TITUS
Rg-Veda: Rg-Veda-Samhita
Part No. 411
Previous part

Hymn: 57_(411) 
Verse: 1 
Halfverse: a    आ रु॑द्रास॒ इन्द्र॑वन्तः स॒जोष॑सो॒ हिर॑ण्यरथाः सुवि॒ताय॑ गन्तन ।
   आ रु॑द्रास॒ इन्द्र॑वन्तः स॒जोष॑सो
   आ रु॑द्रासः इन्द्र॑वन्तः स॒जोष॑सः
   आ रु॑द्रास इन्द्र॑वन्तः स॒जोष॑सो

Halfverse: b    हिर॑ण्यरथाः सुवि॒ताय॑ गन्तन ।
   हिर॑ण्यरथाः सुवि॒ताय गन्तन ।
   हिर॑ण्यरथाः सुवि॒ताय गन्तन ।

Halfverse: c    इ॒यं वो॑ अ॒स्मत्प्रति॑ हर्यते म॒तिस्तृ॒ष्णजे॒ न दि॒व उत्सा॑ उद॒न्यवे॑ ।।
   इ॒यं वो॑ अ॒स्मत्प्रति॑ हर्यते म॒तिस्
   इ॒यम् वः अ॒स्मत् प्रति हर्यते म॒तिः
   इ॒यं वो अ॒स्मत् प्रति हर्यते म॒तिस्

Halfverse: d    तृ॒ष्णजे॒ न दि॒व उत्सा॑ उद॒न्यवे॑ ।।
   तृ॒ष्णजे न दि॒वः उत्साः उद॒न्यवे ।।
   तृ॒ष्णजे न दि॒व उत्सा उद॒न्यवे ।।


Verse: 2 
Halfverse: a    वाशी॑मन्त ऋष्टि॒मन्तो॑ मनी॒षिणः॑ सु॒धन्वा॑न॒ इषु॑मन्तो निष॒ङ्गिणः॑ ।
   वाशी॑मन्त ऋष्टि॒मन्तो॑ मनी॒षिणः
   वाशी॑मन्तः ऋष्टि॒मन्तः मनी॒षिणः
   वाशी॑मन्त ऋष्टि॒मन्तो मनी॒षिणः

Halfverse: b    सु॒धन्वा॑न॒ इषु॑मन्तो निष॒ङ्गिणः॑ ।
   सु॒धन्वा॑नः इषु॑मन्तः निष॒ङ्गिणः ।
   सु॒धन्वा॑न इषु॑मन्तो निष॒ङ्गिणः ।

Halfverse: c    स्वश्वा॑ स्थ सु॒रथाः॑ पृश्निमातरः स्वायु॒धा म॑रुतो याथना॒ शुभ॑म् ।।
   स्वश्वा॑ स्थ सु॒रथाः॑ पृश्निमातरः
   स्वश्वाः स्थ सु॒रथाः पृश्निमातरः
   सुअश्वा स्थ सु॒रथाः पृश्निमातरः

Halfverse: d    स्वायु॒धा म॑रुतो याथना॒ शुभ॑म् ।।
   स्वा॑यु॒धाः म॑रुतः याथन+ शुभ॑म् ।।
   सुआ॑यु॒धा म॑रुतो याथना शुभ॑म् ।।


Verse: 3 
Halfverse: a    धू॑नु॒थ द्याम्पर्व॑तान्दा॒शुषे॒ वसु॒ नि वो॒ वना॑ जिहते॒ याम॑नो भि॒या ।
   धू॑नु॒थ द्याम्पर्व॑तान्दा॒शुषे॒ वसु
   धूनु॒थ द्याम् पर्व॑तान् दा॒शुषे वसु
   धूनु॒थ द्याम् पर्व॑तान् दा॒शुषे वसु

Halfverse: b    नि वो॒ वना॑ जिहते॒ याम॑नो भि॒या ।
   नि वः वना जिहते याम॑नः भि॒या ।
   नि वो वना जिहते याम॑नो भि॒या ।

Halfverse: c    को॒पय॑थ पृथि॒वीम्पृ॑श्निमातरः शु॒भे यदु॑ग्राः॒ पृष॑ती॒रयु॑ग्ध्वम् ।।
   को॒पय॑थ पृथि॒वीम्पृ॑श्निमातरः
   को॒पय॑थ पृथि॒वीम् पृश्निमातरः
   को॒पय॑थ पृथि॒वीम् पृश्निमातरः

Halfverse: d    शु॒भे यदु॑ग्राः॒ पृष॑ती॒रयु॑ग्ध्वम् ।।
   शु॒भे यत् उग्राः पृष॑तीः अयु॑ग्ध्वम् ।।
   शु॒भे यद् उग्राः पृष॑तीर् अयु॑ग्धुवम् ।।


Verse: 4 
Halfverse: a    वात॑त्विषो म॒रुतो॑ व॒र्षनि॑र्णिजो य॒मा इ॑व॒ सुस॑दृशः सु॒पेश॑सः ।
   वात॑त्विषो म॒रुतो॑ व॒र्षनि॑र्णिजो
   वात॑त्विषः म॒रुतः व॒र्षनि॑र्णिजः
   वात॑त्विषो म॒रुतो व॒र्षनि॑र्णिजो

Halfverse: b    य॒मा इ॑व॒ सुस॑दृशः सु॒पेश॑सः ।
   य॒माः इ॑व सुस॑दृशः सु॒पेश॑सः ।
   य॒मा इ॑व सुस॑दृशः सु॒पेश॑सः ।

Halfverse: c    पि॒शङ्गा॑श्वा अरु॒णाश्वा॑ अरे॒पसः॒ प्रत्व॑क्षसो महि॒ना द्यौरि॑वो॒रवः॑ ।।
   पि॒शङ्गा॑श्वा अरु॒णाश्वा॑ अरे॒पसः
   पि॒शङ्गा॑श्वाः अरु॒णाश्वाः अरे॒पसः
   पि॒शङ्गा॑श्वा अरु॒णाश्वा अरे॒पसः

Halfverse: d    प्रत्व॑क्षसो महि॒ना द्यौरि॑वो॒रवः॑ ।।
   प्रत्व॑क्षसः महि॒ना द्यौः इ॑व उ॒रवः ।।
   प्रत्व॑क्षसो महि॒ना द्यौर् इवो॒रवः ।।


Verse: 5 
Halfverse: a    पु॑रुद्र॒प्सा अ॑ञ्जि॒मन्तः॑ सु॒दान॑वस्त्वे॒षसं॑दृशो अनव॒भ्ररा॑धसः ।
   पु॑रुद्र॒प्सा अ॑ञ्जि॒मन्तः॑ सु॒दान॑वस्
   पुरुद्र॒प्साः अ॑ञ्जि॒मन्तः सु॒दान॑वः
   पुरुद्र॒प्सा अ॑ञ्जि॒मन्तः सु॒दान॑वस्

Halfverse: b    त्वे॒षसं॑दृशो अनव॒भ्ररा॑धसः ।
   त्वे॒षसं॑दृशः अनव॒भ्ररा॑धसः ।
   त्वे॒षसं॑दृशो अनव॒भ्ररा॑धसः ।

Halfverse: c    सु॑जा॒तासो॑ ज॒नुषा॑ रु॒क्मव॑क्षसो दि॒वो अ॒र्का अ॒मृतं॒ नाम॑ भेजिरे ।।
   सु॑जा॒तासो॑ ज॒नुषा॑ रु॒क्मव॑क्षसो
   सुजा॒तासः ज॒नुषा रु॒क्मव॑क्षसः
   सुजा॒तासो ज॒नुषा रु॒क्मव॑क्षसो

Halfverse: d    दि॒वो अ॒र्का अ॒मृतं॒ नाम॑ भेजिरे ।।
   दि॒वः अ॒र्काः अ॒मृत॑म् नाम भेजिरे ।।
   दि॒वो अ॒र्का अ॒मृतं नाम भेजिरे ।।


Verse: 6 
Halfverse: a    ऋ॒ष्टयो॑ वो मरुतो॒ अँस॑यो॒रधि॒ सह॒ ओजो॑ बा॒ह्वोर्वो॒ बलं॑ हि॒तम् ।
   ऋ॒ष्टयो॑ वो मरुतो॒ अँस॑यो॒रधि
   ऋ॒ष्टयः वः मरुतः अंस॑योः अधि
   ऋ॒ष्टयो वो मरुतो अंस॑योर् अधि

Halfverse: b    सह॒ ओजो॑ बा॒ह्वोर्वो॒ बलं॑ हि॒तम् ।
   सहः ओजः बा॒ह्वोः वः बल॑म् हि॒तम् ।
   सह ओजो बाहु॒वोर् वो बलं हि॒तम् ।

Halfverse: c    नृ॒म्णा शी॒र्षस्वायु॑धा॒ रथे॑षु वो॒ विश्वा॑ वः॒ श्रीरधि॑ त॒नूषु॑ पिपिशे ।।
   नृ॒म्णा शी॒र्षस्वायु॑धा॒ रथे॑षु वो
   नृ॒म्णा शी॒र्षसु आयु॑धा रथे॑षु वः
   नृ॒म्णा शी॒र्षसु आयु॑धा रथे॑षु वो

Halfverse: d    विश्वा॑ वः॒ श्रीरधि॑ त॒नूषु॑ पिपिशे ।।
   विश्वा वः श्रीः अधि त॒नूषु पिपिशे ।।
   विश्वा वः श्रीर् अधि त॒नूषु पिपिशे ।।


Verse: 7 
Halfverse: a    गोम॒दश्वा॑व॒द्रथ॑वत्सु॒वीरं॑ च॒न्द्रव॒द्राधो॑ मरुतो ददा नः ।
   गोम॒दश्वा॑व॒द्रथ॑वत्सु॒वीरं
   गोम॑त् अश्वा॑वत् रथ॑वत् सु॒वीर॑म्
   गोम॑द् अश्वा॑वद् रथ॑वत् सु॒वीरं

Halfverse: b    च॒न्द्रव॒द्राधो॑ मरुतो ददा नः ।
   च॒न्द्रव॑त् राधः मरुतः दद+ नः ।
   च॒न्द्रव॑द् राधो मरुतो ददा नः ।

Halfverse: c    प्रश॑स्तिं नः कृणुत रुद्रियासो भक्षी॒य वो ऽव॑सो॒ दैव्य॑स्य ।।
   प्रश॑स्तिं नः कृणुत रुद्रियासो
   प्रश॑स्तिम् नः कृणुत रुद्रियासः
   प्रश॑स्तिं नः कृणुत रुद्रियासो

Halfverse: d    भक्षी॒य वो ऽव॑सो॒ दैव्य॑स्य ।।
   भ॑क्षी॒य वः अव॑सः दैव्य॑स्य ।।
   भ॑क्षी॒य वो अव॑सो दैवि॑यस्य ।।


Verse: 8 
Halfverse: a    ह॒ये नरो॒ मरु॑तो मृ॒ळता॑ न॒स्तुवी॑मघासो॒ अमृ॑ता॒ ऋत॑ज्ञाः ।
   ह॒ये नरो॒ मरु॑तो मृ॒ळता॑ नस्
   ह॒ये नरः मरु॑तः मृ॒ळत+ नः
   ह॒ये नरो मरु॑तो मृ॒ळता नस्

Halfverse: b    तुवी॑मघासो॒ अमृ॑ता॒ ऋत॑ज्ञाः ।
   तुवी॑मघासः अमृ॑ताः ऋत॑ज्ञाः ।
   तुवी॑मघासो अमृ॑ता ऋत॑ज्ञाः ।

Halfverse: c    सत्य॑श्रुतः॒ कव॑यो॒ युवा॑नो॒ बृह॑द्गिरयो बृ॒हदु॒क्षमा॑णाः ।।
   सत्य॑श्रुतः॒ कव॑यो॒ युवा॑नो
   सत्य॑श्रुतः कव॑यः युवा॑नः
   सत्य॑श्रुतः ? कव॑यो युवा॑नो

Halfverse: d    बृह॑द्गिरयो बृ॒हदु॒क्षमा॑णाः ।।
   बृह॑द्गिरयः बृ॒हत् उ॒क्षमा॑णाः ।।
   बृह॑द्गिरयो बृ॒हद् उ॒क्षमा॑णाः ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.