TITUS
Rg-Veda: Rg-Veda-Samhita
Part No. 462
Previous part

Hymn: 21_(462) 
Verse: 1 
Halfverse: a    इ॒मा उ॑ त्वा पुरु॒तम॑स्य का॒रोर्हव्यं॑ वीर॒ हव्या॑ हवन्ते ।
   इ॒मा उ॑ त्वा पुरु॒तम॑स्य का॒रोर्
   इ॒मा उ त्वा पुरु॒तम॑स्य का॒रोः
   इ॒मा उ त्वा पुरु॒तम॑स्य का॒रोर्

Halfverse: b    हव्यं॑ वीर॒ हव्या॑ हवन्ते ।
   हव्य॑म् वीर हव्याः हवन्ते ।
   हवि॑यं वीर हवि॑या हवन्ते ।

Halfverse: c    धियो॑ रथे॒ष्ठाम॒जरं॒ नवी॑यो र॒यिर्विभू॑तिरीयते वच॒स्या ।।
   धियो॑ रथे॒ष्ठाम॒जरं॒ नवी॑यो
   धियः रथे॒ष्ठाम् अ॒जर॑म् नवी॑यः
   धियो रथे॒ष्ठाम् अ॒जरं नवी॑यो

Halfverse: d    र॒यिर्विभू॑तिरीयते वच॒स्या ।।
   र॒यिः विभू॑तिः ईयते वच॒स्या ।।
   र॒यिर् विभू॑तिर् ईयते वच॒स्या ।।


Verse: 2 
Halfverse: a    तमु॑ स्तुष॒ इन्द्रं॒ यो विदा॑नो॒ गिर्वा॑हसं गी॒र्भिर्य॒ज्ञवृ॑द्धम् ।
   तमु॑ स्तुष॒ इन्द्रं॒ यो विदा॑नो
   तम् उ स्तुषे इन्द्र॑म् यः विदा॑नः
   तम् उ स्तुष इन्द॑रं यो विदा॑नो

Halfverse: b    गिर्वा॑हसं गी॒र्भिर् ।!। य॒ज्ञवृ॑द्धम् ।
   गिर्वा॑हसम् गी॒र्भिः य॒ज्ञवृ॑द्धम् ।
   गिर्वा॑हसं ? गी॒र्भिर् य॒ज्ञवृ॑द्धम् ।

Halfverse: c    यस्य॒ दिव॒मति॑ म॒ह्ना पृ॑थि॒व्याः पु॑रुमा॒यस्य॑ रिरि॒चे म॑हि॒त्वम् ।।
   यस्य॒ दिव॒मति॑ म॒ह्ना पृ॑थि॒व्याः
   यस्य दिव॑म् अति म॒ह्ना पृ॑थि॒व्याः
   यस्य दिव॑म् अति म॒ह्ना पृ॑थि॒व्याः

Halfverse: d    पु॑रुमा॒यस्य॑ रिरि॒चे म॑हि॒त्वम् ।।
   पु॑रुमा॒यस्य रिरि॒चे म॑हि॒त्वम् ।।
   पु॑रुमा॒यस्य रिरि॒चे म॑हि॒त्वम् ।।


Verse: 3 
Halfverse: a    स इत्तमो॑ ऽवयु॒नं त॑त॒न्वत्सूर्ये॑ण व॒युन॑वच्चकार ।
   स इत्तमो॑ ऽवयु॒नं त॑त॒न्वत्
   सः ।!। इत् तमः अवयु॒नम् तत॒न्वत्
   स इत् तमो अवयु॒नं त॑त॒न्वत्

Halfverse: b    सूर्ये॑ण व॒युन॑वच्चकार ।
   सूर्ये॑ण व॒युन॑वत् चकार ।
   सूरि॑येण व॒युन॑वच् चकार ।

Halfverse: c    क॒दा ते॒ मर्ता॑ अ॒मृत॑स्य॒ धामेय॑क्षन्तो॒ न मि॑नन्ति स्वधावः ।।
   क॒दा ते॒ मर्ता॑ अ॒मृत॑स्य॒ धाम
   क॒दा ते मर्ताः अ॒मृत॑स्य धाम
   क॒दा ते मर्ता अ॒मृत॑स्य धाम

Halfverse: d     इय॑क्षन्तो॒ न मि॑नन्ति स्वधावः ।।
   इय॑क्षन्तः न मि॑नन्ति स्वधावः ।।
   इय॑क्षन्तो न मि॑नन्ति स्वधावः ।।


Verse: 4 
Halfverse: a    यस्ता च॒कार॒ स कुह॑ स्वि॒दिन्द्रः॒ कमा जनं॑ चरति॒ कासु॑ वि॒क्षु ।
   यस्ता च॒कार॒ स कुह॑ स्वि॒दिन्द्रः
   यः ता च॒कार स कुह स्वित् इन्द्रः
   यस् ता च॒कार स कुह स्विद् इन्द्रः

Halfverse: b    कमा जनं॑ चरति॒ कासु॑ वि॒क्षु ।
   कम् आ जन॑म् चरति कासु वि॒क्षु ।
   कम् आ जनं चरति कासु वि॒क्षु ।

Halfverse: c    कस्ते॑ य॒ज्ञो मन॑से॒ शं वरा॑य॒ को अ॒र्क इ॑न्द्र कत॒मः स होता॑ ।।
   कस्ते॑ य॒ज्ञो मन॑से॒ शं वरा॑य
   कः ते य॒ज्ञः मन॑से शम् वरा॑य
   कस् ते य॒ज्ञो मन॑से शं वरा॑य

Halfverse: d    को अ॒र्क इ॑न्द्र कत॒मः स होता॑ ।।
   कः अ॒र्कः इ॑न्द्र कत॒मः स होता ।।
   को अ॒र्क इ॑न्द्र कत॒मः स होता ।।


Verse: 5 
Halfverse: a    इ॒दा हि ते॒ वेवि॑षतः पुरा॒जाः प्र॒त्नास॑ आ॒सुः पु॑रुकृ॒त्सखा॑यः ।
   इ॒दा हि ते॒ वेवि॑षतः पुरा॒जाः
   इ॒दा हि ते वेवि॑षतः पुरा॒जाः
   इ॒दा हि ते वेवि॑षतः पुरा॒जाः

Halfverse: b    प्र॒त्नास॑ आ॒सुः पु॑रुकृ॒त्सखा॑यः ।
   प्र॒त्नासः आ॒सुः पु॑रुकृत् सखा॑यः ।
   प्र॒त्नास आ॒सुः पु॑रुकृत् सखा॑यः ।

Halfverse: c    ये म॑ध्य॒मास॑ उ॒त नूत॑नास उ॒ताव॒मस्य॑ पुरुहूत बोधि ।।
   ये म॑ध्य॒मास॑ उ॒त नूत॑नास
   ये म॑ध्य॒मासः उ॒त नूत॑नासः
   ये म॑ध्य॒मास उ॒त नूत॑नास

Halfverse: d    उ॒ताव॒मस्य॑ पुरुहूत बोधि ।।
   उ॒त अ॑व॒मस्य पुरुहूत बोधि ।।
   उ॒ताव॒मस्य पुरुहूत बोधि ।।


Verse: 6 
Halfverse: a    तम्पृ॒छन्तो ऽव॑रासः॒ परा॑णि प्र॒त्ना त॑ इन्द्र॒ श्रुत्यानु॑ येमुः ।
   तम्पृ॒छन्तो ऽव॑रासः॒ परा॑णि
   तम् पृ॒छन्तः अव॑रासः परा॑णि
   तम् पृ॒छन्तो अव॑रासः परा॑णि

Halfverse: b    प्र॒त्ना त॑ इन्द्र॒ श्रुत्यानु॑ येमुः ।
   प्र॒त्ना ते इन्द्र श्रुत्या अनु येमुः ।
   प्र॒त्ना त इन्द्र श्रुति॒यानु येमुः ।

Halfverse: c    अर्चा॑मसि वीर ब्रह्मवाहो॒ यादे॒व वि॒द्म तात्त्वा॑ म॒हान्त॑म् ।।
   अर्चा॑मसि वीर ब्रह्मवाहो
   अर्चा॑मसि वीर ब्रह्मवाहः
   अर्चा॑मसि ? वीर ब्रह्मवाहो

Halfverse: d    यादे॒व वि॒द्म तात्त्वा॑ म॒हान्त॑म् ।।
   यात् ए॒व वि॒द्म तात् त्वा म॒हान्त॑म् ।।
   याद् ए॒व वि॒द्म तात् त्वा म॒हान्त॑म् ।।


Verse: 7 
Halfverse: a    अ॒भि त्वा॒ पाजो॑ र॒क्षसो॒ वि त॑स्थे॒ महि॑ जज्ञा॒नम॒भि तत्सु ति॑ष्ठ ।
   अ॒भि त्वा॒ पाजो॑ र॒क्षसो॒ वि त॑स्थे
   अ॒भि त्वा पाजः र॒क्षसः वि त॑स्थे
   अ॒भि त्वा पाजो र॒क्षसो वि त॑स्थे

Halfverse: b    महि॑ जज्ञा॒नम॒भि तत्सु ति॑ष्ठ ।
   महि जज्ञा॒नम् अ॒भि तत् सु ति॑ष्ठ ।
   महि जज्ञा॒नम् अ॒भि तत् सु ति॑ष्ठ ।

Halfverse: c    तव॑ प्र॒त्नेन॒ युज्ये॑न॒ सख्या॒ वज्रे॑ण धृष्णो॒ अप॒ ता नु॑दस्व ।।
   तव॑ प्र॒त्नेन॒ युज्ये॑न॒ सख्या
   तव प्र॒त्नेन युज्ये॑न सख्या
   तव प्र॒त्नेन युजि॑येन सख्या

Halfverse: d    वज्रे॑ण धृष्णो॒ अप॒ ता नु॑दस्व ।।
   वज्रे॑ण धृष्णो अप ता नु॑दस्व ।।
   वज्रे॑ण धृष्णो अप ता नु॑दस्व ।।


Verse: 8 
Halfverse: a    स तु श्रु॑धीन्द्र॒ नूत॑नस्य ब्रह्मण्य॒तो वी॑र कारुधायः ।
   स तु श्रु॑धीन्द्र॒ नूत॑नस्य
   स तु श्रु॑धि इन्द्र नूत॑नस्य
   स तु श्रु॑धि इन्दर नूत॑नस्य

Halfverse: b    ब्रह्मण्य॒तो वी॑र कारुधायः ।
   ब्र॑ह्मण्य॒तः वी॑र कारुधायः ।
   ब्र॑ह्मण्य॒तो ? वी॑र कारुधायः ।

Halfverse: c    त्वं ह्या॒पिः प्र॒दिवि॑ पितॄ॒णां शश्व॑द्ब॒भूथ॑ सु॒हव॒ एष्टौ॑ ।।
   त्वं ह्या॒पिः प्र॒दिवि॑ पितॄ॒णां
   त्वम् हि आ॒पिः प्र॒दिवि पितॄ॒णाम्
   तु॒वं हि आ॒पिः प्र॒दिवि पितॄ॒णां

Halfverse: d    शश्व॑द्ब॒भूथ॑ सु॒हव॒ एष्टौ॑ ।।
   शश्व॑त् ब॒भूथ सु॒हवः एष्टौ ।।
   शश्व॑द् ब॒भूथ सु॒हव ऐष्टौ ।।


Verse: 9 
Halfverse: a    प्रोतये॒ वरु॑णम्मि॒त्रमिन्द्र॑म्म॒रुतः॑ कृ॒ष्वाव॑से नो अ॒द्य ।
   प्रोतये॒ वरु॑णम्मि॒त्रमिन्द्र॑म्
   प्र ऊ॒तये वरु॑णम् मि॒त्रम् इन्द्र॑म्
   प्र ऊ॒तये वरु॑णम् मि॒त्रम् इन्द्र॑म्

Halfverse: b    म॒रुतः॑ कृ॒ष्वाव॑से नो अ॒द्य ।
   म॒रुतः कृष्व अव॑से नः अ॒द्य ।
   म॒रुतः कृष्व अव॑से नो अ॒द्य ।

Halfverse: c    प्र पू॒षणं॒ विष्णु॑म॒ग्निम्पुरं॑धिं सवि॒तार॒मोष॑धीः॒ पर्व॑तांश्च ।।
   प्र पू॒षणं॒ विष्णु॑म॒ग्निम्पुरं॑धिं
   प्र पू॒षण॑म् विष्णु॑म् अ॒ग्निम् पुरं॑धिम्
   प्र पू॒षणं विष्णु॑म् अ॒ग्निम् पुरं॑धिं

Halfverse: d    सवि॒तार॒मोष॑धीः॒ पर्व॑तांश्च ।।
   स॑वि॒तार॑म् ओष॑धीः पर्व॑तान् च ।।
   स॑वि॒तार॑म् ओष॑धीः पर्व॑तांश् च ।।


Verse: 10 
Halfverse: a    इ॒म उ॑ त्वा पुरुशाक प्रयज्यो जरि॒तारो॑ अ॒भ्य॑र्चन्त्य॒र्कैः ।
   इ॒म उ॑ त्वा पुरुशाक प्रयज्यो
   इ॒मे उ त्वा पुरुशाक प्रयज्यो
   इ॒म उ त्वा पुरुशाक प्रयज्यो

Halfverse: b    जरि॒तारो॑ अ॒भ्य॑र्चन्त्य॒र्कैः ।
   ज॑रि॒तारः अ॒भि अ॑र्चन्ति अ॒र्कैः ।
   ज॑रि॒तारो अ॒भि अ॑र्चन्ति अ॒र्कैः ।

Halfverse: c    श्रु॒धी हव॒मा हु॑व॒तो हु॑वा॒नो न त्वावाँ॑ अ॒न्यो अ॑मृत॒ त्वद॑स्ति ।।
   श्रु॒धी हव॒मा हु॑व॒तो हु॑वा॒नो
   श्रु॒धि+ हव॑म् आ हु॑व॒तः हु॑वा॒नः
   श्रु॒धी हव॑म् आ हु॑व॒तो हु॑वा॒नो

Halfverse: d    न त्वावाँ॑ अ॒न्यो अ॑मृत॒ त्वद॑स्ति ।।
   न त्वावा॑न् अ॒न्यः अ॑मृत त्वत् अस्ति ।।
   न त्वावाँ अ॒न्यो अ॑मृत त्वद् अस्ति ।।


Verse: 11 
Halfverse: a    नू म॒ आ वाच॒मुप॑ याहि वि॒द्वान्विश्वे॑भिः सूनो सहसो॒ यज॑त्रैः ।
   नू म॒ आ वाच॒मुप॑ याहि वि॒द्वान्
   नु+ मे आ वाच॑म् उप याहि वि॒द्वान्
   नू म आ वाच॑म् उप याहि वि॒द्वान्

Halfverse: b    विश्वे॑भिः सूनो सहसो॒ यज॑त्रैः ।
   विश्वे॑भिः सूनो सहसः यज॑त्रैः ।
   विश्वे॑भिः सूनो सहसो यज॑त्रैः ।

Halfverse: c    ये अ॑ग्निजि॒ह्वा ऋ॑त॒साप॑ आ॒सुर्ये मनुं॑ च॒क्रुरुप॑रं॒ दसा॑य ।।
   ये अ॑ग्निजि॒ह्वा ऋ॑त॒साप॑ आ॒सुर्
   ये अ॑ग्निजि॒ह्वाः ऋ॑त॒सापः आ॒सुः
   ये अ॑ग्निजि॒ह्वा ऋ॑त॒साप आ॒सुर्

Halfverse: d    ये मनुं॑ च॒क्रुरुप॑रं॒ दसा॑य ।।
   ये मनु॑म् च॒क्रुः उप॑रम् दसा॑य ।।
   ये मनुं च॒क्रुर् उप॑रं दसा॑य ।।


Verse: 12 
Halfverse: a    स नो॑ बोधि पुरए॒ता सु॒गेषू॒त दु॒र्गेषु॑ पथि॒कृद्विदा॑नः ।
   स नो॑ बोधि पुरए॒ता सु॒गेषु
   स नः बोधि पुरए॒ता सु॒गेषु
   स नो बोधि पुरए॒ता सु॒गेषु

Halfverse: b     ॑उ॒त दु॒र्गेषु॑ पथि॒कृद्विदा॑नः ।
   उ॒त दु॒र्गेषु पथि॒कृत् विदा॑नः ।
   उ॒त दु॒र्गेषु पथि॒कृद् विदा॑नः ।

Halfverse: c    ये अश्र॑मास उ॒रवो॒ वहि॑ष्ठा॒स्तेभि॑र्न इन्द्रा॒भि व॑क्षि॒ वाज॑म् ।।
   ये अश्र॑मास उ॒रवो॒ वहि॑ष्ठास्
   ये अश्र॑मासः उ॒रवः वहि॑ष्ठाः
   ये अश्र॑मास उ॒रवो वहि॑ष्ठास्

Halfverse: d    तेभि॑र्न इन्द्रा॒भि व॑क्षि॒ वाज॑म् ।।
   तेभिः नः इन्द्र अ॒भि व॑क्षि वाज॑म् ।।
   तेभि॑र् न इन्द्र अ॒भि व॑क्षि वाज॑म् ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.