TITUS Texts: Rg-Veda: Rg-Veda-Samhita

TITUS
Rg-Veda: Rg-Veda-Samhita
Part No. 404

Hymn: 50_(404)
Verse: 1
Halfverse: a    विश्वो॑ दे॒वस्य॑ ने॒तुर्मर्तो॑ वुरीत स॒ख्यम् ।
   विश्वो॑ दे॒वस्य॑ ने॒तुर्
   विश्वः दे॒वस्य ने॒तुः
   विश्वो दे॒वस्य नयि॒तुर्

Halfverse: b    मर्तो॑ वुरीत स॒ख्यम् ।
   मर्तः वुरीत स॒ख्यम् ।
   मर्तो वुरीत सखि॒यम् ।

Halfverse: c    विश्वो॑ रा॒य इ॑षुध्यति द्यु॒म्नं वृ॑णीत पु॒ष्यसे॑ ।।
   विश्वो॑ रा॒य इ॑षुध्यति
   विश्वः रा॒ये इ॑षुध्यति
   विश्वो रा॒य इ॑षुध्यति

Halfverse: d    द्यु॒म्नं वृ॑णीत पु॒ष्यसे॑ ।।
   द्यु॒म्नम् वृणीत पु॒ष्यसे ।।
   द्यु॒म्नं वृ॑णीत पु॒ष्यसे ।।

Verse: 2
Halfverse: a    ते ते॑ देव नेत॒र्ये चे॒माँ अ॑नु॒शसे॑ ।
   ते ते॑ देव नेतर्
   ते ते देव नेतर्
   ते ते देव नयितर्

Halfverse: b    ये चे॒माँ अ॑नु॒शसे॑ ।
   ये च इ॒मान् अनु॒शसे ।
   ये च इ॒माँ अ॑नु॒शसे ।

Halfverse: c    ते रा॒या ते ह्या॒पृचे॒ सचे॑महि सच॒थ्यैः॑ ।।
   ते रा॒या ते ह्या॒पृचे
   ते रा॒या ते हि आ॒पृचे
   ते रा॒या ते हि आ॒पृचे

Halfverse: d    सचे॑महि सच॒थ्यैः॑ ।।
   सचे॑महि सच॒थ्यैः ।।
   सचे॑महि सच॒थियैः ।।

Verse: 3
Halfverse: a    अतो॑ न॒ आ नॄनति॑थी॒नतः॒ पत्नी॑र्दशस्यत ।
   अतो॑ न॒ आ नॄनति॑थीन्
   अतः नः आ नॄन् अति॑थीन्
   अतो न आ नॄन् अति॑थीन्

Halfverse: b    अतः॒ पत्नी॑र्दशस्यत ।
   अतः पत्नीः दशस्यत ।
   अतः पत्नी॑र् दशस्यत ।

Halfverse: c    आ॒रे विश्व॑म्पथे॒ष्ठां द्वि॒षो यु॑योतु॒ यूयु॑विः ।।
   आ॒रे विश्व॑म्पथे॒ष्ठां
   आ॒रे विश्व॑म् पथे॒ष्ठाम्
   आ॒रे विश्व॑म् पथे॒ष्ठाअं

Halfverse: d    द्वि॒षो यु॑योतु॒ यूयु॑विः ।।
   द्वि॒षः यु॑योतु यूयु॑विः ।।
   द्वि॒षो यु॑योतु यूयु॑विः ।।

Verse: 4
Halfverse: a    यत्र॒ वह्नि॑र॒भिहि॑तो दु॒द्रव॒द्द्रोण्यः॑ प॒शुः ।
   यत्र॒ वह्नि॑र॒भिहि॑तो
   यत्र वह्निः अ॒भिहि॑तः
   यत्र वह्नि॑र् अ॒भिहि॑तो

Halfverse: b    दु॒द्रव॒द्द्रोण्यः॑ प॒शुः ।
   दु॒द्रव॑त् द्रोण्यः प॒शुः ।
   दु॒द्रव॑द् द्रोणि॑यः प॒शुः ।

Halfverse: c    नृ॒मणा॑ वी॒रप॒स्त्यो ऽर्णा॒ धीरे॑व॒ सनि॑ता ।।
   नृ॒मणा॑ वी॒रप॒स्त्यो
   नृ॒मणाः वी॒रप॑स्त्यः
   नृ॒मणा वी॒रप॑स्तियो

Halfverse: d    ऽर्णा॒ धीरे॑व॒ सनि॑ता ।।
   अर्णा धीरा इव सनि॑ता ।।
   अर्णा धीरे॑व सनि॑ता ।।

Verse: 5
Halfverse: a    ए॒ष ते॑ देव नेता॒ रथ॒स्पतिः॒ शं र॒यिः ।
   ए॒ष ते॑ देव नेता
   ए॒ष ते देव नेतर्
   ए॒ष ते देव नयिता

Halfverse: b    रथ॒स्पतिः॒ शं र॒यिः ।
   रथ॒स्पतिः शम् र॒यिः ।
   रथ॒स्पतिः शं र॒यिः ।

Halfverse: c    शं रा॒ये शं स्व॒स्तय॑ इष॒स्तुतो॑ मनामहे देव॒स्तुतो॑ मनामहे ।।
   शं रा॒ये शं स्व॒स्तय
   शम् रा॒ये शम् स्व॒स्तये
   शं रा॒ये शं सुअ॒स्तय

Halfverse: d    इष॒स्तुतो॑ मनामहे
   इष॒स्तुतः मनामहे
   इष॒स्तुतो मनामहे

Halfverse: e    देव॒स्तुतो॑ मनामहे ।।
   दे॑व॒स्तुतः मनामहे ।।
   दे॑व॒स्तुतो मनामहे ।।

This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.