TITUS
Rg-Veda: Rg-Veda-Samhita
Part No. 441
Previous part

Hymn: 87_(441) 
Verse: 1 
Halfverse: a    प्र वो॑ म॒हे म॒तयो॑ यन्तु॒ विष्ण॑वे म॒रुत्व॑ते गिरि॒जा ए॑व॒याम॑रुत् ।
   प्र वो॑ म॒हे म॒तयो॑ यन्तु॒ विष्ण॑वे
   प्र वः म॒हे म॒तयः यन्तु विष्ण॑वे
   प्र वो म॒हे म॒तयो यन्तु विष्ण॑वे

Halfverse: b    म॒रुत्व॑ते गिरि॒जा ए॑व॒याम॑रुत् ।
   म॒रुत्व॑ते गिरि॒जाः ए॑व॒याम॑रुत् ।
   म॒रुत्व॑ते गिरि॒जा ए॑व॒याम॑रुत् ।

Halfverse: c    प्र शर्धा॑य॒ प्रय॑ज्यवे सुखा॒दये॑ त॒वसे॑ भ॒न्ददि॑ष्टये॒ धुनि॑व्रताय॒ शव॑से ।।
   प्र शर्धा॑य॒ प्रय॑ज्यवे सुखा॒दये
   प्र शर्धा॑य प्रय॑ज्यवे सुखा॒दये
   प्र शर्धा॑य प्रय॑ज्यवे सुखा॒दये

Halfverse: d    त॒वसे॑ भ॒न्ददि॑ष्टये
   त॒वसे भ॒न्ददि॑ष्टये
   त॒वसे भ॒न्ददि॑ष्टये

Halfverse: e    धुनि॑व्रताय॒ शव॑से ।।
   धुनि॑व्रताय शव॑से ।।
   धुनि॑व्रताय शव॑से ।।


Verse: 2 
Halfverse: a    प्र ये जा॒ता म॑हि॒ना ये च॒ नु स्व॒यम्प्र वि॒द्मना॑ ब्रु॒वत॑ एव॒याम॑रुत् ।
   प्र ये जा॒ता म॑हि॒ना ये च॒ नु स्व॒यम्
   प्र ये जा॒ताः म॑हि॒ना ये च नु स्व॒यम्
   प्र ये जा॒ता म॑हि॒ना ये च नु स्व॒यम्

Halfverse: b    प्र वि॒द्मना॑ ब्रु॒वत॑ एव॒याम॑रुत् ।
   प्र वि॒द्मना ब्रु॒वते एव॒याम॑रुत् ।
   प्र वि॒द्मना ब्रु॒वत एव॒याम॑रुत् ।

Halfverse: c    क्रत्वा॒ तद्वो॑ मरुतो॒ नाधृषे॒ शवो॑ दा॒ना म॒ह्ना तदे॑षा॒मधृ॑ष्टासो॒ नाद्र॑यः ।।
   क्रत्वा॒ तद्वो॑ मरुतो॒ नाधृषे॒ शवो
   क्रत्वा तत् वः मरुतः न आ॒धृषे शवः
   क्रत्वा तद् वो मरुतो नाधृषे शवो

Halfverse: d    दा॒ना म॒ह्ना तदे॑षाम्
   दा॒ना म॒ह्ना तत् एषाम्
   दा॒ना म॒ह्ना तद् एषाअम्

Halfverse: e    अधृ॑ष्टासो॒ नाद्र॑यः ।।
   अधृ॑ष्टासः न अद्र॑यः ।।
   अधृ॑ष्टासो न अद्र॑यः ।।


Verse: 3 
Halfverse: a    प्र ये दि॒वो बृ॑ह॒तः शृ॑ण्वि॒रे गि॒रा सु॒शुक्वा॑नः सु॒भ्व॑ एव॒याम॑रुत् ।
   प्र ये दि॒वो बृ॑ह॒तः शृ॑ण्वि॒रे गि॒रा
   प्र ये दि॒वः बृ॑ह॒तः शृ॑ण्वि॒रे गि॒रा
   प्र ये दि॒वो बृ॑ह॒तः शृ॑ण्वि॒रे गि॒रा

Halfverse: b    सु॒शुक्वा॑नः सु॒भ्व॑ एव॒याम॑रुत् ।
   सु॒शुक्वा॑नः सु॒भ्वः एव॒याम॑रुत् ।
   सु॒शुक्वा॑नः सु॒भुव एव॒याम॑रुत् ।

Halfverse: c    न येषा॒मिरी॑ स॒धस्थ॒ ईष्ट॒ आँ अ॒ग्नयो॒ न स्ववि॑द्युतः॒ प्र स्य॒न्द्रासो॒ धुनी॑नाम् ।।
   न येषा॒मिरी॑ स॒धस्थ॒ ईष्ट॒ आँ
   न येषा॑म् इरी स॒धस्थे ईष्टे आ
   न येषाअ॑म् इरी स॒धस्थ ईष्ट आँ

Halfverse: d    अ॒ग्नयो॒ न स्ववि॑द्युतः
   अ॒ग्नयः न स्ववि॑द्युतः
   अ॒ग्नयो न स्ववि॑द्युतः

Halfverse: e    प्र स्य॒न्द्रासो॒ धुनी॑नाम् ।।
   प्र स्य॒न्द्रासः धुनी॑नाम् ।।
   प्र स्य॒न्द्रासो धुनी॑नाअम् ।।


Verse: 4 
Halfverse: a    स च॑क्रमे मह॒तो निरु॑रुक्र॒मः स॑मा॒नस्मा॒त्सद॑स एव॒याम॑रुत् ।
   स च॑क्रमे मह॒तो निरु॑रुक्र॒मः
   स च॑क्रमे मह॒तः निः उ॑रुक्र॒मः
   स च॑क्रमे मह॒तो निर् उरुक्र॒मः

Halfverse: b    स॑मा॒नस्मा॒त्सद॑स एव॒याम॑रुत् ।
   स॑मा॒नस्मा॑त् सद॑सः एव॒याम॑रुत् ।
   स॑मा॒नस्मा॑त् सद॑स एव॒याम॑रुत् ।

Halfverse: c    य॒दायु॑क्त॒ त्मना॒ स्वादधि॒ ष्णुभि॒र्विष्प॑र्धसो॒ विम॑हसो॒ जिगा॑ति॒ शेवृ॑धो॒ नृभिः॑ ।।
   य॒दायु॑क्त॒ त्मना॒ स्वादधि॒ ष्णुभि॑र्
   य॒दा अयु॑क्त त्मना स्वात् अधि स्नुभिः
   य॒दायु॑क्त त्मना सु॒वाद् अधि ष्णुभि॑र्

Halfverse: d    विष्प॑र्धसो॒ विम॑हसो
   विष्प॑र्धसः विम॑हसः
   विष्प॑र्धसो विम॑हसो

Halfverse: e    जिगा॑ति॒ शेवृ॑धो॒ नृभिः॑ ।।
   जिगा॑ति शेवृ॑धः नृभिः ।।
   जिगा॑ति शेवृ॑धो नृभिः ।।


Verse: 5 
Halfverse: a    स्व॒नो न वो ऽम॑वान्रेजय॒द्वृषा॑ त्वे॒षो य॒यिस्त॑वि॒ष ए॑व॒याम॑रुत् ।
   स्व॒नो न वो ऽम॑वान्रेजय॒द्वृषा
   स्व॒नः न वः अम॑वान् रेजयत् वृषा
   स्व॒नो न वो अम॑वान् रेजयद् वृषा

Halfverse: b    त्वे॒षो य॒यिस्त॑वि॒ष ए॑व॒याम॑रुत् ।
   त्वे॒षः य॒यिः त॑वि॒षः ए॑व॒याम॑रुत् ।
   त्वे॒षो य॒यिस् तवि॒ष ए॑व॒याम॑रुत् ।

Halfverse: c    येना॒ सह॑न्त ऋ॒ञ्जत॒ स्वरो॑चिष॒ स्थार॑श्मानो हिर॒ण्ययाः॑ स्वायु॒धास॑ इ॒ष्मिणः॑ ।।
   येना॒ सह॑ न्तऋ॒ञ्जत॒ स्वरो॑चिष
   येन+ सह॑न्तः ऋ॒ञ्जत स्वरो॑चिषः
   येना सह॑न्त ऋ॒ञ्जत स्वरो॑चिष

Halfverse: d    स्थार॑श्मानो हिर॒ण्ययाः
   स्थार॑श्मानः हिर॒ण्ययाः
   स्थार॑श्मानो हिर॒ण्ययाः

Halfverse: e    स्वायु॒धास॑ इ॒ष्मिणः॑ ।।
   स्वा॑यु॒धासः इ॒ष्मिणः ।।
   सुआ॑यु॒धास इ॒ष्मिणः ।।


Verse: 6 
Halfverse: a    अ॑पा॒रो वो॑ महि॒मा वृ॑द्धशवसस्त्वे॒षं शवो॑ ऽवत्वेव॒याम॑रुत् ।
   अ॑पा॒रो वो॑ महि॒मा वृ॑द्धशवसस्
   अपा॒रः वः महि॒मा वृ॑द्धशवसः
   अपा॒रो वो महि॒मा वृ॑द्धशवसस्

Halfverse: b    त्वे॒षं शवो॑ ऽवत्वेव॒याम॑रुत् ।
   त्वे॒षम् शवः अवतु एव॒याम॑रुत् ।
   त्वे॒षं शवो अवतु एव॒याम॑रुत् ।

Halfverse: c    स्थाता॑रो॒ हि प्रसि॑तौ सं॒दृशि॒ स्थन॒ ते न॑ उरुष्यता नि॒दः शु॑शु॒क्वाँसो॒ नाग्नयः॑ ।।
   स्थाता॑रो॒ हि प्रसि॑तौ सं॒दृशि॒ स्थन
   स्थाता॑रः हि प्रसि॑तौ सं॒दृशि स्थन
   स्थाता॑रो हि प्रसि॑तौ सं॒दृशि स्थन

Halfverse: d    ते न॑ उरुष्यता नि॒दः
   ते नः उरुष्यत+ नि॒दः
   ते न उरुष्यता नि॒दः

Halfverse: e    शु॑शु॒क्वाँसो॒ नाग्नयः॑ ।।
   शु॑शु॒क्वांसः न अ॒ग्नयः ।।
   शु॑शु॒क्वांसो न अ॒ग्नयः ।।


Verse: 7 
Halfverse: a    ते रु॒द्रासः॒ सुम॑खा अ॒ग्नयो॑ यथा तुविद्यु॒म्ना अ॑वन्त्वेव॒याम॑रुत् ।
   ते रु॒द्रासः॒ सुम॑खा अ॒ग्नयो॑ यथा
   ते रु॒द्रासः सुम॑खाः अ॒ग्नयः यथा
   ते रु॒द्रासः सुम॑खा अ॒ग्नयो यथा

Halfverse: b    तुविद्यु॒म्ना अ॑वन्त्वेव॒याम॑रुत् ।
   तु॑विद्यु॒म्नाः अ॑वन्तु एव॒याम॑रुत् ।
   तु॑विद्यु॒म्ना अ॑वन्तु एव॒याम॑रुत् ।

Halfverse: c    दी॒र्घम्पृ॒थु प॑प्रथे॒ सद्म॒ पार्थि॑वं॒ येषा॒मज्मे॒ष्वा म॒हः शर्धाँ॒स्यद्भु॑तैनसाम् ।।
   दी॒र्घम्पृ॒थु प॑प्रथे॒ सद्म॒ पार्थि॑वं
   दी॒र्घम् पृ॒थु प॑प्रथे सद्म पार्थि॑वम्
   दी॒र्घम् पृ॒थु प॑प्रथे सद्म पार्थि॑वं

Halfverse: d    येषा॒मज्मे॒ष्वा म॒हः
   येषा॑म् अज्मे॑षु आ म॒हः
   येषा॑म् अज्मे॑षु आ म॒हः

Halfverse: e    शर्धाँ॒स्यद्भु॑तैनसाम् ।।
   शर्धां॑सि अद्भु॑तैनसाम् ।।
   शर्धां॑सि अद्भु॑तैनसाम् ।।


Verse: 8 
Halfverse: a    अ॑द्वे॒षो नो॑ मरुतो गा॒तुमेत॑न॒ श्रोता॒ हवं॑ जरि॒तुरे॑व॒याम॑रुत् ।
   अ॑द्वे॒षो नो॑ मरुतो गा॒तुमेत॑न
   अद्वे॒षः नः मरुतः गा॒तुम् आ इ॑तन
   अद्वे॒षो नो मरुतो गा॒तुम् एत॑न

Halfverse: b    श्रोता॒ हवं॑ जरि॒तुरे॑व॒याम॑रुत् ।
   श्रोत+ हव॑म् जरि॒तुः ए॑व॒याम॑रुत् ।
   श्रोता हवं जरि॒तुर् एव॒याम॑रुत् ।

Halfverse: c    विष्णो॑र्म॒हः स॑मन्यवो युयोतन॒ स्मद्र॒थ्यो॒ न दं॒सनाप॒ द्वेषाँ॑सि सनु॒तः ।।
   विष्णो॑र्म॒हः स॑मन्यवो युयोतन
   विष्णोः म॒हः स॑मन्यवः युयोतन
   विष्णो॑र् म॒हः स॑मन्यवो युयोतन

Halfverse: d    स्मद्र॒थ्यो॒ न दं॒सना
   स्मत् र॒थ्यः न दं॒सना
   स्मद् र॒थियो न दं॒सना

Halfverse: e     अप॒ द्वेषाँ॑सि सनु॒तः ।।
   अप द्वेषां॑सि सनु॒तर् ।।
   अप द्वेषां॑सि सनु॒तः ।।


Verse: 9 
Halfverse: a    गन्ता॑ नो य॒ज्ञं य॑ज्ञियाः सु॒शमि॒ श्रोता॒ हव॑मर॒क्ष ए॑व॒याम॑रुत् ।
   गन्ता॑ नो य॒ज्ञं य॑ज्ञियाः सु॒शमि
   गन्त+ नः य॒ज्ञम् यज्ञियाः सु॒शमि
   गन्ता नो य॒ज्ञं य॑ज्ञियाः सु॒शमि

Halfverse: b    श्रोता॒ हव॑मर॒क्ष ए॑व॒याम॑रुत् ।
   श्रोत+ हव॑म् अर॒क्षः ए॑व॒याम॑रुत् ।
   श्रोता हव॑म् अर॒क्ष ए॑व॒याम॑रुत् ।

Halfverse: c    ज्येष्ठा॑सो॒ न पर्व॑तासो॒ व्यो॑मनि यू॒यं तस्य॑ प्रचेतसः॒ स्यात॑ दु॒र्धर्त॑वो नि॒दः ।।
   ज्येष्ठा॑सो॒ न पर्व॑तासो॒ व्यो॑मनि
   ज्येष्ठा॑सः न पर्व॑तासः व्यो॑मनि
   ज्येष्ठा॑सो न पर्व॑तासो विओमनि

Halfverse: d    यू॒यं तस्य॑ प्रचेतसः
   यू॒यम् तस्य प्रचेतसः
   यू॒यं तस्य प्रचेतसः

Halfverse: e    स्यात॑ दु॒र्धर्त॑वो नि॒दः ।।
   स्यात दु॒र्धर्त॑वः नि॒दः ।।
   स्यात दु॒र्धर्त॑वो नि॒दः ।।





Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.