TITUS
Rg-Veda: Rg-Veda-Samhita
Part No. 447
Previous part

Hymn: 6_(447) 
Verse: 1 
Halfverse: a    प्र नव्य॑सा॒ सह॑सः सू॒नुमछा॑ य॒ज्ञेन॑ गा॒तुमव॑ इ॒छमा॑नः ।
   प्र नव्य॑सा॒ सह॑सः सू॒नुमछा
   प्र नव्य॑सा सह॑सः सू॒नुम् अछ+
   प्र नव्य॑सा सह॑सः सू॒नुम् अछा

Halfverse: b    य॒ज्ञेन॑ गा॒तुमव॑ इ॒छमा॑नः ।
   य॒ज्ञेन गा॒तुम् अवः इ॒छमा॑नः ।
   य॒ज्ञेन गा॒तुम् अव इ॒छमा॑नः ।

Halfverse: c    वृ॒श्चद्व॑नं कृ॒ष्णया॑मं॒ रुश॑न्तं वी॒ती होता॑रं दि॒व्यं जि॑गाति ।।
   वृ॒श्चद्व॑नं कृ॒ष्णया॑मं॒ रुश॑न्तं
   वृ॒श्चद्व॑नम् कृ॒ष्णया॑मम् रुश॑न्तम्
   वृ॒श्चद्व॑नं कृ॒ष्णया॑मं रुश॑न्तं

Halfverse: d    वी॒ती होता॑रं दि॒व्यं जि॑गाति ।।
   वी॒ती होता॑रम् दि॒व्यम् जिगाति ।।
   वी॒ती होता॑रं दिवि॒यं जि॑गाति ।।


Verse: 2 
Halfverse: a    स श्वि॑ता॒नस्त॑न्य॒तू रो॑चन॒स्था अ॒जरे॑भि॒र्नान॑दद्भि॒र्यवि॑ष्ठः ।
   स श्वि॑ता॒नस्त॑न्य॒तू रो॑चन॒स्था
   स श्वि॑ता॒नः त॑न्य॒तुः रो॑चन॒स्थाः
   स श्वि॑ता॒नस् तन्य॒तू रो॑चन॒स्था

Halfverse: b    अ॒जरे॑भि॒र्नान॑दद्भि॒र्यवि॑ष्ठः ।
   अ॒जरे॑भिः नान॑दद्भिः यवि॑ष्ठः ।
   अ॒जरे॑भिर् नान॑दद्भिर् यवि॑ष्ठः ।

Halfverse: c    यः पा॑व॒कः पु॑रु॒तमः॑ पु॒रूणि॑ पृ॒थून्य॒ग्निर॑नु॒याति॒ भर्व॑न् ।।
   यः पा॑व॒कः पु॑रु॒तमः॑ पु॒रूणि
   यः पा॑व॒कः पु॑रु॒तमः पु॒रूणि
   यः प॑वा॒कः पु॑रु॒तमः पु॒रूणि

Halfverse: d    पृ॒थून्य॒ग्निर॑नु॒याति॒ भर्व॑न् ।।
   पृ॒थूनि अ॒ग्निः अ॑नु॒याति भर्व॑न् ।।
   पृ॒थूनि अ॒ग्निर् अनु॒याति भर्व॑न् ।।


Verse: 3 
Halfverse: a    वि ते॒ विष्व॒ग्वात॑जूतासो अग्ने॒ भामा॑सः शुचे॒ शुच॑यश्चरन्ति ।
   वि ते॒ विष्व॒ग्वात॑जूतासो अग्ने
   वि ते विष्व॑क् वात॑जूतासः अग्ने
   वि ते विष्व॑ग् वात॑जूतासो अग्ने

Halfverse: b    भामा॑सः शुचे॒ शुच॑यश्चरन्ति ।
   भामा॑सः शुचे शुच॑यः चरन्ति ।
   भामा॑सः शुचे शुच॑यश् चरन्ति ।

Halfverse: c    तु॑विम्र॒क्षासो॑ दि॒व्या नव॑ग्वा॒ वना॑ वनन्ति धृष॒ता रु॒जन्तः॑ ।।
   तु॑विम्र॒क्षासो॑ दि॒व्या नव॑ग्वा
   तुविम्र॒क्षासः दि॒व्याः नव॑ग्वाः
   तुविम्र॒क्षासो दिवि॒या नव॑ग्वा

Halfverse: d    वना॑ वनन्ति धृष॒ता रु॒जन्तः॑ ।।
   वना वनन्ति धृष॒ता रु॒जन्तः ।।
   वना वनन्ति धृष॒ता रु॒जन्तः ।।


Verse: 4 
Halfverse: a    ये ते॑ शु॒क्रासः॒ शुच॑यः शुचिष्मः॒ क्षां वप॑न्ति॒ विषि॑तासो॒ अश्वाः॑ ।
   ये ते॑ शु॒क्रासः॒ शुच॑यः शुचिष्मः
   ये ते शु॒क्रासः शुच॑यः शुचिष्मः
   ये ते शु॒क्रासः शुच॑यः शुचिष्मः

Halfverse: b    क्षां वप॑न्ति॒ विषि॑तासो॒ अश्वाः॑ ।
   क्षाम् वप॑न्ति विषि॑तासः अश्वाः ।
   क्षाअं वप॑न्ति विषि॑तासो अश्वाः ।

Halfverse: c    अध॑ भ्र॒मस्त॑ उर्वि॒या वि भा॑ति या॒तय॑मानो॒ अधि॒ सानु॒ पृश्नेः॑ ।।
   अध॑ भ्र॒मस्त॑ उर्वि॒या वि भा॑ति
   अध भ्र॒मः ते उर्वि॒या वि भा॑ति
   अध भ्र॒मस् त उर्वि॒या वि भा॑ति

Halfverse: d    या॒तय॑मानो॒ अधि॒ सानु॒ पृश्नेः॑ ।।
   या॒तय॑मानः अधि सानु पृश्नेः ।।
   या॒तय॑मानो अधि सानु पृश्नेः ।।


Verse: 5 
Halfverse: a    अध॑ जि॒ह्वा पा॑पतीति॒ प्र वृष्णो॑ गोषु॒युधो॒ नाशनिः॑ सृजा॒ना ।
   अध॑ जि॒ह्वा पा॑पतीति॒ प्र वृष्णो
   अध जि॒ह्वा पा॑पतीति प्र वृष्णः
   अध जि॒ह्वा पा॑पतीति प्र वृष्णो

Halfverse: b    गोषु॒युधो॒ नाशनिः॑ सृजा॒ना ।
   गो॑षु॒युधः न अ॒शनिः सृजा॒ना ।
   गो॑षु॒युधो न अ॒शनिः सृजा॒ना ।

Halfverse: c    शूर॑स्येव॒ प्रसि॑तिः क्षा॒तिर॒ग्नेर्दु॒र्वर्तु॑र्भी॒मो द॑यते॒ वना॑नि ।।
   शूर॑स्येव॒ प्रसि॑तिः क्षा॒तिर॒ग्नेर्
   शूर॑स्य इव प्रसि॑तिः क्षा॒तिः अ॒ग्नेः
   शूर॑स्येव प्रसि॑तिः क्षा॒तिर् अ॒ग्नेर्

Halfverse: d    दु॒र्वर्तु॑र्भी॒मो द॑यते॒ वना॑नि ।।
   दु॒र्वर्तुः भी॒मः द॑यते वना॑नि ।।
   दु॒र्वर्तु॑र् भी॒मो द॑यते वना॑नि ।।


Verse: 6 
Halfverse: a    आ भा॒नुना॒ पार्थि॑वानि॒ ज्रयां॑सि म॒हस्तो॒दस्य॑ धृष॒ता त॑तन्थ ।
   आ भा॒नुना॒ पार्थि॑वानि॒ ज्रयां॑सि
   आ भा॒नुना पार्थि॑वानि ज्रयां॑सि
   आ भा॒नुना पार्थि॑वानि ज्रयां॑सि

Halfverse: b    म॒हस्तो॒दस्य॑ धृष॒ता त॑तन्थ ।
   म॒हः तो॒दस्य धृष॒ता त॑तन्थ ।
   म॒हस् तो॒दस्य धृष॒ता त॑तन्थ ।

Halfverse: c    स बा॑ध॒स्वाप॑ भ॒या सहो॑भि॒ स्पृधो॑ वनु॒ष्यन्व॒नुषो॒ नि जू॑र्व ।।
   स बा॑ध॒स्वाप॑ भ॒या सहो॑भि
   स बा॑धस्व अप भ॒या सहो॑भिः
   स बा॑धस्व अप भ॒या सहो॑भि

Halfverse: d    स्पृधो॑ वनु॒ष्यन्व॒नुषो॒ नि जू॑र्व ।।
   स्पृधः वनु॒ष्यन् व॒नुषः नि जू॑र्व ।।
   स्पृधो वनु॒ष्यन् व॒नुषो नि जू॑र्व ।।


Verse: 7 
Halfverse: a    स चि॑त्र चि॒त्रं चि॒तय॑न्तम॒स्मे चित्र॑क्षत्र चि॒त्रत॑मं वयो॒धाम् ।
   स चि॑त्र चि॒त्रं चि॒तय॑न्तम॒स्मे
   स चि॑त्र चि॒त्रम् चि॒तय॑न्तम् अ॒स्मे
   स चि॑त्र चि॒त्रं चि॒तय॑न्तम् अ॒स्मे

Halfverse: b    चित्र॑क्षत्र चि॒त्रत॑मं वयो॒धाम् ।
   चित्र॑क्षत्र चि॒त्रत॑मम् वयो॒धाम् ।
   चित्र॑क्षत्र चि॒त्रत॑मं वयो॒धाम् ।

Halfverse: c    च॒न्द्रं र॒यिम्पु॑रु॒वीर॑म्बृ॒हन्तं॒ चन्द्र॑ च॒न्द्राभि॑र्गृण॒ते यु॑वस्व ।।
   च॒न्द्रं र॒यिम्पु॑रु॒वीर॑म्बृ॒हन्तं
   च॒न्द्रम् र॒यिम् पुरु॒वीर॑म् बृ॒हन्त॑म्
   च॒न्द्रं र॒यिम् पुरु॒वीर॑म् बृ॒हन्तं

Halfverse: d    चन्द्र॑ च॒न्द्राभि॑र्गृण॒ते यु॑वस्व ।।
   चन्द्र च॒न्द्राभिः गृण॒ते यु॑वस्व ।।
   चन्द्र च॒न्द्राभि॑र् गृण॒ते यु॑वस्व ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.