TITUS
Rg-Veda: Rg-Veda-Samhita
Part No. 416
Previous part

Hymn: 62_(416) 
Verse: 1 
Halfverse: a    ऋ॒तेन॑ ऋ॒तमपि॑हितं ध्रु॒वं वां॒ सूर्य॑स्य॒ यत्र॑ विमु॒चन्त्यश्वा॑न् ।
   ऋ॒तेन॑ ऋ॒तमपि॑हितं ध्रु॒वं वां
   ऋ॒तेन ऋ॒तम् अपि॑हितम् ध्रु॒वम् वाम्
   ऋ॒तेन र्तम् अपि॑हितं ध्रु॒वं वां

Halfverse: b    सूर्य॑स्य॒ यत्र॑ विमु॒चन्त्यश्वा॑न् ।
   सूर्य॑स्य यत्र विमु॒चन्ति अश्वा॑न् ।
   सूर्य॑स्य यत्र विमु॒चन्ति अश्वा॑न् ।

Halfverse: c    दश॑ श॒ता स॒ह त॑स्थु॒स्तदेकं॑ दे॒वानां॒ श्रेष्ठं॒ वपु॑षामपश्यम् ।।
   दश॑ श॒ता स॒ह त॑स्थु॒स्तदेकं
   दश श॒ता स॒ह त॑स्थुः तत् एक॑म्
   दश श॒ता स॒ह त॑स्थुस् तद् एकं

Halfverse: d    दे॒वानां॒ श्रेष्ठं॒ वपु॑षामपश्यम् ।।
   दे॒वाना॑म् श्रेष्ठ॑म् वपु॑षाम् अपश्यम् ।।
   दे॒वानां श्रेष्ठं वपु॑षाम् अपश्यम् ।।


Verse: 2 
Halfverse: a    तत्सु वा॑म्मित्रावरुणा महि॒त्वमी॒र्मा त॒स्थुषी॒रह॑भिर्दुदुह्रे ।
   तत्सु वा॑म्मित्रावरुणा महि॒त्वम्
   तत् सु वा॑म् मित्रावरुणा महि॒त्वम्
   तत् सु वा॑म् मित्रावरुणा महि॒त्वम्

Halfverse: b    ई॒र्मा त॒स्थुषी॒रह॑भिर्दुदुह्रे ।
   ई॒र्मा त॒स्थुषीः अह॑भिः दुदुह्रे ।
   ई॒र्मा त॒स्थुषी॑र् अह॑भिर् दुदुह्रे ।

Halfverse: c    विश्वाः॑ पिन्वथः॒ स्वस॑रस्य॒ धेना॒ अनु॑ वा॒मेकः॑ प॒विरा व॑वर्त ।।
   विश्वाः॑ पिन्वथः॒ स्वस॑रस्य॒ धेना
   विश्वाः पिन्वथः स्वस॑रस्य धेनाः
   विश्वाः पिन्वथः स्वस॑रस्य धेना

Halfverse: d    अनु॑ वा॒मेकः॑ प॒विरा व॑वर्त ।।
   अनु वाम् एकः प॒विः आ व॑वर्त ।।
   अनु वाम् एकः प॒विर् आ व॑वर्त ।।


Verse: 3 
Halfverse: a    अधा॑रयतम्पृथि॒वीमु॒त द्याम्मित्र॑राजाना वरुणा॒ महो॑भिः ।
   अधा॑रयतम्पृथि॒वीमु॒त द्याम्
   अधा॑रयतम् पृथि॒वीम् उ॒त द्याम्
   अधा॑रयतम् पृथि॒वीम् उ॒त द्याम्

Halfverse: b    मित्र॑राजाना वरुणा॒ महो॑भिः ।
   मित्र॑राजाना वरुणा महो॑भिः ।
   मित्र॑राजाना वरुणा महो॑भिः ।

Halfverse: c    व॒र्धय॑त॒मोष॑धीः॒ पिन्व॑तं॒ गा अव॑ वृ॒ष्टिं सृ॑जतं जीरदानू ।।
   व॒र्धय॑त॒मोष॑धीः॒ पिन्व॑तं॒ गा
   व॒र्धय॑तम् ओष॑धीः पिन्व॑तम् गाः
   व॒र्धय॑तम् ओष॑धीः पिन्व॑तं गा

Halfverse: d    अव॑ वृ॒ष्टिं सृ॑जतं जीरदानू ।।
   अव वृ॒ष्टिम् सृजतम् जीरदानू ।।
   अव वृ॒ष्टिं सृ॑जतं जीरदानू ।।


Verse: 4 
Halfverse: a    आ वा॒मश्वा॑सः सु॒युजो॑ वहन्तु य॒तर॑श्मय॒ उप॑ यन्त्व॒र्वाक् ।
   आ वा॒मश्वा॑सः सु॒युजो॑ वहन्तु
   आ वा॑म् अश्वा॑सः सु॒युजः वहन्तु
   आ वा॑म् अश्वा॑सः सु॒युजो वहन्तु

Halfverse: b    य॒तर॑श्मय॒ उप॑ यन्त्व॒र्वाक् ।
   य॒तर॑श्मयः उप यन्तु अ॒र्वाक् ।
   य॒तर॑श्मय उप यन्तु अ॒र्वाक् ।

Halfverse: c    घृ॒तस्य॑ नि॒र्णिगनु॑ वर्तते वा॒मुप॒ सिन्ध॑वः प्र॒दिवि॑ क्षरन्ति ।।
   घृ॒तस्य॑ नि॒र्णिगनु॑ वर्तते वाम्
   घृ॒तस्य नि॒र्णिक् अनु वर्तते वाम्
   घृ॒तस्य नि॒र्णिग् अनु वर्तते वाम्

Halfverse: d    उप॒ सिन्ध॑वः प्र॒दिवि॑ क्षरन्ति ।।
   उप सिन्ध॑वः प्र॒दिवि क्षरन्ति ।।
   उप सिन्ध॑वः प्र॒दिवि क्षरन्ति ।।


Verse: 5 
Halfverse: a    अनु॑ श्रु॒ताम॒मतिं॒ वर्ध॑दु॒र्वीम्ब॒र्हिरि॑व॒ यजु॑षा॒ रक्ष॑माणा ।
   अनु॑ श्रु॒ताम॒मतिं॒ वर्ध॑दु॒र्वीम्
   अनु श्रु॒ताम् अ॒मति॑म् वर्ध॑त् उ॒र्वीम्
   अनु श्रु॒ताम् अ॒मतिं वर्ध॑द् उ॒र्वीम्

Halfverse: b    ब॒र्हिरि॑व॒ यजु॑षा॒ रक्ष॑माणा ।
   ब॒र्हिः इ॑व यजु॑षा रक्ष॑माणा ।
   ब॒र्हिर् इव यजु॑षा रक्ष॑माणा ।

Halfverse: c    नम॑स्वन्ता धृतद॒क्षाधि॒ गर्ते॒ मित्रासा॑थे वरु॒णेळा॑स्व॒न्तः ।।
   नम॑स्वन्ता धृतद॒क्षाधि॒ गर्ते
   नम॑स्वन्ता धृतदक्षा अधि गर्ते
   नम॑स्वन्ता धृतद॒क्षाधि गर्ते

Halfverse: d    मित्रासा॑थे वरु॒णेळा॑स्व् ।!। अ॒न्तः ।।
   मित्र आसा॑थे वरुणा इळा॑सु अ॒न्तर् ।।
   मित्रासा॑थे वरु॒णेळा॑सु अ॒न्तः ।।


Verse: 6 
Halfverse: a    अक्र॑विहस्ता सु॒कृते॑ पर॒स्पा यं त्रासा॑थे वरु॒णेळा॑स्व॒न्तः ।
   अक्र॑विहस्ता सु॒कृते॑ पर॒स्पा
   अक्र॑विहस्ता सु॒कृते पर॒स्पा
   अक्र॑विहस्ता सु॒कृते पर॒स्पा

Halfverse: b    यं त्रासा॑थे वरु॒णेळा॑स्व॒न्तः ।
   यम् त्रासा॑थे वरुणा इळा॑सु अ॒न्तर् ।
   यं त्रासा॑थे वरु॒णेळा॑सु अ॒न्तः ।

Halfverse: c    राजा॑ना क्ष॒त्रमहृ॑णीयमाना स॒हस्र॑स्थूणम्बिभृथः स॒ह द्वौ ।।
   राजा॑ना क्ष॒त्रमहृ॑णीयमाना
   राजा॑ना क्ष॒त्रम् अहृ॑णीयमाना
   राजा॑ना क्ष॒त्रम् अहृ॑णीयमाना

Halfverse: d    स॒हस्र॑स्थूणम्बिभृथः स॒ह द्वौ ।।
   स॒हस्र॑स्थूणम् बिभृथः स॒ह द्वौ ।।
   स॒हस्र॑स्थूणम् बिभृथः स॒ह द्वौ ।।


Verse: 7 
Halfverse: a    हिर॑ण्यनिर्णि॒गयो॑ अस्य॒ स्थूणा॒ वि भ्रा॑जते दि॒व्य॒श्वाज॑नीव ।
   हिर॑ण्यनिर्णि॒गयो॑ अस्य॒ स्थूणा
   हिर॑ण्यनिर्णिक् अयः अस्य स्थूणा
   हिर॑ण्यनिर्णिग् अयो अस्य स्थूणा

Halfverse: b    वि भ्रा॑जते दि॒व्य॒श्वाज॑नीव ।
   वि भ्रा॑जते दि॒वि अ॒श्वाज॑नी इव ।
   वि भ्रा॑जते दि॒वि अ॒श्वाज॑नीव ।

Halfverse: c    भ॒द्रे क्षेत्रे॒ निमि॑ता॒ तिल्वि॑ले वा स॒नेम॒ मध्वो॒ अधि॑गर्त्यस्य ।।
   भ॒द्रे क्षेत्रे॒ निमि॑ता॒ तिल्वि॑ले वा
   भ॒द्रे क्षेत्रे निमि॑ता तिल्वि॑ले वा
   भ॒द्रे क्षेत्रे निमि॑ता तिल्वि॑ले वा

Halfverse: d    स॒नेम॒ मध्वो॒ अधि॑गर्त्यस्य ।।
   स॒नेम मध्वः अधि॑गर्त्यस्य ।।
   स॒नेम मध्वो अधि॑गर्तियस्य ।।


Verse: 8 
Halfverse: a    हिर॑ण्यरूपमु॒षसो॒ व्यु॑ष्टा॒वय॑स्थूण॒मुदि॑ता॒ सूर्य॑स्य ।
   हिर॑ण्यरूपमु॒षसो॒ व्यु॑ष्टाव्
   हिर॑ण्यरूपम् उ॒षसः व्यु॑ष्टौ
   हिर॑ण्यरूपम् उ॒षसो विउष्टाव्

Halfverse: b    अय॑स्थूण॒मुदि॑ता॒ सूर्य॑स्य ।
   अय॑स्थूणम् उदि॑ता सूर्य॑स्य ।
   अय॑स्थूणम् उदि॑ता सूरि॑यस्य ।

Halfverse: c    आ रो॑हथो वरुण मित्र॒ गर्त॒मत॑श्चक्षाथे॒ अदि॑तिं॒ दितिं॑ च ।।
   आ रो॑हथो वरुण मित्र॒ गर्त॑म्
   आ रो॑हथः वरुण मित्र गर्त॑म्
   आ रो॑हथो वरुण मित्र गर्त॑म्

Halfverse: d    अत॑श्चक्षाथे॒ अदि॑तिं॒ दितिं॑ च ।।
   अतः चक्षाथे अदि॑तिम् दिति॑म् च ।।
   अत॑श् चक्षाथे अदि॑तिं दितिं च ।।


Verse: 9 
Halfverse: a    यद्बँहि॑ष्ठं॒ नाति॒विधे॑ सुदानू॒ अछि॑द्रं॒ शर्म॑ भुवनस्य गोपा ।
   यद्बँहि॑ष्ठं॒ नाति॒विधे॑ सुदानू
   यत् बंहि॑ष्ठम् न अ॑ति॒विधे सुदानू
   यद् बंहि॑ष्ठं नाति॒विधे सुदानू

Halfverse: b    अछि॑द्रं॒ शर्म॑ भुवनस्य गोपा ।
   अछि॑द्रम् शर्म भुवनस्य गोपा ।
   अछि॑द्रं शर्म भुवनस्य गोपा ।

Halfverse: c    तेन॑ नो मित्रावरुणावविष्टं॒ सिषा॑सन्तो जिगी॒वाँसः॑ स्याम ।।
   तेन॑ नो मित्रावरुणावविष्टं
   तेन नः मित्रावरुणौ अविष्टम्
   तेन नो मित्रावरुणाव् अविष्टं

Halfverse: d    सिषा॑सन्तो जिगी॒वाँसः॑ स्याम ।।
   सिषा॑सन्तः जिगी॒वांसः स्याम ।।
   सिषा॑सन्तो जिगी॒वांसः सियाम ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.