TITUS
Rg-Veda: Rg-Veda-Samhita
Part No. 446
Previous part

Hymn: 5_(446) 
Verse: 1 
Halfverse: a    हु॒वे वः॑ सू॒नुं सह॑सो॒ युवा॑न॒मद्रो॑घवाचम्म॒तिभि॒र्यवि॑ष्ठम् ।
   हु॒वे वः॑ सू॒नुं सह॑सो॒ युवा॑नम्
   हु॒वे वः सू॒नुम् सह॑सः युवा॑नम्
   हु॒वे वः सू॒नुं सह॑सो युवा॑नम्

Halfverse: b    अद्रो॑घवाचम्म॒तिभि॒र्यवि॑ष्ठम् ।
   अद्रो॑घवाचम् म॒तिभिः यवि॑ष्ठम् ।
   अद्रो॑घवाचम् म॒तिभि॑र् यवि॑ष्ठम् ।

Halfverse: c    य इन्व॑ति॒ द्रवि॑णानि॒ प्रचे॑ता वि॒श्ववा॑राणि पुरु॒वारो॑ अ॒ध्रुक् ।।
   य इन्व॑ति॒ द्रवि॑णानि॒ प्रचे॑ता
   यः इन्व॑ति द्रवि॑णानि प्रचे॑ताः
   य इन्व॑ति द्रवि॑णानि प्रचे॑ता

Halfverse: d    वि॒श्ववा॑राणि पुरु॒वारो॑ अ॒ध्रुक् ।।
   वि॒श्ववा॑राणि पुरु॒वारः अ॒ध्रुक् ।।
   वि॒श्ववा॑राणि पुरु॒वारो अ॒ध्रुक् ।।


Verse: 2 
Halfverse: a    त्वे वसू॑नि पुर्वणीक होतर्दो॒षा वस्तो॒रेरि॑रे य॒ज्ञिया॑सः ।
   त्वे वसू॑नि पुर्वणीक होतर्
   त्वे वसू॑नि पुर्वणीक होतर्
   तु॒वे वसू॑नि पुर्वणीक होतर्

Halfverse: b    दो॒षा वस्तो॒रेरि॑रे य॒ज्ञिया॑सः ।
   दो॒षा वस्तोः आ ई॑रिरे य॒ज्ञिया॑सः ।
   दो॒षा वस्तो॑र् एरि॑रे य॒ज्ञिया॑सः ।

Halfverse: c    क्षामे॑व॒ विश्वा॒ भुव॑नानि॒ यस्मि॒न्सं सौभ॑गानि दधि॒रे पा॑व॒के ।।
   क्षामे॑व॒ विश्वा॒ भुव॑नानि॒ यस्मि॑न्
   क्षाम इव विश्वा भुव॑नानि यस्मि॑न्
   क्षामे॑व विश्वा भुव॑नानि यस्मि॑न्

Halfverse: d    सं सौभ॑गानि दधि॒रे पा॑व॒के ।।
   सम् सौभ॑गानि दधि॒रे पा॑व॒के ।।
   सं सौभ॑गानि दधि॒रे प॑वा॒के ।।


Verse: 3 
Halfverse: a    त्वं वि॒क्षु प्र॒दिवः॑ सीद आ॒सु क्रत्वा॑ र॒थीर॑भवो॒ वार्या॑णाम् ।
   त्वं वि॒क्षु प्र॒दिवः॑ सीद आ॒सु
   त्वम् वि॒क्षु प्र॒दिवः सीदः आ॒सु
   तु॒वं वि॒क्षु प्र॒दिवः सीद आ॒सु

Halfverse: b    क्रत्वा॑ र॒थीर॑भवो॒ वार्या॑णाम् ।
   क्रत्वा र॒थीः अ॑भवः वार्या॑णाम् ।
   क्रत्वा र॒थीर् अभवो वारि॑याणाम् ।

Halfverse: c    अत॑ इनोषि विध॒ते चि॑कित्वो॒ व्या॑नु॒षग्जा॑तवेदो॒ वसू॑नि ।।
   अत॑ इनोषि विध॒ते चि॑कित्वो
   अतः इनोषि विध॒ते चि॑कित्वः
   अत इनोषि विध॒ते चि॑कित्वो

Halfverse: d    व्या॑नु॒षग्जा॑तवेदो॒ वसू॑नि ।।
   वि आ॑नु॒षक् जातवेदः वसू॑नि ।।
   वि आ॑नु॒षग् जातवेदो वसू॑नि ।।


Verse: 4 
Halfverse: a    यो नः॒ सनु॑त्यो अभि॒दास॑दग्ने॒ यो अन्त॑रो मित्रमहो वनु॒ष्यात् ।
   यो नः॒ सनु॑त्यो अभि॒दास॑दग्ने
   यः नः सनु॑त्यः अभि॒दास॑त् अग्ने
   यो नः सनु॑त्यो अभि॒दास॑द् अग्ने

Halfverse: b    यो अन्त॑रो मित्रमहो वनु॒ष्यात् ।
   यः अन्त॑रः मित्रमहः वनु॒ष्यात् ।
   यो अन्त॑रो मित्रमहो वनु॒ष्यात् ।

Halfverse: c    तम॒जरे॑भि॒र्वृष॑भि॒स्तव॒ स्वैस्तपा॑ तपिष्ठ॒ तप॑सा॒ तप॑स्वान् ।।
   तम॒जरे॑भि॒र्वृष॑भि॒स्तव॒ स्वैस्
   तम् अ॒जरे॑भिः वृष॑भिः तव स्वैः
   तम् अ॒जरे॑भिर् वृष॑भिस् तव स्वैस्

Halfverse: d    तपा॑ तपिष्ठ॒ तप॑सा॒ तप॑स्वान् ।।
   तप+ तपिष्ठ तप॑सा तप॑स्वान् ।।
   तपा तपिष्ठ तप॑सा तप॑स्वान् ।।


Verse: 5 
Halfverse: a    यस्ते॑ य॒ज्ञेन॑ स॒मिधा॒ य उ॒क्थैर॒र्केभिः॑ सूनो सहसो॒ ददा॑शत् ।
   यस्ते॑ य॒ज्ञेन॑ स॒मिधा॒ य उ॒क्थैर्
   यः ते य॒ज्ञेन स॒मिधा यः उ॒क्थैः
   यस् ते य॒ज्ञेन स॒मिधा य उ॒क्थैर्

Halfverse: b    अ॒र्केभिः॑ सूनो सहसो॒ ददा॑शत् ।
   अ॒र्केभिः सूनो सहसः ददा॑शत् ।
   अ॒र्केभिः सूनो सहसो ददा॑शत् ।

Halfverse: c    स मर्त्ये॑ष्वमृत॒ प्रचे॑ता रा॒या द्यु॒म्नेन॒ श्रव॑सा॒ वि भा॑ति ।।
   स मर्त्ये॑ष्वमृत॒ प्रचे॑ता
   स मर्त्ये॑षु अमृत प्रचे॑ताः
   स मर्ति॑येषु अमृत प्रचे॑ता

Halfverse: d    रा॒या द्यु॒म्नेन॒ श्रव॑सा॒ वि भा॑ति ।।
   रा॒या द्यु॒म्नेन श्रव॑सा वि भा॑ति ।।
   रा॒या द्यु॒म्नेन श्रव॑सा वि भा॑ति ।।


Verse: 6 
Halfverse: a    स तत्कृ॑धीषि॒तस्तूय॑मग्ने॒ स्पृधो॑ बाधस्व॒ सह॑सा॒ सह॑स्वान् ।
   स तत्कृ॑धीषि॒तस्तूय॑मग्ने
   स तत् कृधि इषि॒तः तूय॑म् अग्ने
   स तत् कृधि इषि॒तस् तूय॑म् अग्ने

Halfverse: b    स्पृधो॑ बाधस्व॒ सह॑सा॒ सह॑स्वान् ।
   स्पृधः बाधस्व सह॑सा सह॑स्वान् ।
   स्पृधो बाधस्व सह॑सा सह॑स्वान् ।

Halfverse: c    यच्छ॒स्यसे॒ द्युभि॑र॒क्तो वचो॑भि॒स्तज्जु॑षस्व जरि॒तुर्घोषि॒ मन्म॑ ।।
   यच्छ॒स्यसे॒ द्युभि॑र॒क्तो वचो॑भिस्
   यत् श॒स्यसे द्युभिः अ॒क्तः वचो॑भिः
   यच् छ॒स्यसे द्युभि॑र् अ॒क्तो वचो॑भिस्

Halfverse: d    तज्जु॑षस्व जरि॒तुर्घोषि॒ मन्म॑ ।।
   तत् जुषस्व जरि॒तुः घोषि मन्म ।।
   तज् जुषस्व जरि॒तुर् घोषि मन्म ।।


Verse: 7 
Halfverse: a    अ॒श्याम॒ तं काम॑मग्ने॒ तवो॒ती अ॒श्याम॑ र॒यिं र॑यिवः सु॒वीर॑म् ।
   अ॒श्याम॒ तं काम॑मग्ने॒ तवो॒ती
   अ॒श्याम तम् काम॑म् अग्ने तव ऊ॒ती
   अ॒श्याम तं काम॑म् अग्ने तवो॒ती

Halfverse: b    अ॒श्याम॑ र॒यिं र॑यिवः सु॒वीर॑म् ।
   अ॒श्याम र॒यिम् रयिवः सु॒वीर॑म् ।
   अ॒श्याम र॒यिं र॑यिवः सु॒वीर॑म् ।

Halfverse: c    अ॒श्याम॒ वाज॑म॒भि वा॒जय॑न्तो॒ ऽश्याम॑ द्यु॒म्नम॑जरा॒जरं॑ ते ।।
   अ॒श्याम॒ वाज॑म॒भि वा॒जय॑न्तो
   अ॒श्याम वाज॑म् अ॒भि वा॒जय॑न्तः
   अ॒श्याम वाज॑म् अ॒भि वा॒जय॑न्तो

Halfverse: d    ऽश्याम॑ द्यु॒म्नम॑जरा॒जरं॑ ते ।।
   अ॒श्याम द्यु॒म्नम् अजर अ॒जर॑म् ते ।।
   अ॒श्याम द्यु॒म्नम् अजरा॒जरं ते ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.