TITUS
Rg-Veda: Rg-Veda-Samhita
Part No. 443
Previous part

Hymn: 2_(443) 
Verse: 1 
Halfverse: a    त्वं हि क्षैत॑व॒द्यशो ऽग्ने॑ मि॒त्रो न पत्य॑से ।
   त्वं हि क्षैत॑व॒द्यशो
   त्वम् हि क्षैत॑वत् यशः
   तु॒वं हि क्षैत॑वद् यशो

Halfverse: b    ऽग्ने मि॒त्रो न पत्य॑से ।
   अग्ने मि॒त्रः न पत्य॑से ।
   अग्ने मि॒त्रो न पत्य॑से ।

Halfverse: c    त्वं वि॑चर्षणे॒ श्रवो॒ वसो॑ पु॒ष्टिं न पु॑ष्यसि ।।
   त्वं वि॑चर्षणे॒ श्रवो
   त्वम् विचर्षणे श्रवः
   तु॒वं वि॑चर्षणे श्रवो

Halfverse: d    वसो॑ पु॒ष्टिं न पु॑ष्यसि ।।
   वसो पु॒ष्टिम् न पु॑ष्यसि ।।
   वसो पु॒ष्टिं न पु॑ष्यसि ।।


Verse: 2 
Halfverse: a    त्वां हि ष्मा॑ चर्ष॒णयो॑ य॒ज्ञेभि॑र्गी॒र्भिरीळ॑ते ।
   त्वां हि ष्मा॑ चर्ष॒णयो
   त्वाम् हि स्म+ चर्ष॒णयः
   तु॒वां हि ष्मा चर्ष॒णयो

Halfverse: b    य॒ज्ञेभि॑र्गी॒र्भिरीळ॑ते ।
   य॒ज्ञेभिः गी॒र्भिः ईळ॑ते ।
   य॒ज्ञेभि॑र् गी॒र्भिर् ईळ॑ते ।

Halfverse: c    त्वां वा॒जी या॑त्यवृ॒को र॑ज॒स्तूर्वि॒श्वच॑र्षणिः ।।
   त्वां वा॒जी या॑त्यवृ॒को
   त्वाम् वा॒जी या॑ति अवृ॒कः
   त्वां वा॒जी या॑ति अवृ॒को

Halfverse: d    र॑ज॒स्तूर्वि॒श्वच॑र्षणिः ।।
   र॑ज॒स्तूः वि॒श्वच॑र्षणिः ।।
   र॑ज॒स्तूर् वि॒श्वच॑र्षणिः ।।


Verse: 3 
Halfverse: a    स॒जोष॑स्त्वा दि॒वो नरो॑ य॒ज्ञस्य॑ के॒तुमि॑न्धते ।
   स॒जोष॑स्त्वा दि॒वो नरो
   स॒जोषः त्वा दि॒वः नरः
   स॒जोष॑स् त्वा दि॒वो नरो

Halfverse: b    य॒ज्ञस्य॑ के॒तुमि॑न्धते ।
   य॒ज्ञस्य के॒तुम् इन्धते ।
   य॒ज्ञस्य के॒तुम् इन्धते ।

Halfverse: c    यद्ध॒ स्य मानु॑षो॒ जनः॑ सुम्ना॒युर्जु॒ह्वे अ॑ध्व॒रे ।।
   यद्ध॒ स्य मानु॑षो॒ जनः
   यत् ह स्य मानु॑षः जनः
   यद् ध स्य मानु॑षो जनः

Halfverse: d    सुम्ना॒युर्जु॒ह्वे अ॑ध्व॒रे ।।
   सु॑म्ना॒युः जु॒ह्वे अ॑ध्व॒रे ।।
   सु॑म्ना॒युर् जु॒ह्वे अ॑ध्व॒रे ।।


Verse: 4 
Halfverse: a    ऋध॒द्यस्ते॑ सु॒दान॑वे धि॒या मर्तः॑ श॒शम॑ते ।
   ऋध॒द्यस्ते॑ सु॒दान॑वे
   ऋध॑त् यः ते सु॒दान॑वे
   ऋध॑द् यस् ते सु॒दान॑वे

Halfverse: b    धि॒या मर्तः॑ श॒शम॑ते ।
   धि॒या मर्तः श॒शम॑ते ।
   धि॒या मर्तः श॒शम॑ते ।

Halfverse: c    ऊ॒ती ष बृ॑ह॒तो दि॒वो द्वि॒षो अंहो॒ न त॑रति ।।
   ऊ॒ती ष बृ॑ह॒तो दि॒वो
   ऊ॒ती स बृ॑ह॒तः दि॒वः
   ऊ॒ती ष बृ॑ह॒तो दि॒वो

Halfverse: d    द्वि॒षो अंहो॒ न त॑रति ।।
   द्वि॒षः अंहः न त॑रति ।।
   द्वि॒षो अंहो न त॑रति ।।


Verse: 5 
Halfverse: a    स॒मिधा॒ यस्त॒ आहु॑तिं॒ निशि॑ति॒म्मर्त्यो॒ नश॑त् ।
   स॒मिधा॒ यस्त॒ आहु॑तिं
   स॒मिधा यः ते आहु॑तिम्
   स॒मिधा यस् त आहु॑तिं

Halfverse: b    निशि॑ति॒म्मर्त्यो॒ नश॑त् ।
   निशि॑तिम् मर्त्यः नश॑त् ।
   निशि॑तिम् मर्ति॑यो नश॑त् ।

Halfverse: c    व॒याव॑न्तं॒ स पु॑ष्यति॒ क्षय॑मग्ने श॒तायु॑षम् ।।
   व॒याव॑न्तं॒ स पु॑ष्यति
   व॒याव॑न्तम् स पु॑ष्यति
   व॒याव॑न्तं स पु॑ष्यति

Halfverse: d    क्षय॑मग्ने श॒तायु॑षम् ।।
   क्षय॑म् अग्ने श॒तायु॑षम् ।।
   क्षय॑म् अग्ने श॒तायु॑षम् ।।


Verse: 6 
Halfverse: a    त्वे॒षस्ते॑ धू॒म ऋ॑ण्वति दि॒वि षञ्छु॒क्र आत॑तः ।
   त्वे॒षस्ते॑ धू॒म ऋ॑ण्वति
   त्वे॒षः ते धू॒मः ऋ॑ण्वति
   त्वे॒षस् ते धू॒म ऋ॑ण्वति

Halfverse: b    दि॒वि षञ्छु॒क्र आत॑तः ।
   दि॒वि सन् शु॒क्रः आत॑तः ।
   दि॒वि षञ् छु॒क्र आत॑तः ।

Halfverse: c    सूरो॒ न हि द्यु॒ता त्वं कृ॒पा पा॑वक॒ रोच॑से ।।
   सूरो॒ न हि द्यु॒ता त्वं
   सूरः न हि द्यु॒ता त्वम्
   सूरो न हि द्यु॒ता तु॒वं

Halfverse: d    कृ॒पा पा॑वक॒ रोच॑से ।।
   कृ॒पा पा॑वक रोच॑से ।।
   कृ॒पा प॑वाक रोच॑से ।।


Verse: 7 
Halfverse: a    अधा॒ हि वि॒क्ष्वीड्यो ऽसि॑ प्रि॒यो नो॒ अति॑थिः ।
   अधा॒ हि वि॒क्ष्वीड्यो
   अध+ हि वि॒क्षु ईड्यः
   अधा हि वि॒क्षु ईडि॑यो

Halfverse: b    ऽसि प्रि॒यो नो॒ अति॑थिः ।
   असि प्रि॒यः नः अति॑थिः ।
   असि प्रि॒यो नो अति॑थिः ।

Halfverse: c    र॒ण्वः पु॒री॑व॒ जूर्यः॑ सू॒नुर्न त्र॑य॒याय्यः॑ ।।
   र॒ण्वः पु॒री॑व॒ जूर्यः
   र॒ण्वः पु॒रि इ॑व जूर्यः
   र॒ण्वः पु॒री॑व जूरि॑यः

Halfverse: d    सू॒नुर्न त्र॑य॒याय्यः॑ ।।
   सू॒नुः न त्र॑य॒याय्यः ।।
   सू॒नुर् न त्र॑य॒यायि॑यः ।।


Verse: 8 
Halfverse: a    क्रत्वा॒ हि द्रोणे॑ अ॒ज्यसे ऽग्ने॑ वा॒जी न कृत्व्यः॑ ।
   क्रत्वा॒ हि द्रोणे॑ अ॒ज्यसे
   क्रत्वा हि द्रोणे अ॒ज्यसे
   क्रत्वा हि द्रोणे अ॒ज्यसे

Halfverse: b    ऽग्ने वा॒जी न कृत्व्यः॑ ।
   अग्ने वा॒जी न कृत्व्यः ।
   अग्ने वा॒जी न कृत्वि॑यः ।

Halfverse: c    परि॑ज्मेव स्व॒धा गयो ऽत्यो॒ न ह्वा॒र्यः शिशुः॑ ।।
   परि॑ज्मेव स्व॒धा गयो
   परि॑ज्मा इव स्व॒धा गयः
   परि॑ज्मेव स्व॒धा गयो

Halfverse: d    ऽत्यो॒ न ह्वा॒र्यः शिशुः॑ ।।
   अत्यः न ह्वा॒र्यः शिशुः ।।
   अत्यो न ह्वा॑रि॒यः शिशुः ।।


Verse: 9 
Halfverse: a    त्वं त्या चि॒दच्यु॒ताग्ने॑ प॒शुर्न यव॑से ।
   त्वं त्या चि॒दच्यु॑ता
   त्वम् त्या चि॑त् अच्यु॑ता
   तु॒वं ति॒या चि॑द् अच्यु॑ता

Halfverse: b     अग्ने॑ प॒शुर्न यव॑से ।
   अग्ने प॒शुः न यव॑से ।
   अग्ने प॒शुर् न यव॑से ।

Halfverse: c    धामा॑ ह॒ यत्ते॑ अजर॒ वना॑ वृ॒श्चन्ति॒ शिक्व॑सः ।।
   धामा॑ ह॒ यत्ते॑ अजर
   धाम+ ह यत् ते अजर
   धामा ह यत् ते अजर

Halfverse: d    वना॑ वृ॒श्चन्ति॒ शिक्व॑सः ।।
   वना वृ॒श्चन्ति शिक्व॑सः ।।
   वना वृ॒श्चन्ति शिक्व॑सः ।।


Verse: 10 
Halfverse: a    वेषि॒ ह्य॑ध्वरीय॒तामग्ने॒ होता॒ दमे॑ वि॒शाम् ।
   वेषि॒ ह्य॑ध्वरीय॒ताम्
   वेषि हि अ॑ध्वरीय॒ताम्
   वेषि हि अ॑ध्वरीय॒ताम्

Halfverse: b    अग्ने॒ होता॒ दमे॑ वि॒शाम् ।
   अग्ने होता दमे वि॒शाम् ।
   अग्ने होता दमे वि॒शाम् ।

Halfverse: c    स॒मृधो॑ विश्पते कृणु जु॒षस्व॑ ह॒व्यम॑ङ्गिरः ।।
   स॒मृधो॑ विश्पते कृणु
   स॒मृधः विश्पते कृणु
   स॒मृधो विश्पते कृणु

Halfverse: d    जु॒षस्व॑ ह॒व्यम॑ङ्गिरः ।।
   जु॒षस्व ह॒व्यम् अङ्गिरः ।।
   जु॒षस्व ह॒व्यम् अङ्गिरः ।।


Verse: 11 
Halfverse: a    अछा॑ नो मित्रमहो देव दे॒वानग्ने॒ वोचः॑ सुम॒तिं रोद॑स्योः ।
   अछा॑ नो मित्रमहो देव दे॒वान्
   अछ+ नः मित्रमहः देव दे॒वान्
   अछा नो मित्रमहो देव दे॒वान्

Halfverse: b    अग्ने॒ वोचः॑ सुम॒तिं रोद॑स्योः ।
   अग्ने वोचः सुम॒तिम् रोद॑स्योः ।
   अग्ने वोचः सुम॒तिं रोद॑सीयोः ।

Halfverse: c    वी॒हि स्व॒स्तिं सु॑क्षि॒तिं दि॒वो नॄन्द्वि॒षो अँहां॑सि दुरि॒ता त॑रेम॒ ता त॑रेम॒ तवाव॑सा तरेम ।।
   वी॒हि स्व॒स्तिं सु॑क्षि॒तिं दि॒वो नॄन्
   वी॒हि स्व॒स्तिम् सुक्षि॒तिम् दि॒वः नॄन्
   वी॒हि सुअ॒स्तिं सु॑क्षि॒तिं दि॒वो नॄन्

Halfverse: d    द्वि॒षो अँहां॑सि दुरि॒ता त॑रेम
   द्वि॒षः अंहां॑सि दुरि॒ता त॑रेम
   द्वि॒षो अंहां॑सि दुरि॒ता त॑रेम

Halfverse: e    ता त॑रेम॒ तवाव॑सा तरेम ।।
   ता त॑रेम तव अव॑सा तरेम ।।
   ता त॑रेम तवाव॑सा तरेम ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.