TITUS
Rg-Veda: Rg-Veda-Samhita
Part No. 412
Previous part

Hymn: 58_(412) 
Verse: 1 
Halfverse: a    तमु॑ नू॒नं तवि॑षीमन्तमेषां स्तु॒षे ग॒णम्मारु॑तं॒ नव्य॑सीनाम् ।
   तमु॑ नू॒नं तवि॑षीमन्तमेषां
   तम् उ नू॒नम् तवि॑षीमन्तम् एषाम्
   तम् उ नू॒नं तवि॑षीमन्तम् एषां

Halfverse: b    स्तु॒षे ग॒णम्मारु॑तं॒ नव्य॑सीनाम् ।
   स्तु॒षे ग॒णम् मारु॑तम् नव्य॑सीनाम् ।
   स्तु॒षे ग॒णम् मारु॑तं नव्य॑सीनाम् ।

Halfverse: c    य आ॒श्व॑श्वा॒ अम॑व॒द्वह॑न्त उ॒तेशि॑रे अ॒मृत॑स्य स्व॒राजः॑ ।।
   य आ॒श्व॑श्वा॒ अम॑व॒द्वह॑न्त
   ये आ॒श्व॑श्वाः अम॑वत् वह॑न्ते
   य आशुअश्वा अम॑वद् वह॑न्त

Halfverse: d    उ॒तेशि॑रे अ॒मृत॑स्य स्व॒राजः॑ ।।
   उ॒त ई॑शिरे अ॒मृत॑स्य स्व॒राजः ।।
   उ॒तेशि॑रे अ॒मृत॑स्य स्व॒राजः ।।


Verse: 2 
Halfverse: a    त्वे॒षं ग॒णं त॒वसं॒ खादि॑हस्तं॒ धुनि॑व्रतम्मा॒यिनं॒ दाति॑वारम् ।
   त्वे॒षं ग॒णं त॒वसं॒ खादि॑हस्तं
   त्वे॒षम् ग॒णम् त॒वस॑म् खादि॑हस्तम्
   त्वे॒षं ग॒णं त॒वसं खादि॑हस्तं

Halfverse: b    धुनि॑व्रतम्मा॒यिनं॒ दाति॑वारम् ।
   धुनि॑व्रतम् मा॒यिन॑म् दाति॑वारम् ।
   धुनि॑व्रतम् मा॒यिनं दाति॑वारम् ।

Halfverse: c    म॑यो॒भुवो॒ ये अमि॑ता महि॒त्वा वन्द॑स्व विप्र तुवि॒राध॑सो॒ नॄन् ।।
   म॑यो॒भुवो॒ ये अमि॑ता महि॒त्वा
   म॑यो॒भुवः ये अमि॑ताः महि॒त्वा
   म॑यो॒भुवो ये अमि॑ता महि॒त्वा

Halfverse: d    वन्द॑स्व विप्र तुवि॒राध॑सो॒ नॄन् ।।
   वन्द॑स्व विप्र तुवि॒राध॑सः नॄन् ।।
   वन्द॑स्व विप्र तुवि॒राध॑सो नॄन् ।।


Verse: 3 
Halfverse: a    आ वो॑ यन्तूदवा॒हासो॑ अ॒द्य वृ॒ष्टिं ये विश्वे॑ म॒रुतो॑ जु॒नन्ति॑ ।
   आ वो॑ यन्तूदवा॒हासो॑ अ॒द्य
   आ वः यन्तु उदवा॒हासः अ॒द्य
   आ वो यन्तु उदवा॒हासो अ॒द्य

Halfverse: b    वृ॒ष्टिं ये विश्वे॑ म॒रुतो॑ जु॒नन्ति॑ ।
   वृ॒ष्टिम् ये विश्वे म॒रुतः जु॒नन्ति ।
   वृ॒ष्टिं ये विश्वे म॒रुतो जु॒नन्ति ।

Halfverse: c    अ॒यं यो अ॒ग्निर्म॑रुतः॒ समि॑द्ध ए॒तं जु॑षध्वं कवयो युवानः ।।
   अ॒यं यो अ॒ग्निर्म॑रुतः॒ समि॑द्ध
   अ॒यम् यः अ॒ग्निः म॑रुतः समि॑द्धः
   अ॒यं यो अ॒ग्निर् मरुतः समि॑द्ध

Halfverse: d    ए॒तं जु॑षध्वं कवयो युवानः ।।
   ए॒तम् जुषध्वम् कवयः युवानः ।।
   ए॒तं जु॑षध्वं कवयो युवानः ।।


Verse: 4 
Halfverse: a    यू॒यं राजा॑न॒मिर्यं॒ जना॑य विभ्वत॒ष्टं ज॑नयथा यजत्राः ।
   यू॒यं राजा॑न॒मिर्यं॒ जना॑य
   यू॒यम् राजा॑नम् इर्य॑म् जना॑य
   यू॒यं राजा॑नम् इरि॑यं जना॑य

Halfverse: b    विभ्वत॒ष्टं ज॑नयथा यजत्राः ।
   वि॑भ्वत॒ष्टम् जनयथ+ यजत्राः ।
   वि॑भ्वत॒ष्टं ज॑नयथा यजत्राः ।

Halfverse: c    यु॒ष्मदे॑ति मुष्टि॒हा बा॒हुजू॑तो यु॒ष्मद्सद॑श्वो मरुतः सु॒वीरः॑ ।।
   यु॒ष्मदे॑ति मुष्टि॒हा बा॒हुजू॑तो
   यु॒ष्मत् एति मुष्टि॒हा बा॒हुजू॑तः
   यु॒ष्मद् एति मुष्टि॒हा बा॒हुजू॑तो

Halfverse: d    यु॒ष्मद्सद॑श्वो मरुतः सु॒वीरः॑ ।।
   यु॒ष्मत् सद॑श्वः मरुतः सु॒वीरः ।।
   यु॒ष्मद् सद॑श्वो मरुतः सु॒वीरः ।।


Verse: 5 
Halfverse: a    अ॒रा इ॒वेदच॑रमा॒ अहे॑व॒ प्रप्र॑ जायन्ते॒ अक॑वा॒ महो॑भिः ।
   अ॒रा इ॒वेदच॑रमा॒ अहे॑व
   अ॒राः इ॑व इत् अच॑रमाः अहा इव
   अ॒रा इ॒वेद् अच॑रमा अहे॑व

Halfverse: b    प्रप्र॑ जायन्ते॒ अक॑वा॒ महो॑भिः ।
   प्रप्र जायन्ते अक॑वाः महो॑भिः ।
   प्रप्र जायन्ते अक॑वा महो॑भिः ।

Halfverse: c    पृश्नेः॑ पु॒त्रा उ॑प॒मासो॒ रभि॑ष्ठाः॒ स्वया॑ म॒त्या म॒रुतः॒ सम्मि॑मिक्षुः ।।
   पृश्नेः॑ पु॒त्रा उ॑प॒मासो॒ रभि॑ष्ठाः
   पृश्नेः पु॒त्राः उ॑प॒मासः रभि॑ष्ठाः
   पृश्नेः पु॒त्रा उ॑प॒मासो रभि॑ष्ठाः

Halfverse: d    स्वया॑ म॒त्या म॒रुतः॒ सम्मि॑मिक्षुः ।।
   स्वया म॒त्या म॒रुतः सम् मिमिक्षुः ।।
   स्वया म॒त्या म॒रुतः सम् मिमिक्षुः ।।


Verse: 6 
Halfverse: a    यत्प्राया॑सिष्ट॒ पृष॑तीभि॒रश्वै॑र्वीळुप॒विभि॑र्मरुतो॒ रथे॑भिः ।
   यत्प्राया॑सिष्ट॒ पृष॑तीभि॒रश्वै॑र्
   यत् प्र अया॑सिष्ट पृष॑तीभिः अश्वैः
   यत् प्राया॑सिष्ट पृष॑तीभिर् अश्वै॑र्

Halfverse: b    वीळुप॒विभि॑र्मरुतो॒ रथे॑भिः ।
   वी॑ळुप॒विभिः मरुतः रथे॑भिः ।
   वी॑ळुप॒विभि॑र् मरुतो रथे॑भिः ।

Halfverse: c    क्षोद॑न्त॒ आपो॑ रिण॒ते वना॒न्यवो॒स्रियो॑ वृष॒भः क्र॑न्दतु॒ द्यौः ।।
   क्षोद॑न्त॒ आपो॑ रिण॒ते वना॑न्य्
   क्षोद॑न्ते आपः रिण॒ते वना॑नि
   क्षोद॑न्त आपो रिण॒ते वना॑नि

Halfverse: d    अवो॒स्रियो॑ वृष॒भः क्र॑न्दतु॒ द्यौः ।।
   अव उ॒स्रियः वृष॒भः क्र॑न्दतु द्यौः ।।
   अवो॒स्रियो वृष॒भः क्र॑न्दतु द्यौः ।।


Verse: 7 
Halfverse: a    प्रथि॑ष्ट॒ याम॑न्पृथि॒वी चि॑देषा॒म्भर्ते॑व॒ गर्भं॒ स्वमिच्छवो॑ धुः ।
   प्रथि॑ष्ट॒ याम॑न्पृथि॒वी चि॑देषाम्
   प्रथि॑ष्ट याम॑न् पृथि॒वी चि॑त् एषाम्
   प्रथि॑ष्ट याम॑न् पृथि॒वी चि॑द् एषाम्

Halfverse: b    भर्ते॑व॒ गर्भं॒ स्वमिच्छवो॑ धुः ।
   भर्ता इव गर्भ॑म् स्वम् इत् शवः धुः ।
   भर्ते॑व गर्भं सु॒वम् इच् छवो धुः ।

Halfverse: c    वाता॒न्ह्यश्वा॑न्धु॒र्या॑युयु॒ज्रे व॒र्षं स्वेदं॑ चक्रिरे रु॒द्रिया॑सः ।।
   वाता॒न्ह्यश्वा॑न्धु॒र्या॑युयु॒ज्रे
   वाता॑न् हि अश्वा॑न् धु॒रि आ॑युयु॒ज्रे
   वाता॑न् हि अश्वा॑न् धु॒रि आ॑युयु॒ज्रे

Halfverse: d    व॒र्षं स्वेदं॑ चक्रिरे रु॒द्रिया॑सः ।।
   व॒र्षम् स्वेद॑म् चक्रिरे रु॒द्रिया॑सः ।।
   व॒र्षं स्वेदं चक्रिरे रु॒द्रिया॑सः ।।


Verse: 8 
Halfverse: a    ह॒ये नरो॒ मरु॑तो मृ॒ळता॑ न॒स्तुवी॑मघासो॒ अमृ॑ता॒ ऋत॑ज्ञाः ।
   ह॒ये नरो॒ मरु॑तो मृ॒ळता॑ नस्
   ह॒ये नरः मरु॑तः मृ॒ळत+ नः
   ह॒ये नरो मरु॑तो मृ॒ळता नस्

Halfverse: b    तुवी॑मघासो॒ अमृ॑ता॒ ऋत॑ज्ञाः ।
   तुवी॑मघासः अमृ॑ताः ऋत॑ज्ञाः ।
   तुवी॑मघासो अमृ॑ता ऋत॑ज्ञाः ।

Halfverse: c    सत्य॑श्रुतः॒ कव॑यो॒ युवा॑नो॒ बृह॑द्गिरयो बृ॒हदु॒क्षमा॑णाः ।।
   सत्य॑श्रुतः॒ कव॑यो॒ युवा॑नो
   सत्य॑श्रुतः कव॑यः युवा॑नः
   सत्य॑श्रुतः ? कव॑यो युवा॑नो

Halfverse: d    बृह॑द्गिरयो बृ॒हदु॒क्षमा॑णाः ।।
   बृह॑द्गिरयः बृ॒हत् उ॒क्षमा॑णाः ।।
   बृह॑द्गिरयो बृ॒हद् उ॒क्षमा॑णाः ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.