TITUS
Rg-Veda: Rg-Veda-Samhita
Part No. 450
Previous part

Hymn: 9_(450) 
Verse: 1 
Halfverse: a    अह॑श्च कृ॒ष्णमह॒रर्जु॑नं च॒ वि व॑र्तेते॒ रज॑सी वे॒द्याभिः॑ ।
   अह॑श्च कृ॒ष्णमह॒रर्जु॑नं च
   अह॑र् च कृ॒ष्णम् अह॑र् अर्जु॑नम् च
   अह॑श् च कृ॒ष्णम् अह॑र् अर्जु॑नं च

Halfverse: b    वि व॑र्तेते॒ रज॑सी वे॒द्याभिः॑ ।
   वि व॑र्तेते रज॑सी वे॒द्याभिः ।
   वि व॑र्तेते रज॑सी वेदि॒याभिः ।

Halfverse: c    वै॑श्वान॒रो जाय॑मानो॒ न राजावा॑तिर॒ज्ज्योति॑षा॒ग्निस्तमां॑सि ।।
   वै॑श्वान॒रो जाय॑मानो॒ न राजा
   वैश्वान॒रः जाय॑मानः न राजा
   वैश्वान॒रो जाय॑मानो न राजा

Halfverse: d     अवा॑तिर॒ज्ज्योति॑षा॒ग्निस्तमां॑सि ।।
   अव अतिरत् ज्योति॑षा अ॒ग्निः तमां॑सि ।।
   अवा॑तिरज् ज्योति॑षा॒ग्निस् तमां॑सि ।।


Verse: 2 
Halfverse: a    नाहं तन्तुं॒ न वि जा॑ना॒म्योतुं॒ न यं वय॑न्ति सम॒रे ऽत॑मानाः ।
   नाहं तन्तुं॒ न वि जा॑ना॒म्योतुं
   न अ॒हम् तन्तु॑म् न वि जा॑नामि ओतु॑म्
   नाहं तन्तुं न वि जा॑नामि ओतुं

Halfverse: b    न यं वय॑न्ति सम॒रे ऽत॑मानाः ।
   न यम् वय॑न्ति सम॒रे अत॑मानाः ।
   न यं वय॑न्ति सम॒रे ऽत॑मानाः ।

Halfverse: c    कस्य॑ स्वित्पु॒त्र इ॒ह वक्त्वा॑नि प॒रो व॑दा॒त्यव॑रेण पि॒त्रा ।।
   कस्य॑ स्वित्पु॒त्र इ॒ह वक्त्वा॑नि
   कस्य स्वित् पु॒त्रः इ॒ह वक्त्वा॑नि
   कस्य स्वित् पु॒त्र इ॒ह वक्तु॑वानि

Halfverse: d    प॒रो व॑दा॒त्यव॑रेण पि॒त्रा ।।
   प॒रः व॑दाति अव॑रेण पि॒त्रा ।।
   प॒रो व॑दाति अव॑रेण पि॒त्रा ।।


Verse: 3 
Halfverse: a    स इत्तन्तुं॒ स वि जा॑ना॒त्योतुं॒ स वक्त्वा॑न्यृतु॒था व॑दाति ।
   स इत्तन्तुं॒ स वि जा॑ना॒त्योतुं
   सः ।!। इत् तन्तु॑म् स वि जा॑नाति ओतु॑म्
   स इत् तन्तुं स वि जा॑नाति ओतुं

Halfverse: b    स वक्त्वा॑न्यृतु॒था व॑दाति ।
   स वक्त्वा॑नि ऋतु॒था व॑दाति ।
   स वक्तु॑वानि ऋतु॒था व॑दाति ।

Halfverse: c    य ईं॒ चिके॑तद॒मृत॑स्य गो॒पा अ॒वश्चर॑न्प॒रो अ॒न्येन॒ पश्य॑न् ।।
   य ईं॒ चिके॑तद॒मृत॑स्य गो॒पा
   यः ई॑म् चिके॑तत् अ॒मृत॑स्य गो॒पाः
   य ईं चिके॑तद् अ॒मृत॑स्य गो॒पा

Halfverse: d    अ॒वश्चर॑न्प॒रो अ॒न्येन॒ पश्य॑न् ।।
   अ॒वः चर॑न् प॒रः अ॒न्येन पश्य॑न् ।।
   अ॒वश् चर॑न् प॒रो अ॒न्येन पश्य॑न् ।।


Verse: 4 
Halfverse: a    अ॒यं होता॑ प्रथ॒मः पश्य॑ते॒ममि॒दं ज्योति॑र॒मृत॒म्मर्त्ये॑षु ।
   अ॒यं होता॑ प्रथ॒मः पश्य॑ते॒मम्
   अ॒यम् होता प्रथ॒मः पश्य॑त इ॒मम्
   अ॒यं होता प्रथ॒मः पश्य॑ते॒मम्

Halfverse: b    इ॒दं ज्योति॑र॒मृत॒म्मर्त्ये॑षु ।
   इ॒दम् ज्योतिः अ॒मृत॑म् मर्त्ये॑षु ।
   इ॒दं ज्योति॑र् अ॒मृत॑म् मर्ति॑येषु ।

Halfverse: c    अ॒यं स ज॑ज्ञे ध्रु॒व आ निष॒त्तो ऽम॑र्त्यस्त॒न्वा॒ वर्ध॑मानः ।।
   अ॒यं स ज॑ज्ञे ध्रु॒व आ निष॒त्तो
   अ॒यम् स ज॑ज्ञे ध्रु॒वः आ निष॑त्तः
   अ॒यं स ज॑ज्ञे ध्रु॒व आ निष॑त्तो

Halfverse: d    ऽमर्त्यस्त॒न्वा॒ वर्ध॑मानः ।।
   अम॑र्त्यः त॒न्वा वर्ध॑मानः ।।
   अम॑र्तियस् त॒नुवा वर्ध॑मानः ।।


Verse: 5 
Halfverse: a    ध्रु॒वं ज्योति॒र्निहि॑तं दृ॒शये॒ कम्मनो॒ जवि॑ष्ठम्प॒तय॑त्स्व॒न्तः ।
   ध्रु॒वं ज्योति॒र्निहि॑तं दृ॒शये॒ कम्
   ध्रु॒वम् ज्योतिः निहि॑तम् दृ॒शये कम्
   ध्रु॒वं ज्योति॑र् निहि॑तं दृ॒शये कम्

Halfverse: b    मनो॒ जवि॑ष्ठम्प॒तय॑त्स्व॒न्तः ।
   मनः जवि॑ष्ठम् प॒तय॑त्सु अ॒न्तर् ।
   मनो जवि॑ष्ठम् प॒तय॑त्सु अ॒न्तः ।

Halfverse: c    विश्वे॑ दे॒वाः सम॑नसः॒ सके॑ता॒ एकं॒ क्रतु॑म॒भि वि य॑न्ति सा॒धु ।।
   विश्वे॑ दे॒वाः सम॑नसः॒ सके॑ता
   विश्वे दे॒वाः सम॑नसः सके॑ताः
   विश्वे दे॒वाः सम॑नसः सके॑ता

Halfverse: d    एकं॒ क्रतु॑म॒भि वि य॑न्ति सा॒धु ।।
   एक॑म् क्रतु॑म् अ॒भि वि य॑न्ति सा॒धु ।।
   एकं क्रतु॑म् अ॒भि वि य॑न्ति सा॒धु ।।


Verse: 6 
Halfverse: a    वि मे॒ कर्णा॑ पतयतो॒ वि चक्षु॒र्वी॒दं ज्योति॒र्हृद॑य॒ आहि॑तं॒ यत् ।
   वि मे॒ कर्णा॑ पतयतो॒ वि चक्षु॑र्
   वि मे कर्णा पतयतः वि चक्षुः
   वि मे कर्णा पतयतो वि चक्षु॑र्

Halfverse: b    वी॒दं ज्योति॒र्हृद॑य॒ आहि॑तं॒ यत् ।
   वि इ॒दम् ज्योतिः हृद॑ये आहि॑तम् यत् ।
   वी॒दं ज्योति॑र् हृद॑य आहि॑तं यत् ।

Halfverse: c    वि मे॒ मन॑श्चरति दूरआधीः॒ किं स्वि॑द्व॒क्ष्यामि॒ किमु॒ नू म॑निष्ये ।।
   वि मे॒ मन॑श्चरति दूरआधीः
   वि मे मनः चरति दूरआधीः
   वि मे मन॑श् चरति दूरआधीः

Halfverse: d    किं स्वि॑द्व॒क्ष्यामि॒ किमु॒ नू म॑निष्ये ।।
   किम् स्वित् व॒क्ष्यामि किम् उ नु+ म॑निष्ये ।।
   किं स्वि॑द् व॒क्ष्यामि किम् उ नू म॑निष्ये ।।


Verse: 7 
Halfverse: a    विश्वे॑ दे॒वा अ॑नमस्यन्भिया॒नास्त्वाम॑ग्ने॒ तम॑सि तस्थि॒वांस॑म् ।
   विश्वे॑ दे॒वा अ॑नमस्यन्भिया॒नास्
   विश्वे दे॒वाः अ॑नमस्यन् भिया॒नाः
   विश्वे दे॒वा अ॑नमस्यन् भिया॒नास्

Halfverse: b    त्वाम॑ग्ने॒ तम॑सि तस्थि॒वांस॑म् ।
   त्वाम् अग्ने तम॑सि तस्थि॒वांस॑म् ।
   तु॒वाम् अग्ने तम॑सि तस्थि॒वांस॑म् ।

Halfverse: c    वै॑श्वान॒रो॑ ऽवतू॒तये॒ नो ऽम॑र्त्यो ऽवतू॒तये॑ नः ।।
   वै॑श्वान॒रो॑ ऽवतू॒तये॒ नो
   वै॑श्वान॒रः अ॑वतु ऊ॒तये नः
   वैश्वान॒रे अ॑वतु ऊ॒तये नो

Halfverse: d    ऽमर्त्यो ऽवतू॒तये॑ नः ।।
   अम॑र्त्यः अवतु ऊ॒तये नः ।।
   अम॑र्तियो अवतु ऊ॒तये नः ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.