TITUS
Rg-Veda: Rg-Veda-Samhita
Part No. 463
Previous part

Hymn: 22_(463) 
Verse: 1 
Halfverse: a    य एक॒ इद्धव्य॑श्चर्षणी॒नामिन्द्रं॒ तं गी॒र्भिर॒भ्य॑र्च आ॒भिः ।
   य एक॒ इद्धव्य॑श्चर्षणी॒नाम्
   यः एकः इत् हव्यः चर्षणी॒नाम्
   य एक इद् धवि॑यश् चर्षणी॒नाम्

Halfverse: b    इन्द्रं॒ तं गी॒र्भिर॒भ्य॑र्च आ॒भिः ।
   इन्द्र॑म् तम् गी॒र्भिः अ॒भि अ॑र्चे आ॒भिः ।
   इन्द्रं तं गी॒र्भिर् अ॒भि अ॑र्च आ॒भिः ।

Halfverse: c    यः पत्य॑ते वृष॒भो वृष्ण्या॑वान्स॒त्यः सत्वा॑ पुरुमा॒यः सह॑स्वान् ।।
   यः पत्य॑ते वृष॒भो वृष्ण्या॑वान्
   यः पत्य॑ते वृष॒भः वृष्ण्या॑वान्
   यः पत्य॑ते वृष॒भो वृष्णि॑यावान्

Halfverse: d    स॒त्यः सत्वा॑ पुरुमा॒यः सह॑स्वान् ।।
   स॒त्यः सत्वा पुरुमा॒यः सह॑स्वान् ।।
   स॒त्यः सत्वा पुरुमा॒यः सह॑स्वान् ।।


Verse: 2 
Halfverse: a    तमु॑ नः॒ पूर्वे॑ पि॒तरो॒ नव॑ग्वाः स॒प्त विप्रा॑सो अ॒भि वा॒जय॑न्तः ।
   तमु॑ नः॒ पूर्वे॑ पि॒तरो॒ नव॑ग्वाः
   तम् उ नः पूर्वे पि॒तरः नव॑ग्वाः
   तम् उ नः पूर्वे पि॒तरो नव॑ग्वाः

Halfverse: b    स॒प्त विप्रा॑सो अ॒भि वा॒जय॑न्तः ।
   स॒प्त विप्रा॑सः अ॒भि वा॒जय॑न्तः ।
   स॒प्त विप्रा॑सो अ॒भि वा॒जय॑न्तः ।

Halfverse: c    न॑क्षद्दा॒भं ततु॑रिम्पर्वते॒ष्ठामद्रो॑घवाचम्म॒तिभिः॒ शवि॑ष्ठम् ।।
   न॑क्षद्दा॒भं ततु॑रिम्पर्वते॒ष्ठाम्
   नक्षद्दा॒भम् ततु॑रिम् पर्वते॒ष्ठाम्
   नक्षद्दा॒भं ततु॑रिम् पर्वते॒ष्ठाम्

Halfverse: d    अद्रो॑घवाचम्म॒तिभिः॒ शवि॑ष्ठम् ।।
   अद्रो॑घवाचम् म॒तिभिः शवि॑ष्ठम् ।।
   अद्रो॑घवाचम् म॒तिभिः शवि॑ष्ठम् ।।


Verse: 3 
Halfverse: a    तमी॑मह॒ इन्द्र॑मस्य रा॒यः पु॑रु॒वीर॑स्य नृ॒वतः॑ पुरु॒क्षोः ।
   तमी॑मह॒ इन्द्र॑मस्य रा॒यः
   तम् ईमहे इन्द्र॑म् अस्य रा॒यः
   तम् ईमह इन्द॑रम् अस्य रा॒यः

Halfverse: b    पु॑रु॒वीर॑स्य नृ॒वतः॑ पुरु॒क्षोः ।
   पु॑रु॒वीर॑स्य नृ॒वतः पुरु॒क्षोः ।
   पु॑रु॒वीर॑स्य नृ॒वतः पुरु॒क्षोः ।

Halfverse: c    यो अस्कृ॑धोयुर॒जरः॒ स्व॑र्वा॒न्तमा भ॑र हरिवो माद॒यध्यै॑ ।।
   यो अस्कृ॑धोयुर॒जरः॒ स्व॑र्वान्
   यः अस्कृ॑धोयुः अ॒जरः स्व॑र्वान्
   यो अस्कृ॑धोयुर् अ॒जरः सुव॑र्वान्

Halfverse: d    तमा भ॑र हरिवो माद॒यध्यै॑ ।।
   तम् आ भ॑र हरिवः माद॒यध्यै ।।
   तम् आ भ॑र हरिवो माद॒यध्यै ।।


Verse: 4 
Halfverse: a    तन्नो॒ वि वो॑चो॒ यदि॑ ते पु॒रा चि॑ज्जरि॒तार॑ आन॒शुः सु॒म्नमि॑न्द्र ।
   तन्नो॒ वि वो॑चो॒ यदि॑ ते पु॒रा चि॑ज्
   तत् नः वि वो॑चः यदि ते पु॒रा चि॑त्
   तन् नो वि वो॑चो यदि ते पु॒रा चि॑ज्

Halfverse: b    जरि॒तार॑ आन॒शुः सु॒म्नमि॑न्द्र ।
   ज॑रि॒तारः आन॒शुः सु॒म्नम् इन्द्र ।
   ज॑रि॒तार आन॒शुः सु॒म्नम् इन्द्र ।

Halfverse: c    कस्ते॑ भा॒गः किं वयो॑ दुध्र खिद्वः॒ पुरु॑हूत पुरूवसो ऽसुर॒घ्नः ।।
   कस्ते॑ भा॒गः किं वयो॑ दुध्र खिद्वः
   कः ते भा॒गः किम् वयः दुध्र खिद्वः
   कस् ते भा॒गः किं वयो दुध्र खिद्वः

Halfverse: d    पुरु॑हूत पुरूवसो ऽसुर॒घ्नः ।।
   पुरु॑हूत पुरूवसो असुर॒घ्नः ।।
   पुरु॑हूत पुरूवसो ऽसुर॒घ्नः ।।


Verse: 5 
Halfverse: a    तम्पृ॒छन्ती॒ वज्र॑हस्तं रथे॒ष्ठामिन्द्रं॒ वेपी॒ वक्व॑री॒ यस्य॒ नू गीः ।
   तम्पृ॒छन्ती॒ वज्र॑हस्तं रथे॒ष्ठाम्
   तम् पृ॒छन्ती वज्र॑हस्तम् रथे॒ष्ठाम्
   तम् पृ॒छन्ती वज्र॑हस्तं रथे॒ष्ठाम्

Halfverse: b    इन्द्रं॒ वेपी॒ वक्व॑री॒ यस्य॒ नू गीः ।
   इन्द्र॑म् वेपी वक्व॑री यस्य नु+ गीः ।
   इन्द्रं वेपी वक्व॑री यस्य नू गीः ।

Halfverse: c    तु॑विग्रा॒भं तु॑विकू॒र्मिं र॑भो॒दाम्गा॒तुमि॑षे॒ नक्ष॑ते॒ तुम्र॒मछ॑ ।।
   तु॑विग्रा॒भं तु॑विकू॒र्मिं र॑भो॒दाम्
   तुविग्रा॒भम् तुविकू॒र्मिम् रभो॒दाम्
   तुविग्रा॒भं तु॑विकू॒र्मिं र॑भो॒दाम्

Halfverse: d    गा॒तुमि॑षे॒ नक्ष॑ते॒ तुम्र॒मछ॑ ।।
   गा॒तुम् इषे नक्ष॑ते तुम्र॑म् अछ ।।
   गा॒तुम् इषे नक्ष॑ते तुम्र॑म् अछ ।।


Verse: 6 
Halfverse: a    अ॒या ह॒ त्यम्मा॒यया॑ वावृधा॒नम्म॑नो॒जुवा॑ स्वतवः॒ पर्व॑तेन ।
   अ॒या ह॒ त्यम्मा॒यया॑ वावृधा॒नम्
   अ॒या ह त्यम् मा॒यया वावृधा॒नम्
   अ॒या ह त्यम् मा॒यया वावृधा॒नम्

Halfverse: b    मनो॒जुवा॑ स्वतवः॒ पर्व॑तेन ।
   म॑नो॒जुवा स्वतवः पर्व॑तेन ।
   म॑नो॒जुवा स्वतवः पर्व॑तेन ।

Halfverse: c    अच्यु॑ता चिद्वीळि॒ता स्वो॑जो रु॒जो वि दृ॒ऴा धृ॑ष॒ता वि॑रप्शिन् ।।
   अच्यु॑ता चिद्वीळि॒ता स्वो॑जो
   अच्यु॑ता चित् वीळि॒ता स्वो॑जः
   अच्यु॑ता चिद् ? वीळि॒ता सुओ॑जो

Halfverse: d    रु॒जो वि दृ॒ऴा धृ॑ष॒ता वि॑रप्शिन् ।।
   रु॒जः वि दृ॒ऴा धृ॑ष॒ता वि॑रप्शिन् ।।
   रु॒जो वि दृ॒ऴा धृ॑ष॒ता वि॑रप्शिन् ।।


Verse: 7 
Halfverse: a    तं वो॑ धि॒या नव्य॑स्या॒ शवि॑ष्ठम्प्र॒त्नम्प्र॑त्न॒वत्प॑रितंस॒यध्यै॑ ।
   तं वो॑ धि॒या नव्य॑स्या॒ शवि॑ष्ठम्
   तम् वः धि॒या नव्य॑स्या शवि॑ष्ठम्
   तं वो धि॒या नव्य॑सिया शवि॑ष्ठम्

Halfverse: b    प्र॒त्नम्प्र॑त्न॒वत्प॑रितंस॒यध्यै॑ ।
   प्र॒त्नम् प्रत्न॒वत् परितंस॒यध्यै ।
   प्र॒त्नम् प्रत्न॒वत् परितंस॒यध्यै ।

Halfverse: c    स नो॑ वक्षदनिमा॒नः सु॒वह्मेन्द्रो॒ विश्वा॒न्यति॑ दु॒र्गहा॑णि ।।
   स नो॑ वक्षदनिमा॒नः सु॒वह्मा
   स नः वक्षत् अनिमा॒नः सु॒वह्मा
   स नो वक्षद् अनिमा॒नः सु॒वह्मा

Halfverse: d     इन्द्रो॒ विश्वा॒न्यति॑ दु॒र्गहा॑णि ।।
   इन्द्रः विश्वा॑नि अति दु॒र्गहा॑णि ।।
   इन्द्रो विश्वा॑नि अति दु॒र्गहा॑णि ।।


Verse: 8 
Halfverse: a    आ जना॑य॒ द्रुह्व॑णे॒ पार्थि॑वानि दि॒व्यानि॑ दीपयो॒ ऽन्तरि॑क्षा ।
   आ जना॑य॒ द्रुह्व॑णे॒ पार्थि॑वानि
   आ जना॑य द्रुह्व॑णे पार्थि॑वानि
   आ जना॑य द्रुह्व॑णे पार्थि॑वानि

Halfverse: b    दि॒व्यानि॑ दीपयो॒ ऽन्तरि॑क्षा ।
   दि॒व्यानि दीपयः अ॒न्तरि॑क्षा ।
   दि॑वि॒यानि दीपयो अ॒न्तरि॑क्षा ।

Halfverse: c    तपा॑ वृषन्वि॒श्वतः॑ शो॒चिषा॒ तान्ब्र॑ह्म॒द्विषे॑ शोचय॒ क्षाम॒पश्च॑ ।।
   तपा॑ वृषन्वि॒श्वतः॑ शो॒चिषा॒ तान्
   तप+ वृषन् वि॒श्वतः शो॒चिषा तान्
   तपा वृषन् वि॒श्वतः शो॒चिषा तान्

Halfverse: d    ब्रह्म॒द्विषे॑ शोचय॒ क्षाम॒पश्च॑ ।।
   ब्र॑ह्म॒द्विषे शोचय क्षाम् अ॒पः च ।।
   ब्र॑ह्म॒द्विषे शोचय क्षाम् अ॒पश् च ।।


Verse: 9 
Halfverse: a    भुवो॒ जन॑स्य दि॒व्यस्य॒ राजा॒ पार्थि॑वस्य॒ जग॑तस्त्वेषसंदृक् ।
   भुवो॒ जन॑स्य दि॒व्यस्य॒ राजा
   भुवः जन॑स्य दि॒व्यस्य राजा
   भुवो जन॑स्य दिवि॒यस्य राजा

Halfverse: b    पार्थि॑वस्य॒ जग॑तस्त्वेषसंदृक् ।
   पार्थि॑वस्य जग॑तः त्वेषसंदृक् ।
   पार्थि॑वस्य जग॑तस् त्वेषसंदृक् ।

Halfverse: c    धि॒ष्व वज्रं॒ दक्षि॑ण इन्द्र॒ हस्ते॒ विश्वा॑ अजुर्य दयसे॒ वि मा॒याः ।।
   धि॒ष्व वज्रं॒ दक्षि॑ण इन्द्र॒ हस्ते
   धि॒ष्व वज्र॑म् दक्षि॑णे इन्द्र हस्ते
   धि॒ष्व वज्रं दक्षि॑ण इन्द्र हस्ते

Halfverse: d    विश्वा॑ अजुर्य दयसे॒ वि मा॒याः ।।
   विश्वाः अजुर्य दयसे वि मा॒याः ।।
   विश्वा अजुर्य दयसे वि मा॒याः ।।


Verse: 10 
Halfverse: a    आ सं॒यत॑मिन्द्र णः स्व॒स्तिं श॑त्रु॒तूर्या॑य बृह॒तीममृ॑ध्राम् ।
   आ सं॒यत॑मिन्द्र णः स्व॒स्तिं
   आ सं॒यत॑म् इन्द्र नः स्व॒स्तिम्
   आ सं॒यत॑म् इन्दर णः सुअ॒स्तिं

Halfverse: b    श॑त्रु॒तूर्या॑य बृह॒तीममृ॑ध्राम् ।
   श॑त्रु॒तूर्या॑य बृह॒तीम् अमृ॑ध्राम् ।
   श॑त्रु॒तूर्या॑य बृह॒तीम् अमृ॑ध्राम् ।

Halfverse: c    यया॒ दासा॒न्यार्या॑णि वृ॒त्रा करो॑ वज्रिन्सु॒तुका॒ नाहु॑षाणि ।।
   यया॒ दासा॒न्यार्या॑णि वृ॒त्रा
   यया दासा॑नि आर्या॑णि वृ॒त्रा
   यया दासा॑नि आरि॑याणि वृ॒त्रा

Halfverse: d    करो॑ वज्रिन्सु॒तुका॒ नाहु॑षाणि ।।
   करः वज्रिन् सु॒तुका नाहु॑षाणि ।।
   करो वज्रिन् सु॒तुका नाहु॑षाणि ।।


Verse: 11 
Halfverse: a    स नो॑ नि॒युद्भिः॑ पुरुहूत वेधो वि॒श्ववा॑राभि॒रा ग॑हि प्रयज्यो ।
   स नो॑ नि॒युद्भिः॑ पुरुहूत वेधो
   स नः नि॒युद्भिः पुरुहूत वेधः
   स नो नि॒युद्भिः पुरुहूत वेधो

Halfverse: b    वि॒श्ववा॑राभि॒रा ग॑हि प्रयज्यो ।
   वि॒श्ववा॑राभिः आ ग॑हि प्रयज्यो ।
   वि॒श्ववा॑राभिर् आ ग॑हि प्रयज्यो ।

Halfverse: c    न या अदे॑वो॒ वर॑ते॒ न दे॒व आभि॑र्याहि॒ तूय॒मा म॑द्र्य॒द्रिक् ।।
   न या अदे॑वो॒ वर॑ते॒ न दे॒व
   न याः अदे॑वः वर॑ते न दे॒वः
   न या अदे॑वो वर॑ते न दे॒व

Halfverse: d    आभि॑र्याहि॒ तूय॒मा म॑द्र्य॒द्रिक् ।।
   आ आ॑भिः याहि तूय॑म् आ म॑द्र्य॒द्रिक् ।।
   आभि॑र् याहि तूय॑म् आ म॑द्रिअ॒द्रिक् ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.