TITUS
Rg-Veda: Rg-Veda-Samhita
Part No. 409
Previous part

Hymn: 55_(409) 
Verse: 1 
Halfverse: a    प्रय॑ज्यवो म॒रुतो॒ भ्राज॑दृष्टयो बृ॒हद्वयो॑ दधिरे रु॒क्मव॑क्षसः ।
   प्रय॑ज्यवो म॒रुतो॒ भ्राज॑दृष्टयो
   प्रय॑ज्यवः म॒रुतः भ्राज॑दृष्टयः
   प्रय॑ज्यवो म॒रुतो भ्राज॑दृष्टयो

Halfverse: b    बृ॒हद्वयो॑ दधिरे रु॒क्मव॑क्षसः ।
   बृ॒हत् वयः दधिरे रु॒क्मव॑क्षसः ।
   बृ॒हद् वयो दधिरे रु॒क्मव॑क्षसः ।

Halfverse: c    ईय॑न्ते॒ अश्वैः॑ सु॒यमे॑भिरा॒शुभिः॒ शुभं॑ या॒तामनु॒ रथा॑ अवृत्सत ।।
   ईय॑न्ते॒ अश्वैः॑ सु॒यमे॑भिरा॒शुभिः
   ईय॑न्ते अश्वैः सु॒यमे॑भिः आ॒शुभिः
   ईय॑न्ते अश्वैः सु॒यमे॑भिर् आ॒शुभिः

Halfverse: d    शुभं॑ या॒तामनु॒ रथा॑ अवृत्सत ।।
   शुभ॑म् या॒ताम् अनु रथाः अवृत्सत ।।
   शुभं या॒ताम् अनु रथा अवृत्सत ।।


Verse: 2 
Halfverse: a    स्व॒यं द॑धिध्वे॒ तवि॑षीं॒ यथा॑ वि॒द बृ॒हन्म॑हान्त उर्वि॒या वि रा॑जथ ।
   स्व॒यं द॑धिध्वे॒ तवि॑षीं॒ यथा॑ वि॒द
   स्व॒यम् दधिध्वे तवि॑षीम् यथा वि॒द
   स्व॒यं द॑धिध्वे तवि॑षीं यथा वि॒द

Halfverse: b    बृ॒हन्म॑हान्त उर्वि॒या वि रा॑जथ ।
   बृ॒हत् महान्तः उर्वि॒या वि रा॑जथ ।
   बृ॒हन् महान्त उर्वि॒या वि रा॑जथ ।

Halfverse: c    उ॒तान्तरि॑क्षम्ममिरे॒ व्योज॑सा॒ शुभं॑ या॒तामनु॒ रथा॑ अवृत्सत ।।
   उ॒तान्तरि॑क्षम्ममिरे॒ व्योज॑सा
   उ॒त अ॒न्तरि॑क्षम् ममिरे वि ओज॑सा
   उ॒तान्तरि॑क्षम् ममिरे वि ओज॑सा

Halfverse: d    शुभं॑ या॒तामनु॒ रथा॑ अवृत्सत ।।
   शुभ॑म् या॒ताम् अनु रथाः अवृत्सत ।।
   शुभं या॒ताम् अनु रथा अवृत्सत ।।


Verse: 3 
Halfverse: a    सा॒कं जा॒ताः सु॒भ्वः॑ सा॒कमु॑क्षि॒ताः श्रि॒ये चि॒दा प्र॑त॒रं वा॑वृधु॒र्नरः॑ ।
   सा॒कं जा॒ताः सु॒भ्वः॑ सा॒कमु॑क्षि॒ताः
   सा॒कम् जा॒ताः सु॒भ्वः सा॒कम् उक्षि॒ताः
   सा॒कं जा॒ताः सु॒भुवः सा॒कम् उक्षि॒ताः

Halfverse: b    श्रि॒ये चि॒दा प्र॑त॒रं वा॑वृधु॒र्नरः॑ ।
   श्रि॒ये चि॑त् आ प्र॑त॒रम् वावृधुः नरः ।
   श्रि॒ये चि॑द् आ प्र॑त॒रं वा॑वृधुर् नरः ।

Halfverse: c    वि॑रो॒किणः॒ सूर्य॑स्येव र॒श्मयः॒ शुभं॑ या॒तामनु॒ रथा॑ अवृत्सत ।।
   वि॑रो॒किणः॒ सूर्य॑स्येव र॒श्मयः
   विरो॒किणः सूर्य॑स्य इव र॒श्मयः
   विरो॒किणः सूरि॑यस्येव र॒श्मयः

Halfverse: d    शुभं॑ या॒तामनु॒ रथा॑ अवृत्सत ।।
   शुभ॑म् या॒ताम् अनु रथाः अवृत्सत ।।
   शुभं या॒ताम् अनु रथा अवृत्सत ।।


Verse: 4 
Halfverse: a    आ॑भू॒षेण्यं॑ वो मरुतो महित्व॒नं दि॑दृ॒क्षेण्यं॒ सूर्य॑स्येव॒ चक्ष॑णम् ।
   आ॑भू॒षेण्यं॑ वो मरुतो महित्व॒नं
   आ॑भू॒षेण्य॑म् वः मरुतः महित्व॒नम्
   आभू॒षेण्यं वो मरुतो महित्व॒नं

Halfverse: b    दि॑दृ॒क्षेण्यं॒ सूर्य॑स्येव॒ चक्ष॑णम् ।
   दि॑दृ॒क्षेण्य॑म् सूर्य॑स्य इव चक्ष॑णम् ।
   दि॑दृ॒क्षेण्यं सूरि॑यस्येव चक्ष॑णम् ।

Halfverse: c    उ॒तो अ॒स्माँ अ॑मृत॒त्वे द॑धातन॒ शुभं॑ या॒तामनु॒ रथा॑ अवृत्सत ।।
   उ॒तो अ॒स्माँ अ॑मृत॒त्वे द॑धातन
   उ॒त उ अ॒स्मान् अमृत॒त्वे द॑धातन
   उ॒तो अ॒स्माँ अ॑मृत॒त्वे द॑धातन

Halfverse: d    शुभं॑ या॒तामनु॒ रथा॑ अवृत्सत ।।
   शुभ॑म् या॒ताम् अनु रथाः अवृत्सत ।।
   शुभं या॒ताम् अनु रथा अवृत्सत ।।


Verse: 5 
Halfverse: a    उदी॑रयथा मरुतः समुद्र॒तो यू॒यं वृ॒ष्टिं व॑र्षयथा पुरीषिणः ।
   उदी॑रयथा मरुतः समुद्र॒तो
   उत् ईरयथ+ मरुतः समुद्र॒तः
   उद् ईरयथा मरुतः समुद्र॒तो

Halfverse: b    यू॒यं वृ॒ष्टिं व॑र्षयथा पुरीषिणः ।
   यू॒यम् वृ॒ष्टिम् वर्षयथ+ पुरीषिणः ।
   यू॒यं वृ॒ष्टिं व॑र्षयथा पुरीषिणः ।

Halfverse: c    न वो॑ दस्रा॒ उप॑ दस्यन्ति धे॒नवः॒ शुभं॑ या॒तामनु॒ रथा॑ अवृत्सत ।।
   न वो॑ दस्रा॒ उप॑ दस्यन्ति धे॒नवः
   न वः दस्राः उप दस्यन्ति धे॒नवः
   न वो दस्रा उप दस्यन्ति धे॒नवः

Halfverse: d    शुभं॑ या॒तामनु॒ रथा॑ अवृत्सत ।।
   शुभ॑म् या॒ताम् अनु रथाः अवृत्सत ।।
   शुभं या॒ताम् अनु रथा अवृत्सत ।।


Verse: 6 
Halfverse: a    यदश्वा॑न्धू॒र्षु पृष॑ती॒रयु॑ग्ध्वं हिर॒ण्यया॒न्प्रत्यत्काँ॒ अमु॑ग्ध्वम् ।
   यदश्वा॑न्धू॒र्षु पृष॑ती॒रयु॑ग्ध्वं
   यत् अश्वा॑न् धू॒र्षु पृष॑तीः अयु॑ग्ध्वम्
   यद् अश्वा॑न् धू॒र्षु पृष॑तीर् अयु॑ग्धुवं

Halfverse: b    हिर॒ण्यया॒न्प्रत्यत्काँ॒ अमु॑ग्ध्वम् ।
   हि॑र॒ण्यया॑न् प्रति अत्का॑न् अमु॑ग्ध्वम् ।
   हि॑र॒ण्यया॑न् प्रति अत्काँ अमु॑ग्धुवम् ।

Halfverse: c    विश्वा॒ इत्स्पृधो॑ मरुतो॒ व्य॑स्यथ॒ शुभं॑ या॒तामनु॒ रथा॑ अवृत्सत ।।
   विश्वा॒ इत्स्पृधो॑ मरुतो॒ व्य॑स्यथ
   विश्वाः इत् स्पृधः मरुतः वि अ॑स्यथ
   विश्वा इत् स्पृधो मरुतो वि अ॑स्यथ

Halfverse: d    शुभं॑ या॒तामनु॒ रथा॑ अवृत्सत ।।
   शुभ॑म् या॒ताम् अनु रथाः अवृत्सत ।।
   शुभं या॒ताम् अनु रथा अवृत्सत ।।


Verse: 7 
Halfverse: a    न पर्व॑ता॒ न न॒द्यो॑ वरन्त वो॒ यत्राचि॑ध्वम्मरुतो॒ गछ॒थेदु॒ तत् ।
   न पर्व॑ता॒ न न॒द्यो॑ वरन्त वो
   न पर्व॑ताः न न॒द्यः वरन्त वः
   न पर्व॑ता न न॒दियो वरन्त वो

Halfverse: b    यत्राचि॑ध्वम्मरुतो॒ गछ॒थेदु॒ तत् ।
   यत्र अचि॑ध्वम् मरुतः गछ॑थ इत् उ तत् ।
   यत्राचि॑ध्वम् मरुतो गछ॒थेद् उ तत् ।

Halfverse: c    उ॒त द्यावा॑पृथि॒वी या॑थना॒ परि॒ शुभं॑ या॒तामनु॒ रथा॑ अवृत्सत ।।
   उ॒त द्यावा॑पृथि॒वी या॑थना॒ परि
   उ॒त द्यावा॑पृथि॒वी या॑थन+ परि
   उ॒त द्यावा॑पृथि॒वी या॑थना परि

Halfverse: d    शुभं॑ या॒तामनु॒ रथा॑ अवृत्सत ।।
   शुभ॑म् या॒ताम् अनु रथाः अवृत्सत ।।
   शुभं या॒ताम् अनु रथा अवृत्सत ।।


Verse: 8 
Halfverse: a    यत्पू॒र्व्यम्म॑रुतो॒ यच्च॒ नूत॑नं॒ यदु॒द्यते॑ वसवो॒ यच्च॑ श॒स्यते॑ ।
   यत्पू॒र्व्यम्म॑रुतो॒ यच्च॒ नूत॑नं
   यत् पू॒र्व्यम् मरुतः यत् च नूत॑नम्
   यत् पूर्वि॒यम् मरुतो यच् च नूत॑नं

Halfverse: b    यदु॒द्यते॑ वसवो॒ यच्च॑ श॒स्यते॑ ।
   यत् उ॒द्यते वसवः यत् च श॒स्यते ।
   यद् उ॒द्यते वसवो यच् च श॒स्यते ।

Halfverse: c    विश्व॑स्य॒ तस्य॑ भवथा॒ नवे॑दसः॒ शुभं॑ या॒तामनु॒ रथा॑ अवृत्सत ।।
   विश्व॑स्य॒ तस्य॑ भवथा॒ नवे॑दसः
   विश्व॑स्य तस्य भवथ+ नवे॑दसः
   विश्व॑स्य तस्य भवथा नवे॑दसः

Halfverse: d    शुभं॑ या॒तामनु॒ रथा॑ अवृत्सत ।।
   शुभ॑म् या॒ताम् अनु रथाः अवृत्सत ।।
   शुभं या॒ताम् अनु रथा अवृत्सत ।।


Verse: 9 
Halfverse: a    मृ॒ळत॑ नो मरुतो॒ मा व॑धिष्टना॒स्मभ्यं॒ शर्म॑ बहु॒लं वि य॑न्तन ।
   मृ॒ळत॑ नो मरुतो॒ मा व॑धिष्टन
   मृ॒ळत नः मरुतः मा व॑धिष्टन
   मृ॒ळत नो मरुतो मा व॑धिष्टन

Halfverse: b     अ॒स्मभ्यं॒ शर्म॑ बहु॒लं वि य॑न्तन ।
   अ॒स्मभ्य॑म् शर्म बहु॒लम् वि य॑न्तन ।
   अ॒स्मभ्यं शर्म बहु॒लं वि य॑न्तन ।

Halfverse: c    अधि॑ स्तो॒त्रस्य॑ स॒ख्यस्य॑ गातन॒ शुभं॑ या॒तामनु॒ रथा॑ अवृत्सत ।।
   अधि॑ स्तो॒त्रस्य॑ स॒ख्यस्य॑ गातन
   अधि स्तो॒त्रस्य स॒ख्यस्य गातन
   अधि स्तो॒त्रस्य सखि॒यस्य गातन

Halfverse: d    शुभं॑ या॒तामनु॒ रथा॑ अवृत्सत ।।
   शुभ॑म् या॒ताम् अनु रथाः अवृत्सत ।।
   शुभं या॒ताम् अनु रथा अवृत्सत ।।


Verse: 10 
Halfverse: a    यू॒यम॒स्मान्न॑यत॒ वस्यो॒ अछा॒ निरँ॑ह॒तिभ्यो॑ मरुतो गृणा॒नाः ।
   यू॒यम॒स्मान्न॑यत॒ वस्यो॒ अछा
   यू॒यम् अ॒स्मान् नयत वस्यः अछ+
   यू॒यम् अ॒स्मान् नयत वस्यो अछा

Halfverse: b    निरँ॑ह॒तिभ्यो॑ मरुतो गृणा॒नाः ।
   निः अं॑ह॒तिभ्यः मरुतः गृणा॒नाः ।
   निर् अंह॒तिभ्यो मरुतो गृणा॒नाः ।

Halfverse: c    जु॒षध्वं॑ नो ह॒व्यदा॑तिं यजत्रा व॒यं स्या॑म॒ पत॑यो रयी॒णाम् ।।
   जु॒षध्वं॑ नो ह॒व्यदा॑तिं यजत्रा
   जु॒षध्व॑म् नः ह॒व्यदा॑तिम् यजत्राः
   जु॒षध्वं नो ह॒व्यदा॑तिं यजत्रा

Halfverse: d    व॒यं स्या॑म॒ पत॑यो रयी॒णाम् ।।
   व॒यम् स्याम पत॑यः रयी॒णाम् ।।
   व॒यं सि॑याम पत॑यो रयी॒णाम् ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.