TITUS
Rg-Veda: Rg-Veda-Samhita
Part No. 456
Previous part

Hymn: 15_(456) 
Verse: 1 
Halfverse: a    इ॒ममू॒ षु वो॒ अति॑थिमुष॒र्बुधं॒ विश्वा॑सां वि॒शाम्पति॑मृञ्जसे गि॒रा ।
   इ॒ममू॒ षु वो॒ अति॑थिमुष॒र्बुधं
   इ॒मम् उ+ सु वः अति॑थिम् उष॒र्बुध॑म्
   इ॒मम् ऊ षु वो अति॑थिम् उष॒र्बुधं

Halfverse: b    विश्वा॑सां वि॒शाम्पति॑मृञ्जसे गि॒रा ।
   विश्वा॑साम् वि॒शाम् पति॑म् ऋञ्जसे गि॒रा ।
   विश्वा॑सां वि॒शाम् पति॑म् ऋञ्जसे गि॒रा ।

Halfverse: c    वेतीद्दि॒वो ज॒नुषा॒ कच्चि॒दा शुचि॒र्ज्योक्चि॑दत्ति॒ गर्भो॒ यदच्यु॑तम् ।।
   वेतीद्दि॒वो ज॒नुषा॒ कच्चि॒दा शुचि॑र्
   वेति इत् दि॒वः ज॒नुषा कत् चित् आ शुचिः
   वेतीद् दि॒वो ज॒नुषा कच् चिद् आ शुचि॑र्

Halfverse: d    ज्योक्चि॑दत्ति॒ गर्भो॒ यदच्यु॑तम् ।।
   ज्योक् चित् अत्ति गर्भः यत् अच्यु॑तम् ।।
   जि॒योक् चिद् अत्ति गर्भो यद् अच्यु॑तम् ।।


Verse: 2 
Halfverse: a    मि॒त्रं न यं सुधि॑त॒म्भृग॑वो द॒धुर्वन॒स्पता॒वीड्य॑मू॒र्ध्वशो॑चिषम् ।
   मि॒त्रं न यं सुधि॑त॒म्भृग॑वो द॒धुर्
   मि॒त्रम् न यम् सुधि॑तम् भृग॑वः द॒धुः
   मि॒त्रं न यं सुधि॑तम् भृग॑वो द॒धुर्

Halfverse: b    वन॒स्पता॒वीड्य॑मू॒र्ध्वशो॑चिषम् ।
   वन॒स्पतौ ईड्य॑म् ऊ॒र्ध्वशो॑चिषम् ।
   वन॒स्पता॑व् ईडि॑यम् ऊ॒र्ध्वशो॑चिषम् ।

Halfverse: c    स त्वं सुप्री॑तो वी॒तह॑व्ये अद्भुत॒ प्रश॑स्तिभिर्महयसे दि॒वेदि॑वे ।।
   स त्वं सुप्री॑तो वी॒तह॑व्ये अद्भुत
   स त्वम् सुप्री॑तः वी॒तह॑व्ये अद्भुत
   स त्वं सुप्री॑तो वी॒तह॑व्ये अद्भुत

Halfverse: d    प्रश॑स्तिभिर्महयसे दि॒वेदि॑वे ।।
   प्रश॑स्तिभिः महयसे दि॒वेदि॑वे ।।
   प्रश॑स्तिभिर् महयसे दि॒वेदि॑वे ।।


Verse: 3 
Halfverse: a    स त्वं दक्ष॑स्यावृ॒को वृ॒धो भू॑र॒र्यः पर॒स्यान्त॑रस्य॒ तरु॑षः ।
   स त्वं दक्ष॑स्यावृ॒को वृ॒धो भू॑र्
   स त्वम् दक्ष॑स्य अवृ॒कः वृ॒धः भूः
   स त्वं दक्ष॑स्य अवृ॒को वृ॒धो भूउ॑र्

Halfverse: b    अ॒र्यः पर॒स्यान्त॑रस्य॒ तरु॑षः ।
   अ॒र्यः पर॑स्य अन्त॑रस्य तरु॑षः ।
   अ॒र्यः पर॑स्य अन्त॑रस्य तरु॑षः ।

Halfverse: c    रा॒यः सू॑नो सहसो॒ मर्त्ये॒ष्वा छ॒र्दिर्य॑छ वी॒तह॑व्याय स॒प्रथो॑ भ॒रद्वा॑जाय स॒प्रथः॑ ।।
   रा॒यः सू॑नो सहसो॒ मर्त्ये॒ष्वा
   रा॒यः सू॑नो सहसः मर्त्ये॑षु आ
   रा॒यः सू॑नो सहसो मर्ति॑येषु आ

Halfverse: d    छ॒र्दिर्य॑छ वी॒तह॑व्याय स॒प्रथो
   छ॒र्दिः य॑छ वी॒तह॑व्याय स॒प्रथः
   छ॒र्दिर् यछ वी॒तह॑व्याय स॒प्रथो

Halfverse: e    भ॒रद्वा॑जाय स॒प्रथः॑ ।।
   भ॒रद्वा॑जाय स॒प्रथः ।।
   भ॒रद्वा॑जाय स॒प्रथः ।।


Verse: 4 
Halfverse: a    द्यु॑ता॒नं वो॒ अति॑थिं॒ स्व॑र्णरम॒ग्निं होता॑र॒म्मनु॑षः स्वध्व॒रम् ।
   द्यु॑ता॒नं वो॒ अति॑थिं॒ स्व॑र्णरम्
   द्युता॒नम् वः अति॑थिम् स्व॑र्णरम्
   दियुता॒नं वो अति॑थिं सुव॑र्णरम्

Halfverse: b    अ॒ग्निं होता॑र॒म्मनु॑षः स्वध्व॒रम् ।
   अ॒ग्निम् होता॑रम् मनु॑षः स्वध्व॒रम् ।
   अ॒ग्निं होता॑रम् मनु॑षः सुअध्व॒रम् ।

Halfverse: c    विप्रं॒ न द्यु॒क्षव॑चसं सुवृ॒क्तिभि॑र्हव्य॒वाह॑मर॒तिं दे॒वमृ॑ञ्जसे ।।
   विप्रं॒ न द्यु॒क्षव॑चसं सुवृ॒क्तिभि॑र्
   विप्र॑म् न द्यु॒क्षव॑चसम् सुवृ॒क्तिभिः
   विप्रं न द्यु॒क्षव॑चसं सुवृ॒क्तिभि॑र्

Halfverse: d    हव्य॒वाह॑मर॒तिं दे॒वमृ॑ञ्जसे ।।
   ह॑व्य॒वाह॑म् अर॒तिम् दे॒वम् ऋञ्जसे ।।
   ह॑व्य॒वाह॑म् अर॒तिं दे॒वम् ऋञ्जसे ।।


Verse: 5 
Halfverse: a    पा॑व॒कया॒ यश्चि॒तय॑न्त्या कृ॒पा क्षाम॑न्रुरु॒च उ॒षसो॒ न भा॒नुना॑ ।
   पा॑व॒कया॒ यश्चि॒तय॑न्त्या कृ॒पा
   पा॑व॒कया यः चि॒तय॑न्त्या कृ॒पा
   प॑वा॒कया यश् चि॒तय॑न्तिया कृ॒पा

Halfverse: b    क्षाम॑न्रुरु॒च उ॒षसो॒ न भा॒नुना॑ ।
   क्षाम॑न् रुरु॒चे उ॒षसः न भा॒नुना ।
   क्षाम॑न् रुरु॒च उ॒षसो न भा॒नुना ।

Halfverse: c    तूर्व॒न्न याम॒न्नेत॑शस्य॒ नू रण॒ आ यो घृ॒णे न त॑तृषा॒णो अ॒जरः॑ ।।
   तूर्व॒न्न याम॒न्नेत॑शस्य॒ नू रण
   तूर्व॑न् न याम॑न् एत॑शस्य नु+ रणे
   तूर्व॑न् न याम॑न्न् एत॑शस्य नू रण

Halfverse: d    आ यो घृ॒णे न त॑तृषा॒णो अ॒जरः॑ ।।
   आ यः घृ॒णे न त॑तृषा॒णः अ॒जरः ।।
   आ यो घृ॒णे न त॑तृषा॒णो अ॒जरः ।।


Verse: 6 
Halfverse: a    अ॒ग्निम्॑ग्निं वः स॒मिधा॑ दुवस्यत प्रि॒यम्॑प्रियं वो॒ अति॑थिं गृणी॒षणि॑ ।
   अ॒ग्निम्॑ग्निं वः स॒मिधा॑ दुवस्यत
   अ॒ग्निम्॑ग्निम् वः स॒मिधा दुवस्यत
   अ॒ग्निम्॑ग्निं वः स॒मिधा दुवस्यत

Halfverse: b    प्रि॒यम्॑प्रियं वो॒ अति॑थिं गृणी॒षणि॑ ।
   प्रि॒यम्॑प्रियम् वः अति॑थिम् गृणी॒षणि ।
   प्रि॒यम्॑प्रियं वो अति॑थिं गृणी॒षणि ।

Halfverse: c    उप॑ वो गी॒र्भिर॒मृतं॑ विवासत
   उप॑ वो गी॒र्भिर॒मृतं॑ विवासत
   उप वः गी॒र्भिः अ॒मृत॑म् विवासत
   उप वो गी॒र्भिर् अ॒मृतं विवासत

Halfverse: d    दे॒वो दे॒वेषु॒ वन॑ते॒ हि वार्यं॑ दे॒वो दे॒वेषु॒ वन॑ते॒ हि नो॒ दुवः॑ ।।
   दे॒वो दे॒वेषु॒ वन॑ते॒ हि वार्यं
   दे॒वः दे॒वेषु वन॑ते हि वार्य॑म्
   दे॒वो दे॒वेषु वन॑ते हि वारि॑यं

Halfverse: e    दे॒वो दे॒वेषु॒ वन॑ते॒ हि नो॒ दुवः॑ ।।
   दे॒वः दे॒वेषु वन॑ते हि नः दुवः ।।
   दे॒वो दे॒वेषु वन॑ते हि नो दुवः ।।


Verse: 7 
Halfverse: a    समि॑द्धम॒ग्निं स॒मिधा॑ गि॒रा गृ॑णे॒ शुचि॑म्पाव॒कम्पु॒रो अ॑ध्व॒रे ध्रु॒वम् ।
   समि॑द्धम॒ग्निं स॒मिधा॑ गि॒रा गृ॑णे
   समि॑द्धम् अ॒ग्निम् स॒मिधा गि॒रा गृ॑णे
   समि॑द्धम् अ॒ग्निं स॒मिधा गि॒रा गृ॑णे

Halfverse: b    शुचि॑म्पाव॒कम्पु॒रो अ॑ध्व॒रे ध्रु॒वम् ।
   शुचि॑म् पाव॒कम् पु॒रः अ॑ध्व॒रे ध्रु॒वम् ।
   शुचि॑म् पवा॒कम् पु॒रो अ॑ध्व॒रे ध्रु॒वम् ।

Halfverse: c    विप्रं॒ होता॑रम्पुरु॒वार॑म॒द्रुहं॑ क॒विं सु॒म्नैरी॑महे जा॒तवे॑दसम् ।।
   विप्रं॒ होता॑रम्पुरु॒वार॑म॒द्रुहं
   विप्र॑म् होता॑रम् पुरु॒वार॑म् अ॒द्रुह॑म्
   विप्रं होता॑रम् पुरु॒वार॑म् अ॒द्रुहं

Halfverse: d    क॒विं सु॒म्नैरी॑महे जा॒तवे॑दसम् ।।
   क॒विम् सु॒म्नैः ई॑महे जा॒तवे॑दसम् ।।
   क॒विं सु॒म्नैर् ईमहे जा॒तवे॑दसम् ।।


Verse: 8 
Halfverse: a    त्वां दू॒तम॑ग्ने अ॒मृतं॑ यु॒गेयु॑गे हव्य॒वाहं॑ दधिरे पा॒युमीड्य॑म् ।
   त्वां दू॒तम॑ग्ने अ॒मृतं॑ यु॒गेयु॑गे
   त्वाम् दू॒तम् अग्ने अ॒मृत॑म् यु॒गेयु॑गे
   त्वां दू॒तम् अग्ने अ॒मृतं यु॒गेयु॑गे

Halfverse: b    हव्य॒वाहं॑ दधिरे पा॒युमीड्य॑म् ।
   ह॑व्य॒वाह॑म् दधिरे पा॒युम् ईड्य॑म् ।
   ह॑व्य॒वाहं दधिरे पा॒युम् ईडि॑यम् ।

Halfverse: c    दे॒वास॑श्च॒ मर्ता॑सश्च॒ जागृ॑विं वि॒भुं वि॒श्पतिं॒ नम॑सा॒ नि षे॑दिरे ।।
   दे॒वास॑श्च॒ मर्ता॑सश्च॒ जागृ॑विं
   दे॒वासः च मर्ता॑सः च जागृ॑विम्
   दे॒वास॑श् च मर्तिआ॑सश् % च जागृ॑विं

Halfverse: d    वि॒भुं वि॒श्पतिं॒ नम॑सा॒ नि षे॑दिरे ।।
   वि॒भुम् वि॒श्पति॑म् नम॑सा नि से॑दिरे ।।
   वि॒भुं वि॒श्पतिं नम॑सा नि षे॑दिरे ।।


Verse: 9 
Halfverse: a    वि॒भूष॑न्नग्न उ॒भयाँ॒ अनु॑ व्र॒ता दू॒तो दे॒वानां॒ रज॑सी॒ समी॑यसे ।
   वि॒भूष॑न्नग्न उ॒भयाँ॒ अनु॑ व्र॒ता
   वि॒भूष॑न् अग्ने उ॒भया॑न् अनु व्र॒ता
   वि॒भूष॑न्न् अग्न उ॒भयाँ अनु व्र॒ता

Halfverse: b    दू॒तो दे॒वानां॒ रज॑सी॒ समी॑यसे ।
   दू॒तः दे॒वाना॑म् रज॑सी सम् ईयसे ।
   दू॒तो दे॒वानां रज॑सी सम् ईयसे ।

Halfverse: c    यत्ते॑ धी॒तिं सु॑म॒तिमा॑वृणी॒महे ऽध॑ स्मा नस्त्रि॒वरू॑थः शि॒वो भ॑व ।।
   यत्ते॑ धी॒तिं सु॑म॒तिमा॑वृणी॒महे
   यत् ते धी॒तिम् सुम॒तिम् आवृणी॒महे
   यत् ते धी॒तिं सु॑म॒तिम् आवृणी॒महे

Halfverse: d    ऽध स्मा नस्त्रि॒वरू॑थः शि॒वो भ॑व ।।
   अध स्म+ नः त्रि॒वरू॑थः शि॒वः भ॑व ।।
   अध स्मा नस् त्रि॒वरू॑थः शि॒वो भ॑व ।।


Verse: 10 
Halfverse: a    तं सु॒प्रती॑कं सु॒दृशं॒ स्वञ्च॒मवि॑द्वांसो वि॒दुष्ट॑रं सपेम ।
   तं सु॒प्रती॑कं सु॒दृशं॒ स्वञ्च॑म्
   तम् सु॒प्रती॑कम् सु॒दृश॑म् स्वञ्च॑म्
   तं सु॒प्रती॑कं सु॒दृशं सुअञ्च॑म्

Halfverse: b    अवि॑द्वांसो वि॒दुष्ट॑रं सपेम ।
   अवि॑द्वांसः वि॒दुष्ट॑रम् सपेम ।
   अवि॑द्वांसो वि॒दुष्ट॑रं सपेम ।

Halfverse: c    स य॑क्ष॒द्विश्वा॑ व॒युना॑नि वि॒द्वान्प्र ह॒व्यम॒ग्निर॒मृते॑षु वोचत् ।।
   स य॑क्ष॒द्विश्वा॑ व॒युना॑नि वि॒द्वान्
   स य॑क्षत् विश्वा व॒युना॑नि वि॒द्वान्
   स य॑क्षद् विश्वा व॒युना॑नि वि॒द्वान्

Halfverse: d    प्र ह॒व्यम॒ग्निर॒मृते॑षु वोचत् ।।
   प्र ह॒व्यम् अ॒ग्निः अ॒मृते॑षु वोचत् ।।
   प्र ह॒व्यम् अ॒ग्निर् अ॒मृते॑षु वोचत् ।।


Verse: 11 
Halfverse: a    तम॑ग्ने पास्यु॒त तम्पि॑पर्षि॒ यस्त॒ आन॑ट्क॒वये॑ शूर धी॒तिम् ।
   तम॑ग्ने पास्यु॒त तम्पि॑पर्षि
   तम् अग्ने पासि उ॒त तम् पिपर्षि
   तम् अग्ने पासि उ॒त तम् पिपर्षि

Halfverse: b    यस्त॒ आन॑ट्क॒वये॑ शूर धी॒तिम् ।
   यः ते आन॑ट् क॒वये शूर धी॒तिम् ।
   यस् त आन॑ट् क॒वये शूर धी॒तिम् ।

Halfverse: c    य॒ज्ञस्य॑ वा॒ निशि॑तिं॒ वोदि॑तिं वा॒ तमित्पृ॑णक्षि॒ शव॑सो॒त रा॒या ।।
   य॒ज्ञस्य॑ वा॒ निशि॑तिं॒ वोदि॑तिं वा
   य॒ज्ञस्य वा निशि॑तिम् वा उदि॑तिम् वा
   य॒ज्ञस्य वा निशि॑तिं वोदि॑तिं वा

Halfverse: d    तमित्पृ॑णक्षि॒ शव॑सो॒त रा॒या ।।
   तम् इत् पृणक्षि शव॑सा उ॒त रा॒या ।।
   तम् इत् पृणक्षि शव॑सो॒त रा॒या ।।


Verse: 12 
Halfverse: a    त्वम॑ग्ने वनुष्य॒तो नि पा॑हि॒ त्वमु॑ नः सहसावन्नव॒द्यात् ।
   त्वम॑ग्ने वनुष्य॒तो नि पा॑हि
   त्वम् अग्ने वनुष्य॒तः नि पा॑हि
   तु॒वम् अग्ने वनुष्य॒तो नि पा॑हि

Halfverse: b    त्वमु॑ नः सहसावन्नव॒द्यात् ।
   त्वम् उ नः सहसावन् अव॒द्यात् ।
   तु॒वम् उ नः सहसावन्न् अव॒द्यात् ।

Halfverse: c    सं त्वा॑ ध्वस्म॒न्वद॒भ्ये॑तु॒ पाथः॒ सं र॒यि स्पृ॑ह॒याय्यः॑ सह॒स्री ।।
   सं त्वा॑ ध्वस्म॒न्वद॒भ्ये॑तु॒ पाथः
   सम् त्वा ध्वस्म॒न्वत् अ॒भि ए॑तु पाथः
   सं त्वा ध्वस्म॒न्वद् अ॒भि ए॑तु पाथः

Halfverse: d    सं र॒यि स्पृ॑ह॒याय्यः॑ सह॒स्री ।।
   सम् र॒यिः स्पृ॑ह॒याय्यः सह॒स्री ।।
   सं र॒यि स्पृ॑ह॒यायि॑यः सह॒स्री ।।


Verse: 13 
Halfverse: a    अ॒ग्निर्होता॑ गृ॒हप॑तिः॒ स राजा॒ विश्वा॑ वेद॒ जनि॑मा जा॒तवे॑दाः ।
   अ॒ग्निर्होता॑ गृ॒हप॑तिः॒ स राजा
   अ॒ग्निः होता गृ॒हप॑तिः स राजा
   अ॒ग्निर् होता गृ॒हप॑तिः स राजा

Halfverse: b    विश्वा॑ वेद॒ जनि॑मा जा॒तवे॑दाः ।
   विश्वा वेद जनि॑म+ जा॒तवे॑दाः ।
   विश्वा वेद जनि॑मा जा॒तवे॑दाः ।

Halfverse: c    दे॒वाना॑मु॒त यो मर्त्या॑नां॒ यजि॑ष्ठः॒ स प्र य॑जतामृ॒तावा॑ ।।
   दे॒वाना॑मु॒त यो मर्त्या॑नां
   दे॒वाना॑म् उ॒त यः मर्त्या॑नाम्
   दे॒वानाअ॑म् उ॒त यो मर्ति॑यानां

Halfverse: d    यजि॑ष्ठः॒ स प्र य॑जतामृ॒तावा॑ ।।
   यजि॑ष्ठः स प्र य॑जताम् ऋ॒तावा ।।
   यजि॑ष्ठः स प्र य॑जताम् ऋ॒तावा ।।


Verse: 14 
Halfverse: a    अग्ने॒ यद॒द्य वि॒शो अ॑ध्वरस्य होतः॒ पाव॑कशोचे॒ वेष्ट्वं हि यज्वा॑ ।
   अग्ने॒ यद॒द्य वि॒शो अ॑ध्वरस्य होतः
   अग्ने यत् अ॒द्य वि॒शः अ॑ध्वरस्य होतर्
   अग्ने यद् अ॒द्य वि॒शो अ॑ध्वरस्य होतः

Halfverse: b    पाव॑कशोचे॒ वेष्ट्वं ।!। हि यज्वा॑ ।
   पाव॑कशोचे वेः त्वम् हि यज्वा ।
   पवा॑कशोचे वेष् टु॒वं हि यज्वा ।

Halfverse: c    ऋ॒ता य॑जासि महि॒ना वि यद्भूर्ह॒व्या व॑ह यविष्ठ॒ या ते॑ अ॒द्य ।।
   ऋ॒ता य॑जासि महि॒ना वि यद्भूर्
   ऋ॒ता य॑जासि महि॒ना वि यत् भूः
   ऋ॒ता य॑जासि महि॒ना वि यद् भूर्

Halfverse: d    ह॒व्या व॑ह यविष्ठ॒ या ते॑ अ॒द्य ।।
   ह॒व्या व॑ह यविष्ठ या ते अ॒द्य ।।
   ह॒व्या व॑ह यविष्ठ या ते अ॒द्य ।।


Verse: 15 
Halfverse: a    अ॒भि प्रयां॑सि॒ सुधि॑तानि॒ हि ख्यो नि त्वा॑ दधीत॒ रोद॑सी॒ यज॑ध्यै ।
   अ॒भि प्रयां॑सि॒ सुधि॑तानि॒ हि ख्यो
   अ॒भि प्रयां॑सि सुधि॑तानि हि ख्यः
   अ॒भि प्रयां॑सि सुधि॑तानि हि ख्यो

Halfverse: b    नि त्वा॑ दधीत॒ रोद॑सी॒ यज॑ध्यै ।
   नि त्वा दधीत रोद॑सी यज॑ध्यै ।
   नि त्वा दधीत रोद॑सी यज॑ध्यै ।

Halfverse: c    अवा॑ नो मघव॒न्वाज॑साता॒वग्ने॒ विश्वा॑नि दुरि॒ता त॑रेम॒ ता त॑रेम॒ तवाव॑सा तरेम ।।
   अवा॑ नो मघव॒न्वाज॑साताव्
   अव+ नः मघवन् वाज॑सातौ
   अवा नो ? मघवन् वाज॑साताव्

Halfverse: d    अग्ने॒ विश्वा॑नि दुरि॒ता त॑रेम
   अग्ने विश्वा॑नि दुरि॒ता त॑रेम
   अग्ने विश्वा॑नि दुरि॒ता त॑रेम

Halfverse: e    ता त॑रेम॒ तवाव॑सा तरेम ।।
   ता त॑रेम तव अव॑सा तरेम ।।
   ता त॑रेम तवाव॑सा तरेम ।।


Verse: 16 
Halfverse: a    अग्ने॒ विश्वे॑भिः स्वनीक दे॒वैरूर्णा॑वन्तम्प्रथ॒मः सी॑द॒ योनि॑म् ।
   अग्ने॒ विश्वे॑भिः स्वनीक दे॒वैर्
   अग्ने विश्वे॑भिः स्वनीक दे॒वैः
   अग्ने विश्वे॑भिः सुअनीक दे॒वैर्

Halfverse: b    ऊर्णा॑वन्तम्प्रथ॒मः सी॑द॒ योनि॑म् ।
   ऊर्णा॑वन्तम् प्रथ॒मः सी॑द योनि॑म् ।
   ऊर्णा॑वन्तम् प्रथ॒मः सी॑द योनि॑म् ।

Halfverse: c    कु॑ला॒यिनं॑ घृ॒तव॑न्तं सवि॒त्रे य॒ज्ञं न॑य॒ यज॑मानाय सा॒धु ।।
   कु॑ला॒यिनं॑ घृ॒तव॑न्तं सवि॒त्रे
   कु॑ला॒यिन॑म् घृ॒तव॑न्तम् सवि॒त्रे
   कु॑ला॒यिनं घृ॒तव॑न्तं सवि॒त्रे

Halfverse: d    य॒ज्ञं न॑य॒ यज॑मानाय सा॒धु ।।
   य॒ज्ञम् नय यज॑मानाय सा॒धु ।।
   य॒ज्ञं न॑य यज॑मानाय सा॒धु ।।


Verse: 17 
Halfverse: a    इ॒ममु॒ त्यम॑थर्व॒वद॒ग्निम्म॑न्थन्ति वे॒धसः॑ ।
   इ॒ममु॒ त्यम॑थर्व॒वद्
   इ॒मम् उ त्यम् अथर्व॒वत्
   इ॒मम् उ त्यम् अथर्व॒वद्

Halfverse: b    अ॒ग्निम्म॑न्थन्ति वे॒धसः॑ ।
   अ॒ग्निम् मन्थन्ति वे॒धसः ।
   अ॒ग्निम् मन्थन्ति वे॒धसः ।

Halfverse: c    यम॑ङ्कू॒यन्त॒मान॑य॒न्नमू॑रं श्या॒व्या॑भ्यः ।।
   यम॑ङ्कू॒यन्त॒मान॑यन्न्
   यम् अङ्कू॒यन्त॑म् आ अन॑यन्
   यम् अङ्कू॒यन्त॑म् आन॑यन्न्

Halfverse: d    अमू॑रं श्या॒व्या॑भ्यः ।।
   अमू॑रम् श्या॒व्या॑भ्यः ।।
   अमू॑रं श्या॒विया॑भियः ।।


Verse: 18 
Halfverse: a    जनि॑ष्वा दे॒ववी॑तये स॒र्वता॑ता स्व॒स्तये॑ ।
   जनि॑ष्वा दे॒ववी॑तये
   जनि॑ष्व+ दे॒ववी॑तये
   जनि॑ष्वा दे॒ववी॑तये

Halfverse: b    स॒र्वता॑ता स्व॒स्तये॑ ।
   स॒र्वता॑ता स्व॒स्तये ।
   स॒र्वता॑ता सुअ॒स्तये ।

Halfverse: c    आ दे॒वान्व॑क्ष्य॒मृताँ॑ ऋता॒वृधो॑ य॒ज्ञं दे॒वेषु॑ पिस्पृशः ।।
   आ दे॒वान्व॑क्ष्य॒मृताँ॑ ऋता॒वृधो
   आ दे॒वान् वक्षि अ॒मृता॑न् ऋता॒वृधः
   आ दे॒वान् वक्षि अ॒मृताँ ऋता॒वृधो

Halfverse: d    य॒ज्ञं दे॒वेषु॑ पिस्पृशः ।।
   य॒ज्ञम् दे॒वेषु पिस्पृशः ।।
   य॒ज्ञं दे॒वेषु पिस्पृशः ।।


Verse: 19 
Halfverse: a    व॒यमु॑ त्वा गृहपते जनाना॒मग्ने॒ अक॑र्म स॒मिधा॑ बृ॒हन्त॑म् ।
   व॒यमु॑ त्वा गृहपते जनानाम्
   व॒यम् उ त्वा गृहपते जनानाम्
   व॒यम् उ त्वा गृहपते जनानाम्

Halfverse: b    अग्ने॒ अक॑र्म स॒मिधा॑ बृ॒हन्त॑म् ।
   अग्ने अक॑र्म स॒मिधा बृ॒हन्त॑म् ।
   अग्ने अक॑र्म स॒मिधा बृ॒हन्त॑म् ।

Halfverse: c    अ॑स्थू॒रि नो॒ गार्ह॑पत्यानि सन्तु ति॒ग्मेन॑ न॒स्तेज॑सा॒ सं शि॑शाधि ।।
   अ॑स्थू॒रि नो॒ गार्ह॑पत्यानि सन्तु
   अस्थू॒रि नः गार्ह॑पत्यानि सन्तु
   अस्थू॒रि नो गार्ह॑पत्यानि सन्तु

Halfverse: d    ति॒ग्मेन॑ न॒स्तेज॑सा॒ सं शि॑शाधि ।।
   ति॒ग्मेन नः तेज॑सा सम् शिशाधि ।।
   ति॒ग्मेन नस् तेज॑सा सं शि॑शाधि ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.