TITUS
Rg-Veda: Rg-Veda-Samhita
Part No. 444
Previous part

Hymn: 3_(444) 
Verse: 1 
Halfverse: a    अग्ने॒ स क्षे॑षदृत॒पा ऋ॑ते॒जा उ॒रु ज्योति॑र्नशते देव॒युष्टे॑ ।
   अग्ने॒ स क्षे॑षदृत॒पा ऋ॑ते॒जा
   अग्ने स क्षे॑षत् ऋत॒पाः ऋ॑ते॒जाः
   अग्ने स क्षे॑षद् ऋत॒पा ऋ॑ते॒जा

Halfverse: b    उ॒रु ज्योति॑र्नशते देव॒युष्टे॑ ।
   उ॒रु ज्योतिः नशते देव॒युः ते ।
   उ॒रु ज्योति॑र् नशते देव॒युष् टे ।

Halfverse: c    यं त्वम्मि॒त्रेण॒ वरु॑णः स॒जोषा॒ देव॒ पासि॒ त्यज॑सा॒ मर्त॒मंहः॑ ।।
   यं त्वम्मि॒त्रेण॒ वरु॑णः स॒जोषा
   यम् त्वम् मि॒त्रेण वरु॑णः स॒जोषाः
   यं त्वम् मि॒त्रेण वरु॑णः स॒जोषा

Halfverse: d    देव॒ पासि॒ त्यज॑सा॒ मर्त॒मंहः॑ ।।
   देव पासि त्यज॑सा मर्त॑म् अंहः ।।
   देव पासि त्यज॑सा मर्त॑म् अंहः ।।


Verse: 2 
Halfverse: a    ई॒जे य॒ज्ञेभिः॑ शश॒मे शमी॑भिरृ॒धद्वा॑राया॒ग्नये॑ ददाश ।
   ई॒जे य॒ज्ञेभिः॑ शश॒मे शमी॑भिर्
   ई॒जे य॒ज्ञेभिः शश॒मे शमी॑भिः
   ई॒जे य॒ज्ञेभिः शश॒मे शमी॑भिर्

Halfverse: b    ऋ॒धद्वा॑राया॒ग्नये॑ ददाश ।
   ऋ॒धद्वा॑राय अ॒ग्नये ददाश ।
   ऋ॒धद्वा॑राय अ॒ग्नये ददाश ।

Halfverse: c    ए॒वा च॒न तं य॒शसा॒मजु॑ष्टि॒र्नांहो॒ मर्तं॑ नशते॒ न प्रदृ॑प्तिः ।।
   ए॒वा च॒न तं य॒शसा॒मजु॑ष्टिर्
   ए॒व+ च॒न तम् य॒शसा॑म् अजु॑ष्टिः
   ए॒वा च॒न तं य॒शसा॑म् अजु॑ष्टिर्

Halfverse: d    नांहो॒ मर्तं॑ नशते॒ न प्रदृ॑प्तिः ।।
   न अंहः मर्त॑म् नशते न प्रदृ॑प्तिः ।।
   नांहो मर्तं नशते न प्रदृ॑प्तिः ।।


Verse: 3 
Halfverse: a    सूरो॒ न यस्य॑ दृश॒तिर॑रे॒पा भी॒मा यदेति॑ शुच॒तस्त॒ आ धीः ।
   सूरो॒ न यस्य॑ दृश॒तिर॑रे॒पा
   सूरः न यस्य दृश॒तिः अ॑रे॒पाः
   सूरो न यस्य दृश॒तिर् अरे॒पा

Halfverse: b    भी॒मा यदेति॑ शुच॒तस्त॒ आ धीः ।
   भी॒मा यत् एति शुच॒तः ते आ धीः ।
   भी॒मा यद् एति शुच॒तस् त आ धीः ।

Halfverse: c    हेष॑स्वतः शु॒रुधो॒ नायम॒क्तोः कुत्रा॑ चिद्र॒ण्वो व॑स॒तिर्व॑ने॒जाः ।।
   हेष॑स्वतः शु॒रुधो॒ नायम॒क्तोः
   हेष॑स्वतः शु॒रुधः न अ॒यम् अ॒क्तोः
   हेष॑स्वतः शु॒रुधो नायम् अ॒क्तोः

Halfverse: d    कुत्रा॑ चिद्र॒ण्वो व॑स॒तिर्व॑ने॒जाः ।।
   कुत्र+ चित् र॒ण्वः व॑स॒तिः व॑ने॒जाः ।।
   कुत्रा चिद् र॒ण्वो व॑स॒तिर् वने॒जाः ।।


Verse: 4 
Halfverse: a    ति॒ग्मं चि॒देम॒ महि॒ वर्पो॑ अस्य॒ भस॒दश्वो॒ न य॑मसा॒न आ॒सा ।
   ति॒ग्मं चि॒देम॒ महि॒ वर्पो॑ अस्य
   ति॒ग्मम् चित् एम महि वर्पः अस्य
   ति॒ग्मं चि॑द् एम महि वर्पो अस्य

Halfverse: b    भस॒दश्वो॒ न य॑मसा॒न आ॒सा ।
   भस॑त् अश्वः न य॑मसा॒नः आ॒सा ।
   भस॑द् अश्वो न य॑मसा॒न आ॒सा ।

Halfverse: c    वि॒जेह॑मानः पर॒शुर्न जि॒ह्वां द्र॒विर्न द्रा॑वयति॒ दारु॒ धक्ष॑त् ।।
   वि॒जेह॑मानः पर॒शुर्न जि॒ह्वां
   वि॒जेह॑मानः पर॒शुः न जि॒ह्वाम्
   वि॒जेह॑मानः पर॒शुर् न जि॒ह्वां

Halfverse: d    द्र॒विर्न द्रा॑वयति॒ दारु॒ धक्ष॑त् ।।
   द्र॒विः न द्रा॑वयति दारु धक्ष॑त् ।।
   द्र॒विर् न द्रा॑वयति दारु धक्ष॑त् ।।


Verse: 5 
Halfverse: a    स इदस्ते॑व॒ प्रति॑ धादसि॒ष्यञ्छिशी॑त॒ तेजो ऽय॑सो॒ न धारा॑म् ।
   स इदस्ते॑व॒ प्रति॑ धादसि॒ष्यञ्
   सः ।!। इत् अस्ता इव प्रति धात् असि॒ष्यन्
   स इद् अस्ते॑व प्रति धाद् असि॒ष्यञ्

Halfverse: b    छिशी॑त॒ तेजो ऽय॑सो॒ न धारा॑म् ।
   शिशी॑त तेजः अय॑सः न धारा॑म् ।
   छिशी॑त तेजो अय॑सो न धारा॑म् ।

Halfverse: c    चि॒त्रध्र॑जतिरर॒तिर्यो अ॒क्तोर्वेर्न द्रु॒षद्वा॑ रघु॒पत्म॑जंहाः ।।
   चि॒त्रध्र॑जतिरर॒तिर्यो अ॒क्तोर्
   चि॒त्रध्र॑जतिः अर॒तिः यः अ॒क्तोः
   चि॒त्रध्र॑जतिर् अर॒तिर् यो अ॒क्तोर्

Halfverse: d    वेर्न द्रु॒षद्वा॑ रघु॒पत्म॑जंहाः ।।
   वेः न द्रु॒षद्वा रघु॒पत्म॑जंहाः ।।
   वेर् न द्रु॒षद्वा रघु॒पत्म॑जंहाः ।।


Verse: 6 
Halfverse: a    स ईं॑ रे॒भो न प्रति॑ वस्त उ॒स्राः शो॒चिषा॑ रारपीति मि॒त्रम॑हाः ।
   स ईं॑ रे॒भो न प्रति॑ वस्त उ॒स्राः
   सः ।!। ई॑म् रे॒भः न प्रति वस्ते उ॒स्राः
   स ईं रे॒भो न प्रति वस्त उ॒स्राः

Halfverse: b    शो॒चिषा॑ रारपीति मि॒त्रम॑हाः ।
   शो॒चिषा रारपीति मि॒त्रम॑हाः ।
   शो॒चिषा रारपीति मि॒त्रम॑हाः ।

Halfverse: c    नक्तं॒ य ई॑मरु॒षो यो दिवा॒ नॄनम॑र्त्यो अरु॒षो यो दिवा॒ नॄन् ।।
   नक्तं॒ य ई॑मरु॒षो यो दिवा॒ नॄन्
   नक्त॑म् यः ई॑म् अरु॒षः यः दिवा नॄन्
   नक्तं य ई॑म् अरु॒षो यो दिवा नॄन्

Halfverse: d    अम॑र्त्यो अरु॒षो यो दिवा॒ नॄन् ।।
   अम॑र्त्यः अरु॒षः यः दिवा नॄन् ।।
   अम॑र्तियो अरु॒षो यो दिवा नॄन् ।।


Verse: 7 
Halfverse: a    दि॒वो न यस्य॑ विध॒तो नवी॑नो॒द्वृषा॑ रु॒क्ष ओष॑धीषु नूनोत् ।
   दि॒वो न यस्य॑ विध॒तो नवी॑नोद्
   दि॒वः न यस्य विध॒तः नवी॑नोत्
   दि॒वो न यस्य विध॒तो नवी॑नोद्

Halfverse: b    वृषा॑ रु॒क्ष ओष॑धीषु नूनोत् ।
   वृषा रु॒क्षः ओष॑धीषु नूनोत् ।
   वृषा रु॒क्ष ? ओष॑धीषु नूनोत् ।

Halfverse: c    घृणा॒ न यो ध्रज॑सा॒ पत्म॑ना॒ यन्ना रोद॑सी॒ वसु॑ना॒ दं सु॒पत्नी॑ ।।
   घृणा॒ न यो ध्रज॑सा॒ पत्म॑ना॒ यन्न्
   घृणा न यः ध्रज॑सा पत्म॑ना यन्
   घृणा न यो ध्रज॑सा पत्म॑ना यन्न्

Halfverse: d    आ रोद॑सी॒ वसु॑ना॒ दं सु॒पत्नी॑ ।।
   आ रोद॑सी वसु॑ना दम् सु॒पत्नी ।।
   आ रोद॑सी वसु॑ना दं सु॒पत्नी ।।


Verse: 8 
Halfverse: a    धायो॑भिर्वा॒ यो युज्ये॑भिर॒र्कैर्वि॒द्युन्न द॑विद्यो॒त्स्वेभिः॒ शुष्मैः॑ ।
   धायो॑भिर्वा॒ यो युज्ये॑भिर॒र्कैर्
   धायो॑भिः वा यः युज्ये॑भिः अ॒र्कैः
   धायो॑भिर् वा यो युजि॑येभिर् अ॒र्कैर्

Halfverse: b    वि॒द्युन्न द॑विद्यो॒त्स्वेभिः॒ शुष्मैः॑ ।
   वि॒द्युत् न द॑विद्योत् स्वेभिः शुष्मैः ।
   वि॒द्युन् न द॑विद्योत् सु॒वेभिः शुष्मैः ।

Halfverse: c    शर्धो॑ वा॒ यो म॒रुतां॑ त॒तक्ष॑ ऋ॒भुर्न त्वे॒षो र॑भसा॒नो अ॑द्यौत् ।।
   शर्धो॑ वा॒ यो म॒रुतां॑ त॒तक्ष
   शर्धः वा यः म॒रुता॑म् त॒तक्ष
   शर्धो वा यो म॒रुताअं त॒तक्ष

Halfverse: d    ऋ॒भुर्न त्वे॒षो र॑भसा॒नो अ॑द्यौत् ।।
   ऋ॒भुः न त्वे॒षः र॑भसा॒नः अ॑द्यौत् ।।
   ऋ॒भुर् न त्वे॒षो र॑भसा॒नो अ॑द्यौत् ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.