TITUS
Rg-Veda: Rg-Veda-Samhita
Part No. 430
Previous part

Hymn: 76_(430) 
Verse: 1 
Halfverse: a    आ भा॑त्य॒ग्निरु॒षसा॒मनी॑क॒मुद्विप्रा॑णां देव॒या वाचो॑ अस्थुः ।
   आ भा॑त्य॒ग्निरु॒षसा॒मनी॑कम्
   आ भा॑ति अ॒ग्निः उ॒षसा॑म् अनी॑कम्
   आ भा॑ति अ॒ग्निर् उ॒षसा॑म् अनी॑कम्

Halfverse: b    उद्विप्रा॑णां देव॒या वाचो॑ अस्थुः ।
   उत् विप्रा॑णाम् देव॒याः वाचः अस्थुः ।
   उद् विप्रा॑णां देव॒या वाचो अस्थुः ।

Halfverse: c    अ॒र्वाञ्चा॑ नू॒नं र॑थ्ये॒ह या॑तम्पीपि॒वाँस॑मश्विना घ॒र्ममछ॑ ।।
   अ॒र्वाञ्चा॑ नू॒नं र॑थ्ये॒ह या॑तम्
   अ॒र्वाञ्चा नू॒नम् रथ्या इ॒ह या॑तम्
   अ॒र्वाञ्चा नू॒नं र॑थिये॒ह या॑तम्

Halfverse: d    पीपि॒वाँस॑मश्विना घ॒र्ममछ॑ ।।
   पी॑पि॒वांस॑म् अश्विना घ॒र्मम् अछ ।।
   पी॑पि॒वांस॑म् अश्विना घ॒र्मम् अछ ।।


Verse: 2 
Halfverse: a    न सं॑स्कृ॒तम्प्र मि॑मीतो॒ गमि॒ष्ठान्ति॑ नू॒नम॒श्विनोप॑स्तुते॒ह ।
   न सं॑स्कृ॒तम्प्र मि॑मीतो॒ गमि॑ष्ठा
   न सं॑स्कृ॒तम् प्र मि॑मीतः गमि॑ष्ठा
   न सं॑स्कृ॒तम् प्र मि॑मीतो गमि॑ष्ठा

Halfverse: b     अन्ति॑ नू॒नम॒श्विनोप॑स्तुते॒ह ।
   अन्ति नू॒नम् अ॒श्विना उप॑स्तुता इ॒ह ।
   अन्ति नू॒नम् अ॒श्विनोप॑स्तुते॒ह ।

Halfverse: c    दिवा॑भिपि॒त्वे ऽव॒साग॑मिष्ठा॒ प्रत्यव॑र्तिं दा॒शुषे॒ शम्भ॑विष्ठा ।।
   दिवा॑भिपि॒त्वे ऽव॒साग॑मिष्ठा
   दिवा अभिपि॒त्वे अव॑सा आग॑मिष्ठा
   दिवा॑भिपित्वे अव॒साग॑मिष्ठा

Halfverse: d    प्रत्यव॑र्तिं दा॒शुषे॒ शम्भ॑विष्ठा ।।
   प्रति अव॑र्तिम् दा॒शुषे शम्भ॑विष्ठा ।।
   प्रत्य् अव॑र्तिं दा॒शुषे शम्भ॑विष्ठा ।।


Verse: 3 
Halfverse: a    उ॒ता या॑तं संग॒वे प्रा॒तरह्नो॑ म॒ध्यंदि॑न॒ उदि॑ता॒ सूर्य॑स्य ।
   उ॒ता या॑तं संग॒वे प्रा॒तरह्नो
   उ॒त आ या॑तम् संग॒वे प्रा॒तर् अह्नः
   उ॒ता या॑तं संग॒वे प्रा॒तर् अह्नो

Halfverse: b    म॒ध्यंदि॑न॒ उदि॑ता॒ सूर्य॑स्य ।
   म॒ध्यंदि॑ने उदि॑ता सूर्य॑स्य ।
   म॒ध्यंदि॑न उदि॑ता सूरि॑यस्य ।

Halfverse: c    दिवा॒ नक्त॒मव॑सा॒ शंत॑मेन॒ नेदानी॑म्पी॒तिर॒श्विना त॑तान ।।
   दिवा॒ नक्त॒मव॑सा॒ शंत॑मेन
   दिवा नक्त॑म् अव॑सा शंत॑मेन
   दिवा नक्त॑म् अव॑सा शंत॑मेन

Halfverse: d    नेदानी॑म्पी॒तिर॒श्विना त॑तान ।।
   न इ॒दानी॑म् पी॒तिः अ॒श्विना आ त॑तान ।।
   नेदानी॑म् पी॒तिर् अ॒श्विना त॑तान ।।


Verse: 4 
Halfverse: a    इ॒दं हि वा॑म्प्र॒दिवि॒ स्थान॒मोक॑ इ॒मे गृ॒हा अ॑श्विने॒दं दु॑रो॒णम् ।
   इ॒दं हि वा॑म्प्र॒दिवि॒ स्थान॒मोक
   इ॒दम् हि वा॑म् प्र॒दिवि स्थान॑म् ओकः
   इ॒दं हि वा॑म् प्र॒दिवि स्थान॑म् ओक

Halfverse: b    इ॒मे गृ॒हा अ॑श्विने॒दं दु॑रो॒णम् ।
   इ॒मे गृ॒हाः अ॑श्विना इ॒दम् दुरो॒णम् ।
   इ॒मे गृ॒हा अ॑श्विने॒दं दु॑रो॒णम् ।

Halfverse: c    आ नो॑ दि॒वो बृ॑ह॒तः पर्व॑ता॒दाद्भ्यो या॑त॒मिष॒मूर्जं॒ वह॑न्ता ।।
   आ नो॑ दि॒वो बृ॑ह॒तः पर्व॑ता॒दा
   आ नः दि॒वः बृ॑ह॒तः पर्व॑तात् आ
   आ नो दि॒वो बृ॑ह॒तः पर्व॑ताद् आ

Halfverse: d     अ॒द्भ्यो या॑त॒मिष॒मूर्जं॒ वह॑न्ता ।।
   अ॒द्भ्यः या॑तम् इष॑म् ऊर्ज॑म् वह॑न्ता ।।
   अ॒द्भ्यो या॑तम् इष॑म् ऊर्जं वह॑न्ता ।।


Verse: 5 
Halfverse: a    सम॒श्विनो॒रव॑सा॒ नूत॑नेन मयो॒भुवा॑ सु॒प्रणी॑ती गमेम ।
   सम॒श्विनो॒रव॑सा॒ नूत॑नेन
   सम् अ॒श्विनोः अव॑सा नूत॑नेन
   सम् अ॒श्विनो॑र् अव॑सा नूत॑नेन

Halfverse: b    मयो॒भुवा॑ सु॒प्रणी॑ती गमेम ।
   म॑यो॒भुवा सु॒प्रणी॑ती गमेम ।
   म॑यो॒भुवा सु॒प्रणी॑ती गमेम ।

Halfverse: c    आ नो॑ र॒यिं व॑हत॒मोत वी॒राना विश्वा॑न्यमृता॒ सौभ॑गानि ।।
   आ नो॑ र॒यिं व॑हत॒मोत वी॒रान्
   आ नः र॒यिम् वहतम् आ उ॒त वी॒रान्
   आ नो र॒यिं व॑हतम् ओत वी॒रान्

Halfverse: d    आ विश्वा॑न्यमृता॒ सौभ॑गानि ।।
   आ विश्वा॑नि अमृता सौभ॑गानि ।।
   आ विश्वा॑नि अमृता सौभ॑गानि ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.