TITUS
Rg-Veda: Rg-Veda-Samhita
Part No. 455
Previous part

Hymn: 14_(455) 
Verse: 1 
Halfverse: a    अ॒ग्ना यो मर्त्यो॒ दुवो॒ धियं॑ जु॒जोष॑ धी॒तिभिः॑ ।
   अ॒ग्ना यो मर्त्यो॒ दुवो
   अ॒ग्ना यः मर्त्यः दुवः
   अ॒ग्ना यो मर्ति॑यो दुवो

Halfverse: b    धियं॑ जु॒जोष॑ धी॒तिभिः॑ ।
   धिय॑म् जु॒जोष धी॒तिभिः ।
   धियं जु॒जोष धी॒तिभिः ।

Halfverse: c    भस॒न्नु ष प्र पू॒र्व्य इषं॑ वुरी॒ताव॑से ।।
   भस॒न्नु ष प्र पू॒र्व्य
   भस॑त् नु स प्र पू॒र्व्यः
   भस॑न् नु ष प्र पू॑र्वि॒य

Halfverse: d    इषं॑ वुरी॒ताव॑से ।।
   इष॑म् वुरीत अव॑से ।।
   इषं वुरीत अव॑से ।।


Verse: 2 
Halfverse: a    अ॒ग्निरिद्धि प्रचे॑ता अ॒ग्निर्वे॒धस्त॑म॒ ऋषिः॑ ।
   अ॒ग्निरिद्धि प्रचे॑ता
   अ॒ग्निः इत् हि प्रचे॑ताः
   अ॒ग्निर् इद् धि प्रचे॑ता

Halfverse: b    अ॒ग्निर्वे॒धस्त॑म॒ ऋषिः॑ ।
   अ॒ग्निः वे॒धस्त॑मः ऋषिः ।
   अ॒ग्निर् वे॒धस्त॑म ऋषिः ।

Halfverse: c    अ॒ग्निं होता॑रमीळते य॒ज्ञेषु॒ मनु॑षो॒ विशः॑ ।।
   अ॒ग्निं होता॑रमीळते
   अ॒ग्निम् होता॑रम् ईळते
   अ॒ग्निं होता॑रम् ईळते

Halfverse: d    य॒ज्ञेषु॒ मनु॑षो॒ विशः॑ ।।
   य॒ज्ञेषु मनु॑षः विशः ।।
   य॒ज्ञेषु मनु॑षो विशः ।।


Verse: 3 
Halfverse: a    नाना॒ ह्य॒ग्ने ऽव॑से॒ स्पर्ध॑न्ते॒ रायो॑ अ॒र्यः ।
   नाना॒ ह्य॒ग्ने ऽव॑से
   नाना हि अ॑ग्ने अव॑से
   नाना हि अ॑ग्ने अव॑से

Halfverse: b    स्पर्ध॑न्ते॒ रायो॑ अ॒र्यः ।
   स्पर्ध॑न्ते रायः अ॒र्यः ।
   स्पर्ध॑न्ते रायो अरि॒यः ।

Halfverse: c    तूर्व॑न्तो॒ दस्यु॑मा॒यवो॑ व्र॒तैः सीक्ष॑न्तो अव्र॒तम् ।।
   तूर्व॑न्तो॒ दस्यु॑मा॒यवो
   तूर्व॑न्तः दस्यु॑म् आ॒यवः
   तूर्व॑न्तो दस्यु॑म् आ॒यवो

Halfverse: d    व्र॒तैः सीक्ष॑न्तो अव्र॒तम् ।।
   व्र॒तैः सीक्ष॑न्तः अव्र॒तम् ।।
   व्र॒तैः सीक्ष॑न्तो अव्र॒तम् ।।


Verse: 4 
Halfverse: a    अ॒ग्निर॒प्सामृ॑ती॒षहं॑ वी॒रं द॑दाति॒ सत्प॑तिम् ।
   अ॒ग्निर॒प्सामृ॑ती॒षहं
   अ॒ग्निः अ॒प्साम् ऋती॒षह॑म्
   अ॒ग्निर् अ॒प्साम् ऋती॒षहं

Halfverse: b    वी॒रं द॑दाति॒ सत्प॑तिम् ।
   वी॒रम् ददाति सत्प॑तिम् ।
   वी॒रं द॑दाति सत्प॑तिम् ।

Halfverse: c    यस्य॒ त्रस॑न्ति॒ शव॑सः सं॒चक्षि॒ शत्र॑वो भि॒या ।।
   यस्य॒ त्रस॑न्ति॒ शव॑सः
   यस्य त्रस॑न्ति शव॑सः
   यस्य त्रस॑न्ति शव॑सः

Halfverse: d    सं॒चक्षि॒ शत्र॑वो भि॒या ।।
   सं॒चक्षि शत्र॑वः भि॒या ।।
   सं॒चक्षि शत्र॑वो भि॒या ।।


Verse: 5 
Halfverse: a    अ॒ग्निर्हि वि॒द्मना॑ नि॒दो दे॒वो मर्त॑मुरु॒ष्यति॑ ।
   अ॒ग्निर्हि वि॒द्मना॑ नि॒दो
   अ॒ग्निः हि वि॒द्मना नि॒दः
   अ॒ग्निर् हि वि॒द्मना नि॒दो

Halfverse: b    दे॒वो मर्त॑मुरु॒ष्यति॑ ।
   दे॒वः मर्त॑म् उरु॒ष्यति ।
   दे॒वो मर्त॑म् उरु॒ष्यति ।

Halfverse: c    स॒हावा॒ यस्यावृ॑तो र॒यिर्वाजे॒ष्ववृ॑तः ।।
   स॒हावा॒ यस्यावृ॑तो
   स॒हावा यस्य अवृ॑तः
   स॒हावा यस्य अवृ॑तो

Halfverse: d    र॒यिर्वाजे॒ष्ववृ॑तः ।।
   र॒यिः वाजे॑षु अवृ॑तः ।।
   र॒यिर् वाजे॑षु अवृ॑तः ।।


Verse: 6 
Halfverse: a    अछा॑ नो मित्रमहो देव दे॒वानग्ने॒ वोचः॑ सुम॒तिं रोद॑स्योः ।
   अछा॑ नो मित्रमहो देव दे॒वान्
   अछ+ नः मित्रमहः देव दे॒वान्
   अछा नो मित्रमहो देव दे॒वान्

Halfverse: b    अग्ने॒ वोचः॑ सुम॒तिं रोद॑स्योः ।
   अग्ने वोचः सुम॒तिम् रोद॑स्योः ।
   अग्ने वोचः सुम॒तिं रोद॑सीयोः ।

Halfverse: c    वी॒हि स्व॒स्तिं सु॑क्षि॒तिं दि॒वो नॄन्द्वि॒षो अँहां॑सि दुरि॒ता त॑रेम॒ ता त॑रेम॒ तवाव॑सा तरेम ।।
   वी॒हि स्व॒स्तिं सु॑क्षि॒तिं दि॒वो नॄन्
   वी॒हि स्व॒स्तिम् सुक्षि॒तिम् दि॒वः नॄन्
   वी॒हि सुअ॒स्तिं सु॑क्षि॒तिं दि॒वो नॄन्

Halfverse: d    द्वि॒षो अँहां॑सि दुरि॒ता त॑रेम
   द्वि॒षः अंहां॑सि दुरि॒ता त॑रेम
   द्वि॒षो अंहां॑सि दुरि॒ता त॑रेम

Halfverse: e    ता त॑रेम॒ तवाव॑सा तरेम ।।
   ता त॑रेम तव अव॑सा तरेम ।।
   ता त॑रेम तवाव॑सा तरेम ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.