TITUS
Rg-Veda: Rg-Veda-Samhita
Part No. 313
Previous part

Hymn: 17_(313) 
Verse: 1 
Halfverse: a    त्वम्म॒हाँ इ॑न्द्र॒ तुभ्यं॑ ह॒ क्षा अनु॑ क्ष॒त्रम्मँ॒हना॑ मन्यत॒ द्यौः ।
   त्वम्म॒हाँ इ॑न्द्र॒ तुभ्यं॑ ह॒ क्षा
   त्वम् म॒हान् इन्द्र तुभ्य॑म् ह क्षाः
   तु॒वम् म॒हाँ इ॑न्दर तुभ्य % ह क्षा

Halfverse: b    अनु॑ क्ष॒त्रम्मँ॒हना॑ मन्यत॒ द्यौः ।
   अनु क्ष॒त्रम् मं॒हना मन्यत द्यौः ।
   अनु क्ष॒त्रम् मं॒हना मन्यत द्यौः ।

Halfverse: c    त्वं वृ॒त्रं शव॑सा जघ॒न्वान्सृ॒जः सिन्धूँ॒रहि॑ना जग्रसा॒नान् ।।
   त्वं वृ॒त्रं शव॑सा जघ॒न्वान्
   त्वम् वृ॒त्रम् शव॑सा जघ॒न्वान्
   तु॒वं वृ॒त्रं ? शव॑सा जघ॒न्वान्

Halfverse: d    सृ॒जः सिन्धूँ॒रहि॑ना जग्रसा॒नान् ।।
   सृ॒जः सिन्धू॑न् अहि॑ना जग्रसा॒नान् ।।
   सृ॒जः सिन्धूँ॑र् अहि॑ना जग्रसा॒नान् ।।


Verse: 2 
Halfverse: a    तव॑ त्वि॒षो जनि॑मन्रेजत॒ द्यौ रेज॒द्भूमि॑र्भि॒यसा॒ स्वस्य॑ म॒न्योः ।
   तव॑ त्वि॒षो जनि॑मन्रेजत॒ द्यौ
   तव त्वि॒षः जनि॑मन् रेजत द्यौः
   तव त्वि॒षो जनि॑मन् रेजत द्यौ

Halfverse: b     रेज॒द्भूमि॑र्भि॒यसा॒ स्वस्य॑ म॒न्योः ।
   एज॑त् ! भूमिः भि॒यसा स्वस्य म॒न्योः ।
   रेज॑द् भूमि॑र् भि॒यसा स्वस्य म॒न्योः ।

Halfverse: c    ऋ॑घा॒यन्त॑ सु॒भ्वः॒ पर्व॑तास॒ आर्द॒न्धन्वा॑नि स॒रय॑न्त॒ आपः॑ ।।
   ऋ॑घा॒यन्त॑ सु॒भ्वः॒ पर्व॑तास
   ऋघा॒यन्त सु॒भ्वः पर्व॑तासः
   ऋघा॒यन्त सु॒भुवः पर्व॑तास

Halfverse: d    आर्द॒न्धन्वा॑नि स॒रय॑न्त॒ आपः॑ ।।
   आर्द॑न् धन्वा॑नि स॒रय॑न्ते आपः ।।
   आर्द॑न् धन्वा॑नि स॒रय॑न्त आपः ।।


Verse: 3 
Halfverse: a    भि॒नद्गि॒रिं शव॑सा॒ वज्र॑मि॒ष्णन्ना॑विष्कृण्वा॒नः स॑हसा॒न ओजः॑ ।
   भि॒नद्गि॒रिं शव॑सा॒ वज्र॑मि॒ष्णन्न्
   भि॒नत् गि॒रिम् शव॑सा वज्र॑म् इ॒ष्णन्
   भि॒नद् गि॒रिं शव॑सा वज्र॑म् इ॒ष्णन्न्

Halfverse: b    आविष्कृण्वा॒नः स॑हसा॒न ओजः॑ ।
   आ॑विष्कृण्वा॒नः स॑हसा॒नः ओजः ।
   आ॑विष्कृण्वा॒नः स॑हसा॒न ओजः ।

Halfverse: c    वधी॑द्वृ॒त्रं वज्रे॑ण मन्दसा॒नः सर॒न्नापो॒ जव॑सा ह॒तवृ॑ष्णीः ।।
   वधी॑द्वृ॒त्रं वज्रे॑ण मन्दसा॒नः
   वधी॑त् वृ॒त्रम् वज्रे॑ण मन्दसा॒नः
   वधी॑द् वृ॒त्रं वज्रे॑ण मन्दसा॒नः

Halfverse: d    सर॒न्नापो॒ जव॑सा ह॒तवृ॑ष्णीः ।।
   सर॑न् आपः जव॑सा ह॒तवृ॑ष्णीः ।।
   सर॑न्न् आपो जव॑सा ह॒तवृ॑ष्णीः ।।


Verse: 4 
Halfverse: a    सु॒वीर॑स्ते जनि॒ता म॑न्यत॒ द्यौरिन्द्र॑स्य क॒र्ता स्वप॑स्तमो भूत् ।
   सु॒वीर॑स्ते जनि॒ता म॑न्यत॒ द्यौर्
   सु॒वीरः ते जनि॒ता म॑न्यत द्यौः
   सु॒वीर॑स् ते जनि॒ता म॑न्यत द्यौर्

Halfverse: b    इन्द्र॑स्य क॒र्ता स्वप॑स्तमो भूत् ।
   इन्द्र॑स्य क॒र्ता स्वप॑स्तमः भूत् ।
   इन्द्र॑स्य क॒र्ता सुअ॑पस्तमो भूत् ।

Halfverse: c    य ईं॑ ज॒जान॑ स्व॒र्यं॑ सु॒वज्र॒मन॑पच्युतं॒ सद॑सो॒ न भूम॑ ।।
   य ईं॑ ज॒जान॑ स्व॒र्यं॑ सु॒वज्र॑म्
   यः ई॑म् ज॒जान स्व॒र्य॑म् सु॒वज्र॑म्
   य ईं ज॒जान स्व॒रियं सु॒वज्र॑म्

Halfverse: d    अन॑पच्युतं॒ सद॑सो॒ न भूम॑ ।।
   अन॑पच्युतम् सद॑सः न भूम ।।
   अन॑पच्युतं सद॑सो न भूम ।।


Verse: 5 
Halfverse: a    य एक॒ इच्च्या॒वय॑ति॒ प्र भूमा॒ राजा॑ कृष्टी॒नाम्पु॑रुहू॒त इन्द्रः॑ ।
   य एक॒ इच् ।!। च्या॒वय॑ति॒ प्र भूमा
   यः एकः इत् च्या॒वय॑ति प्र भूम+
   य एक इच् च्या॒वय॑ति प्र भूमा

Halfverse: b    राजा॑ कृष्टी॒नाम्पु॑रुहू॒त इन्द्रः॑ ।
   राजा कृष्टी॒नाम् पुरुहू॒तः इन्द्रः ।
   राजा कृष्टी॒नाम् पुरुहू॒त इन्द्रः ।

Halfverse: c    स॒त्यमे॑न॒मनु॒ विश्वे॑ मदन्ति रा॒तिं दे॒वस्य॑ गृण॒तो म॒घोनः॑ ।।
   स॒त्यमे॑न॒मनु॒ विश्वे॑ मदन्ति
   स॒त्यम् एनम् अनु विश्वे मदन्ति
   स॒त्यम् एनम् अनु विश्वे मदन्ति

Halfverse: d    रा॒तिं दे॒वस्य॑ गृण॒तो म॒घोनः॑ ।।
   रा॒तिम् दे॒वस्य गृण॒तः म॒घोनः ।।
   रा॒तिं दे॒वस्य गृण॒तो म॒घोनः ।।


Verse: 6 
Halfverse: a    स॒त्रा सोमा॑ अभवन्नस्य॒ विश्वे॑ स॒त्रा मदा॑सो बृह॒तो मदि॑ष्ठाः ।
   स॒त्रा सोमा॑ अभवन्नस्य॒ विश्वे
   स॒त्रा सोमाः अभवन् अस्य विश्वे
   स॒त्रा सोमा अभवन्न् अस्य विश्वे

Halfverse: b    स॒त्रा मदा॑सो बृह॒तो मदि॑ष्ठाः ।
   स॒त्रा मदा॑सः बृह॒तः मदि॑ष्ठाः ।
   स॒त्रा मदा॑सो बृह॒तो मदि॑ष्ठाः ।

Halfverse: c    स॒त्राभ॑वो॒ वसु॑पति॒र्वसू॑नां॒ दत्रे॒ विश्वा॑ अधिथा इन्द्र कृ॒ष्टीः ।।
   स॒त्राभ॑वो॒ वसु॑पति॒र्वसू॑नां
   स॒त्रा अ॑भवः वसु॑पतिः वसू॑नाम्
   स॒त्राभ॑वो वसु॑पतिर् वसू॑नां

Halfverse: d    दत्रे॒ विश्वा॑ अधिथा इन्द्र कृ॒ष्टीः ।।
   दत्रे विश्वाः अधिथाः इन्द्र कृ॒ष्टीः ।।
   दत्रे विश्वा अधिथा इन्द्र कृ॒ष्टीः ।।


Verse: 7 
Halfverse: a    त्वमध॑ प्रथ॒मं जाय॑मा॒नो ऽमे॒ विश्वा॑ अधिथा इन्द्र कृ॒ष्टीः ।
   त्वमध॑ प्रथ॒मं जाय॑मा॒नो
   त्वम् अध प्रथ॒मम् जाय॑मानः
   तु॒वम् अध प्रथ॒मं जाय॑मानो

Halfverse: b    ऽमे॒ विश्वा॑ अधिथा इन्द्र कृ॒ष्टीः ।
   अमे विश्वाः अधिथाः इन्द्र कृ॒ष्टीः ।
   अमे विश्वा अधिथा इन्द्र कृ॒ष्टीः ।

Halfverse: c    त्वम्प्रति॑ प्र॒वत॑ आ॒शया॑न॒महिं॒ वज्रे॑ण मघव॒न्वि वृ॑श्चः ।।
   त्वम्प्रति॑ प्र॒वत॑ आ॒शया॑नम्
   त्वम् प्रति प्र॒वतः आ॒शया॑नम्
   तु॒वम् प्रति प्र॒वत आ॒शया॑नम्

Halfverse: d    अहिं॒ वज्रे॑ण मघव॒न्वि वृ॑श्चः ।।
   अहि॑म् वज्रे॑ण मघवन् वि वृ॑श्चः ।।
   अहिं वज्रे॑ण मघवन् वि वृ॑श्चः ।।


Verse: 8 
Halfverse: a    स॑त्रा॒हणं॒ दाधृ॑षिं॒ तुम्र॒मिन्द्र॑म्म॒हाम॑पा॒रं वृ॑ष॒भं सु॒वज्र॑म् ।
   स॑त्रा॒हणं॒ दाधृ॑षिं॒ तुम्र॒मिन्द्र॑म्
   सत्रा॒हण॑म् दाधृ॑षिम् तुम्र॑म् इन्द्र॑म्
   सत्रा॒हणं दाधृ॑षिं तुम्र॑म् इन्द्र॑म्

Halfverse: b    म॒हाम॑पा॒रं वृ॑ष॒भं सु॒वज्र॑म् ।
   म॒हाम् अपा॒रम् वृष॒भम् सु॒वज्र॑म् ।
   म॒हाम् अपा॒रं वृ॑ष॒भं सु॒वज्र॑म् ।

Halfverse: c    हन्ता॒ यो वृ॒त्रं सनि॑तो॒त वाजं॒ दाता॑ म॒घानि॑ म॒घवा॑ सु॒राधाः॑ ।।
   हन्ता॒ यो वृ॒त्रं सनि॑तो॒त वाजं
   हन्ता यः वृ॒त्रम् सनि॑ता उ॒त वाज॑म्
   हन्ता यो वृ॒त्रं सनि॑तो॒त वाजं

Halfverse: d    दाता॑ म॒घानि॑ म॒घवा॑ सु॒राधाः॑ ।।
   दाता म॒घानि म॒घवा सु॒राधाः ।।
   दाता म॒घानि म॒घवा सु॒राधाः ।।


Verse: 9 
Halfverse: a    अ॒यं वृत॑श्चातयते समी॒चीर्य आ॒जिषु॑ म॒घवा॑ शृ॒ण्व एकः॑ ।
   अ॒यं वृत॑श्चातयते समी॒चीर्
   अ॒यम् वृतः चातयते समी॒चीः
   अ॒यं वृत॑श् चातयते समी॒चीर्

Halfverse: b    य आ॒जिषु॑ म॒घवा॑ शृ॒ण्व एकः॑ ।
   यः आ॒जिषु म॒घवा शृ॒ण्वे एकः ।
   य आ॒जिषु म॒घवा शृ॒ण्व एकः ।

Halfverse: c    अ॒यं वाज॑म्भरति॒ यं स॒नोत्य॒स्य प्रि॒यासः॑ स॒ख्ये स्या॑म ।।
   अ॒यं वाज॑म्भरति॒ यं स॒नोत्य्
   अ॒यम् वाज॑म् भरति यम् स॒नोति
   अ॒यं वाज॑म् भरति यं स॒नोति

Halfverse: d    अ॒स्य प्रि॒यासः॑ स॒ख्ये स्या॑म ।।
   अ॒स्य प्रि॒यासः स॒ख्ये स्या॑म ।।
   अ॒स्य प्रि॒यासः सखि॒ये सि॑याम ।।


Verse: 10 
Halfverse: a    अ॒यं शृ॑ण्वे॒ अध॒ जय॑न्नु॒त घ्नन्न॒यमु॒त प्र कृ॑णुते यु॒धा गाः ।
   अ॒यं शृ॑ण्वे॒ अध॒ जय॑न्नु॒त घ्नन्न्
   अ॒यम् शृण्वे अध जय॑न् उ॒त घ्नन्
   अ॒यं शृ॑ण्वे अध जय॑न्न् उ॒त घ्नन्न्

Halfverse: b    अ॒यमु॒त प्र कृ॑णुते यु॒धा गाः ।
   अ॒यम् उ॒त प्र कृ॑णुते यु॒धा गाः ।
   अ॒यम् उ॒त प्र कृ॑णुते यु॒धा गाः ।

Halfverse: c    य॒दा स॒त्यं कृ॑णु॒ते म॒न्युमिन्द्रो॒ विश्वं॑ दृ॒ऴम्भ॑यत॒ एज॑दस्मात् ।।
   य॒दा स॒त्यं कृ॑णु॒ते म॒न्युमिन्द्रो
   य॒दा स॒त्यम् कृणु॒ते म॒न्युम् इन्द्रः
   य॒दा स॒त्यं कृ॑णु॒ते म॒न्युम् इन्द्रो

Halfverse: d    विश्वं॑ दृ॒ऴम्भ॑यत॒ एज॑दस्मात् ।।
   विश्व॑म् दृ॒ऴम् भयते एज॑त् अस्मात् ।।
   विश्वं दृ॒ऴम् भयत एज॑द् अस्मात् ।।


Verse: 11 
Halfverse: a    समिन्द्रो॒ गा अ॑जय॒त्सं हिर॑ण्या॒ सम॑श्वि॒या म॒घवा॒ यो ह॑ पू॒र्वीः ।
   समिन्द्रो॒ गा अ॑जय॒त्सं हिर॑ण्या
   सम् इन्द्रः गाः अ॑जयत् सम् हिर॑ण्या
   सम् इन्द्रो गा अ॑जयत् सं हिर॑ण्या

Halfverse: b    सम॑श्वि॒या म॒घवा॒ यो ह॑ पू॒र्वीः ।
   सम् अश्वि॒या म॒घवा यः ह पू॒र्वीः ।
   सम् अश्वि॒या म॒घवा यो ह पू॒र्वीः ।

Halfverse: c    ए॒भिर्नृभि॒र्नृत॑मो अस्य शा॒कै रा॒यो वि॑भ॒क्ता स॑म्भ॒रश्च॒ वस्वः॑ ।।
   ए॒भिर्नृभि॒र्नृत॑मो अस्य शा॒कै
   ए॒भिः नृभिः नृत॑मः अस्य शा॒कैः
   ए॒भिर् नृभि॑र् नृत॑मो अस्य शा॒कै

Halfverse: d    रा॒यो वि॑भ॒क्ता स॑म्भ॒रश्च॒ वस्वः॑ ।।
   रा॒यः वि॑भ॒क्ता स॑म्भ॒रः च वस्वः ।।
   रा॒यो वि॑भ॒क्ता स॑म्भ॒रश् च वस्वः ।।


Verse: 12 
Halfverse: a    किय॑त्स्वि॒दिन्द्रो॒ अध्ये॑ति मा॒तुः किय॑त्पि॒तुर्ज॑नि॒तुर्यो ज॒जान॑ ।
   किय॑त्स्वि॒दिन्द्रो॒ अध्ये॑ति मा॒तुः
   किय॑त् स्वित् इन्द्रः अधि एति मा॒तुः
   किय॑त् स्विद् इन्द्रो अधि एति मा॒तुः

Halfverse: b    किय॑त्पि॒तुर्ज॑नि॒तुर्यो ज॒जान॑ ।
   किय॑त् पि॒तुः ज॑नि॒तुः यः ज॒जान ।
   किय॑त् पि॒तुर् जनि॒तुर् यो ज॒जान ।

Halfverse: c    यो अ॑स्य॒ शुष्म॑म्मुहु॒कैरिय॑र्ति॒ वातो॒ न जू॒त स्त॒नय॑द्भिर॒भ्रैः ।।
   यो अ॑स्य॒ शुष्म॑म्मुहु॒कैरिय॑र्ति
   यः अ॑स्य शुष्म॑म् मुहु॒कैः इय॑र्ति
   यो अ॑स्य शुष्म॑म् मुहु॒कैर् इय॑र्ति

Halfverse: d    वातो॒ न जू॒त स्त॒नय॑द्भिर॒भ्रैः ।।
   वातः न जू॒तः स्त॒नय॑द्भिः अ॒भ्रैः ।।
   वातो न जू॒त स्त॒नय॑द्भिर् अ॒भ्रैः ।।


Verse: 13 
Halfverse: a    क्षि॒यन्तं॑ त्व॒मक्षि॑यन्तं कृणो॒तीय॑र्ति रे॒णुम्म॒घवा॑ स॒मोह॑म् ।
   क्षि॒यन्तं॑ त्व॒मक्षि॑यन्तं कृणोति
   क्षि॒यन्त॑म् त्वम् अक्षि॑यन्तम् कृणोति
   क्षि॒यन्तं त्वम् अक्षि॑यन्तं कृणोति

Halfverse: b     इय॑र्ति रे॒णुम्म॒घवा॑ स॒मोह॑म् ।
   इय॑र्ति रे॒णुम् म॒घवा स॒मोह॑म् ।
   इय॑र्ति रे॒णुम् म॒घवा स॒मोह॑म् ।

Halfverse: c    वि॑भञ्ज॒नुर॒शनि॑माँ इव॒ द्यौरु॒त स्तो॒तार॑म्म॒घवा॒ वसौ॑ धात् ।।
   वि॑भञ्ज॒नुर॒शनि॑माँ इव॒ द्यौर्
   विभञ्ज॒नुः अ॒शनि॑मान् इव द्यौः
   वि॑भञ्ज॒नुर् अ॒शनि॑माँ इव द्यौर्

Halfverse: d    उ॒त स्तो॒तार॑म्म॒घवा॒ वसौ॑ धात् ।।
   उ॒त स्तो॒तार॑म् म॒घवा वसौ धात् ।।
   उ॒त स्तो॒तार॑म् म॒घवा वसौ धात् ।।


Verse: 14 
Halfverse: a    अ॒यं च॒क्रमि॑षण॒त्सूर्य॑स्य॒ न्येत॑शं रीरमत्ससृमा॒णम् ।
   अ॒यं च॒क्रमि॑षण॒त्सूर्य॑स्य
   अ॒यम् च॒क्रम् इषणत् सूर्य॑स्य
   अ॒यं च॒क्रम् इषणत् सूरि॑यस्य

Halfverse: b    न्येत॑शं रीरमत्ससृमा॒णम् ।
   नि एत॑शम् रीरमत् ससृमा॒णम् ।
   नि एत॑शं रीरमत् ससृमा॒णम् ।

Halfverse: c    आ कृ॒ष्ण ईं॑ जुहुरा॒णो जि॑घर्ति त्व॒चो बु॒ध्ने रज॑सो अ॒स्य योनौ॑ ।।
   आ कृ॒ष्ण ईं॑ जुहुरा॒णो जि॑घर्ति
   आ कृ॒ष्णः ई॑म् जुहुरा॒णः जि॑घर्ति
   आ कृ॒ष्ण ईं जुहुरा॒णो जि॑घर्ति

Halfverse: d    त्व॒चो बु॒ध्ने रज॑सो अ॒स्य योनौ॑ ।।
   त्व॒चः बु॒ध्ने रज॑सः अ॒स्य योनौ ।।
   त्व॒चो बु॒ध्ने रज॑सो अ॒स्य योनौ ।।


Verse: 15 
Halfverse: a    असि॑क्न्यां॒ यज॑मानो॒ न होता॑ ।।
   असि॑क्न्यां॒ यज॑मानो॒ न होता॑ ।।
   असि॑क्न्याम् यज॑मानः न होता ।।
   असि॑क्नियां यज॑मानो न होता ।।


Verse: 16 
Halfverse: a    ग॒व्यन्त॒ इन्द्रं॑ स॒ख्याय॒ विप्रा॑ अश्वा॒यन्तो॒ वृष॑णं वा॒जय॑न्तः ।
   ग॒व्यन्त॒ इन्द्रं॑ स॒ख्याय॒ विप्रा
   ग॒व्यन्तः इन्द्र॑म् स॒ख्याय विप्राः
   ग॒व्यन्त इन्द्रं सखि॒याय विप्रा

Halfverse: b    अश्वा॒यन्तो॒ वृष॑णं वा॒जय॑न्तः ।
   अ॑श्वा॒यन्तः वृष॑णम् वा॒जय॑न्तः ।
   अ॑श्वा॒यन्तो वृष॑णं वा॒जय॑न्तः ।

Halfverse: c    ज॑नी॒यन्तो॑ जनि॒दामक्षि॑तोति॒मा च्या॑वयामो ऽव॒ते न कोश॑म् ।।
   ज॑नी॒यन्तो॑ जनि॒दामक्षि॑तोतिम्
   जनी॒यन्तः जनि॒दाम् अक्षि॑तोतिम्
   जनी॒यन्तो जनि॒दाम् अक्षि॑तोतिम्

Halfverse: d    आ च्या॑वयामो ऽव॒ते न कोश॑म् ।।
   आ च्या॑वयामः अव॒ते न कोश॑म् ।।
   आ च्या॑वयामो अव॒ते न कोश॑म् ।।


Verse: 17 
Halfverse: a    त्रा॒ता नो॑ बोधि॒ ददृ॑शान आ॒पिर॑भिख्या॒ता म॑र्डि॒ता सो॒म्याना॑म् ।
   त्रा॒ता नो॑ बोधि॒ ददृ॑शान आ॒पिर्
   त्रा॒ता नः बोधि ददृ॑शानः आ॒पिः
   त्रा॒ता नो बोधि ददृ॑शान आ॒पिर्

Halfverse: b    अभिख्या॒ता म॑र्डि॒ता सो॒म्याना॑म् ।
   अ॑भिख्या॒ता म॑र्डि॒ता सो॒म्याना॑म् ।
   अ॑भिख्या॒ता म॑र्डि॒ता सो॑मि॒याना॑म् ।

Halfverse: c    सखा॑ पि॒ता पि॒तृत॑मः पितॄ॒णां कर्ते॑मुलो॒कमु॑श॒ते व॑यो॒धाः ।।
   सखा॑ पि॒ता पि॒तृत॑मः पितॄ॒णां
   सखा पि॒ता पि॒तृत॑मः पितॄ॒णाम्
   सखा पि॒ता पि॒तृत॑मः पितॄ॒णां

Halfverse: d    कर्ते॑मुलो॒कम् ।!। उ॑श॒ते व॑यो॒धाः ।।
   कर्ता ईम् उलो॒कम् ! उश॒ते व॑यो॒धाः ।।
   कर्ते॑म् उलो॒कम् उश॒ते व॑यो॒धाः ।।


Verse: 18 
Halfverse: a    स॑खीय॒ताम॑वि॒ता बो॑धि॒ सखा॑ गृणा॒न इ॑न्द्र स्तुव॒ते वयो॑ धाः ।
   स॑खीय॒ताम॑वि॒ता बो॑धि॒ सखा
   सखीय॒ताम् अवि॒ता बो॑धि सखा
   सखीय॒ताम् अवि॒ता बो॑धि सखा

Halfverse: b    गृणा॒न इ॑न्द्र स्तुव॒ते वयो॑ धाः ।
   गृ॑णा॒नः इ॑न्द्र स्तुव॒ते वयः धाः ।
   गृ॑णा॒न इ॑न्द्र स्तुव॒ते वयो धाः ।

Halfverse: c    व॒यं ह्या ते॑ चकृ॒मा स॒बाध॑ आ॒भिः शमी॑भिर्म॒हय॑न्त इन्द्र ।।
   व॒यं ह्या ते॑ चकृ॒मा स॒बाध
   व॒यम् हि आ ते चकृ॒म+ स॒बाधः
   व॒यं हि आ ते चकृ॒मा स॒बाध

Halfverse: d    आ॒भिः शमी॑भिर्म॒हय॑न्त इन्द्र ।।
   आ॒भिः शमी॑भिः म॒हय॑न्तः इन्द्र ।।
   आ॒भिः शमी॑भिर् म॒हय॑न्त इन्द्र ।।


Verse: 19 
Halfverse: a    स्तु॒त इन्द्रो॑ म॒घवा॒ यद्ध॑ वृ॒त्रा भूरी॒ण्येको॑ अप्र॒तीनि॑ हन्ति ।
   स्तु॒त इन्द्रो॑ म॒घवा॒ यद्ध॑ वृ॒त्रा
   स्तु॒तः इन्द्रः म॒घवा यत् ह वृ॒त्रा
   स्तु॒त इन्द्रो म॒घवा यद् ध वृ॒त्रा

Halfverse: b    भूरी॒ण्येको॑ अप्र॒तीनि॑ हन्ति ।
   भूरी॑णि एकः अप्र॒तीनि हन्ति ।
   भूरी॑णि एको अप्र॒तीनि हन्ति ।

Halfverse: c    अ॒स्य प्रि॒यो ज॑रि॒ता यस्य॒ शर्म॒न्नकि॑र्दे॒वा वा॒रय॑न्ते॒ न मर्ताः॑ ।।
   अ॒स्य प्रि॒यो ज॑रि॒ता यस्य॒ शर्म॑न्
   अ॒स्य प्रि॒यः ज॑रि॒ता यस्य शर्म॑न्
   अ॒स्य प्रि॒यो ज॑रि॒ता यस्य शर्म॑न्

Halfverse: d    नकि॑र्दे॒वा वा॒रय॑न्ते॒ न मर्ताः॑ ।।
   नकिः दे॒वाः वा॒रय॑न्ते न मर्ताः ।।
   नकि॑र् दे॒वा वा॒रय॑न्ते न मर्ताः ।।


Verse: 20 
Halfverse: a    ए॒वा न॒ इन्द्रो॑ म॒घवा॑ विर॒प्शी कर॑त्स॒त्या च॑र्षणी॒धृद॑न॒र्वा ।
   ए॒वा न॒ इन्द्रो॑ म॒घवा॑ विर॒प्शी
   ए॒व+ नः इन्द्रः म॒घवा विर॒प्शी
   ए॒वा न इन्द्रो म॒घवा विर॒प्शी

Halfverse: b    कर॑त्स॒त्या च॑र्षणी॒धृद॑न॒र्वा ।
   कर॑त् स॒त्या च॑र्षणी॒धृत् अन॒र्वा ।
   कर॑त् स॒त्या च॑र्षणी॒धृद् अन॒र्वा ।

Halfverse: c    त्वं राजा॑ ज॒नुषां॑ धेह्य॒स्मे अधि॒ श्रवो॒ माहि॑नं॒ यज्ज॑रि॒त्रे ।।
   त्वं राजा॑ ज॒नुषां॑ धेह्य॒स्मे
   त्वम् राजा ज॒नुषा॑म् धेहि अ॒स्मे
   तु॒वं राजा ज॒नुषां धेहि अ॒स्मे

Halfverse: d    अधि॒ श्रवो॒ माहि॑नं॒ यज्ज॑रि॒त्रे ।।
   अधि श्रवः माहि॑नम् यत् जरि॒त्रे ।।
   अधि श्रवो माहि॑नं यज् जरि॒त्रे ।।


Verse: 21 
Halfverse: a    नू ष्टु॒त इ॑न्द्र॒ नू गृ॑णा॒न इषं॑ जरि॒त्रे न॒द्यो॒ न पी॑पेः ।
   नू ष्टु॒त इ॑न्द्र॒ नू गृ॑णा॒न
   नु+ स्तु॒तः इ॑न्द्र नु+ गृ॑णा॒नः
   नूउ ष्टु॒त इ॑न्दर नू गृ॑णा॒न

Halfverse: b    इषं॑ जरि॒त्रे न॒द्यो॒ न पी॑पेः ।
   इष॑म् जरि॒त्रे न॒द्यः न पी॑पेः ।
   इषं जरि॒त्रे न॒दियो न पी॑पेः ।

Halfverse: c    अका॑रि ते हरिवो॒ ब्रह्म॒ नव्यं॑ धि॒या स्या॑म र॒थ्यः॑ सदा॒साः ।।
   अका॑रि ते हरिवो॒ ब्रह्म॒ नव्यं
   अका॑रि ते हरिवः ब्रह्म नव्य॑म्
   अका॑रि ते हरिवो ब्रह्म नव्यं

Halfverse: d    धि॒या स्या॑म र॒थ्यः॑ सदा॒साः ।।
   धि॒या स्या॑म र॒थ्यः सदा॒साः ।।
   धि॒या सि॑याम र॒थियः सदा॒साः ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.