TITUS
Rg-Veda: Rg-Veda-Samhita
Part No. 461
Previous part

Hymn: 20_(461) 
Verse: 1 
Halfverse: a    द्यौर्न य इ॑न्द्रा॒भि भूमा॒र्यस्त॒स्थौ र॒यिः शव॑सा पृ॒त्सु जना॑न् ।
   द्यौर्न य इ॑न्द्रा॒भि भूमा॒र्यस्
   द्यौः न यः इ॑न्द्र अ॒भि भूम अ॒र्यः
   द्यौर् न य इ॑न्द्र अ॒भि भूम अ॒र्यस्

Halfverse: b    त॒स्थौ र॒यिः शव॑सा पृ॒त्सु जना॑न् ।
   त॒स्थौ र॒यिः शव॑सा पृ॒त्सु जना॑न् ।
   त॒स्थौ र॒यिः शव॑सा पृ॒त्सु जना॑न् ।

Halfverse: c    तं नः॑ स॒हस्र॑भरमुर्वरा॒सां द॒द्धि सू॑नो सहसो वृत्र॒तुर॑म् ।।
   तं नः॑ स॒हस्र॑भरमुर्वरा॒सां
   तम् नः स॒हस्र॑भरम् उर्वरा॒साम्
   तं नः स॒हस्र॑भरम् उर्वरा॒सां

Halfverse: d    द॒द्धि सू॑नो सहसो वृत्र॒तुर॑म् ।।
   द॒द्धि सू॑नो सहसः वृत्र॒तुर॑म् ।।
   द॒द्धि सू॑नो सहसो वृत्र॒तुर॑म् ।।


Verse: 2 
Halfverse: a    दि॒वो न तुभ्य॒मन्वि॑न्द्र स॒त्रासु॒र्यं॑ दे॒वेभि॑र्धायि॒ विश्व॑म् ।
   दि॒वो न तुभ्य॒मन्वि॑न्द्र स॒त्रा
   दि॒वः न तुभ्य॑म् अनु इन्द्र स॒त्रा
   दि॒वो न तुभ्य॑म् अनु इन्द्र स॒त्रा

Halfverse: b     अ॑सु॒र्यं॑ दे॒वेभि॑र्धायि॒ विश्व॑म् ।
   अ॑सु॒र्य॑म् दे॒वेभिः धायि विश्व॑म् ।
   अ॑सु॒रियं दे॒वेभि॑र् धायि विश्व॑म् ।

Halfverse: c    अहिं॒ यद्वृ॒त्रम॒पो व॑व्रि॒वांसं॒ हन्नृ॑जीषि॒न्विष्णु॑ना सचा॒नः ।।
   अहिं॒ यद्वृ॒त्रम॒पो व॑व्रि॒वांसं
   अहि॑म् यत् वृ॒त्रम् अ॒पः व॑व्रि॒वांस॑म्
   अहिं यद् वृ॒त्रम् अ॒पो व॑व्रि॒वांसं

Halfverse: d    हन्नृ॑जीषि॒न्विष्णु॑ना सचा॒नः ।।
   हन् ऋजीषिन् विष्णु॑ना सचा॒नः ।।
   हन्न् ऋजीषिन् ? विष्णु॑ना सचा॒नः ।।


Verse: 3 
Halfverse: a    तूर्व॒न्नोजी॑यान्त॒वस॒स्तवी॑यान्कृ॒तब्र॒ह्मेन्द्रो॑ वृ॒द्धम॑हाः ।
   तूर्व॒न्नोजी॑यान्त॒वस॒स्तवी॑यान्
   तूर्व॑न् ओजी॑यान् त॒वसः तवी॑यान्
   तूर्व॑न्न् ओजी॑यान् त॒वस॑स् तवी॑यान्

Halfverse: b    कृ॒तब्र॒ह्मेन्द्रो॑ वृ॒द्धम॑हाः ।
   कृ॒तब्र॑ह्मा इन्द्रः वृ॒द्धम॑हाः ।
   कृ॒तब्र॑ह्मा इन्द॑रो वृ॒द्धम॑हाः ।

Halfverse: c    राजा॑भव॒न्मधु॑नः सो॒म्यस्य॒ विश्वा॑सां॒ यत्पु॒रां द॒र्त्नुमाव॑त् ।।
   राजा॑भव॒न्मधु॑नः सो॒म्यस्य
   राजा अभवत् मधु॑नः सो॒म्यस्य
   राजा॑भवन् मधु॑नः सोमि॒यस्य

Halfverse: d    विश्वा॑सां॒ यत्पु॒रां द॒र्त्नुमाव॑त् ।।
   विश्वा॑साम् यत् पु॒राम् द॒र्त्नुम् आव॑त् ।।
   विश्वा॑सां यत् पु॒राअं द॒र्त्नुम् आव॑त् ।।


Verse: 4 
Halfverse: a    श॒तैर॑पद्रन्प॒णय॑ इ॒न्द्रात्र॒ दशो॑णये क॒वये॒ ऽर्कसा॑तौ ।
   श॒तैर॑पद्रन्प॒णय॑ इ॒न्द्रात्र
   श॒तैः अ॑पद्रन् प॒णयः इन्द्र अत्र
   श॒तैर् अपद्रन् प॒णय इ॒न्द्रात्र

Halfverse: b    दशो॑णये क॒वये॒ ऽर्कसा॑तौ ।
   दशो॑णये क॒वये अ॒र्कसा॑तौ ।
   दशो॑णये क॒वये अ॒र्कसा॑तौ ।

Halfverse: c    व॒धैः शुष्ण॑स्या॒शुष॑स्य मा॒याः पि॒त्वो नारि॑रेची॒त्किं च॒न प्र ।।
   व॒धैः शुष्ण॑स्या॒शुष॑स्य मा॒याः
   व॒धैः शुष्ण॑स्य अ॒शुष॑स्य मा॒याः
   व॒धैः शुष्ण॑स्य अ॒शुष॑स्य मा॒याः

Halfverse: d    पि॒त्वो नारि॑रेची॒त्किं च॒न प्र ।।
   पि॒त्वः न अ॑रिरेचीत् किम् च॒न प्र ।।
   पि॒त्वो न अ॑रिरेचीत् किं च॒न प्र ।।


Verse: 5 
Halfverse: a    म॒हो द्रु॒हो अप॑ वि॒श्वायु॑ धायि॒ वज्र॑स्य॒ यत्पत॑ने॒ पादि॒ शुष्णः॑ ।
   म॒हो द्रु॒हो अप॑ वि॒श्वायु॑ धायि
   म॒हः द्रु॒हः अप वि॒श्वायु धायि
   म॒हो द्रु॒हो अप वि॒श्वायु धायि

Halfverse: b    वज्र॑स्य॒ यत्पत॑ने॒ पादि॒ शुष्णः॑ ।
   वज्र॑स्य यत् पत॑ने पादि शुष्णः ।
   वज्र॑स्य यत् पत॑ने पादि शुष्णः ।

Halfverse: c    उ॒रु ष स॒रथं॒ सार॑थये क॒रिन्द्रः॒ कुत्सा॑य॒ सूर्य॑स्य सा॒तौ ।।
   उ॒रु ष स॒रथं॒ सार॑थये कर्
   उ॒रु स स॒रथ॑म् सार॑थये कर्
   उ॒रु ष स॒रथं सार॑थये कर्

Halfverse: d    इन्द्रः॒ कुत्सा॑य॒ सूर्य॑स्य सा॒तौ ।।
   इन्द्रः कुत्सा॑य सूर्य॑स्य सा॒तौ ।।
   इन्द्रः कुत्सा॑य सूरि॑यस्य सा॒तौ ।।


Verse: 6 
Halfverse: a    प्र श्ये॒नो न म॑दि॒रमं॒शुम॑स्मै॒ शिरो॑ दा॒सस्य॒ नमु॑चेर्मथा॒यन् ।
   प्र श्ये॒नो न म॑दि॒रमं॒शुम॑स्मै
   प्र श्ये॒नः न म॑दि॒रम् अं॒शुम् अस्मै
   प्र श्ये॒नो न म॑दि॒रम् अं॒शुम् अस्मै

Halfverse: b    शिरो॑ दा॒सस्य॒ नमु॑चेर्मथा॒यन् ।
   शिरः दा॒सस्य नमु॑चेः मथा॒यन् ।
   शिरो दा॒सस्य नमु॑चेर् मथा॒यन् ।

Halfverse: c    प्राव॒न्नमीं॑ सा॒प्यं स॒सन्त॑म्पृ॒णग्रा॒या समि॒षा सं स्व॒स्ति ।।
   प्राव॒न्नमीं॑ सा॒प्यं स॒सन्त॑म्
   प्र आ॑वत् नमी॑म् सा॒प्यम् स॒सन्त॑म्
   प्र आ॑वन् नमीं सापि॒यं स॒सन्त॑म्

Halfverse: d    पृ॒णग्रा॒या समि॒षा सं स्व॒स्ति ।।
   पृ॒णक् रा॒या सम् इ॒षा सम् स्व॒स्ति ।।
   पृ॒णग् रा॒या सम् इ॒षा सं सुअ॒स्ति ।।


Verse: 7 
Halfverse: a    वि पिप्रो॒रहि॑मायस्य दृ॒ऴाः पुरो॑ वज्रि॒ञ्छव॑सा॒ न द॑र्दः ।
   वि पिप्रो॒रहि॑मायस्य दृ॒ऴाः
   वि पिप्रोः अहि॑मायस्य दृ॒ऴाः
   वि पिप्रो॑र् अहि॑मायस्य दृ॒ऴाः

Halfverse: b    पुरो॑ वज्रि॒ञ्छव॑सा॒ न द॑र्दः ।
   पुरः वज्रिन् शव॑सा न द॑र्दर् ।
   पुरो वज्रिञ् छव॑सा न द॑र्दः ।

Halfverse: c    सुदा॑म॒न्तद्रेक्णो॑ अप्रमृ॒ष्यमृ॒जिश्व॑ने दा॒त्रं दा॒शुषे॑ दाः ।।
   सुदा॑म॒न्तद्रेक्णो॑ अप्रमृ॒ष्यम्
   सुदा॑मन् तत् रेक्णः अप्रमृ॒ष्यम्
   सुदा॑मन् तद् रेक्णो अप्रमृ॒ष्यम्

Halfverse: d    ऋ॒जिश्व॑ने दा॒त्रं दा॒शुषे॑ दाः ।।
   ऋ॒जिश्व॑ने दा॒त्रम् दा॒शुषे दाः ।।
   ऋ॒जिश्व॑ने दा॒त्रं दा॒शुषे दाः ।।


Verse: 8 
Halfverse: a    स वे॑त॒सुं दश॑मायं॒ दशो॑णिं॒ तूतु॑जि॒मिन्द्रः॑ स्वभि॒ष्टिसु॑म्नः ।
   स वे॑त॒सुं दश॑मायं॒ दशो॑णिं
   स वे॑त॒सुम् दश॑मायम् दशो॑णिम्
   स वे॑त॒सुं दश॑मायं दशो॑णिं

Halfverse: b    तूतु॑जि॒मिन्द्रः॑ स्वभि॒ष्टिसु॑म्नः ।
   तूतु॑जिम् इन्द्रः स्वभि॒ष्टिसु॑म्नः ।
   तूतु॑जिम् इन्द्रः सुअभि॒ष्टिसु॑म्नः ।

Halfverse: c    आ तुग्रं॒ शश्व॒दिभं॒ द्योत॑नाय मा॒तुर्न सी॒मुप॑ सृजा इ॒यध्यै॑ ।।
   आ तुग्रं॒ शश्व॒दिभं॒ द्योत॑नाय
   आ तुग्र॑म् शश्व॑त् इभ॑म् द्योत॑नाय
   आ तुग्रं शश्व॑द् इभं द्योत॑नाय

Halfverse: d    मा॒तुर्न सी॒मुप॑ सृजा इ॒यध्यै॑ ।।
   मा॒तुः न सी॑म् उप सृजै ! इ॒यध्यै ।।
   मा॒तुर् न सी॑म् उप सृजा इ॒यध्यै ।।


Verse: 9 
Halfverse: a    स ईं॒ स्पृधो॑ वनते॒ अप्र॑तीतो॒ बिभ्र॒द्वज्रं॑ वृत्र॒हणं॒ गभ॑स्तौ ।
   स ईं॒ स्पृधो॑ वनते॒ अप्र॑तीतो
   सः ।!। ई॑म् स्पृधः वनते अप्र॑तीतः
   स ईं स्पृधो वनते अप्र॑तीतो

Halfverse: b    बिभ्र॒द्वज्रं॑ वृत्र॒हणं॒ गभ॑स्तौ ।
   बिभ्र॑त् वज्र॑म् वृत्र॒हण॑म् गभ॑स्तौ ।
   बिभ्र॑द् वज्रं वृत्र॒हणं गभ॑स्तौ ।

Halfverse: c    तिष्ठ॒द्धरी॒ अध्यस्ते॑व॒ गर्ते॑ वचो॒युजा॑ वहत॒ इन्द्र॑मृ॒ष्वम् ।।
   तिष्ठ॒द्धरी॒ अध्यस्ते॑व॒ गर्ते
   तिष्ठ॑त् हरी अधि अस्ता इव गर्ते
   तिष्ठ॑द् धरी अधि अस्ते॑व गर्ते

Halfverse: d    वचो॒युजा॑ वहत॒ इन्द्र॑मृ॒ष्वम् ।।
   व॑चो॒युजा वहतः इन्द्र॑म् ऋ॒ष्वम् ।।
   व॑चो॒युजा वहत इन्द्र॑म् ऋ॒ष्वम् ।।


Verse: 10 
Halfverse: a    स॒नेम॒ ते ऽव॑सा॒ नव्य॑ इन्द्र॒ प्र पू॒रव॑ स्तवन्त ए॒ना य॒ज्ञैः ।
   स॒नेम॒ ते ऽव॑सा॒ नव्य॑ इन्द्र
   स॒नेम ते अव॑सा नव्यः इन्द्र
   स॒नेम ते अव॑सा नव्य इन्द्र

Halfverse: b    प्र पू॒रव॑ स्तवन्त ए॒ना य॒ज्ञैः ।
   प्र पू॒रवः स्तवन्ते ए॒ना य॒ज्ञैः ।
   प्र पू॒रव स्तवन्त ए॒ना य॒ज्ञैः ।

Halfverse: c    स॒प्त यत्पुरः॒ शर्म॒ शार॑दी॒र्दर्द्धन्दासीः॑ पुरु॒कुत्सा॑य॒ शिक्ष॑न् ।।
   स॒प्त यत्पुरः॒ शर्म॒ शार॑दी॒र्दर्द्
   स॒प्त यत् पुरः शर्म शार॑दीः दर्त्
   स॒प्त यत् पुरः शर्म शार॑दीर् दर्द्

Halfverse: d    धन्दासीः॑ पुरु॒कुत्सा॑य॒ शिक्ष॑न् ।।
   हन् दासीः पुरु॒कुत्सा॑य शिक्ष॑न् ।।
   धन् दाअसीः पुरु॒कुत्सा॑य शिक्ष॑न् ।।


Verse: 11 
Halfverse: a    त्वं वृ॒ध इ॑न्द्र पू॒र्व्यो भू॑र्वरिव॒स्यन्नु॒शने॑ का॒व्याय॑ ।
   त्वं वृ॒ध इ॑न्द्र पू॒र्व्यो भू॑र्
   त्वम् वृ॒धः इ॑न्द्र पू॒र्व्यः भूः
   तु॒वं वृ॒ध इ॑न्दर पूर्वि॒यो भू॑र्

Halfverse: b    वरिव॒स्यन्नु॒शने॑ का॒व्याय॑ ।
   व॑रिव॒स्यन् उ॒शने का॒व्याय ।
   व॑रिव॒स्यन्न् उ॒शने कावि॒याय ।

Halfverse: c    परा॒ नव॑वास्त्वमनु॒देय॑म्म॒हे पि॒त्रे द॑दाथ॒ स्वं नपा॑तम् ।।
   परा॒ नव॑वास्त्वमनु॒देय॑म्
   परा नव॑वास्त्वम् अनु॒देय॑म्
   परा नव॑वास्तुवम् अनु॒देय॑म्

Halfverse: d    म॒हे पि॒त्रे द॑दाथ॒ स्वं नपा॑तम् ।।
   म॒हे पि॒त्रे द॑दाथ स्वम् नपा॑तम् ।।
   म॒हे पि॒त्रे द॑दाथ स्वं नपा॑तम् ।।


Verse: 12 
Halfverse: a    त्वं धुनि॑रिन्द्र॒ धुनि॑मतीरृ॒णोर॒पः सी॒रा न स्रव॑न्तीः ।
   त्वं धुनि॑रिन्द्र॒ धुनि॑मतीर्
   त्वम् धुनिः इन्द्र धुनि॑मतीः
   तु॒वं धुनि॑र् इन्दर धुनि॑मतीर्

Halfverse: b    ऋ॒णोर॒पः सी॒रा न स्रव॑न्तीः ।
   ऋ॒णोः अ॒पः सी॒राः न स्रव॑न्तीः ।
   ऋ॒णोर् अ॒पः ? सी॒रा न स्रव॑न्तीः ।

Halfverse: c    प्र यत्स॑मु॒द्रमति॑ शूर॒ पर्षि॑ पा॒रया॑ तु॒र्वशं॒ यदुं॑ स्व॒स्ति ।।
   प्र यत्स॑मु॒द्रमति॑ शूर॒ पर्षि
   प्र यत् समु॒द्रम् अति शूर पर्षि
   प्र यत् समु॒द्रम् अति शूर पर्षि

Halfverse: d    पा॒रया॑ तु॒र्वशं॒ यदुं॑ स्व॒स्ति ।।
   पा॒रय+ तु॒र्वश॑म् यदु॑म् स्व॒स्ति ।।
   पा॒रया तु॒र्वशं यदुं सुअ॒स्ति ।।


Verse: 13 
Halfverse: a    तव॑ ह॒ त्यदि॑न्द्र॒ विश्व॑मा॒जौ स॒स्तो धुनी॒चुमु॑री॒ या ह॒ सिष्व॑प् ।
   तव॑ ह॒ त्यदि॑न्द्र॒ विश्व॑मा॒जौ
   तव ह त्यत् इन्द्र विश्व॑म् आ॒जौ
   तव ह त्यद् इन्दर विश्व॑म् आ॒जौ

Halfverse: b    स॒स्तो धुनी॒चुमु॑री॒ या ह॒ सिष्व॑प् ।
   स॒स्तः धुनी॒चुमु॑री या ह सिष्व॑प् ।
   स॒स्तो धुनी॒चुमु॑री या ह सिष्व॑प् ।

Halfverse: c    दी॒दय॒दित्तुभ्यं॒ सोमे॑भिः सु॒न्वन्द॒भीति॑रि॒ध्मभृ॑तिः प॒क्थ्य॒र्कैः ।।
   दी॒दय॒दित्तुभ्यं॒ सोमे॑भिः सु॒न्वन्
   दी॒दय॑त् इत् तुभ्य॑म् सोमे॑भिः सु॒न्वन्
   दी॒दय॑द् इत् तुभ्य % सोमे॑भिः सु॒न्वन्

Halfverse: d    द॒भीति॑रि॒ध्मभृ॑तिः प॒क्थ्य॒र्कैः ।।
   द॒भीतिः इ॒ध्मभृ॑तिः प॒क्थी अ॒र्कैः ।।
   द॒भीति॑र् इ॒ध्मभृ॑तिः प॒क्थि अ॒र्कैः ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.