TITUS
Rg-Veda: Rg-Veda-Samhita
Part No. 435
Previous part

Hymn: 81_(435) 
Verse: 1 
Halfverse: a    यु॒ञ्जते॒ मन॑ उ॒त यु॑ञ्जते॒ धियो॒ विप्रा॒ विप्र॑स्य बृह॒तो वि॑प॒श्चितः॑ ।
   यु॒ञ्जते॒ मन॑ उ॒त यु॑ञ्जते॒ धियो
   यु॒ञ्जते मनः उ॒त यु॑ञ्जते धियः
   यु॒ञ्जते मन उ॒त यु॑ञ्जते धियो

Halfverse: b    विप्रा॒ विप्र॑स्य बृह॒तो वि॑प॒श्चितः॑ ।
   विप्राः विप्र॑स्य बृह॒तः वि॑प॒श्चितः ।
   विप्रा विप्र॑स्य बृह॒तो वि॑प॒श्चितः ।

Halfverse: c    वि होत्रा॑ दधे वयुना॒विदेक॒ इन्म॒ही दे॒वस्य॑ सवि॒तुः परि॑ष्टुतिः ।।
   वि होत्रा॑ दधे वयुना॒विदेक॒ इन्
   वि होत्राः दधे वयुना॒वित् एकः इत्
   वि होत्रा दधे वयुना॒विद् एक इन्

Halfverse: d    म॒ही दे॒वस्य॑ सवि॒तुः परि॑ष्टुतिः ।।
   म॒ही दे॒वस्य सवि॒तुः परि॑ष्टुतिः ।।
   म॒ही दे॒वस्य सवि॒तुः परि॑ष्टुतिः ।।


Verse: 2 
Halfverse: a    विश्वा॑ रू॒पाणि॒ प्रति॑ मुञ्चते क॒विः प्रासा॑वीद्भ॒द्रं द्वि॒पदे॒ चतु॑ष्पदे ।
   विश्वा॑ रू॒पाणि॒ प्रति॑ मुञ्चते क॒विः
   विश्वा रू॒पाणि प्रति मुञ्चते क॒विः
   विश्वा रू॒पाणि प्रति मुञ्चते क॒विः

Halfverse: b    प्रासा॑वीद्भ॒द्रं द्वि॒पदे॒ चतु॑ष्पदे ।
   प्र अ॑सावीत् भ॒द्रम् द्वि॒पदे चतु॑ष्पदे ।
   प्रासा॑वीद् भ॒द्रं द्वि॒पदे चतु॑ष्पदे ।

Halfverse: c    वि नाक॑मख्यत्सवि॒ता वरे॒ण्यो ऽनु॑ प्र॒याण॑मु॒षसो॒ वि रा॑जति ।।
   वि नाक॑मख्यत्सवि॒ता वरे॒ण्यो
   वि नाक॑म् अख्यत् सवि॒ता वरे॑ण्यः
   वि नाक॑म् अख्यत् सवि॒ता वरे॑णियो

Halfverse: d    ऽनु प्र॒याण॑मु॒षसो॒ वि रा॑जति ।।
   अनु प्र॒याण॑म् उ॒षसः वि रा॑जति ।।
   अनु प्र॒याण॑म् उ॒षसो वि रा॑जति ।।


Verse: 3 
Halfverse: a    यस्य॑ प्र॒याण॒मन्व॒न्य इद्य॒युर्दे॒वा दे॒वस्य॑ महि॒मान॒मोज॑सा ।
   यस्य॑ प्र॒याण॒मन्व॒न्य इद्य॒युर्
   यस्य प्र॒याण॑म् अनु अ॒न्ये इत् य॒युः
   यस्य प्र॒याण॑म् अनु अ॒न्य इद् य॒युर्

Halfverse: b    दे॒वा दे॒वस्य॑ महि॒मान॒मोज॑सा ।
   दे॒वाः दे॒वस्य महि॒मान॑म् ओज॑सा ।
   दे॒वा दे॒वस्य महि॒मान॑म् ओज॑सा ।

Halfverse: c    यः पार्थि॑वानि विम॒मे स एत॑शो॒ रजाँ॑सि दे॒वः स॑वि॒ता म॑हित्व॒ना ।।
   यः पार्थि॑वानि विम॒मे स एत॑शो
   यः पार्थि॑वानि विम॒मे सः ।!। एत॑शः
   यः पार्थि॑वानि विम॒मे स एत॑शो

Halfverse: d    रजाँ॑सि दे॒वः स॑वि॒ता म॑हित्व॒ना ।।
   रजां॑सि दे॒वः स॑वि॒ता म॑हित्व॒ना ।।
   रजां॑सि दे॒वः स॑वि॒ता म॑हित्व॒ना ।।


Verse: 4 
Halfverse: a    उ॒त या॑सि सवित॒स्त्रीणि॑ रोच॒नोत सूर्य॑स्य र॒श्मिभिः॒ समु॑च्यसि ।
   उ॒त या॑सि सवित॒स्त्रीणि॑ रोच॒ना
   उ॒त या॑सि सवितर् त्रीणि रोच॒ना
   उ॒त या॑सि सवितस् त्रीणि रोच॒ना

Halfverse: b     उ॒त सूर्य॑स्य र॒श्मिभिः॒ समु॑च्यसि ।
   उ॒त सूर्य॑स्य र॒श्मिभिः सम् उच्यसि ।
   उ॒त सूर्य॑स्य र॒श्मिभिः सम् उच्यसि ।

Halfverse: c    उ॒त रात्री॑मुभ॒यतः॒ परी॑यस उ॒त मि॒त्रो भ॑वसि देव॒ धर्म॑भिः ।।
   उ॒त रात्री॑मुभ॒यतः॒ परी॑यस
   उ॒त रात्री॑म् उभ॒यतः परि ईयसे
   उ॒त रात्री॑म् उभ॒यतः परी॑यस

Halfverse: d    उ॒त मि॒त्रो भ॑वसि देव॒ धर्म॑भिः ।।
   उ॒त मि॒त्रः भ॑वसि देव धर्म॑भिः ।।
   उ॒त मि॒त्रो भ॑वसि देव धर्म॑भिः ।।


Verse: 5 
Halfverse: a    उ॒तेशि॑षे प्रस॒वस्य॒ त्वमेक॒ इदु॒त पू॒षा भ॑वसि देव॒ याम॑भिः ।
   उ॒तेशि॑षे प्रस॒वस्य॒ त्वमेक॒ इद्
   उ॒त ई॑शिषे प्रस॒वस्य त्वम् एकः इत्
   उ॒तेशि॑षे प्रस॒वस्य त्वम् एक इद्

Halfverse: b    उ॒त पू॒षा भ॑वसि देव॒ याम॑भिः ।
   उ॒त पू॒षा भ॑वसि देव याम॑भिः ।
   उ॒त पू॒षा भ॑वसि देव याम॑भिः ।

Halfverse: c    उ॒तेदं विश्व॒म्भुव॑नं॒ वि रा॑जसि श्या॒वाश्व॑स्ते सवित॒ स्तोम॑मानशे ।।
   उ॒तेदं विश्व॒म्भुव॑नं॒ वि रा॑जसि
   उ॒त इ॒दम् विश्व॑म् भुव॑नम् वि रा॑जसि
   उ॒तेदं विश्व॑म् भुव॑नं वि रा॑जसि

Halfverse: d    श्या॒वाश्व॑स्ते सवित॒ स्तोम॑मानशे ।।
   श्या॒वाश्वः ते सवितर् स्तोम॑म् आनशे ।।
   श्या॒वाश्व॑स् ते सवित स्तोम॑म् आनशे ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.