TITUS
Rg-Veda: Rg-Veda-Samhita
Part No. 402
Previous part

Hymn: 48_(402) 
Verse: 1 
Halfverse: a    कदु॑ प्रि॒याय॒ धाम्ने॑ मनामहे॒ स्वक्ष॑त्राय॒ स्वय॑शसे म॒हे व॒यम् ।
   कदु॑ प्रि॒याय॒ धाम्ने॑ मनामहे
   कत् उ प्रि॒याय धाम्ने मनामहे
   कद् उ प्रि॒याय धाम॑ने मनामहे

Halfverse: b    स्वक्ष॑त्राय॒ स्वय॑शसे म॒हे व॒यम् ।
   स्वक्ष॑त्राय स्वय॑शसे म॒हे व॒यम् ।
   स्वक्ष॑त्राय स्वय॑शसे म॒हे व॒यम् ।

Halfverse: c    आ॑मे॒न्यस्य॒ रज॑सो॒ यद॒भ्र आँ अ॒पो वृ॑णा॒ना वि॑त॒नोति॑ मा॒यिनी॑ ।।
   आ॑मे॒न्यस्य॒ रज॑सो॒ यद॒भ्र आँ
   आ॑मे॒न्यस्य रज॑सः यत् अ॒भ्रे आ
   आ॑मेनि॒यस्य रज॑सो यद् अ॒भ्र आँ

Halfverse: d    अ॒पो वृ॑णा॒ना वि॑त॒नोति॑ मा॒यिनी॑ ।।
   अ॒पः वृ॑णा॒ना वि॑त॒नोति मा॒यिनी ।।
   अ॒पो वृ॑णा॒ना वि॑त॒नोति मा॒यिनी ।।


Verse: 2 
Halfverse: a    ता अ॑त्नत व॒युनं॑ वी॒रव॑क्षणं समा॒न्या वृ॒तया॒ विश्व॒मा रजः॑ ।
   ता अ॑त्नत व॒युनं॑ वी॒रव॑क्षणं
   ताः अ॑त्नत व॒युन॑म् वी॒रव॑क्षणम्
   ता अ॑त्नत व॒युनं वी॒रव॑क्षणं

Halfverse: b    समा॒न्या वृ॒तया॒ विश्व॒मा रजः॑ ।
   स॑मा॒न्या वृ॒तया विश्व॑म् आ रजः ।
   स॑मानि॒या वृ॒तया विश्व॑म् आ रजः ।

Halfverse: c    अपो॒ अपा॑ची॒रप॑रा॒ अपे॑जते॒ प्र पूर्वा॑भिस्तिरते देव॒युर्जनः॑ ।।
   अपो॒ अपा॑ची॒रप॑रा॒ अपे॑जते
   अप उ अपा॑चीः अप॑राः अप ईजते
   अपो अपा॑चीर् अप॑रा अपे॑जते

Halfverse: d    प्र पूर्वा॑भिस्तिरते देव॒युर्जनः॑ ।।
   प्र पूर्वा॑भिः तिरते देव॒युः जनः ।।
   प्र पूर्वा॑भिस् तिरते देव॒युर् जनः ।।


Verse: 3 
Halfverse: a    आ ग्राव॑भिरह॒न्ये॑भिर॒क्तुभि॒र्वरि॑ष्ठं॒ वज्र॒मा जि॑घर्ति मा॒यिनि॑ ।
   आ ग्राव॑भिरह॒न्ये॑भिर॒क्तुभि॑र्
   आ ग्राव॑भिः अह॒न्ये॑भिः अ॒क्तुभिः
   आ ग्राव॑भिर् अह॒निये॑भिर् अ॒क्तुभि॑र्

Halfverse: b    वरि॑ष्ठं॒ वज्र॒मा जि॑घर्ति मा॒यिनि॑ ।
   वरि॑ष्ठम् वज्र॑म् आ जि॑घर्ति मा॒यिनि ।
   वरि॑ष्ठं वज्र॑म् आ जि॑घर्ति मा॒यिनि ।

Halfverse: c    श॒तं वा॒ यस्य॑ प्र॒चर॒न्स्वे दमे॑ संव॒र्तय॑न्तो॒ वि च॑ वर्तय॒न्नहा॑ ।।
   श॒तं वा॒ यस्य॑ प्र॒चर॒न्स्वे दमे
   श॒तम् वा यस्य प्र॒चर॑न् स्वे दमे
   श॒तं वा यस्य प्र॒चर॑न् सु॒वे दमे

Halfverse: d    संव॒र्तय॑न्तो॒ वि च॑ वर्तय॒न्नहा॑ ।।
   सं॑व॒र्तय॑न्तः वि च वर्तयन् अहा ।।
   सं॑व॒र्तय॑न्तो वि च वर्तयन्न् अहा ।।


Verse: 4 
Halfverse: a    ताम॑स्य री॒तिम्प॑र॒शोरि॑व॒ प्रत्यनी॑कमख्यम्भु॒जे अ॑स्य॒ वर्प॑सः ।
   ताम॑स्य री॒तिम्प॑र॒शोरि॑व॒ प्रत्य्
   ताम् अस्य री॒तिम् पर॒शोः इ॑व प्रति
   ताम् अस्य री॒तिम् पर॒शोर् इव प्रति

Halfverse: b    अनी॑कमख्यम्भु॒जे अ॑स्य॒ वर्प॑सः ।
   अनी॑कम् अख्यम् भु॒जे अ॑स्य वर्प॑सः ।
   अनी॑कम् अख्यम् भु॒जे अ॑स्य वर्प॑सः ।

Halfverse: c    सचा॒ यदि॑ पितु॒मन्त॑मिव॒ क्षयं॒ रत्नं॒ दधा॑ति॒ भर॑हूतये वि॒शे ।।
   सचा॒ यदि॑ पितु॒मन्त॑मिव॒ क्षयं
   सचा यदि पितु॒मन्त॑म् इव क्षय॑म्
   सचा यदि पितु॒मन्त॑म् इव क्षयं

Halfverse: d    रत्नं॒ दधा॑ति॒ भर॑हूतये वि॒शे ।।
   रत्न॑म् दधा॑ति भर॑हूतये वि॒शे ।।
   रत्नं दधा॑ति भर॑हूतये वि॒शे ।।


Verse: 5 
Halfverse: a    स जि॒ह्वया॒ चतु॑रनीक ऋञ्जते॒ चारु॒ वसा॑नो॒ वरु॑णो॒ यत॑न्न॒रिम् ।
   स जि॒ह्वया॒ चतु॑रनीक ऋञ्जते
   स जि॒ह्वया चतु॑रनीकः ऋञ्जते
   स जि॒ह्वया चतु॑रनीक ऋञ्जते

Halfverse: b    चारु॒ वसा॑नो॒ वरु॑णो॒ यत॑न्न॒रिम् ।
   चारु वसा॑नः वरु॑णः यत॑न् अ॒रिम् ।
   चारु वसा॑नो वरु॑णो यत॑न्न् अ॒रिम् ।

Halfverse: c    न तस्य॑ विद्म पुरुष॒त्वता॑ व॒यं यतो॒ भगः॑ सवि॒ता दाति॒ वार्य॑म् ।।
   न तस्य॑ विद्म पुरुष॒त्वता॑ व॒यं
   न तस्य विद्म पुरुष॒त्वता व॒यम्
   न तस्य विद्म पुरुष॒त्वता व॒यं

Halfverse: d    यतो॒ भगः॑ सवि॒ता दाति॒ वार्य॑म् ।।
   यतः भगः सवि॒ता दाति वार्य॑म् ।।
   यतो भगः सवि॒ता दाति वारि॑यम् ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.