TITUS
Rg-Veda: Rg-Veda-Samhita
Part No. 317
Previous part

Hymn: 21_(317) 
Verse: 1 
Halfverse: a    आ या॒त्विन्द्रो ऽव॑स॒ उप॑ न इ॒ह स्तु॒तः स॑ध॒माद॑स्तु॒ शूरः॑ ।
   आ या॒त्विन्द्रो ऽव॑स॒ उप॑ न
   आ या॑तु इन्द्रः अव॑से उप नः
   आ या॑तु इन्द्रो अव॑स उप न

Halfverse: b    इ॒ह स्तु॒तः स॑ध॒माद॑स्तु॒ शूरः॑ ।
   इ॒ह स्तु॒तः स॑ध॒मात् अस्तु शूरः ।
   इ॒ह स्तु॒तः स॑ध॒माद् अस्तु शूरः ।

Halfverse: c    वा॑वृधा॒नस्तवि॑षी॒र्यस्य॑ पू॒र्वीर्द्यौर्न क्ष॒त्रम॒भिभू॑ति॒ पुष्या॑त् ।।
   वा॑वृधा॒नस्तवि॑षी॒र्यस्य॑ पू॒र्वीर्
   वावृधा॒नः तवि॑षीः यस्य पू॒र्वीः
   वा॑वृधा॒नस् तवि॑षीर् यस्य पू॒र्वीर्

Halfverse: d    द्यौर्न क्ष॒त्रम॒भिभू॑ति॒ पुष्या॑त् ।।
   द्यौः न क्ष॒त्रम् अ॒भिभू॑ति पुष्या॑त् ।।
   दि॒यौर् न क्ष॒त्रम् अ॒भिभू॑ति पुष्या॑त् ।।


Verse: 2 
Halfverse: a    तस्येदि॒ह स्त॑वथ॒ वृष्ण्या॑नि तुविद्यु॒म्नस्य॑ तुवि॒राध॑सो॒ नॄन् ।
   तस्येदि॒ह स्त॑वथ॒ वृष्ण्या॑नि
   तस्य इत् इ॒ह स्त॑वथ वृष्ण्या॑नि
   तस्येद् इ॒ह स्त॑वथ वृष्णि॑यानि

Halfverse: b    तुविद्यु॒म्नस्य॑ तुवि॒राध॑सो॒ नॄन् ।
   तु॑विद्यु॒म्नस्य तुवि॒राध॑सः नॄन् ।
   तु॑विद्यु॒म्नस्य तुवि॒राध॑सो नॄन् ।

Halfverse: c    यस्य॒ क्रतु॑र्विद॒थ्यो॒ न स॒म्राट्सा॒ह्वान्तरु॑त्रो अ॒भ्यस्ति॑ कृ॒ष्टीः ।।
   यस्य॒ क्रतु॑र्विद॒थ्यो॒ न स॒म्राट्
   यस्य क्रतुः विद॒थ्यः न स॒म्राट्
   यस्य क्रतु॑र् विद॒थियो न स॒म्राट्

Halfverse: d    सा॒ह्वान्तरु॑त्रो अ॒भ्यस्ति॑ कृ॒ष्टीः ।।
   सा॒ह्वान् तरु॑त्रः अ॒भि अस्ति कृ॒ष्टीः ।।
   सा॒ह्वान् तरु॑त्रो अ॒भि अस्ति कृ॒ष्टीः ।।


Verse: 3 
Halfverse: a    आ या॒त्विन्द्रो॑ दि॒व आ पृ॑थि॒व्या म॒क्षू स॑मु॒द्रादु॒त वा॒ पुरी॑षात् ।
   आ या॒त्विन्द्रो॑ दि॒व आ पृ॑थि॒व्या
   आ या॑तु इन्द्रः दि॒वः आ पृ॑थि॒व्याः
   आ या॑तु इन्द्रो दि॒व आ पृ॑थि॒व्या

Halfverse: b    म॒क्षू स॑मु॒द्रादु॒त वा॒ पुरी॑षात् ।
   म॒क्षु+ स॑मु॒द्रात् उ॒त वा पुरी॑षात् ।
   म॒क्षू स॑मु॒द्राद् उ॒त वा पुरी॑षात् ।

Halfverse: c    स्व॑र्णरा॒दव॑से नो म॒रुत्वा॑न्परा॒वतो॑ वा॒ सद॑नादृ॒तस्य॑ ।।
   स्व॑र्णरा॒दव॑से नो म॒रुत्वा॑न्
   स्व॑र्णरात् अव॑से नः म॒रुत्वा॑न्
   सुव॑र्णराद् अव॑से नो म॒रुत्वा॑न्

Halfverse: d    परा॒वतो॑ वा॒ सद॑नादृ॒तस्य॑ ।।
   प॑रा॒वतः वा सद॑नात् ऋ॒तस्य ।।
   प॑रा॒वतो वा सद॑नाद् ऋ॒तस्य ।।


Verse: 4 
Halfverse: a    स्थू॒रस्य॑ रा॒यो बृ॑ह॒तो य ईशे॒ तमु॑ ष्टवाम वि॒दथे॒ष्विन्द्र॑म् ।
   स्थू॒रस्य॑ रा॒यो बृ॑ह॒तो य ईशे
   स्थू॒रस्य रा॒यः बृ॑ह॒तः यः ईशे
   स्थू॒रस्य रा॒यो बृ॑ह॒तो य ईशे

Halfverse: b    तमु॑ ष्टवाम वि॒दथे॒ष्विन्द्र॑म् ।
   तम् उ स्तवाम वि॒दथे॑षु इन्द्र॑म् ।
   तम् उ ष्टवाम वि॒दथे॑षु इन्द्र॑म् ।

Halfverse: c    यो वा॒युना॒ जय॑ति॒ गोम॑तीषु॒ प्र धृ॑ष्णु॒या नय॑ति॒ वस्यो॒ अछ॑ ।।
   यो वा॒युना॒ जय॑ति॒ गोम॑तीषु
   यः वा॒युना जय॑ति गोम॑तीषु
   यो वा॒युना जय॑ति गोम॑तीषु

Halfverse: d    प्र धृ॑ष्णु॒या नय॑ति॒ वस्यो॒ अछ॑ ।।
   प्र धृ॑ष्णु॒या नय॑ति वस्यः अछ ।।
   प्र धृ॑ष्णु॒या नय॑ति वस्यो अछ ।।


Verse: 5 
Halfverse: a    उप॒ यो नमो॒ नम॑सि स्तभा॒यन्निय॑र्ति॒ वाचं॑ ज॒नय॒न्यज॑ध्यै ।
   उप॒ यो नमो॒ नम॑सि स्तभा॒यन्न्
   उप यः नमः नम॑सि स्तभा॒यन्
   उप यो नमो नम॑सि स्तभा॒यन्न्

Halfverse: b    इय॑र्ति॒ वाचं॑ ज॒नय॒न्यज॑ध्यै ।
   इय॑र्ति वाच॑म् ज॒नय॑न् यज॑ध्यै ।
   इय॑र्ति वाचं ज॒नय॑न् यज॑ध्यै ।

Halfverse: c    ऋ॑ञ्जसा॒नः पु॑रु॒वार॑ उ॒क्थैरेन्द्रं॑ कृण्वीत॒ सद॑नेषु॒ होता॑ ।।
   ऋ॑ञ्जसा॒नः पु॑रु॒वार॑ उ॒क्थैर्
   ऋञ्जसा॒नः पु॑रु॒वारः उ॒क्थैः
   ऋ॑ञ्जसा॒नः ? पु॑रु॒वार उ॒क्थैर्

Halfverse: d    एन्द्रं॑ कृण्वीत॒ सद॑नेषु॒ होता॑ ।।
   आ इन्द्र॑म् कृण्वीत सद॑नेषु होता ।।
   एन्द्रं कृण्वीत सद॑नेषु होता ।।


Verse: 6 
Halfverse: a    धि॒षा यदि॑ धिष॒ण्यन्तः॑ सर॒ण्यान्सद॑न्तो॒ अद्रि॑औशि॒जस्य॒ गोहे॑ ।
   धि॒षा यदि॑ धिष॒ण्यन्तः॑ सर॒ण्यान्
   धि॒षा यदि धिष॒ण्यन्तः सर॒ण्यान्
   धि॒षा यदि धिष॒ण्यन्तः सर॒ण्यान्

Halfverse: b    सद॑न्तो॒ अद्रि॑औशि॒जस्य॒ गोहे॑ ।
   सद॑न्तः अद्रि॑म् औशि॒जस्य गोहे ।
   सद॑न्तो अद्रि॑म् औशि॒जस्य गोहे ।

Halfverse: c    आ दु॒रोषाः॑ पा॒स्त्यस्य॒ होता॒ यो नो॑ म॒हान्सं॒वर॑णेषु॒ वह्निः॑ ।।
   आ दु॒रोषाः॑ पा॒स्त्यस्य॒ होता
   आ दु॒रोषाः पा॒स्त्यस्य होता
   आ दु॒रोषाः ? पास्ति॒यस्य होता

Halfverse: d    यो नो॑ म॒हान्सं॒वर॑णेषु॒ वह्निः॑ ।।
   यः नः म॒हान् सं॒वर॑णेषु वह्निः ।।
   यो नो म॒हान् सं॒वर॑णेषु वह्निः ।।


Verse: 7 
Halfverse: a    स॒त्रा यदी॑म्भार्व॒रस्य॒ वृष्णः॒ सिष॑क्ति॒ शुष्म॑ स्तुव॒ते भरा॑य ।
   स॒त्रा यदी॑म्भार्व॒रस्य॒ वृष्णः
   स॒त्रा यत् ईम् भार्व॒रस्य वृष्णः
   स॒त्रा यद् ईम् ? भार्व॒रस्य वृष्णः

Halfverse: b    सिष॑क्ति॒ शुष्म॑ स्तुव॒ते भरा॑य ।
   सिष॑क्ति शुष्मः स्तुव॒ते भरा॑य ।
   सिष॑क्ति शुष्म स्तुव॒ते भरा॑य ।

Halfverse: c    गुहा॒ यदी॑औशि॒जस्य॒ गोहे॒ प्र यद्धि॒ये प्राय॑से॒ मदा॑य ।।
   गुहा॒ यदी॑औशि॒जस्य॒ गोहे
   गुहा यत् ईम् औशि॒जस्य गोहे
   गुहा यद् ईम् ? औशि॒जस्य गोहे

Halfverse: d    प्र यद्धि॒ये प्राय॑से॒ मदा॑य ।।
   प्र यत् धि॒ये प्र अय॑से मदा॑य ।।
   प्र यद् धि॒ये प्र अय॑से मदा॑य ।।


Verse: 8 
Halfverse: a    वि यद्वराँ॑सि॒ पर्व॑तस्य वृ॒ण्वे पयो॑भिर्जि॒न्वे अ॒पां जवाँ॑सि ।
   वि यद्वराँ॑सि॒ पर्व॑तस्य वृ॒ण्वे
   वि यत् वरां॑सि पर्व॑तस्य वृ॒ण्वे
   वि यद् वरां॑सि पर्व॑तस्य वृ॒ण्वे

Halfverse: b    पयो॑भिर्जि॒न्वे अ॒पां जवाँ॑सि ।
   पयो॑भिः जि॒न्वे अ॒पाम् जवां॑सि ।
   पयो॑भिर् जि॒न्वे अ॒पाअं जवां॑सि ।

Halfverse: c    वि॒दद्गौ॒रस्य॑ गव॒यस्य॒ गोहे॒ यदी॒ वाजा॑य सु॒ध्यो॒ वह॑न्ति ।।
   वि॒दद्गौ॒रस्य॑ गव॒यस्य॒ गोहे
   वि॒दत् गौ॒रस्य गव॒यस्य गोहे
   वि॒दद् गौ॒रस्य गव॒यस्य गोहे

Halfverse: d    यदी॒ वाजा॑य सु॒ध्यो॒ वह॑न्ति ।।
   यदि+ वाजा॑य सु॒ध्यः वह॑न्ति ।।
   यदी वाजा॑य सु॒धियो वह॑न्ति ।।


Verse: 9 
Halfverse: a    भ॒द्रा ते॒ हस्ता॒ सुकृ॑तो॒त पा॒णी प्र॑य॒न्तारा॑ स्तुव॒ते राध॑ इन्द्र ।
   भ॒द्रा ते॒ हस्ता॒ सुकृ॑तो॒त पा॒णी
   भ॒द्रा ते हस्ता सुकृ॑ता उ॒त पा॒णी
   भ॒द्रा ते हस्ता सुकृ॑तो॒त पा॒णी

Halfverse: b    प्र॑य॒न्तारा॑ स्तुव॒ते राध॑ इन्द्र ।
   प्र॑य॒न्तारा स्तुव॒ते राधः इन्द्र ।
   प्र॑य॒न्तारा स्तुव॒ते राध इन्द्र ।

Halfverse: c    का ते॒ निष॑त्तिः॒ किमु॒ नो म॑मत्सि॒ किं नोद्॑ुदु हर्षसे॒ दात॒वा उ॑ ।।
   का ते॒ निष॑त्तिः॒ किमु॒ नो म॑मत्सि
   का ते निष॑त्तिः किम् उ न उ ममत्सि
   का ते निष॑त्तिः किम् उ नो म॑मत्सि

Halfverse: d    किं नोद्॑ुदु हर्षसे॒ दात॒वा उ॑ ।।
   किम् न उद्॑ुत् उ हर्षसे दात॒वै उ ।।
   किं नोद्॑ुद् उ हर्षसे दात॒वा उ ।।


Verse: 10 
Halfverse: a    ए॒वा वस्व॒ इन्द्रः॑ स॒त्यः स॒म्राड्ढन्ता॑ वृ॒त्रं वरि॑वः पू॒रवे॑ कः ।
   ए॒वा वस्व॒ इन्द्रः॑ स॒त्यः स॒म्राड्
   ए॒व+ वस्वः इन्द्रः स॒त्यः स॒म्राट्
   ए॒वा वस्व इन्द॑रः स॒त्यः स॒म्राड्

Halfverse: b    ढन्ता॑ वृ॒त्रं वरि॑वः पू॒रवे॑ कः ।
   हन्ता वृ॒त्रम् वरि॑वः पू॒रवे कर् ।
   ढन्ता वृ॒त्रं वरि॑वः पू॒रवे कः ।

Halfverse: c    पुरु॑ष्टुत॒ क्रत्वा॑ नः शग्धि रा॒यो भ॑क्षी॒य ते ऽव॑सो॒ दैव्य॑स्य ।।
   पुरु॑ष्टुत॒ क्रत्वा॑ नः शग्धि रा॒यो
   पुरु॑ष्टुत क्रत्वा नः शग्धि रा॒यः
   पुरु॑ष्टुत क्रत्वा नः शग्धि रा॒यो

Halfverse: d    भ॑क्षी॒य ते ऽव॑सो॒ दैव्य॑स्य ।।
   भ॑क्षी॒य ते अव॑सः दैव्य॑स्य ।।
   भ॑क्षी॒य ते अव॑सो दैवि॑यस्य ।।


Verse: 11 
Halfverse: a    नू ष्टु॒त इ॑न्द्र॒ नू गृ॑णा॒न इषं॑ जरि॒त्रे न॒द्यो॒ न पी॑पेः ।
   नू ष्टु॒त इ॑न्द्र॒ नू गृ॑णा॒न
   नु+ स्तु॒तः इ॑न्द्र नु+ गृ॑णा॒नः
   नूउ ष्टु॒त इ॑न्दर नू गृ॑णा॒न

Halfverse: b    इषं॑ जरि॒त्रे न॒द्यो॒ न पी॑पेः ।
   इष॑म् जरि॒त्रे न॒द्यः न पी॑पेः ।
   इषं जरि॒त्रे न॒दियो न पी॑पेः ।

Halfverse: c    अका॑रि ते हरिवो॒ ब्रह्म॒ नव्यं॑ धि॒या स्या॑म र॒थ्यः॑ सदा॒साः ।।
   अका॑रि ते हरिवो॒ ब्रह्म॒ नव्यं
   अका॑रि ते हरिवः ब्रह्म नव्य॑म्
   अका॑रि ते हरिवो ब्रह्म नव्यं

Halfverse: d    धि॒या स्या॑म र॒थ्यः॑ सदा॒साः ।।
   धि॒या स्या॑म र॒थ्यः सदा॒साः ।।
   धि॒या सि॑याम र॒थियः सदा॒साः ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.