ओको॒ न र॒ण्वा सु॒दृशी॑व पु॒ष्टिः ।।
   ओकः न र॒ण्वा सु॒दृशी इव पु॒ष्टिः ।।
   ओको न र॒ण्वा सु॒दृशी॑व पु॒ष्टिः ।।


Verse: 16 
Halfverse: a    तमिद्व॒ इन्द्रं॑ सु॒हवं॑ हुवेम॒ यस्ता च॒कार॒ नर्या॑ पु॒रूणि॑ ।
   तमिद्व॒ इन्द्रं॑ सु॒हवं॑ हुवेम
   तम् इत् वः इन्द्र॑म् सु॒हव॑म् हुवेम
   तम् इद् व इन्द्रं सु॒हवं हुवेम

Halfverse: b    यस्ता च॒कार॒ नर्या॑ पु॒रूणि॑ ।
   यः ता च॒कार नर्या पु॒रूणि ।
   यस् ता च॒कार नरि॑या पु॒रूणि ।

Halfverse: c    यो माव॑ते जरि॒त्रे गध्यं॑ चिन्म॒क्षू वाज॒म्भर॑ति स्पा॒र्हरा॑धाः ।।
   यो माव॑ते जरि॒त्रे गध्यं॑ चिन्
   यः माव॑ते जरि॒त्रे गध्य॑म् चित्
   यो माव॑ते जरि॒त्रे गधि॑यं चिन्

Halfverse: d    म॒क्षू वाज॒म्भर॑ति स्पा॒र्हरा॑धाः ।।
   म॒क्षु+ वाज॑म् भर॑ति स्पा॒र्हरा॑धाः ।।
   म॒क्षू वाज॑म् भर॑ति स्पा॒र्हरा॑धाः ।।


Verse: 17 
Halfverse: a    ति॒ग्मा यद॒न्तर॒शनिः॒ पता॑ति॒ कस्मि॑ञ्चिच्छूर मुहु॒के जना॑नाम् ।
   ति॒ग्मा यद॒न्तर॒शनिः॒ पता॑ति
   ति॒ग्मा यत् अ॒न्तर् अ॒शनिः पता॑ति
   ति॒ग्मा यद् अ॒न्तर् अ॒शनिः पता॑ति

Halfverse: b    कस्मि॑ञ्चिच्छूर मुहु॒के जना॑नाम् ।
   कस्मि॑न् चित् शूर मुहु॒के जना॑नाम् ।
   कस्मि॑ञ् चिच् छूर मुहु॒के जना॑नाम् ।

Halfverse: c    घो॒रा यद॑र्य॒ समृ॑ति॒र्भवा॒त्यध॑ स्मा नस्त॒न्वो॑ बोधि गो॒पाः ।।
   घो॒रा यद॑र्य॒ समृ॑ति॒र्भवा॑त्य्
   घो॒रा यत् अर्य समृ॑तिः भवा॑ति
   घो॒रा यद् अर्य समृ॑तिर् भवा॑ति

Halfverse: d    अध॑ स्मा नस्त॒न्वो॑ बोधि गो॒पाः ।।
   अध स्म+ नः त॒न्वः बोधि गो॒पाः ।।
   अध स्मा नस् त॒नुवो बोधि गो॒पाः ।।


Verse: 18 
Halfverse: a    भुवो॑ ऽवि॒ता वा॒मदे॑वस्य धी॒नाम्भुवः॒ सखा॑वृ॒को वाज॑सातौ ।
   भुवो॑ ऽवि॒ता वा॒मदे॑वस्य धी॒नाम्
   भुवः अवि॒ता वा॒मदे॑वस्य धी॒नाम्
   भुवो ऽवि॒ता वा॒मदे॑वस्य धी॒नाम्

Halfverse: b    भुवः॒ सखा॑वृ॒को वाज॑सातौ ।
   भुवः सखा अवृ॒कः वाज॑सातौ ।
   भुवः सखा अवृ॒को वाज॑सातौ ।

Halfverse: c    त्वामनु॒ प्रम॑ति॒मा ज॑गन्मोरु॒शंसो॑ जरि॒त्रे वि॒श्वध॑ स्याः ।।
   त्वामनु॒ प्रम॑ति॒मा ज॑गन्म
   त्वाम् अनु प्रम॑तिम् आ ज॑गन्म
   तु॒वाम् अनु प्रम॑तिम् आ ज॑गन्म

Halfverse: d     उरु॒शंसो॑ जरि॒त्रे वि॒श्वध॑ स्याः ।।
   उ॑रु॒शंसः जरि॒त्रे वि॒श्वध स्याः ।।
   उ॑रु॒शंसो जरि॒त्रे वि॒श्वध स्याः ।।


Verse: 19 
Halfverse: a    ए॒भिर्नृभि॑रिन्द्र त्वा॒युभि॑ष्ट्वा म॒घव॑द्भिर्मघव॒न्विश्व॑ आ॒जौ ।
   ए॒भिर्नृभि॑रिन्द्र त्वा॒युभि॑ष्ट्वा
   ए॒भिः नृभिः इन्द्र त्वा॒युभिः त्वा
   ए॒भिर् नृभि॑र् इन्दर त्वा॒युभि॑ष् ट्वा

Halfverse: b    म॒घव॑द्भिर्मघव॒न्विश्व॑ आ॒जौ ।
   म॒घव॑द्भिः मघवन् विश्वे आ॒जौ ।
   म॒घव॑द्भिर् मघवन् विश्व आ॒जौ ।

Halfverse: c    द्यावो॒ न द्यु॒म्नैर॒भि सन्तो॑ अ॒र्यः क्ष॒पो म॑देम श॒रद॑श्च पू॒र्वीः ।।
   द्यावो॒ न द्यु॒म्नैर॒भि सन्तो॑ अ॒र्यः
   द्यावः न द्यु॒म्नैः अ॒भि सन्तः अ॒र्यः
   द्यावो न द्यु॒म्नैर् अ॒भि सन्तो अ॒र्यः

Halfverse: d    क्ष॒पो म॑देम श॒रद॑श्च पू॒र्वीः ।।
   क्ष॒पः म॑देम श॒रदः च पू॒र्वीः ।।
   क्ष॒पो म॑देम श॒रद॑श् च पू॒र्वीः ।।


Verse: 20 
Halfverse: a    ए॒वेदिन्द्रा॑य वृष॒भाय॒ वृष्णे॒ ब्रह्मा॑कर्म॒ भृग॑वो॒ न रथ॑म् ।
   ए॒वेदिन्द्रा॑य वृष॒भाय॒ वृष्णे
   ए॒व इत् इन्द्रा॑य वृष॒भाय वृष्णे
   ए॒वेद् इन्द्रा॑य वृष॒भाय वृष्णे

Halfverse: b    ब्रह्मा॑कर्म॒ भृग॑वो॒ न रथ॑म् ।
   ब्रह्म अकर्म भृग॑वः न रथ॑म् ।
   ब्रह्म अकर्म भृग॑वो न रथ॑म् ।

Halfverse: c    नू चि॒द्यथा॑ नः स॒ख्या वि॒योष॒दस॑न्न उ॒ग्रो॑ ऽवि॒ता त॑नू॒पाः ।।
   नू चि॒द्यथा॑ नः स॒ख्या वि॒योष॑द्
   नु+ चि॑त् यथा नः स॒ख्या वि॒योष॑त्
   नू चि॑द् यथा नः सखि॒या वि॒योष॑द्

Halfverse: d    अस॑न्न उ॒ग्रो॑ ऽवि॒ता त॑नू॒पाः ।।
   अस॑त् नः उ॒ग्रः अ॑वि॒ता त॑नू॒पाः ।।
   अस॑न् न उ॒ग्रो अ॑वि॒ता त॑नू॒पाः ।।


Verse: 21 
Halfverse: a    नू ष्टु॒त इ॑न्द्र॒ नू गृ॑णा॒न इषं॑ जरि॒त्रे न॒द्यो॒ न पी॑पेः ।
   नू ष्टु॒त इ॑न्द्र॒ नू गृ॑णा॒न
   नु+ स्तु॒तः इ॑न्द्र नु+ गृ॑णा॒नः
   नूउ ष्टु॒त इ॑न्दर नू गृ॑णा॒न

Halfverse: b    इषं॑ जरि॒त्रे न॒द्यो॒ न पी॑पेः ।
   इष॑म् जरि॒त्रे न॒द्यः न पी॑पेः ।
   इषं जरि॒त्रे न॒दियो न पी॑पेः ।

Halfverse: c    अका॑रि ते हरिवो॒ ब्रह्म॒ नव्यं॑ धि॒या स्या॑म र॒थ्यः॑ सदा॒साः ।।
   अका॑रि ते हरिवो॒ ब्रह्म॒ नव्यं
   अका॑रि ते हरिवः ब्रह्म नव्य॑म्
   अका॑रि ते हरिवो ब्रह्म नव्यं

Halfverse: d    धि॒या स्या॑म र॒थ्यः॑ सदा॒साः ।।
   धि॒या स्या॑म र॒थ्यः सदा॒साः ।।
   धि॒या सि॑याम र॒थियः सदा॒साः ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.