TITUS
Rg-Veda: Rg-Veda-Samhita
Part No. 437
Previous part

Hymn: 83_(437) 
Verse: 1 
Halfverse: a    अछा॑ वद त॒वसं॑ गी॒र्भिरा॒भि स्तु॒हि प॒र्जन्यं॒ नम॒सा वि॑वास ।
   अछा॑ वद त॒वसं॑ गी॒र्भिरा॒भि
   अछ+ वद त॒वस॑म् गी॒र्भिः आ॒भिः
   अछा वद त॒वसं गी॒र्भिर् आ॒भिः

Halfverse: b    स्तु॒हि प॒र्जन्यं॒ नम॒सा वि॑वास ।
   स्तु॒हि प॒र्जन्य॑म् नम॑सा आ वि॑वास ।
   स्तु॒हि प॒र्जन्यं नम॒सा वि॑वास ।

Halfverse: c    कनि॑क्रदद्वृष॒भो जी॒रदा॑नू॒ रेतो॑ दधा॒त्योष॑धीषु॒ गर्भ॑म् ।।
   कनि॑क्रदद्वृष॒भो जी॒रदा॑नू
   कनि॑क्रदत् वृष॒भः जी॒रदा॑नुः
   कनि॑क्रदद् वृष॒भो जी॒रदा॑नू

Halfverse: d    रेतो॑ दधा॒त्योष॑धीषु॒ गर्भ॑म् ।।
   रेतः दधाति ओष॑धीषु गर्भ॑म् ।।
   रेतो दधाति ओष॑धीषु गर्भ॑म् ।।


Verse: 2 
Halfverse: a    वि वृ॒क्षान्ह॑न्त्यु॒त ह॑न्ति र॒क्षसो॒ विश्व॑म्बिभाय॒ भुव॑नम्म॒हाव॑धात् ।
   वि वृ॒क्षान्ह॑न्त्यु॒त ह॑न्ति र॒क्षसो
   वि वृ॒क्षान् हन्ति उ॒त ह॑न्ति र॒क्षसः
   वि वृ॒क्षान् हन्ति उ॒त ह॑न्ति र॒क्षसो

Halfverse: b    विश्व॑म्बिभाय॒ भुव॑नम्म॒हाव॑धात् ।
   विश्व॑म् बिभाय भुव॑नम् म॒हाव॑धात् ।
   विश्व॑म् बिभाय भुव॑नम् म॒हाव॑धात् ।

Halfverse: c    उ॒ताना॑गा ईषते॒ वृष्ण्या॑वतो॒ यत्प॒र्जन्य॑ स्त॒नय॒न्हन्ति॑ दु॒ष्कृतः॑ ।।
   उ॒ताना॑गा ईषते॒ वृष्ण्या॑वतो
   उ॒त अना॑गाः ईषते वृष्ण्या॑वतः
   उ॒ताना॑गा ईषते वृष्णि॑यावतो

Halfverse: d    यत्प॒र्जन्य॑ स्त॒नय॒न्हन्ति॑ दु॒ष्कृतः॑ ।।
   यत् प॒र्जन्यः स्त॒नय॑न् हन्ति दु॒ष्कृतः ।।
   यत् प॒र्जन्य स्त॒नय॑न् हन्ति दु॒ष्कृतः ।।


Verse: 3 
Halfverse: a    र॒थीव॒ कश॒याश्वाँ॑ अभिक्षि॒पन्ना॒विर्दू॒तान्कृ॑णुते व॒र्ष्याँ॒ अह॑ ।
   र॒थीव॒ कश॒याश्वाँ॑ अभिक्षि॒पन्न्
   र॒थी इ॑व कश॑या अश्वा॑न् अभिक्षि॒पन्
   र॒थी इ॑व कश॒याश्वाँ अभिक्षि॒पन्न्

Halfverse: b    आ॒विर्दू॒तान्कृ॑णुते व॒र्ष्याँ॒ अह॑ ।
   आ॒विः दू॒तान् कृणुते व॒र्ष्या॑न् अह ।
   आ॒विर् दू॒तान् कृणुते व॒र्षियाँ अह ।

Halfverse: c    दू॒रात्सिँ॒हस्य॑ स्त॒नथा॒ उदी॑रते॒ यत्प॒र्जन्यः॑ कृणु॒ते व॒र्ष्यं॒ नभः॑ ।।
   दू॒रात्सिँ॒हस्य॑ स्त॒नथा॒ उदी॑रते
   दू॒रात् सिं॒हस्य स्त॒नथाः उत् ईरते
   दू॒रात् सिं॒हस्य स्त॒नथा उद् ईरते

Halfverse: d    यत्प॒र्जन्यः॑ कृणु॒ते व॒र्ष्यं॒ नभः॑ ।।
   यत् प॒र्जन्यः कृणु॒ते व॒र्ष्य॑म् नभः ।।
   यत् प॒र्जन्यः कृणु॒ते व॒र्षियं नभः ।।


Verse: 4 
Halfverse: a    प्र वाता॒ वान्ति॑ प॒तय॑न्ति वि॒द्युत॒ उदोष॑धी॒र्जिह॑ते॒ पिन्व॑ते॒ स्वः॑ ।
   प्र वाता॒ वान्ति॑ प॒तय॑न्ति वि॒द्युत
   प्र वाताः वान्ति प॒तय॑न्ति वि॒द्युतः
   प्र वाता वान्ति प॒तय॑न्ति वि॒द्युत

Halfverse: b    उदोष॑धी॒र्जिह॑ते॒ पिन्व॑ते॒ स्वः॑ ।
   उत् ओष॑धीः जिह॑ते पिन्व॑ते स्व॑र् ।
   उद् ओष॑धीर् जिह॑ते पिन्व॑ते सुवः ।

Halfverse: c    इरा॒ विश्व॑स्मै॒ भुव॑नाय जायते॒ यत्प॒र्जन्यः॑ पृथि॒वीं रेत॒साव॑ति ।।
   इरा॒ विश्व॑स्मै॒ भुव॑नाय जायते
   इरा विश्व॑स्मै भुव॑नाय जायते
   इरा विश्व॑स्मै भुव॑नाय जायते

Halfverse: d    यत्प॒र्जन्यः॑ पृथि॒वीं रेत॒साव॑ति ।।
   यत् प॒र्जन्यः पृथि॒वीम् रेत॑सा अव॑ति ।।
   यत् प॒र्जन्यः पृथि॒वीं रेत॒साव॑ति ।।


Verse: 5 
Halfverse: a    यस्य॑ व्र॒ते पृ॑थि॒वी नन्न॑मीति॒ यस्य॑ व्र॒ते श॒पव॒ज्जर्भु॑रीति ।
   यस्य॑ व्र॒ते पृ॑थि॒वी नन्न॑मीति
   यस्य व्र॒ते पृ॑थि॒वी नन्न॑मीति
   यस्य व्र॒ते पृ॑थि॒वी नन्न॑मीति

Halfverse: b    यस्य॑ व्र॒ते श॒पव॒ज्जर्भु॑रीति ।
   यस्य व्र॒ते श॒पव॑त् जर्भु॑रीति ।
   यस्य व्र॒ते श॒पव॑ज् जर्भु॑रीति ।

Halfverse: c    यस्य॑ व्र॒त ओष॑धीर्वि॒श्वरू॑पाः॒ स नः॑ पर्जन्य॒ महि॒ शर्म॑ यछ ।।
   यस्य॑ व्र॒त ओष॑धीर्वि॒श्वरू॑पाः
   यस्य व्र॒ते ओष॑धीः वि॒श्वरू॑पाः
   यस्य व्र॒त ओष॑धीर् वि॒श्वरू॑पाः

Halfverse: d    स नः॑ पर्जन्य॒ महि॒ शर्म॑ यछ ।।
   स नः पर्जन्य महि शर्म यछ ।।
   स नः पर्जन्य महि शर्म यछ ।।


Verse: 6 
Halfverse: a    दि॒वो नो॑ वृ॒ष्टिम्म॑रुतो ररीध्व॒म्प्र पि॑न्वत॒ वृष्णो॒ अश्व॑स्य॒ धाराः॑ ।
   दि॒वो नो॑ वृ॒ष्टिम्म॑रुतो ररीध्वम्
   दि॒वः नः वृ॒ष्टिम् मरुतः ररीध्वम्
   दि॒वो नो वृ॒ष्टिम् मरुतो ररीध्वम्

Halfverse: b    प्र पि॑न्वत॒ वृष्णो॒ अश्व॑स्य॒ धाराः॑ ।
   प्र पि॑न्वत वृष्णः अश्व॑स्य धाराः ।
   प्र पि॑न्वत वृष्णो अश्व॑स्य धाराः ।

Halfverse: c    अ॒र्वाङे॒तेन॑ स्तनयि॒त्नुनेह्य॒पो नि॑षि॒ञ्चन्नसु॑रः पि॒ता नः॑ ।।
   अ॒र्वाङे॒तेन॑ स्तनयि॒त्नुनेह्य्
   अ॒र्वाङ् ए॒तेन स्तनयि॒त्नुना आ इ॑हि
   अ॒र्वाङ् ए॒तेन स्तनयि॒त्नुनेहि

Halfverse: d    अ॒पो नि॑षि॒ञ्चन्नसु॑रः पि॒ता नः॑ ।।
   अ॒पः नि॑षि॒ञ्चन् असु॑रः पि॒ता नः ।।
   अ॒पो नि॑षि॒ञ्चन्न् असु॑रः पि॒ता नः ।।


Verse: 7 
Halfverse: a    अ॒भि क्र॑न्द स्त॒नय॒ गर्भ॒मा धा॑ उद॒न्वता॒ परि॑ दीया॒ रथे॑न ।
   अ॒भि क्र॑न्द स्त॒नय॒ गर्भ॒मा धा
   अ॒भि क्र॑न्द स्त॒नय गर्भ॑म् आ धाः
   अ॒भि क्र॑न्द स्त॒नय गर्भ॑म् आ धा

Halfverse: b    उद॒न्वता॒ परि॑ दीया॒ रथे॑न ।
   उ॑द॒न्वता परि दीय+ रथे॑न ।
   उ॑द॒न्वता परि दीया रथे॑न ।

Halfverse: c    दृतिं॒ सु क॑र्ष॒ विषि॑तं॒ न्य॑ञ्चं स॒मा भ॑वन्तू॒द्वतो॑ निपा॒दाः ।।
   दृतिं॒ सु क॑र्ष॒ विषि॑तं॒ न्य॑ञ्चं
   दृति॑म् सु क॑र्ष विषि॑तम् न्य॑ञ्चम्
   दृतिं सु क॑र्ष विषि॑तं निअञ्चं

Halfverse: d    स॒मा भ॑वन्तू॒द्वतो॑ निपा॒दाः ।।
   स॒माः भ॑वन्तु उ॒द्वतः निपा॒दाः ।।
   स॒मा भ॑वन्तु उ॒द्वतो निपा॒दाः ।।


Verse: 8 
Halfverse: a    म॒हान्तं॒ कोश॒मुद॑चा॒ नि षि॑ञ्च॒ स्यन्द॑न्तां कु॒ल्या विषि॑ताः पु॒रस्ता॑त् ।
   म॒हान्तं॒ कोश॒मुद॑चा॒ नि षि॑ञ्च
   म॒हान्त॑म् कोश॑म् उत् अच+ नि सि॑ञ्च
   म॒हान्तं कोश॑म् उद् अचा नि षि॑ञ्च

Halfverse: b    स्यन्द॑न्तां कु॒ल्या विषि॑ताः पु॒रस्ता॑त् ।
   स्यन्द॑न्ताम् कु॒ल्याः विषि॑ताः पु॒रस्ता॑त् ।
   स्यन्द॑न्तां कु॒ल्या विषि॑ताः पु॒रस्ता॑त् ।

Halfverse: c    घृ॒तेन॒ द्यावा॑पृथि॒वी व्यु॑न्धि सुप्रपा॒णम्भ॑वत्व॒घ्न्याभ्यः॑ ।।
   घृ॒तेन॒ द्यावा॑पृथि॒वी व्यु॑न्धि
   घृ॒तेन द्यावा॑पृथि॒वी वि उ॑न्धि
   घृ॒तेन द्यावा॑पृथि॒वी वि उ॑न्धि

Halfverse: d    सुप्रपा॒णम्भ॑वत्व॒घ्न्याभ्यः॑ ।।
   सु॑प्रपा॒णम् भवतु अ॒घ्न्याभ्यः ।।
   सु॑प्रपा॒णम् भवतु अघ्नि॒याभ्यः ।।


Verse: 9 
Halfverse: a    यत्प॑र्जन्य॒ कनि॑क्रदत्स्त॒नय॒न्हँसि॑ दु॒ष्कृतः॑ ।
   यत्प॑र्जन्य॒ कनि॑क्रदत्
   यत् पर्जन्य कनि॑क्रदत्
   यत् पर्जन्य कनि॑क्रदत्

Halfverse: b    स्त॒नय॒न्हँसि॑ दु॒ष्कृतः॑ ।
   स्त॒नय॑न् हंसि दु॒ष्कृतः ।
   स्त॒नय॑न् हंसि दु॒ष्कृतः ।

Halfverse: c    प्रती॒दं विश्व॑म्मोदते॒ यत्किं च॑ पृथि॒व्यामधि॑ ।।
   प्रती॒दं विश्व॑म्मोदते
   प्रति इ॒दम् विश्व॑म् मोदते
   प्रती॒दं विश्व॑म् मोदते

Halfverse: d    यत्किं च॑ पृथि॒व्यामधि॑ ।।
   यत् किम् च पृथि॒व्याम् अधि ।।
   यत् किं च पृथि॒व्याम् अधि ।।


Verse: 10 
Halfverse: a    अव॑र्षीर्व॒र्षमुदु॒ षू गृ॑भा॒याक॒र्धन्वा॒न्यत्ये॑त॒वा उ॑ ।
   अव॑र्षीर्व॒र्षमुदु॒ षू गृ॑भाय
   अव॑र्षीः व॒र्षम् उत् उ सु+ गृ॑भाय
   अव॑र्षीर् व॒र्षम् उद् उ षू गृ॑भाय

Halfverse: b     अक॒र्धन्वा॒न्यत्ये॑त॒वा उ॑ ।
   अक॑र् धन्वा॑नि अत्ये॑त॒वै उ ।
   अक॑र् धन्वा॑नि अतिए॑त॒वा उ ।

Halfverse: c    अजी॑जन॒ ओष॑धी॒र्भोज॑नाय॒ कमु॒त प्र॒जाभ्यो॑ ऽविदो मनी॒षाम् ।।
   अजी॑जन॒ ओष॑धी॒र्भोज॑नाय॒ कम्
   अजी॑जनः ओष॑धीः भोज॑नाय कम्
   अजी॑जन ओष॑धीर् भोज॑नाय कम्

Halfverse: d    उ॒त प्र॒जाभ्यो॑ ऽविदो मनी॒षाम् ।।
   उ॒त प्र॒जाभ्यः अविदः मनी॒षाम् ।।
   उ॒त प्र॒जाभ्यो अविदो मनी॒षाम् ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.