TITUS
Rg-Veda: Rg-Veda-Samhita
Part No. 399
Previous part

Hymn: 45_(399) 
Verse: 1 
Halfverse: a    वि॒दा दि॒वो वि॒ष्यन्नद्रि॑मु॒क्थैरा॑य॒त्या उ॒षसो॑ अ॒र्चिनो॑ गुः ।
   वि॒दा दि॒वो वि॒ष्यन्नद्रि॑मु॒क्थैर्
   वि॒दाः दि॒वः वि॒ष्यन् अद्रि॑म् उ॒क्थैः
   वि॒दा दि॒वो वि॑षि॒यन्न् अद्रि॑म् उ॒क्थैर्

Halfverse: b    आय॒त्या उ॒षसो॑ अ॒र्चिनो॑ गुः ।
   आ॑य॒त्याः उ॒षसः अ॒र्चिनः गुः ।
   आ॑यति॒या उ॒षसो अ॒र्चिनो गुः ।

Halfverse: c    अपा॑वृत व्र॒जिनी॒रुत्स्व॑र्गा॒द्वि दुरो॒ मानु॑षीर्दे॒व आ॑वः ।।
   अपा॑वृत व्र॒जिनी॒रुत्स्व॑र्गाद्
   अप अवृत व्र॒जिनीः उत् स्व॑र् गात्
   अपा॑वृत व्र॒जिनी॑र् उत् सुव॑र् गाद्

Halfverse: d    वि दुरो॒ मानु॑षीर्दे॒व आ॑वः ।।
   वि दुरः मानु॑षीः दे॒वः आ॑वर् ।।
   वि दुरो ? मानु॑षीर् दे॒व आ॑वः ।।


Verse: 2 
Halfverse: a    वि सूर्यो॑ अ॒मतिं॒ न श्रियं॑ सा॒दोर्वाद्गवा॑म्मा॒ता जा॑न॒ती गा॑त् ।
   वि सूर्यो॑ अ॒मतिं॒ न श्रियं॑ साद्
   वि सूर्यः अ॒मति॑म् न श्रिय॑म् सात्
   वि सूरि॑यो अ॒मतिं न श्रियं साद्

Halfverse: b    ओर्वाद्गवा॑म्मा॒ता जा॑न॒ती गा॑त् ।
   आ ऊ॒र्वात् गवा॑म् मा॒ता जा॑न॒ती गा॑त् ।
   आ ऊ॒र्वाद् गवा॑म् मा॒ता जा॑न॒ती गा॑त् ।

Halfverse: c    धन्व॑र्णसो न॒द्यः॒ खादोअ॑र्णा॒ स्थूणे॑व॒ सुमि॑ता दृँहत॒ द्यौः ।।
   धन्व॑र्णसो न॒द्यः॒ खादोअ॑र्णा
   धन्व॑र्णसः न॒द्यः खादोअ॑र्णाः
   धन्व॑र्णसो न॒दियः खादोअ॑र्णाः

Halfverse: d    स्थूणे॑व॒ सुमि॑ता दृँहत॒ द्यौः ।।
   स्थूणा इव सुमि॑ता दृंहत द्यौः ।।
   स्थूणा इव सुमि॑ता दृंहत द्यौः ।।


Verse: 3 
Halfverse: a    अ॒स्मा उ॒क्थाय॒ पर्व॑तस्य॒ गर्भो॑ म॒हीनां॑ ज॒नुषे॑ पू॒र्व्याय॑ ।
   अ॒स्मा उ॒क्थाय॒ पर्व॑तस्य॒ गर्भो
   अ॒स्मै उ॒क्थाय पर्व॑तस्य गर्भः
   अ॒स्मा उ॒क्थाय पर्व॑तस्य गर्भो

Halfverse: b    म॒हीनां॑ ज॒नुषे॑ पू॒र्व्याय॑ ।
   म॒हीना॑म् ज॒नुषे पू॒र्व्याय ।
   म॒हीनाअं ज॒नुषे पूर्वि॒याय ।

Halfverse: c    वि पर्व॑तो॒ जिही॑त॒ साध॑त॒ द्यौरा॒विवा॑सन्तो दसयन्त॒ भूम॑ ।।
   वि पर्व॑तो॒ जिही॑त॒ साध॑त॒ द्यौर्
   वि पर्व॑तः जिही॑त साध॑त द्यौः
   वि पर्व॑तो जिही॑त साध॑त द्यौर्

Halfverse: d    आ॒विवा॑सन्तो दसयन्त॒ भूम॑ ।।
   आ॒विवा॑सन्तः दसयन्त भूम ।।
   आ॒विवा॑सन्तो दसयन्त भूम ।।


Verse: 4 
Halfverse: a    सू॒क्तेभि॑र्वो॒ वचो॑भिर्दे॒वजु॑ष्टै॒रिन्द्रा॒ न्व॒ग्नी अव॑से हु॒वध्यै॑ ।
   सू॒क्तेभि॑र्वो॒ वचो॑भिर्दे॒वजु॑ष्टैर्
   सू॒क्तेभिः वः वचो॑भिः दे॒वजु॑ष्टैः
   सू॒क्तेभि॑र् वो वचो॑भिर् दे॒वजु॑ष्टैर्

Halfverse: b    इन्द्रा॒ न्व॒ग्नी अव॑से हु॒वध्यै॑ ।
   इन्द्रा नु अ॒ग्नी अव॑से हु॒वध्यै ।
   इन्द्रा नु अ॒ग्नी अव॑से हु॒वध्यै ।

Halfverse: c    उ॒क्थेभि॒र्हि ष्मा॑ क॒वयः॑ सुय॒ज्ञा आ॒विवा॑सन्तो म॒रुतो॒ यज॑न्ति ।।
   उ॒क्थेभि॒र्हि ष्मा॑ क॒वयः॑ सुय॒ज्ञा
   उ॒क्थेभिः हि स्म+ क॒वयः सुय॒ज्ञाः
   उ॒क्थेभि॑र् हि ष्मा क॒वयः सुय॒ज्ञा

Halfverse: d    आ॒विवा॑सन्तो म॒रुतो॒ यज॑न्ति ।।
   आ॒विवा॑सन्तः म॒रुतः यज॑न्ति ।।
   आ॒विवा॑सन्तो म॒रुतो यज॑न्ति ।।


Verse: 5 
Halfverse: a    एतो॒ न्व॒द्य सु॒ध्यो॒ भवा॑म॒ प्र दु॒छुना॑ मिनवामा॒ वरी॑यः ।
   एतो॒ न्व॒द्य सु॒ध्यो॒ भवा॑म
   आ इ॑त उ नु अ॒द्य सु॒ध्यः भवा॑म
   एतो नु अ॒द्य सु॒धियो भवा॑म

Halfverse: b    प्र दु॒छुना॑ मिनवामा॒ वरी॑यः ।
   प्र दु॒छुना॑म् ! इनवाम+ ! वरी॑यः ।
   प्र दु॒छुना मिनवामा वरी॑यः ।

Halfverse: c    आ॒रे द्वेषाँ॑सि सनु॒तर्द॑धा॒माया॑म॒ प्राञ्चो॒ यज॑मान॒मछ॑ ।।
   आ॒रे द्वेषाँ॑सि सनु॒तर्द॑धाम
   आ॒रे द्वेषां॑सि सनु॒तर् दधाम
   आ॒रे द्वेषां॑सि सनु॒तर् दधाम

Halfverse: d     अया॑म॒ प्राञ्चो॒ यज॑मान॒मछ॑ ।।
   अया॑म प्राञ्चः यज॑मानम् अछ ।।
   अया॑म प्राञ्चो यज॑मानम् अछ ।।


Verse: 6 
Halfverse: a    एता॒ धियं॑ कृ॒णवा॑मा सखा॒यो ऽप॒ या मा॒ताँ ऋ॑णु॒त व्र॒जं गोः ।
   एता॒ धियं॑ कृ॒णवा॑मा ।!। स॑खा॒यो
   आ इ॑त+ धिय॑म् कृ॒णवा॑म+ सखायः
   एता धियं कृ॒णवा॑मा सखायो

Halfverse: b    ऽप॒ या मा॒ताँ ऋ॑णु॒त व्र॒जं गोः ।
   अप या मा॒ता ऋ॑णु॒त व्र॒जम् गोः ।
   अप या मा॒ताँ ऋ॑णु॒त व्र॒जं गोः ।

Halfverse: c    यया॒ मनु॑र्विशिशि॒प्रं जि॒गाय॒ यया॑ व॒णिग्व॒ङ्कुरापा॒ पुरी॑षम् ।।
   यया॒ मनु॑र्विशिशि॒प्रं जि॒गाय
   यया मनुः विशिशि॒प्रम् जि॒गाय
   यया मनु॑र् विशिशि॒प्रं जि॒गाय

Halfverse: d    यया॑ व॒णिग्व॒ङ्कुरापा॒ पुरी॑षम् ।।
   यया व॒णिक् व॒ङ्कुः आप+ पुरी॑षम् ।।
   यया व॒णिग् व॒ङ्कुर् आपा पुरी॑षम् ।।


Verse: 7 
Halfverse: a    अनू॑नो॒दत्र॒ हस्त॑यतो॒ अद्रि॒रार्च॒न्येन॒ दश॑ मा॒सो नव॑ग्वाः ।
   अनू॑नो॒दत्र॒ हस्त॑यतो॒ अद्रि॑र्
   अनू॑नोत् अत्र हस्त॑यतः अद्रिः
   अनू॑नोद् अत्र हस्त॑यतो अद्रि॑र्

Halfverse: b    आर्च॒न्येन॒ दश॑ मा॒सो नव॑ग्वाः ।
   आर्च॑न् येन दश मा॒सः नव॑ग्वाः ।
   आर्च॑न् येन दश मा॒सो नव॑ग्वाः ।

Halfverse: c    ऋ॒तं य॒ती स॒रमा॒ गा अ॑विन्द॒द्विश्वा॑नि स॒त्याङ्गि॑राश्चकार ।।
   ऋ॒तं य॒ती स॒रमा॒ गा अ॑विन्दद्
   ऋ॒तम् य॒ती स॒रमा गाः अ॑विन्दत्
   ऋ॒तं य॒ती स॒रमा गा अ॑विन्दद्

Halfverse: d    विश्वा॑नि स॒त्याङ्गि॑राश्चकार ।।
   विश्वा॑नि स॒त्या अङ्गि॑राः चकार ।।
   विश्वा॑नि स॒त्या अङ्गि॑राश् चकार ।।


Verse: 8 
Halfverse: a    विश्वे॑ अ॒स्या व्युषि॒ माहि॑नायाः॒ सं यद्गोभि॒रङ्गि॑रसो॒ नव॑न्त ।
   विश्वे॑ अ॒स्या व्युषि॒ माहि॑नायाः
   विश्वे अ॒स्याः व्युषि माहि॑नायाः
   विश्वे अ॒स्या विउषि माहि॑नायाः

Halfverse: b    सं यद्गोभि॒रङ्गि॑रसो॒ नव॑न्त ।
   सम् यत् गोभिः अङ्गि॑रसः नव॑न्त ।
   सं यद् गोभि॑र् अङ्गि॑रसो नव॑न्त ।

Halfverse: c    उत्स॑ आसाम्पर॒मे स॒धस्थ॑ ऋ॒तस्य॑ प॒था स॒रमा॑ विद॒द्गाः ।।
   उत्स॑ आसाम्पर॒मे स॒धस्थ
   उत्सः आसाम् पर॒मे स॒धस्थे
   उत्स आसाअम् पर॒मे स॒धस्थ

Halfverse: d    ऋ॒तस्य॑ प॒था स॒रमा॑ विद॒द्गाः ।।
   ऋ॒तस्य प॒था स॒रमा विदत् गाः ।।
   ऋ॒तस्य प॒था स॒रमा विदद् गाः ।।


Verse: 9 
Halfverse: a    आ सूर्यो॑ यातु स॒प्ताश्वः॒ क्षेत्रं॒ यद॑स्योर्वि॒या दी॑र्घया॒थे ।
   आ सूर्यो॑ यातु स॒प्ताश्वः
   आ सूर्यः यातु स॒प्ताश्वः
   आ सूरि॑यो याअतु स॒प्ताअश्वः

Halfverse: b    क्षेत्रं॒ यद॑स्योर्वि॒या दी॑र्घया॒थे ।
   क्षेत्र॑म् यत् अस्य उर्वि॒या दी॑र्घया॒थे ।
   क्षेत्रं यद् अस्योर्वि॒या दी॑र्घया॒थे ।

Halfverse: c    र॒घुः श्ये॒नः प॑तय॒दन्धो॒ अछा॒ युवा॑ क॒विर्दी॑दय॒द्गोषु॒ गछ॑न् ।।
   र॒घुः श्ये॒नः प॑तय॒दन्धो॒ अछा
   र॒घुः श्ये॒नः प॑तयत् अन्धः अछ+
   र॒घुः श्ये॒नः प॑तयद् अन्धो अछा

Halfverse: d    युवा॑ क॒विर्दी॑दय॒द्गोषु॒ गछ॑न् ।।
   युवा क॒विः दी॑दयत् गोषु गछ॑न् ।।
   युवा क॒विर् दीदयद् गोषु गछ॑न् ।।


Verse: 10 
Halfverse: a    आ सूर्यो॑ अरुहच्छु॒क्रमर्णो ऽयु॑क्त॒ यद्ध॒रितो॑ वी॒तपृ॑ष्ठाः ।
   आ सूर्यो॑ अरुहच्छु॒क्रमर्णो
   आ सूर्यः अरुहत् शु॒क्रम् अर्णः
   आ सूरि॑यो अरुहच् छु॒क्रम् अर्णो

Halfverse: b    ऽयुक्त॒ यद्ध॒रितो॑ वी॒तपृ॑ष्ठाः ।
   अयु॑क्त यत् ह॒रितः वी॒तपृ॑ष्ठाः ।
   अयु॑क्त यद् ध॒रितो वी॒तपृ॑ष्ठाः ।

Halfverse: c    उ॒द्ना न नाव॑मनयन्त॒ धीरा॑ आशृण्व॒तीरापो॑ अ॒र्वाग॑तिष्ठन् ।।
   उ॒द्ना न नाव॑मनयन्त॒ धीरा
   उ॒द्ना न नाव॑म् अनयन्त धीराः
   उ॒द्ना न नाव॑म् अनयन्त धीरा

Halfverse: d    आशृण्व॒तीरापो॑ अ॒र्वाग॑तिष्ठन् ।।
   आ॑शृण्व॒तीः आपः अ॒र्वाक् अतिष्ठन् ।।
   आ॑शृण्व॒तीर् आपो अ॒र्वाग् अतिष्ठन् ।।


Verse: 11 
Halfverse: a    धियं॑ वो अ॒प्सु द॑धिषे स्व॒र्षां ययात॑र॒न्दश॑ मा॒सो नव॑ग्वाः ।
   धियं॑ वो अ॒प्सु द॑धिषे स्व॒र्षां
   धिय॑म् वः अ॒प्सु द॑धिषे स्व॒र्षाम्
   धियं वो अ॒प्सु द॑धिषे सुव॒र्षां

Halfverse: b    ययात॑र॒न्दश॑ मा॒सो नव॑ग्वाः ।
   यया अत॑रन् दश मा॒सः नव॑ग्वाः ।
   ययात॑रन् दश मा॒सो नव॑ग्वाः ।

Halfverse: c    अ॒या धि॒या स्या॑म दे॒वगो॑पा अ॒या धि॒या तु॑तुर्या॒मात्यँहः॑ ।।
   अ॒या धि॒या स्या॑म दे॒वगो॑पा
   अ॒या धि॒या स्या॑म दे॒वगो॑पाः
   अ॒या धि॒या सि॑याम दे॒वगो॑पा

Halfverse: d    अ॒या धि॒या तु॑तुर्या॒मात्यँहः॑ ।।
   अ॒या धि॒या तु॑तुर्याम अति अंहः ।।
   अ॒या धि॒या तु॑तुर्या॒माति अंहः ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.