TITUS
Rg-Veda: Rg-Veda-Samhita
Part No. 417
Previous part

Hymn: 63_(417) 
Verse: 1 
Halfverse: a    ऋत॑स्य गोपा॒वधि॑ तिष्ठथो॒ रथं॒ सत्य॑धर्माणा पर॒मे व्यो॑मनि ।
   ऋत॑स्य गोपा॒वधि॑ तिष्ठथो॒ रथं
   ऋत॑स्य गोपौ अधि तिष्ठथः रथ॑म्
   ऋत॑स्य गोपाव् अधि तिष्ठथो रथं

Halfverse: b    सत्य॑धर्माणा पर॒मे व्यो॑मनि ।
   सत्य॑धर्माणा पर॒मे व्यो॑मनि ।
   सत्य॑धर्माणा पर॒मे विओ॑मनि ।

Halfverse: c    यमत्र॑ मित्रावरु॒णाव॑थो यु॒वं तस्मै॑ वृ॒ष्टिर्मधु॑मत्पिन्वते दि॒वः ।।
   यमत्र॑ मित्रावरु॒णाव॑थो यु॒वं
   यम् अत्र मित्रावरुणा अव॑थः यु॒वम्
   यम् अत्र मित्रावरु॒णाव॑थो यु॒वं

Halfverse: d    तस्मै॑ वृ॒ष्टिर्मधु॑मत्पिन्वते दि॒वः ।।
   तस्मै वृ॒ष्टिः मधु॑मत् पिन्वते दि॒वः ।।
   तस्मै वृ॒ष्टिर् मधु॑मत् पिन्वते दि॒वः ।।


Verse: 2 
Halfverse: a    स॒म्राजा॑व॒स्य भुव॑नस्य राजथो॒ मित्रा॑वरुणा वि॒दथे॑ स्व॒र्दृशा॑ ।
   स॒म्राजा॑व॒स्य भुव॑नस्य राजथो
   स॒म्राजौ अ॒स्य भुव॑नस्य राजथः
   स॒म्राजा॑व् अ॒स्य भुव॑नस्य राजथो

Halfverse: b    मित्रा॑वरुणा वि॒दथे॑ स्व॒र्दृशा॑ ।
   मित्रा॑वरुणा वि॒दथे स्व॒र्दृशा ।
   मित्रा॑वरुणा वि॒दथे सुव॒र्दृशा ।

Halfverse: c    वृ॒ष्टिं वां॒ राधो॑ अमृत॒त्वमी॑महे॒ द्यावा॑पृथि॒वी वि च॑रन्ति त॒न्यवः॑ ।।
   वृ॒ष्टिं वां॒ राधो॑ अमृत॒त्वमी॑महे
   वृ॒ष्टिम् वाम् राधः अमृत॒त्वम् ईमहे
   वृ॒ष्टिं वां राधो अमृत॒त्वम् ईमहे

Halfverse: d    द्यावा॑पृथि॒वी वि च॑रन्ति त॒न्यवः॑ ।।
   द्यावा॑पृथि॒वी वि च॑रन्ति त॒न्यवः ।।
   द्यावा॑पृथि॒वी वि च॑रन्ति त॒न्यवः ।।


Verse: 3 
Halfverse: a    स॒म्राजा॑ उ॒ग्रा वृ॑ष॒भा दि॒वस्पती॑ पृथि॒व्या मि॒त्रावरु॑णा॒ विच॑र्षणी ।
   स॒म्राजा॑ उ॒ग्रा वृ॑ष॒भा दि॒वस्पती
   स॒म्राजौ उ॒ग्रा वृ॑ष॒भा दि॒वः पती
   स॒म्राजा उ॒ग्रा वृ॑ष॒भा दि॒वस् पती

Halfverse: b    पृथि॒व्या मि॒त्रावरु॑णा॒ विच॑र्षणी ।
   पृ॑थि॒व्याः मि॒त्रावरु॑णा विच॑र्षणी ।!। ।
   पृ॑थि॒व्या मि॒त्रावरु॑णा विच॑र्षणी ।!। ।

Halfverse: c    चि॒त्रेभि॑र॒भ्रैरुप॑ तिष्ठथो॒ रवं॒ द्यां व॑र्षयथो॒ असु॑रस्य मा॒यया॑ ।।
   चि॒त्रेभि॑र॒भ्रैरुप॑ तिष्ठथो॒ रवं
   चि॒त्रेभिः अ॒भ्रैः उप तिष्ठथः रव॑म्
   चि॒त्रेभि॑र् अ॒भ्रैर् उप तिष्ठथो रवं

Halfverse: d    द्यां व॑र्षयथो॒ असु॑रस्य मा॒यया॑ ।।
   द्याम् वर्षयथः असु॑रस्य मा॒यया ।।
   द्यां व॑र्षयथो असु॑रस्य मा॒यया ।।


Verse: 4 
Halfverse: a    मा॒या वा॑म्मित्रावरुणा दि॒वि श्रि॒ता सूर्यो॒ ज्योति॑श्चरति चि॒त्रमायु॑धम् ।
   मा॒या वा॑म्मित्रावरुणा दि॒वि श्रि॒ता
   मा॒या वा॑म् मित्रावरुणा दि॒वि श्रि॒ता
   मा॒या वा॑म् मित्रावरुणा दि॒वि श्रि॒ता

Halfverse: b    सूर्यो॒ ज्योति॑श्चरति चि॒त्रमायु॑धम् ।
   सूर्यः ज्योतिः चरति चि॒त्रम् आयु॑धम् ।
   सूर्यो ज्योति॑श् चरति चि॒त्रम् आयु॑धम् ।

Halfverse: c    तम॒भ्रेण॑ वृ॒ष्ट्या गू॑हथो दि॒वि पर्ज॑न्य द्र॒प्सा मधु॑मन्त ईरते ।।
   तम॒भ्रेण॑ वृ॒ष्ट्या गू॑हथो दि॒वि
   तम् अ॒भ्रेण वृ॒ष्ट्या गू॑हथः दि॒वि
   तम् अ॒भ्रेण वृष्टि॒या गू॑हथो दि॒वि

Halfverse: d    पर्ज॑न्य द्र॒प्सा मधु॑मन्त ईरते ।।
   पर्ज॑न्य द्र॒प्साः मधु॑मन्तः ईरते ।।
   पर्ज॑न्य द्र॒प्सा मधु॑मन्त ईरते ।।


Verse: 5 
Halfverse: a    रथं॑ युञ्जते म॒रुतः॑ शु॒भे सु॒खं शूरो॒ न मि॑त्रावरुणा॒ गवि॑ष्टिषु ।
   रथं॑ युञ्जते म॒रुतः॑ शु॒भे सु॒खं
   रथ॑म् युञ्जते म॒रुतः शु॒भे सु॒खम्
   रथं युञ्जते म॒रुतः शु॒भे सु॒खं

Halfverse: b    शूरो॒ न मि॑त्रावरुणा॒ गवि॑ष्टिषु ।
   शूरः न मि॑त्रावरुणा गवि॑ष्टिषु ।
   शूरो न मि॑त्रावरुणा गवि॑ष्टिषु ।

Halfverse: c    रजाँ॑सि चि॒त्रा वि च॑रन्ति त॒न्यवो॑ दि॒वः स॑म्राजा॒ पय॑सा न उक्षतम् ।।
   रजाँ॑सि चि॒त्रा वि च॑रन्ति त॒न्यवो
   रजां॑सि चि॒त्रा वि च॑रन्ति त॒न्यवः
   रजां॑सि चि॒त्रा वि च॑रन्ति त॒न्यवो

Halfverse: d    दि॒वः स॑म्राजा॒ पय॑सा न उक्षतम् ।।
   दि॒वः स॑म्राजा पय॑सा नः उक्षतम् ।।
   दि॒वः स॑म्राजा पय॑सा न उक्षतम् ।।


Verse: 6 
Halfverse: a    वाचं॒ सु मि॑त्रावरुणा॒विरा॑वतीम्प॒र्जन्य॑श्चि॒त्रां व॑दति॒ त्विषी॑मतीम् ।
   वाचं॒ सु मि॑त्रावरुणा॒विरा॑वतीम्
   वाच॑म् सु मि॑त्रावरुणौ इरा॑वतीम्
   वाचं सु मि॑त्रावरुणाव् इरा॑वतीम्

Halfverse: b    प॒र्जन्य॑श्चि॒त्रां व॑दति॒ त्विषी॑मतीम् ।
   प॒र्जन्यः चि॒त्राम् वदति त्विषी॑मतीम् ।
   प॒र्जन्य॑श् चि॒त्रां व॑दति त्विषी॑मतीम् ।

Halfverse: c    अ॒भ्रा व॑सत म॒रुतः॒ सु मा॒यया॒ द्यां व॑र्षयतमरु॒णाम॑रे॒पस॑म् ।।
   अ॒भ्रा व॑सत म॒रुतः॒ सु मा॒यया
   अ॒भ्रा व॑सत म॒रुतः सु मा॒यया
   अ॒भ्रा व॑सत म॒रुतः सु मा॒यया

Halfverse: d    द्यां व॑र्षयतमरु॒णाम॑रे॒पस॑म् ।।
   द्याम् वर्षयतम् अरु॒णाम् अरे॒पस॑म् ।।
   द्यां व॑र्षयतम् अरु॒णाम् अरे॒पस॑म् ।।


Verse: 7 
Halfverse: a    धर्म॑णा मित्रावरुणा विपश्चिता व्र॒ता र॑क्षेथे॒ असु॑रस्य मा॒यया॑ ।
   धर्म॑णा मित्रावरुणा विपश्चिता
   धर्म॑णा मित्रावरुणा विपश्चिता
   धर्म॑णा मित्रावरुणा विपश्चिता

Halfverse: b    व्र॒ता र॑क्षेथे॒ असु॑रस्य मा॒यया॑ ।
   व्र॒ता र॑क्षेथे असु॑रस्य मा॒यया ।
   व्र॒ता र॑क्षेथे असु॑रस्य मा॒यया ।

Halfverse: c    ऋ॒तेन॒ विश्व॒म्भुव॑नं॒ वि रा॑जथः॒ सूर्य॒मा ध॑त्थो दि॒वि चित्र्यं॒ रथ॑म् ।।
   ऋ॒तेन॒ विश्व॒म्भुव॑नं॒ वि रा॑जथः
   ऋ॒तेन विश्व॑म् भुव॑नम् वि रा॑जथः
   ऋ॒तेन विश्व॑म् भुव॑नं वि रा॑जथः

Halfverse: d    सूर्य॒मा ध॑त्थो दि॒वि चित्र्यं॒ रथ॑म् ।।
   सूर्य॑म् आ ध॑त्थः दि॒वि चित्र्य॑म् रथ॑म् ।।
   सूर्य॑म् आ ध॑त्थो दि॒वि चित्रि॑यं रथ॑म् ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.